បាងកក​ ៖ ក្រោយហេតុការណ៍ផ្ទុះកូវីដក្នុងសហគមន៍លើកទី 2 នៅក្នុងប្រទេសថៃចេញពីខេត្តសមុទ្រសាខនរួចមកហើយពលរដ្ឋថៃដែលជាអ្នកនិយមលេងបណ្តាញសង្គមជាច្រើនបាននាំគ្នាធ្វើការបន្ទោស​ និងរិះគន់ចំៗទៅលើសមត្ថភាពរបស់រដ្ឋាភិបាលក្នុងការគ្រប់គ្រងជនចំណាកស្រុកខុសច្បាប់ដែលត្រូវបានខ្លួនគិតថាគឺជាឬសគល់ដែលបណ្តាលឲ្យមានរឿងនេះកើតឡើងសាជាថ្មី។ ជាការឆ្លើយតបអជ្ញាធរបានស្វែករកការពិតដើម្បីឆ្លើយតបទៅនឹងបញ្ហារិះគន់ដោយក្នុងនោះកាសែតបាងកកប៉ុស្ត៍បានចេញផ្សាយថាលោកនាយករដ្ឋមន្ត្រីថៃ Prayut Chan-o-cha កាលពីម្សិលមិញបានប្រកាសថាលោកបានកំណត់បានអត្តសញ្ញាណមន្ត្រីរដ្ឋាភិបាលជាច្រើនរូបហើយដែលនឹងត្រូវអាចចោទប្រកាន់បានថាជាអ្នកជួញដូរជនចំណាកស្រុកខុសច្បាប់នាពេលកន្លងមក។ គួរឲ្យដឹងដែរថាការឈានទៅដល់ការបំបែករឿងក្តីមួយនេះត្រូវបានធ្វើឡើងនៅបន្ទាប់ពីមេបញ្ជាការយោធាកំពូលរូបនេះបានស្នើឲ្យពលរដ្ឋរបស់ខ្លួនក្នុងការផ្តល់ព័ត៌មានទាំងឡាយណាអំពីមន្ត្រីដែលពាក់ព័ន្ធទៅនឹងការជូញដូរមនុស្សខុសច្បាប់តាមព្រំដែននាពេលកន្លងមកដែលត្រូវបានមនុស្សពេញប្រទេសដាក់ការស្តីបន្ទោសថាជាកត្តាដែលបានធ្វើឲ្យមានការរីករាលដាលនៃកូវីដ19 សាជាថ្មីនៅប៉ុន្មានសប្តាហ៍នេះ។ លោកនាយករដ្ឋមន្ត្រីថៃក៏បានមានប្រសាសន៍ដែរថា៖គណៈរដ្ឋមន្ត្រីនៃប្រទេសថៃនៅសប្តាហ៍ក្រោយនឹងធ្វើការកោះប្រជុំគ្នាមួយដើម្បីអាចពិនិត្យមើលសំណើររបស់ក្រសួងការងារក្នុងការអនុញ្ញាតឲ្យក្រុមជនចំណាកស្រុកខុសច្បាប់ទាំងអស់អាចចុះឈ្មោះបណ្តោះអាសន្ននៅក្នុងប្រព័ន្ធការងាររបស់ថៃហើយធ្វើបែបនេះនឹងអាចធ្វើឲ្យអជ្ញាធរអាចឈានទៅដល់ការគ្រប់គ្រងវិរុសនេះបានសាជាថ្មី៕

ភ្នំពេញ ៖ អង្គការយូនីសេហ្វ UNICEF បានប្រកាសថាខ្លួននឹងជួយជញ្ជូន និងផ្គត់ផ្គង់ផ្តល់វ៉ាក់សាំងប្រឆាំងនឹងជំងឺរាត្បាត Covid-19 ដល់ប្រទេសកម្ពុជាក្នុងឆ្នាំ2021 ជាមួយនឹងការបង្ហាញពីផែនការដឹកជញ្ជូនវ៉ាក់សាំងការពារ Covid-19 ចំនួន850 តោនក្នុងមួយខែជំនួសឱ្យវ៉ាក់សាំងក្នុងប្រតិបត្តិការដឹកនាំភស្តុភារ និងជាប្រវត្តិសាស្ត្រ។ អង្គការយូនីសេហ្វក្នុងភាពជាដៃគូជាមួយហ្គវី (Gavi) និងអង្គការសុខភាពពិភពលោកក៏កំពុងជួយ ប្រទេសដែលមានប្រាក់ចំណូលទាប