-
ពលរដ្ឋម៉ាឡេស៊ីធុញទ្រាន់នឹងនយោបាយក្នុងប្រទេស សង្ឃឹមស្ថានភាពកូវីដ-១៩ នឹងប្រសើរឡើង
ប្រជាជនម៉ាឡេស៊ីរំពឹងស្ថានភាពកូវីដ-១៩ នឹងមានភាពប្រសើរឡើងបន្ទាប់ពីមាននាយករដ្ឋមន្រ្តីឡើងកាន់តំណែង។ នាយករដ្ឋមន្រ្តីប្រទេសម៉ាឡេស៊ីបាន លោក Muhyiddin Yassin បានប្រកាសលាលែងពីតំណែងកាលពីដើមសប្តាហ៍នេះ ក្រោយពីសមាជិកសភាមួយចំនួនប្រកាសលែងគាំទ្ររដ្ឋាបាលរបស់លោក។ ក្រៅពីមានការមិនគាំទ្រពីសំណាក់អ្នកនិយោបាយនៅក្នុងប្រទេស លោក Muhyiddin ក៏ត្រូវប្រជាជនរិះគន់លោកពីការដាក់ចេញនូវវិធានការណ៍របស់លោកក្នុងការទប់ស្កាត់ការរីករាលដាលនៅក្នុងប្រទេសផងដែរ។ ក្នុងរយៈពេលដែលលោកកាន់តំណែងអស់រយៈពេល ១៧ ខែលោកបានប្រឈមមុខនឹងបញ្ហាដឹកនាំរបស់លោកដែលមិនត្រឹមតែមានការមិនពេញចិត្តពីគណបក្សប្រឆាំងប៉ុណ្ណោះទេ ប៉ុន្តែក៏មានសម្ព័ន្ធមិត្តរបស់លោកនៅដែលមានដូចជា អង្គការជាតិម៉ាឡេស៊ីដែលបានគំរាមកំហែងម្តងហើយម្តងទៀតក្នុងការដកការគាំទ្ររបស់ពួកគេទៅលើលោក Muhyiddin ។ បន្ទាប់ពីការលាលែងពីតំណែងរបស់លោក Muhyiddin ប្រជាជនមួយចំនួនបានសម្តែងការមិនពេញចិត្តចំពោះភាពដឹកនាំរបស់លោក ព្រមទាំងមានការស្ទាក់ស្ទើរចំពោះនយោបាយរបស់ប្រទេសខ្លួន។ តាមការស្រង់សម្តីរបស់សារព័ត៌មាន CNA លោក Yusri Abu Basar អាយុ ៥៣ ឆ្នាំដែលបច្ចុប្បន្នលោកកំពុងបម្រើការនៅក្នុងវិស័យហិរញ្ញវត្ថុបាននិយាយថា តាមការមើលឃើញតបស់លោកនៅក្នុងរឿងនយោបាយរយៈពេលប៉ុន្មានសប្តាហ៍កន្លងមកនេះលោកហាក់មានអារម្មណ៍ដូចជារឿងកំប្លែង ។ លោក Yusri បាននិយាយថា៖ «វាជារឿងគួរអោយខ្មាស់មួយដែលនយោបាយម៉ាឡេស៊ីបានឈានដល់កម្រិតនេះ។ ដំណើរការទាំងមូលមើលទៅដូចជាការមើលសៀករហ័សកម្ម» ។ លោក Chin V Ming អាយុ ៣៦ ឆ្នាំដែលបច្ចុប្បន្នលោកធ្វើការក្នុងវិស័យហិរញ្ញវត្ថុបាននិយាយថា ការលាលែងពីតំណែងរបស់លោក Muhyiddin ក្នុងអំឡុងពេលមានជំងឺរាតត្បាតគឺជារឿងនយោបាយដែលមិនចាំបាច់។ លោកបាននិយាយថា៖ «ចំពោះការជ្រើសរើសនាយករដ្ឋមន្រ្តីថ្មី ខ្ញុំមិនចាប់អារម្មណ៍នឹងដំណើរការនេះទេ ព្រោះមិនមានអ្នកណាដែលខ្ញុំពេញចិត្តទេ»។…
