ភ្នំពេញៈអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាធុរកិច្ចអាស៊ានកម្ពុជា បានជំរុញឱ្យសមាគមភស្តុភារកម្មកម្ពុជា ប្រើប្រាស់ប្រព័ន្ធអេឡិចត្រូនិក ដើម្បីទូទាត់ការបង់ពន្ធនានា និងអាចដោះស្រាយបញ្ហាប្រឈមមួយចំនួន ដែលទាក់ទិនទៅនឹងការដឹកជញ្ជូន និងនីតិវិធីបំពេញបែបបទឱ្យកាន់តែមានភាពងាយស្រួល។ ការជំរុញនេះ បានធ្វើឡើងនៅក្នុងពិធីសំណេះសំណាលនិងជំនួបពិភាក្សាធុរកិច្ច វិស័យភស្តុភារ និងដឹកជញ្ជួនកម្ពុជា កាលពីថ្ងៃទី៨ ខែឆ្នូ ឆ្នាំ២០២៣ នៅសណ្ឋាគារកាំប៉ូឌីយ៉ាណាភ្នំពេញ ដែលពិធីនេះ គឺធ្វើឡើងដើម្បីឱ្យអ្នករកស៊ីលើកពីបញ្ហាប្រឈមផ្សេងៗនៅក្នុងវិស័យនេះ ព្រមទាំងទទួលបាននូវការចែករំលែកនូវព័ត៌មានសំខាន់ៗ និងបង្ហាញពីការយកចិត្តទុកដាក់ពីថ្នាក់ដឹកនាំតំណាងឱ្យវិស័យឯកជន ដើម្បីធ្វើយ៉ាងណាសម្របសម្រួលក្រុមការងារផ្នែកឯកជន នៃវេទិការាជរដ្ឋាភិបាលផ្នែកឯកជន (G-PSF) ដែលមានក្រុមការងារ ផ្នែកដឹកជញ្ជូននិងហេដ្ឋារចនាសម្ព័ន្ធ។ អ្នកឧកញ៉ា គិត ម៉េង បានលើកឡើងថា កាលពីថ្ងៃទី២ ខែធ្នូ ឆ្នាំ២០២៣ កន្លងទៅថ្មីៗនេះ   ប្រធានសមាគមភស្តុភារកម្មកម្ពុជា ដែលជាប្រធានអង្គប្រជុំតំណាងឱ្យប្រទេសកម្ពុជា បានចូលរួមប្រជុំគ្នាជាមួយប្រទេសអាស៊ានទាំង១០ ដើម្បីពិភាក្សានិងដោះស្រាយបញ្ហាប្រឈមមួយចំនួន ដែលទាក់ទិនទៅនឹងការដឹកជញ្ជូន និងនីតិវិធីបំពេញបែបបទឱ្យកាន់តែមានភាពងាយស្រួលជាងនេះទៅទៀតនៅក្នុងអាស៊ាន។ លោកបានបញ្ជាក់ថា៖«កិច្ចពិភាក្សានៅពេលនោះ គឺប្រទេសអាស៊ានមួយចំនួនក៏បានធ្វើបទបង្ហាញទាក់ទិនពីបញ្ហានៅក្នុងប្រទេសរបស់គេរៀងៗខ្លួន ។រីឯយើងក៏បានធ្វើបទបង្ហាញរបស់យើងផងដែរអំពីរបៀបនាំចូលនិងនាំចេញ។ ដោយឡែក អ្វីដែលយើងចង់បាននោះ គឺធ្វើយ៉ាងម៉េចឱ្យមានភាពងាយស្រួលជាងនេះបន្តទៀត គឺការជំរុញការប្រើប្រាស់ប្រព័ន្ធអេឡិចត្រូនិក ជាមធ្យោយបាយទូទាត់ប្រកបដោយប្រសិទ្ធភាព»។ អ្នកឧកញ៉ាបញ្ជាក់ថា «ខ្ញុំសូមស្នើឱ្យសមាជិករបស់សភាពាណិជ្ជកម្មកម្ពុជាទាំងអស់ ដែលបានរកស៊ីនៅក្នុងវិស័យដឹកជញ្ជូនជួបការលំបាកត្រូវលើកពីបញ្ហាប្រឈម និងលើកជាសំណើ ក៏ដូចជា…