និងមធ្យមដើម្បីត្រៀមទទួលវ៉ាក់សាំងការពារ Covid-19 ក្នុងឆ្នាំ 2021 ដែលក្នុងនោះប្រទេសកម្ពុជាគឺជាប្រទេសមួយក្នុងចំណោមប្រទេសដែលយូនីសេហ្វ ផ្តល់ថ្នាំបង្ការដល់ក្រោមការដឹកនាំរបស់រាជរដ្ឋាភិបាលកម្ពុជា និងក្នុងភាពជាដៃគូជិតស្និទ្ធជាមួយអង្គការសុខភាពពិភពលោក (WHO)។ នៅប្រទេសកម្ពុជាយូនីសេហ្វកំពុងធ្វើការជាមួយក្រសួងសុខាភិបាល និងអង្គការសុខភាពពិភពលោក ដើម្បីរៀបចំប្រទេសសំរាប់ការចាក់វ៉ាក់សាំងនេះ។ ដៃគូកំពុងធ្វើការរួមគ្នាដើម្បីបង្កើតយុទ្ធសាស្រ្ត សម្រាប់ការដាក់ពង្រាយវាយតម្លៃការគ្រប់គ្រងវ៉ាក់សាំង និងសមត្ថភាពខ្សែសង្វាក់ត្រជាក់គាំទ្រដល់ការ ស្នើសុំជំនួយឧបករណ៍ខ្សែសង្វាក់ត្រជាក់ពីហ្គាវី អភិវឌ្ឍផែនការសម្រាប់ការជំនួសឧបករណ៍ ខ្សែសង្វាក់ ត្រជាក់ប៉ាន់ប្រមាណចំណាយប្រតិបត្តិការ និងតំរូវការ និងរៀបចំទំនាក់ទំនង ការតស៊ូមតិនិងការ បង្កើត តម្រូវការ។ ការវាយតម្លៃជាសកលដែលធ្វើឡើងដោយ UNICEF បានពិនិត្យលើសមត្ថភាពដឹកជញ្ជូន តាមផ្លូវអាកាសក្នុងសកលលោកទាំងមូល និងច្រកផ្លូវសម្រាប់ដឹកជញ្ជូន ដើម្បីស្វែងយល់ឲ្យកាន់តែ ច្បាស់អំពីបញ្ហាប្រឈមដែលកើតមានក្នុងការដឹកជញ្ជូនថ្នាំបង្ការជំងឺកូវីដ-19 ក្នុងឆ្នាំ2021។ លោកស្រី Henrietta Fore នាយិកាប្រតិបត្តិអង្គការ UNICEF បាននិយាយថា«នេះគឺជាប្រតិបត្តិការដ៏ធំសម្បើមជាប្រវត្តិសាស្ត្រ។ នេះគឺជាកិច្ចការដែលមានទំហំធំហើយនឹងផ្ដល់នូវអត្ថប្រយោជន៍យ៉ាងច្រើនដែលមិនធ្លាប់មានពីមុនមក។…

បរទេស​ ៖ ក្រោយការរង់ចាំអស់រយៈពេលជិត 1 ឆ្នាំកន្លងមកទីបំផុតក្រុមហ៊ុនបច្ចេកវិទ្យាមួយដែលមានឈ្មោះថា Nuro ត្រូវបានទទួលអជ្ញាបណ្ណជាផ្លូវការហើយពីសំណាក់ក្រុងកាលីហ្វ័រញ៉ាដើម្បីអាចដំណើរការរ៉ូបូតសម្រាប់ដឹកជញ្ជូនទំនិញរបស់ខ្លួន​ និងក៏ជាលើកដំបូងរបស់ក្រុងនេះផងដែរ។ យោងតាមការចេញផ្សាយរបស់ទូរទស្សន៍ BBC បានឲ្យដឹងថា Nuro នឹងចាប់ផ្តើមដំណើរការរថយន្តដឹកជញ្ជូនខ្នាតតូចដែលគ្មានអ្នកបើកបររបស់ខ្លួនចាប់ពីដើមឆ្នាំក្រោយនេះហើយ។ ការធ្វើតេស្តចុងក្រោយរបស់ក្រុមហ៊ុនទៅលើរ៉ូបូតប្រភេទ R2 គឺបានធ្វើឡើងតាំងតែពីខែមេសាមកម្ល៉េះ។ ទោះបីជាយ៉ាងណាក្តីរថយន្តមួយនេះនឹងត្រូវកំណត់ឲ្យអាចបើកបរក្នុងល្បឿនប្រមាណតែជា 