-
រដ្ឋបាលលោក បូរីស ចនសុន នឹងអនុញ្ញាតអោយប្រជាជនអាហ្វហ្កានីស្ថានរាប់ម៉ឺននាក់ទទួលបានសិទ្ធិជ្រកកោនស្របច្បាប់នៅអង់គ្លេស
អង់គ្លេស៖ រដ្ឋាភិបាលអង់គ្លេសនៅថ្ងៃអង្គារសប្តាហ៍នេះ បានប្រកាសពីផែនកាទទួលរស្វាគមន៍ជនជាតិអាហ្វហ្គានីស្ថានរហូតដល់៥ពាន់នាក់ ដែលបង្ខំចិត្តភៀសខ្លួនចេញពីការគ្រប់គ្រងរបស់ក្រុមពួកតាលីបង់ ក្នុងអំឡុងឆ្នាំដំបូងនៃកម្មវិធីតាំងទីលំនៅថ្មីមួយរបស់លោកនាយករដ្ឋមន្ត្រី បូរីស ចនសុន ដែលនឹងផ្តល់អាទិភាពដល់ស្ត្រី ក្មេងស្រី និងសាសនា ព្រមទាំងជនជាតិភាគតិចដទៃទៀត។រដ្ឋមន្រ្តីក្រសួងមហាផ្ទៃអង់គ្លេសលោកស្រី ព្រីតធី ផាថែល (Priti Patel) បញ្ជាក់ថា ខ្ញុំចង់ធានាថា ក្នុងនាមជាប្រជាជាតិមួយ យើងគួរតែធ្វើអ្វីៗគ្រប់យ៉ាងតាមដែលអាចធ្វើទៅបាន ដើម្បីផ្តល់ការគាំទ្រដល់ជនងាយរងគ្រោះ ដែលភៀសខ្លួនចេញពីអាហ្វហ្គានីស្ថាន ដូច្នេះពួកគេអាចចាប់ផ្តើមជីវិតថ្មីប្រកបដោយសុវត្ថិភាពនៅលើទឹកដីចក្រភពអង់គ្លេស ។ ជាមួយគ្នានេះ លោកស្រីថែមទាំងបានអំពាវនាវដល់ប្រទេសដទៃទៀតអោយជួយទទួលយកជនភៀសខ្លួនអាហ្វហ្គានីស្ថានផងដែរ ដោយលោកស្រីបញ្ជាក់ថា អង់គ្លេសកំពុងធ្វើគ្រប់យ៉ាងតាមដែលអាចធ្វើទៅបាន ដើម្បីលើកទឹកចិត្តប្រទេសដទៃទៀតអោយជួយ។ យើងមិនត្រឹមតែចង់ដឹកនាដោយឧទាហរណ៍ទេ ហើយយើងក៏មិនអាចធ្វើកិច្ចការនេះតែម្នាក់ឯងបានដែរ។បើតាមផែនការខាងលើនេះ អង់គ្លេសនឹងទទួលយកជនភៀសខ្លួនអាហ្វហ្គានីស្ថាន២ម៉ឺននាក់ក្នុងរយៈពេលប៉ុន្មានឆ្នាំខាងមុខនេះ ដោយជនភៀសខ្លួន៥ពាន់នាក់ ក្នុងនោះមានស្ត្រី ក្មេងស្រី និងអ្នកងាយរងគ្រោះបំផុត នឹងត្រូវបានអនុញ្ញាតឱ្យតាំងទីលំនៅក្នុងអង់គ្លេសក្នុងឆ្នាំដំបូង (ឆ្នាំ២០២១នេះ) សម្រាប់ផែនការរបស់លោក ចនសុន ៕
-
រដ្ឋបាលរបស់លោក ចូ បៃដិន បិទខ្ទប់ប្រាក់បម្រុងរបស់រដ្ឋាភិបាលអាហ្វហ្គានីស្ថានក្នុងធនាគាររបស់ខ្លួន ដើម្បីទប់ស្កាត់ក្រុមតាលីបង់យកទៅប្រើប្រាស់