ហុងកុង៖ លោកតា សាន់តា ក្លូស រាប់សិបនាក់ បានប្រមូលផ្តុំគ្នានៅតាមដងផ្លូវក្នុងទីក្រុងហុងកុង សម្រាប់ការចូលរួមកម្មវិធី SantaCon ប្រចាំឆ្នាំ។ ប្រជាជនហុងកុងស្លៀកពាក់ក្រហម និងស ដោយមានខ្លះស្លៀកពាក់ជាលោកតា សាន់តា ក្លូស បានប្រមូលផ្តុំគ្នានៅបារមួយកន្លែង មុនពេលដើរដង្ហែ និងច្រៀងចម្រៀងបុណ្យណូអែលតាមដងផ្លូវ។ ព្រឹត្តិការណ៍ដែលគេឃើញលោកតា សាន់តា ក្លូស ជាច្រើននៅតាមទីកន្លែងផ្សេងៗគ្នាក្នុងទីក្រុងហុងកុងប្រហែល ១២ម៉ោងនេះ គឺជាកម្មវិធីរៃអង្គាសប្រាក់សម្រាប់ Impact HK ដែលជាអង្គការក្រៅរដ្ឋាភិបាល ជួយដល់ជនអនាថានៅទីក្រុងហុងកុង។ អ្នកនាង Laura អ្នករៀបចំព្រឹត្តិការណ៍ SantaCon បានរៀបរាប់ថា វាជាព្រឹត្តិការណ៍ធំមួយនៅទីក្រុងញូវយ៉ក។ ដូច្នេះខ្ញុំចង់ធ្វើឱ្យព្រឹត្តិការណ៍នេះ ក្រៅពីការកំសាន្តសប្បាយហើយនោះ វាក៏ជាឱកាសធ្វើសប្បុរសធម៌ផងដែរ។ អ្នកនាង Laura បន្ថែមថា ខ្ញុំគិតថា ព្រឹត្តិការណ៍នេះជារឿងដ៏រំភើបរីករាយមួយ ពីព្រោះវាធ្វើឱ្យមនុស្សគ្រប់គ្នានៅជុំវិញយើង មានស្នាមញញឹមជាមួយនឹងការរូបថត ជាពិសេសធ្វើឱ្យអ្នកគ្រប់គ្នាសប្បាយចិត្ត ហើយអ្នកគ្រប់គ្នាសង្ឃឹមថា នឹងមានពេលវេលាដ៏ល្អបែបនេះជារៀងរាល់ឆ្នាំ៕ ប្រភព៖ AFP ប្រែសម្រួលដោយ៖ ឈឹម ទីណា

ភ្នំពេញ៖ធនាគារជាតិនៃកម្ពុជា(NBC)បានអនុស្សរណៈនៃកិច្ចព្រមព្រៀងស្តីពីការអភិវឌ្ឍផែនទីមគ្គុទ្ទេសក៍ហិរញ្ញវត្ថុប្រកប​ដោយចីរភាពរបស់ប្រទេសកម្ពុជា ជាមួយគណៈកម្មការសេដ្ឋកិច្ចនិងសង្គមប្រចាំតំបន់អាស៊ី និងប៉ាស៊ីហ្វិក នៃអង្គការសហប្រជាជាតិ (UNESCAP) ដើម្បីគំនិតផ្តួចផ្តើមចាំបាច់ក្នុងការជំរុញហិរញ្ញវត្ថុប្រកបដោយចីរភាពនៅកម្ពុជា។ ពិធីចុះអនុស្សរណៈនេះត្រូវបានធ្វើឡើងរវាងឯកឧត្តម យឹម លាត ទេសាភិបាលរងធនាគារជាតិនៃកម្ពុជានិងលោកស្រី Subathirai Sivakumaran ប្រធានផ្នែកហិរញ្ញប្បទានសម្រាប់ការអភិវឌ្ឍនៃគណៈកម្មការសេដ្ឋកិច្ចនិងសង្គមប្រចាំតំបន់អាស៊ី