56 គីឡូម៉ែត្រក្នុងមួយម៉ោងប៉ុណ្ណោះក្នុងកម្រិតអតិប្បរិមា​ ហើយនៅក្នុងស្ថានភាពអាកាសធាតុដែលធម្មតាផងដែរ។ លោក Steve Gordon ប្រធាននាយកដ្ឋានទទួលបន្ទុកកិច្ចការងារទោចក្រយានយន្តបាននិយាយថា​ ៖ ការផ្តល់សិទ្ធិក្នុងការដំណើរការរថយន្តរ៉ូបូតសម្រាប់សេវាដឹកជញ្ជូនទំនិញជាលើកដំបូងនេះនឹងក្លាយទៅជាបដិវត្តនៃការប្រើប្រាស់រថយន្តស្វ័យប្រវត្តិរបស់រដ្ឋកាលីហ្វ័រញ៉ា៕ គួរឲ្យដឹងដែរថា Nuro ត្រូវបានបង្កើតឡើងដំបូងដោយស្ថាបនិក 2 រូបដែលជាអតីតវិស្វកររបស់ក្រុមហ៊ុន Google និងទទួលបានការបណ្តាក់ទុនមួយចំនួនពីសំណាក់ធនាគារជប៉ុន Softbank។ក្រៅតែពីអាចបើកបរដោយខ្លួនឯង R2 រថយន្តរ៉ូបូតមួយនេះអាចប្រើប្រាស់រ៉ាដាដើម្បីកំណត់ទិសដៅព្រមទាំងបំពាក់បច្ចេកវិទ្យាកាម៉េរា 360 ដឺក្រេទៀតផង៕

បរទេស ៖យោងតាមសេចក្តីប្រកាសមួយរបស់ក្រុមហ៊ុន Honda Motor Co កាលពីថ្ងៃពុធម្សិលមិញបានឲ្យដឹងថារោងចក្រមួយរបស់ខ្លួនក្នុងប្រទេសឥណ្ឌាដែលស្ថិតនៅក្នុងចំណោមរោងចក្រទាំង2 កន្លែងមានវត្តមាននៅក្នុងប្រទេសឥណ្ឌានឹងបិទទ្វារដោយសារតែទីផ្សារប្រកួតប្រជែងបានធ្វើឲ្យសំពាធកាន់តែធ្ងន់ធ្ងរឡើងចំពោះក្រុមហ៊ុន។ នៅក្នុងសេចក្តីថ្លែងការណ៍ដដែលបានបញ្ជាក់ទៀតថា រោងចក្រមួយរបស់ខ្លួនដែលមានឈ្មោះថា Greater Nodia មានទីតាំងស្ថិតនៅក្បែរទីក្រុង New Delhi និងត្រូវបិទទ្វារជាផ្លូវការ ហើយផ្ទេរយកប្រតិបត្តិការរបស់ខ្លួនទាំងអស់ដែលនៅសេសសល់ទៅឲ្យរោងចក្រមួយទៀតរបស់ខ្លួនដែលស្ថិតនៅក្នុងតំបន់ភាគខាងលិចនៃរដ្ឋ Rajasthan ។ ដោយឡែកក្រុមហ៊ុនក្នុងស្រុក Honda Cars India Ltd (HCIL) វិញក៏នឹងត្រូវរុញដំណើរការផលិតរថយន្ត និងគ្រឿងបន្លាស់របស់ខ្លួនផងដែរទៅកាន់រោងចក្រ Tapukara ដែលស្ថិតនៅភាគខាងលិចរដ្ឋ Rajasthan នេះផងដែរ ដើម្បីអាចបន្តដំណើរការលក់ និងនាំចេញនៅក្នុងប្រទេសដូចធម្មតា។ យោងតាមតួលេខដែលត្រូវបានបង្ហាញថាគិតត្រឹមចុងបញ្ចប់ឆ្នាំសារពើពន្ធថ្ងៃទី 31 ខែមីនា ឆ្នាំ2020 កន្លងទៅរោងចក្រ Tapukara អាចតម្លើង និងផលិតរថយន្តសរុបបានទៅដល់ 180,000 គ្រឿងក្នុងមួយឆ្នាំខណៈដែល 102,000 គ្រឿងត្រូវបានលក់នៅក្នុងស្រុកហើយ 4,000 គ្រឿងទៀតត្រូវបាននាំចេញទៅលក់ខាងក្រៅប្រទេស៕