អាមេរិក៖ រដ្ឋាភិបាលអាមេរិកបានបង្កកប្រាក់បម្រុងរបស់រដ្ឋាភិបាលអាហ្វហ្គានីស្ថាន ដែលមាននៅក្នុងគណនីធនាគារនៅសហរដ្ឋអាមេរិក ដើម្បីការពារក្រុមតាលីបង់មិនអោយប្រើបាន នេះបើតាមកាសែត Washington Post ។ មន្រ្តីរដ្ឋបាលម្នាក់បានប្រាប់កាសែតនេះនៅក្នុងសេចក្តីថ្លែងការណ៍មួយថា ទ្រព្យសម្បត្តិរបស់ធនាគារកណ្តាលណាមួយ ដែលរដ្ឋាភិបាលអាហ្វហ្គានីស្ថានមាននៅសហរដ្ឋអាមេរិក នឹងមិនត្រូវបានផ្តល់អោយក្រុមតាលីបង់ឡើយ ។ យោងតាមទិន្នន័យពីមូលនិធិរូបិយវត្ថុអន្តរជាតិ (IMF) បានឲ្យដឹងថា គិតត្រឹមចុងខែមេសា ឆ្នាំ២០២១នេះ ធនាគារកណ្តាលអាហ្វហ្គានីស្ថានមានទ្រព្យសម្បត្តិបម្រុងចំនួន ៩.៤ ពាន់លានដុល្លារ ៕ ប្រភព៖ CGTN
-
CEO ក្រុមហ៊ុនអាមេរិក ៩០រូប ជំរុញរដ្ឋាភិបាលខ្លួន បរិច្ចាគវ៉ាក់សាំងកូវីដឲ្យវៀតណាមបន្ថែម
បណ្តាអគ្គនាយក CEO ក្រុមហ៊ុនធំៗរបស់អាមេរិក ចំនួន៩០រូបបានជំរុញដល់ប្រធានាធិបតីអាមេរិក លោក ចូ បៃឌិន ពន្លឿនការបរិច្ចាគវ៉ាក់សាំងបង្ការជំងឺកូវីដ១៩ ជូនដល់ប្រទេសវៀតណាមបន្ថែមទៀត ខណៈដែលវៀតណាមកំពុងតែប្រយុទ្ធប្រឆាំងយ៉ាងក្តៅគគុក ចំពោះការរីករាលដាលនៃជំងឺកូវីដ១៩។ ក្នុងលិខិតផ្ញើជូនប្រធានាធិបតិអាមេរិកនេះ មានបណ្តាក្រុមហ៊ុននានា រួមមានទាំង Adidas, Coach, Gap, Hanesbrands, Nike, VF និង Under Amourបានគូសបញ្ជាក់ថា វៀតណាមគឺជាដៃគូសេដ្ឋកិច្ច និងផ្គត់ផ្គង់សំខាន់របស់អាមេរិក។ បណ្តាអគ្គនាយកទាំងនោះបានស្នើដល់លោក បៃឌិន ពន្លឿនការផ្តល់អំណោយវ៉ាក់សាំងនិងសម្ភារ ទប់ស្កាត់ជំងឺកូវីដ១៩ ជូនវៀតណាម ដើម្បីឲ្យឆាប់បានយកឈ្នះជំងឺកូវីដ១៩ ដោយកត់សម្គាល់ថា វិបត្តិបុគ្គលិកធ្វើការនៅវៀតណាម ក៏ជាវិបត្តិរបស់ក្រុមហ៊ុនអាមេរិកទាំងនោះដែរ។ សហរដ្ឋអាមេរិក មកទល់ពេលនេះ បានផ្តល់វ៉ាក់សាំង ប្រភេសចំនួន៥លានដូស ដល់វៀតណាម តាមរយៈយន្តការកូវ៉ាក់របស់អង្គការសុខភាពពិភពលោក៕
-
ចំនួនអ្នកស្លាប់នៅហៃទីកើនឡើងជិត២ពាន់នាក់ ខណៈក្រុមសង្គ្រោះគ្រោះរញ្ជួយដីស្រែកយំដង្ហើយសុំជំនួយ