និងប៉ាស៊ីហ្វិកនៃអង្គការសហប្រជាជាតិ(UNESCAP)នៅចុងសប្ដាហ៍នេះនារាជធានីភ្នំពេញក្រោមអធិបតីភាពលោកជំទាវ ជា សិរី ទេសាភិបាលធនាគារជាតិនៃកម្ពុជា និងលោក Jo Scheuer អ្នកសម្របសម្រួលអង្គការសហប្រជាជាតិប្រចាំកម្ពុជា  ក្នុងពិធីចុះហត្ថលេខាលើ លោកជំទាវ ជា សិរី បានអំពាវនាវដល់ភាគីពាក់ព័ន្ធរួមមាន ក្រសួង-ស្ថាប័នរដ្ឋាភិបាល ស្ថាប័នហិរញ្ញវត្ថុ ដៃគូអភិវឌ្ឍន៍ និងសហគ្រាសឯកជន ឱ្យចូលរួមសហការទប់ស្កាត់បញ្ហាប្រែប្រួលអាកាសធាតុ សំដៅលើកកម្ពស់ដំណើរការអភិវឌ្ឍប្រកបដោយចីរភាព។ លោកជំទាវទេសាភិបាលបានថ្លែងទៀតថា ៖«ការចុះអនុស្សរណៈនៃកិច្ចព្រមព្រៀងស្តីពី ការអភិវឌ្ឍផែនទីមគ្គុទ្ទេសក៍ហិរញ្ញវត្ថុប្រកបដោយចីរភាពរបស់ប្រទេសកម្ពុជានេះ គឺក្នុងគោលដៅដាក់ចេញនូវទស្សនវិស័យ គំនិតផ្តួចផ្តើមចាំបាច់ ក្នុងការជំរុញហិរញ្ញវត្ថុប្រកបដោយចីរភាពនៅកម្ពុជា»។ ប្រភពធនាគារជាតិនៃកម្ពុជាបានបញ្ជាក់ថា អនុស្សរណៈនៃកិច្ចព្រមព្រៀងនេះស្របតាមគោលនយោបាយរបស់រាជរដ្ឋាភិបាលកម្ពុជា ដែលលើកកម្ពស់គម្រោងអភិវឌ្ឍន៍ប្រកបដោយចីរភាព ដូចមានចែងក្នុងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល៕ ដោយ៖ វណ្ណ សុជាតា

(ភ្នំពេញ) ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួបសម្តែងការគួរសម និងពិភាក្សាការងារជាមួយ ឯកឧត្តម Martin V’avra ឯកអគ្គរដ្ឋទូតនៃសាធារណរដ្ឋឆេក ប្រចាំកម្ពុជា នៅទីស្តីការក្រសួងកសិកម្ម កាលពីថ្ងៃទី៧ ខែធ្នូ ឆ្នាំ២០២៣ ។ នៅក្នុងជំនួបនេះ ឯកឧត្តមរដ្ឋមន្ត្រី បានសម្តែងនូវការសាទរចំពោះកិច្ចសហប្រតិបត្តិការល្អរវាងប្រទេសទាំងពីរ កម្ពុជា-ឆេក កន្លងមក។ ជាមួយគ្នានេះដែរ ឯកឧត្តមរដ្ឋមន្ត្រី បានបង្ហាញនូវជំហរនិងស្មារតីបន្តកិច្ចសហប្រតិបត្តិការ និងវិនិយោគជាមួយឆេក ពាក់ព័ន្ធនឹងការកសាងធនធានមនុស្សក្នុងវិស័យកសិកម្ម ក៏ដូចជាសក្តានុពលនៃក្នុងវិនិយោគផ្សេងៗទៀតលើវិស័យជលផល ។ ឯកឧត្តមរដ្ឋមន្ត្រី បានគូសបញ្ជាក់ថា កម្ពុជាមានផលិតផលកសិកម្មដែលមានសក្តានុពលជាច្រើន ដូចជាស្វាយចន្ទី និងម្រេចជាដើម ដែលមានគុណភាពខ្ពស់ រសជាតិឆ្ងាញ់ សម្រាប់នាំចេញ។ មិនត្រឹមតែប៉ុណ្ណោះ កម្ពុជាក៏បើកទូលាយសម្រាប់ការវិនិយោគកសិកម្ម ព្រមទាំងស្វាគមន៍ចំពោះការសហការចូលរួមអភិវឌ្ឍធនធានមនុស្សនៅក្នុងវិស័យនេះផងដែរ ៕ ប្រភព៖ក្រសួងកសិកម្ម