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នៅថ្ងៃ២៤ធ្នូឆ្នាំ២០២០ បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនចំនួន២ ក្នុងទុនវិនិយោគ៦លាន៤សែនដុល្លារ និងអាចបង្កើតការងារបានជាង២ពាន់៥០០កន្លែង។ ក្រុមហ៊ុនទាំង២នោះ គឺទី១ក្រុមហ៊ុន NS INDUSTRIAL CO., LTD គម្រោងបង្កើតរោងចក្រផលិតកេសកាតុង ដែលមានទីតាំងវិនិយោគស្ថិតនៅភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ៣លាន៤សែនដុល្លារអាមេរិក និងអាចបង្កើតការងារបានចំនួន១៣៦កន្លែង។ ចំណែកក្រុមហ៊ុនទី២ មានឈ្មោះ LONSO (CAMBODIA) GARMENT CO., LTD គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិខ្នាចខាងត្បូង ឃុំបឹងត្រាញ់ខាងជើង ស្រុកសំរោង ខេត្តតាកែវ មានទុនវិនិយោគប្រមាណ៣លានដុល្លារអាមេរិក និងអាចបង្កើតការងារបានចំនួន ២ពាន់៤៣៥កន្លែង៕កឹម ទៀង

បរទេស ៖ នៅថ្ងៃព្រហស្បតិ៍នេះរដ្ឋាភិបាលនៃទីក្រុងប៉េកាំងបានប្រកាសថាខ្លួនទើបតែចាប់ផ្តើមបើកការស៊ើបអង្កេតមួយទៅលើក្រុមហ៊ុនយក្ស Alibaba ក្រោមបទចោទប្រកាន់ថាបានប្រើប្រាស់សកម្មភាព និងវិធីសាស្ត្របែបការប្រកួតប្រជែងទីផ្សារផ្តាច់មុខនិយមនៅក្នុងក្រុមហ៊ុនរបស់ខ្លួន។ អង្គភាពទទួលបន្ទុកកិច្ចការងារដ្ឋបាលសម្រាប់ច្បាប់នៃការប្រកួតប្រជែងក្នុងទីផ្សាររបស់ប្រទេសចិនបាននិយាយថាការស៊ើបអង្កេតដែលធ្វើឡើងចំពោះក្រុមហ៊ុន Alibaba ដែលជាភាសាចិន er xuan yi មានន័យថាក្រុមហ៊ុនបានបង្ខំឲ្យក្រុមប្រតិបត្តិករលក់រាយក្នុងការលក់ទំនិញរបស់ខ្លួននៅលើតែវេបសាយមួយប៉ុណ្ណោះ ប៉ុន្តែទោះបីជាយ៉ាងណាក្តីខ្លួនមិនបានធ្វើការបញ្ជាក់លំអិតបន្ថែមនោះទេអំពីករណីនេះ។ ឆ្លើយតបទៅនឹងករណីស៊ើបអង្កេតនេះ អ្នកនាំពាក្យរបស់ក្រុមហ៊ុន Alibaba ម្នាក់បានអះអាងថាក្រុមហ៊ុននឹងចូលរួមសហការការងារនេះឲ្យបានសកម្មបំផុតជាមួយនឹងក្រុមអ្នកច្បាប់ ហើយទោះបីជាយ៉ាងណាក្តីអាជីវកម្មរបស់ខ្លួនគឺនៅតែដំណើរការជាធម្មតាដដែល។ គួរឲ្យដឹងដែរថាក្រោយការប្រកាសអំពីករណីស៊ើបអង្កេតនេះភ្លាម ភាគហ៊ុនរបស់ក្រុមហ៊ុនយក្ស Alibaba មួយនេះបានធ្លាក់ចុះប្រមាណជា 8 ភាគរយភ្លាមនៅក្នុងទីផ្សារនៃក្រុងហុងកុង។ រដ្ឋាភិបាលនៃប្រទេសចិនកន្លងមកធ្លាប់បានបញ្ជាក់ហើយថា យុទ្ធនាការលើកនេះធ្វើឡើងក្នុងគោលបំណងធំដើម្បីប្រឆាំងទៅនឹងអាជីវកម្មរបស់ក្រុមហ៊ុនធំៗរបស់ចិនក្នុងការប្រកួតប្រជែងដែលមិនមានភាពស្មើគ្នា និងបែបផ្តាច់មុខនិយមដោយការបង្ខំឲ្យអ្នកលក់រាយក្នុងការលក់ទំនិញរបស់ខ្លួនផ្តាច់មុខមកឲ្យក្រុមហ៊ុនជាមួយនឹងតម្លៃដែលទាបជាងតម្លៃដើមនៃការផលិត៕

ភ្នំពេញ៖ ក្រសួងការពារជាតិ បានបើកកិច្ចប្រជុំការងារ កែទម្រង់ការគ្រប់គ្រងហិរញ្ញវត្ថុសាធារណៈ ស្ថិតក្រោមអធិបតីភាព នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ សមាជិកគណៈកម្មការជាតិកែទម្រង់ និងជាប្រធានក្រុមការងារកែទម្រង់ ការគ្រប់គ្រងហិរញ្ញវត្ថុសាធារណៈ ក្រសួងការពារជាតិ។  នាយឧត្តមសេនីយ៍ ម៉ឹង សំផនថ្លែងថា ក្រោមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រី រាជរដ្ឋាភិបាលបានផ្តល់នូវថវិកា សម្រាប់សម្រួលទៅតាមតម្រូវការ របស់ក្រសួងការពារជាតិ ដើម្បីធានានូវសុខភាពដល់ ខ.ភ.ម ក្នុងការហ្វឹកហ្វឺនបង្កើនសមត្ថភាព សម្រាប់ការបំពេញភារកិច្ចការពារសន្តិសុខ សុវត្ថិភាព ជូនប្រជាពលរដ្ឋ និងការពារអធិបតេយ្យ បូរណភាពទឹកដីឲ្យបានគង់វង្ស។ ឯកឧត្តម ម៉ឹង សំផន បញ្ជាក់ថា ក្រោមការដឹកនាំរបស់សម្តេចតេជោ ក្រសួងការពារជាតិ បានអនុវត្តទទួលបានជោគជ័យ លើការកែទម្រង់ ការគ្រប់គ្រងហិរញ្ញវត្ថុសាធារណៈ ឆ្នាំ២០២០ ហើយកងទ័ពបានទទួលការយកចិត្តទុកដាក់គិតគូរខ្ពស់ពី ប្រមុខរាជរដ្ឋាភិបាលលើជីភាពរស់នៅប្រចាំថ្ងៃ និងការកសាងអង្គភាព ជំរុំជំរកស្នាក់ ។

បរទេស ៖ ទូរទស្សន៍ BBC ចេញផ្សាយនៅព្រឹកថ្ងៃព្រហស្បតិ៍នេះបានឲ្យដឹងថា ពលរដ្ឋចំណាកស្រុករាប់រយនៅក្នុងប្រទេសបារាំងដែលកំពុងតែធ្វើការងារជួរមុខដើម្បីប្រយុទ្ធប្រឆាំងទៅនឹងការរីករាលដាលនៃវិរុសកូវីដ19នោះគឺត្រូវបានរដ្ឋាភិបាលប្រកាសផ្តល់សញ្ជាតិបារាំងចាត់ទុកជារង្វាន់នៃកិច្ចខំប្រឹងប្រែងនាពេលកន្លងមក។ កាលពីថ្ងៃពុធម្សិលមិញនេះក្រសួងមហាផ្ទៃរបស់ប្រទេសបារាំងបានធ្វើការអញ្ជើញពលរដ្ឋជាជនចំណាកស្រុកដែលកំពុងធ្វើកិច្ចការងារប្រយុទ្ធប្រឆាំងទៅនឹងកូវីដទាំងនោះដើម្បីឲ្យមកជួបជុំគ្នា