ហៃទី៖ មន្ត្រីហៃទីនិយាយថា គិតមកទល់ពេលនេះ ចំនួនអ្នកស្លាប់បានបន្តកើនឡើងដល់១,៩៤១នាក់ ស្របពេលមនុស្សដទៃទៀតបានដង្ហើយរកជំនួយស្បៀងអាហារ ជំរកស្នាក់នៅ និងការថែទាំសុខភាពនៅថ្ងៃអង្គារសប្តាហ៍នេះ ខណៈកិច្ចខិតខំប្រឹងប្រែងស្វែងរកជនរងគ្រោះបានបន្តចាប់ផ្តើមឡើងវិញ បន្ទាប់ពីការវាយប្រហារពីព្យុះត្រូពិច ហ្គ្រេស ។ នៅរសៀលថ្ងៃអង្គារសប្តាហ៍នេះ ទីភ្នាក់ងារការពារស៊ីវិលហៃទីបានបង្កើនចំនួនអ្នកស្លាប់កើនឡើងដល់១,៩៤១នាក់ និងចំនួនអ្នករបួសដល់៩,៩០០នាក់ ដែលភាគច្រើនត្រូវរង់ចាំជំនួយវេជ្ជសាស្ត្រនៅខាងក្រៅ ក្រោមកម្តៅថ្ងៃបែកក្រហែង ខណៈគេនៅមិនទាន់ច្បាស់ទេថាតើមានមនុស្សប៉ុន្មាននាក់កំពុងបាត់ខ្លួន។ សូមបញ្ជាក់ថា ព្យុះត្រូពិច ហ្គ្រេស បានវាយលុកភាគនិរតីប្រទេសហៃទី ដែលរងការវាយប្រហារយ៉ាងធ្ងន់ធ្ងរដោយគ្រោះរញ្ជួយដី កាលពីថ្ងៃសៅរ៍សប្តាហ៍មុន ហើយក្រុមមន្ត្រីបានព្រមានថា តំបន់ខ្លះអាចមានភ្លៀងធ្លាក់កម្រិត១៥អ៊ីញ មុនពេលព្យុះបន្តដំណើរទៅមុខទៀត។ ភ្លៀងខ្លាំងបានធ្លាក់ឥតឈប់ឈរនៅទីក្រុងឡេសខេយ៉េស ដែលរងការខូចខាតយ៉ាងធ្ងន់ធ្ងរដោយគ្រោះរញ្ជួយដី និងនៅក្នុងរដ្ឋធានីព័រអូប្រាំង ៕ ប្រភព៖ Reuters
-
នូវែលសេឡង់ចាប់ផ្តើមការរស់នៅក្នុងពេលបិទខ្ទប់ប្រទេសទប់ស្កាត់ Covid-19 ក្រោយករណីឆ្លងវីរុសបំប្លែងថ្មី Delta កំពុងកើនឡើង
នូវែលសេឡង់៖ នៅតាមដងផ្លូវក្នុងទីក្រុងធំបំផុតរបស់ប្រទេសនូវែលសេឡង់ត្រូវបានគេបោះបង់ចោលទាំងស្រុង នៅក្នុងថ្ងៃពុធនេះ ខណៈដែលនូវែលសេឡង់បានវិលត្រឡប់ទៅរកការរស់នៅក្នុងការបិទខ្ទប់ប្រទេសជាលើកដំបូង ក្នុងរយៈពេល៦ខែមកនេះ ដើម្បីកាត់ផ្តាច់ការឆ្លងរីករាលដាលនៃវីរុសកូវីដ១៩បំប្លែងថ្មី Delta ។ នូវែលសេឡង់បានចាប់ផ្តើមអនុវត្តការបិទផ្លូវកម្រិតខ្ពស់បំផុតក្នុងរយៈពេល៣ថ្ងៃនៅទូទាំងប្រទេស បន្ទាប់ពីអាជ្ញាធរបានរកឃើញករណីឆ្លងវីរុសកូវីដ១៩បំប្លែងថ្មី Delta នៅក្នុងសហគមន៍ក្នុងទីក្រុង Auckland ជាទីក្រុងធំបំផុតរបស់ប្រទេសនេះ នៅថ្ងៃទី១៧ ខែសីហា ឆ្នាំ២០២១ ។ ករណីនេះ ត្រូវបានគេរាយការណ៍ថា