(ភ្នំពេញ)៖ ក្រសួងកសិកម្ម រុក្ខាប្រមាញ់ និងនេសាទ បានរៀបចំកម្មវិធី “កសិកម្ម វាលបៃតង” សម្រាប់ឆ្នាំ២០២៣ ដើម្បីបង្ហាញពីផលិតផលកសិកម្មដែលមានសក្ដានុពលរបស់កម្ពុជា ។ ពិព័រណ៍ផលិតផល កសិកម្ម ដែលបានរៀបចំឡើង នាព្រលប់ថ្ងៃទី៨ ខែធ្នូ ឆ្នាំ២០២៣នេះដែរត្រូវបាន ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឱ្យដឹងថា៖ការរៀបចំពិព័រណ៍ផលិត ផលកសិកម្មនេះគឺ ក្នុងគោលបំណងបង្ហាញរវាងអ្នកផលិតកសិផលកែច្នៃជាមួយអ្នកជំនួញផ្សេងៗដើម្បីជំរុញទីផ្សារ និងក៏ដូចជាពង្រីកទីផ្សារឱ្យកាន់តែទូលំទូលាយថែមទៀត ។ ការតាំងបង្ហាញនេះដែរគឺជាការបង្ហាញនូវទំនិញនានាដែលកើតចេញពីផលិតផលកសិកម្មនៅកម្ពុជាដើម្បីឱ្យអ្នកចូលរួមបានស្គាល់ ងាយទំនាក់ទំនងគ្នាសម្រាប់ពង្រីកទីផ្សារឱ្យកាន់តែទូលំទូលាយទាំងក្នុងស្រុក និងក៏ដូចជាក្រៅប្រទេស។ ឯកឧត្តម រដ្ឋមន្ត្រីបានថ្លែងដោយបញ្ជាក់បន្ថែមថា”ថ្ងៃនេះមានអ្នកជំនួញតូចធំបានមកជួបជុំគ្នាដើម្បីលើកស្ទួយ និងជ្រោមជ្រែងវិស័យកសិកម្មឱ្យកាន់តែរីកចម្រើនបន្ថែមទៀត។ថ្ងៃខាងមុខនេះយើងអាចនឹងរៀបចំព្រឹត្តិការណ៍មួយនេះបន្តទៀតនិងអាចយូរជាង១ថ្ងៃផង”។ ការរៀបចំកម្មវិធី “កសិកម្ម វាលបៃតង”គេឃើញក្រុមសហគ្រាស និង សិប្បកម្មខ្នាតតូចជាច្រើន បានចូលរួមចាប់ពីម៉ោង ១៧:០០ល្ងាច ដល់ ២១:០០យប់ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។ គួរបញ្ជាក់ថាក្នុងកម្មវិធីនេះដែរអ្នកចូលរួមទាំងភ្ញៀវជាតិ និងអន្តរជាតិ អង្គទូត និងតំណាងដៃគូអភិវឌ្ឍទាំងអស់ មានឱកាសភ្លក្សម្ហូបអាហារ ជាផលិតផលខ្មែរដែលមានគុណភាព។ មិនត្រឹមតែប៉ុណ្ណោះ កម្មវិធីនេះ ក៏បានរៀបចំបង្ហាញដល់ភ្ញៀវកិត្តិយសអំពីការដាល់អំបុក ដែលជាផ្នែកមួយនៃវប្បធម៌ផ្សារភ្ជាប់នឹងវិស័យកសិកម្មដំណាំស្រូវក្រោយប្រមូលផលទៀតផង៕…