និងពន្លឿននៃដំណើរការស្នើសុំចូលសញ្ជាតិរបស់ពួកគេ ខណៈដែលជនចំណាកស្រុកប្រមាណជាជាង700 នាក់មកហើយដែលត្រូវបានផ្តល់សញ្ជាតិបារាំង និងកំពុងស្ថិតនៅក្នុងដំណាក់កាលចុងក្រោយនៃការទទួលបានសញ្ជាតិ។ ក្រុមជនចំណាកស្រុកទាំងនោះរាប់មានតាំងតែពីអ្នកជំនាញខាងសេវាសុខាភិបាលសាធារណៈក្រុមអ្នកអនាម័យព្រមទាំងក្រុមអ្នកធ្វើការងារនៅក្នុងហាងលក់ទំនិញផ្សេងៗផង។ គួរឲ្យដឹងដែរថា ជាធម្មតាដើម្បីអាចទទួលបានសញ្ជាតិបារាំងបានបេក្ខភាពជាជនចំណាកស្រុកទាមទារចាំបាច់ឲ្យមានប្រវត្តិនៃការរស់នៅក្នុងប្រទេសបារាំងឲ្យបានយ៉ាងតិច5ឆ្នាំ មានប្រាក់ចំណូលសមស្រប និងស្ថិតស្ថេរមួយ ជាពិសេសគឺមានសកម្មភាពដែលស្របទៅតាមសង្គមនៃប្រទេសបារាំង៕

ភ្នំពេញ ៖ តាមធម្មតាអ្នកដែលចាប់ផ្តើមប្រកបមុខរបរជាអ្នកលក់ដូរ តែងតែមានគំនិតច្រើនក្នុងការគិតលើវិធីសាស្រ្តណាមួយ ដែលធ្វើឱ្យមុខរបររបស់ខ្លួនកាន់តែដំណើរការបានល្អ។ តួយ៉ាងសម្រាប់ការប្រកបអាជីវកម្មលក់រាយដូចជាការលក់ចាប់ហួយបែបប្រពៃណីគ្រួសារ ដែលពេញនិយមក្នុងស្រទាប់ ប្រជាពលរដ្ឋខ្មែរនោះ បច្ចុប្បន្នត្រូវបានកត់សម្គាល់ថាកំពុងជួបភាពប្រឈម ខណៈដែលកំណើននៃផ្សារទំនើប ជាពិសេសវត្តមានមីនីម៉ាតមកជំនួស។ នាយក Camazoon លោក ប៊ុន ផាក បានផ្តល់ជាទស្សនៈផ្ទាល់ខ្លួនប្រាប់ AMSថា ៖ «ខ្ញុំគិតថា ក្នុងការប្រមើលមើលទៅលើអាជីវកម្មលក់រាយ ឬការលក់ចាប់ហួយបែបប្រពៃណីគ្រួសារនេះ ខ្ញុំគិតថានឹងមិនបាត់បង់ទេ តែវានឹងប្តូររូបរាងទៅជាម៉ូឌែលមួយថ្មី»។ លោក ប៊ុន ផាក បានបញ្ជាក់ថា ៖ «ទី1- ការលក់អនឡាញ មានការកើតឡើង និងជាទិសដៅធំ ព្រោះវាត្រូវទៅហើយ ចង់មិនចង់ក៏គេតម្រូវឱ្យលក់តាមអនឡាញ មិនមែនដោយសារកូវីដទេ។ ទី2-ចំពោះផ្សារទំនើបខ្នាតធំ អ្នកដើរផ្សារមិនមែនគាត់ទៅសំដៅទិញទំនិញដែរ គឺគាត់ចង់កំសាន្ត ទី3-ការលក់ចាប់ហួយនៅស្រុកខ្មែរមានច្រើន បើប្រៀបទៅស្រុកចិន អឺរ៉ុប តែបើធៀបទៅថៃ វៀតណាមហ្វីលីពីន គឺប្រហាក់ប្រហែលគ្នា ព្រោះប្រពៃណី និងបរិបទរស់នៅស្រដៀងគ្នា»។ លោកបានមានប្រសាសន៍បញ្ជាក់ថា « បើការរីកចម្រើនមានកើនឡើង និងត្រូវការរៀបចំរចនាសម្ព័ន្ធ នោះការលក់ចាប់ហួយ និងត្រូវកែប្រែ មិនលក់បែបបច្ចុប្បន្នទៀតទេ ព្រោះដៃគូប្រកួតប្រជែងរបស់គាត់គឺម៉ាត…