បានឆ្លងដល់មនុស្ស៤នាក់ផ្សេងទៀត ដែលម្នាក់ក្នុងនោះជាគិលានុបដ្ឋាយិការដែលបានចាក់វ៉ាក់សាំងពេញលេញនៅមន្ទីរពេទ្យ Auckland។ នាយករដ្ឋមន្រ្តីនូវែលហ្សេឡង់លោកស្រី Jacinda Ardern និយាយថា យើងតែងតែមានវិធីប្រតិកម្មដែលត្រូវចាត់វិធានការយ៉ាងម៉ឺងម៉ាត់នៅដំណាក់កាលដំបូងនេះ។ ការបិទប្រទេសនឹងចូលជាធរមានរយៈពេល៣ថ្ងៃ ខណៈវិធានការនេះនឹងត្រូវរក្សានៅទីក្រុង Auckland រយៈពេល៧ថ្ងៃ។ អាជ្ញាធរបានបញ្ជាឱ្យប្រជាពលរដ្ឋទាំងអស់ស្នាក់នៅក្នុងផ្ទះ ខណៈអាជីវកម្មភាគច្រើនត្រូវបានបិទ លើកលែងតែសេវាកម្មសំខាន់ៗដូចជាផ្សារទំនើប និងឱសថស្ថាន៕ ប្រភព៖ Reuters
-
អគ្គលេខាធិការណាតូបន្ទោសថ្នាក់ដឹកនាំអាហ្វហ្គានីស្ថានចំពោះការដួលរលំក្រុងកាប៊ុល
កាលពីថ្ងៃអង្គារ ទី១៧ សីហាអគ្គលេខាធិការអង្គការសន្ធិសញ្ញាអាត្លង់ទិចខាងជើង (ណាតូ) លោកJens Stoltenberg និយាយថាអង្គការមានភ្ញាក់ផ្អើលចំពោះល្បឿននៃជ័យជំនះរបស់ក្រុមឧទ្ទាមតាលីបង់នៅអាហ្វហ្គានីស្ថាន ប៉ុន្តែបានស្ដីបន្ទោសមេដឹកនាំអាហ្វហ្គានីស្ថានចំពោះ «សោកនាដកម្ម» នេះ។ «នៅទីបំផុតថ្នាក់ដឹកនាំនយោបាយអាហ្វហ្គានីស្ថានបានបរាជ័យក្នុងការក្រោកឈរប្រឆាំងនឹងក្រុមតាលីបង់ និងដើម្បីសម្រេចបាននូវដំណោះស្រាយសន្តិភាព ដែលប្រជាជនអាហ្វហ្គានីស្ថានចង់បាន» លោកនិយាយបែបនេះហើយបន្តទៀតថា៖ «ការបរាជ័យរបស់ថ្នាក់ដឹកនាំអាហ្វហ្គានីស្ថាននេះ បាននាំឱ្យមានសោកនាដកម្ម ដែលយើងកំពុងឃើញនៅថ្ងៃនេះ»។ កាលពីចុងសប្ដាហ៍មុនក្រុមតាលីបង់បានឡោមព័ទ្ធរដ្ឋធានីកាប៊ុល ហើយក្រោយមកបានចូលកាន់កាប់បន្ទាប់កងយោធាអាហ្វហ្គានីស្ថាន ដែលផ្គត់ផ្គង់ និងវឹកហាត់ដោយអាមេរិកនិងណាតូ បានដួលរលំ។ ស្ថានទូតលោកខាងលិច រួមទាំងណាតូផងដែរ បានជម្លៀសចេញពីតំបន់បៃតងក្នុងទីក្រុងកាប៊ុល ទៅតាំងទីនៅអាកាសយានដ្ឋានអន្តជាតិវិញ។ លោក Stoltenberg បាននិយាយថាឥឡូវនេះកំពុងសម្របសម្រួលការជម្លៀសពលរដ្ឋរបស់ប្រទេសជាសមាជិក រួមជាមួយបុគ្គលិកស៊ីវិលជនជាតិអាហ្វហ្គានីស្ថានរាប់រយនាក់ផងដែរ។
-
ហ្វេសប៊ុកបន្តហាមឃាត់មាតិកាទាក់ទងនឹងតាលីបង់
ក្រុមហ៊ុនហ្វេសប៊ុកបញ្ជាក់ថា ខ្លួននឹងបន្តហាមឃាត់មាតិកាទាក់ទងនឹងក្រុមតាលីបង់ពីវេទិការបស់ខ្លួន តាមរយៈក្រុមអ្នកជំនាញអាហ្វហ្គានីស្ថានដែលចេះភាសា និងមានចំណេះដឹងអំពីបរិបទក្នុងស្រុក ត្រួតពិនិត្យកិច្ចការនេះ ក្រោមហេតុផលថាក្រុមសកម្មប្រយុទ្ធនេះ ជាអង្គការភេរវកម្ម។ អស់រយៈពេលជាច្រើនឆ្នាំមកហើយ ដែលក្រុមតាលីបង់បានប្រើប្រាស់បណ្តាញសង្គមដើម្បីផ្សព្វផ្សាយសារ និងការឃោសនាផ្សេងៗរបស់ខ្លួន ខណៈហ្វេសប៊ុកបានហៅតាលីបង់ថាជាអង្គការគ្រោះថ្នាក់មួយអស់ជាច្រើនឆ្នាំមកហើយ។ ការកាន់កាប់អាហ្វហ្គានីស្ថានបានយ៉ាងឆាប់រហ័សរបស់ក្រុមនេះ បង្កើតឱ្យមានបញ្ហាប្រឈមថ្មីសម្រាប់ក្រុមហ៊ុនបច្ចេកវិទ្យា អំពីរបៀបដោះស្រាយជាមួយមាតិកាដែលទាក់ទងនឹងក្រុមតាលីបង់។ អ្នកនាំពាក្យក្រុមហ៊ុនហ្វេសប៊ុកម្នាក់បានប្រាប់សារព័ត៌មាន BBC ថា៖ «តាលីបង់ត្រូវបានដាក់ទណ្ឌកម្មថាជាអង្គការភេរវកម្មក្រោមច្បាប់របស់សហរដ្ឋអាមេរិក ហើយយើងបានហាមឃាត់ពួកគេពីសេវាកម្មរបស់យើង ក្រោមគោលនយោបាយអង្គការគ្រោះថ្នាក់របស់យើង។ នេះមានន័យថា យើងដកគណនីដែលកាន់ដោយ ឬក្នុងនាមតាលីបង់ ហើយហាមឃាត់ការសរសើរ ការគាំទ្រ និងការតំណាងឱ្យពួកគេ»។ ក្រុមហ៊ុនបណ្តាញសង្គមយក្សនេះបាននិយាយថា ខ្លួនមិនធ្វើការសម្រេចចិត្តអំពីការទទួលស្គាល់រដ្ឋាភិបាលជាតិទេ ប៉ុន្តែធ្វើតាម «សិទ្ធិអំណាចរបស់សហគមន៍អន្តរជាតិ»។ ហ្វេសប៊ុកគូសបញ្ជាក់ថា គោលនយោបាយនេះអនុវត្តចំពោះគ្រប់វេទិការបស់ខ្លួន រួមទាំង Instagram និង WhatsApp ។ យ៉ាងណាមិញ នៅតែមានរបាយការណ៍ដែលថា ក្រុមតាលីបង់ ប្រើប្រាស់ WhatsApp ដើម្បីប្រាស្រ័យទាក់ទង។ ប្រព័ន្ធផ្សព្វផ្សាយសង្គមគូប្រជែងហ្វេសប៊ុកផ្សេងទៀត ក៏ត្រួតពិនិត្យផងដែរអំពីរបៀបដែលខ្លួនគ្រប់គ្រងមាតិកាទាក់ទងនឹងពួកតាលីបង់។ ជាឧទាហរណ៍ Twitter មិនអនុញ្ញាតឱ្យចលនាដែលលើកកម្ពស់ភេរវកម្ម ឬអំពើហឹង្សាលើជនស៊ីវិលឡើយ។ យ៉ាងណាមិញ អ្នកនាំពាក្យរបស់តាលីបង់បានប្រើបណ្តាញសង្គមមួយនេះ ដើម្បីបញ្ជូនព័ត៌មានចុងក្រោយដល់អ្នកតាមដានរាប់សែននាក់របស់ខ្លួន ខណៈដែលក្រុមនេះដណ្តើមបានការគ្រប់គ្រងនៅអាហ្វហ្គានីស្ថានមកវិញ។ ការណ៍នេះបង្កជាសំណួរលើចំណាត់ការរបស់ក្រុមហ៊ុន Twitter…
-
ហៃទី ៖ ព្យុះ និងគ្រោះទឹកជំនន់វាយលុក ស្របពេលចំនួនអ្នកស្លាប់ដោយសាររញ្ជួយដីចេះតែបន្តកើនឡើង
ទីភ្នាក់ងារការពារស៊ីវិលហៃទីនិយាយថា ចំនួនមនុស្សស្លាប់ដោយសារគ្រោះរញ្ជួយដីកម្រិត ៧,២ រ៉ិចទ័របានកើនឡើងដល់ ១ ៩៤១ នាក់ គិតត្រឹមថ្ងៃអង្គារ ខណៈព្យុះត្រូពិកមួយបានបក់បោកចូលក្នុងប្រទេសនេះដោយនាំជាមួយនូវភ្លៀងធ្លាក់យ៉ាងជោគជាំ បង្កជាបញ្ហាថ្មីមួយទៀតសម្រាប់ប្រជាជនហៃទីដែលរងគ្រោះរួចស្រាប់ហើយ។ យោងតាមទីភ្នាក់ងារកុមាររបស់អង្គការសហប្រជាជាតិ ហៅកាត់ថាយូនីសេហ្វ គ្រោះរញ្ជួយដីកាលពីថ្ងៃសៅរ៍ដែលធ្វើឱ្យមនុស្សជិត ១ សែននាក់រងរបួស ក៏បានបំផ្លាញផ្ទះជាង ៦០ ០០០ ខ្នង និង ៧៦ ០០០ រកការខូចខាត និងប៉ះពាល់ដល់ក្មេងជាងកន្លះលាននាក់។ នៅតាមបណ្ដោយឆ្នេរនៃក្រុង Les Cayes ដែលជាក្រុងមួយក្នុងចំណោមក្រុងពីរដែលរងគ្រោះជាងគេ ប្រជាជនបានចាប់ផ្តើមសាងសង់ជម្រកបណ្តោះអាសន្នរបស់ខ្លួន នៅលើទីលានបាល់ទាត់ ថ្វីបើមានខ្យល់បក់យ៉ាងខ្លាំង និងភ្លៀងធ្លាក់ជោគជាំដែលបណ្ដាលមកពីព្យុះត្រូពិកហ្គ្រេស (Grace) ក៏ដោយ។ មជ្ឈមណ្ឌលព្យុះសង្ឃរាជាតិអាមេរិក បានព្រមានអំពីទឹកជំនន់ភ្លាមៗ និងការរអិលបាក់ដី ក្នុងកម្រិតភ្លៀងធ្លាក់រហូតដល់ ៣៨ សង់ទីម៉ែត្រ។ មន្រ្តីហៃទី ក៏បានប្រកាសឱ្យប្រជាជនប្រយ័ត្នចំពោះអាគារដែលមានស្នាមប្រេះពីការរញ្ជួយដី ព្រោះវាអាចរលំក្រោមទម្ងន់ទឹក។
-
លោកស្រី មឺកែល ថ្កោលទោសការប្រព្រឹត្តរបស់បេឡារូសទៅលើជនភៀសខ្លួន
កាលពីថ្ងៃអង្គារនេះ អធិការបតីអាល្លឺម៉ង់លោកស្រីអេនជេឡា មឺកែលបានថ្កោលទោសការប្រព្រឹត្តរបស់ប្រធានាធិបតីបេឡារូសលោកអាឡិចសាន់ឌឺ លូកាសិនកូទៅលើជនភៀសខ្លួន ហើយបន្ថែមថាអាល្លឺម៉ង់នឹងពិគ្រោះយោបល់យ៉ាងជិតស្និទ្ធជាមួយដៃគូអឺរ៉ុបរបស់ខ្លួនលើការឆ្លើយតបរួមគ្នា។ ក្នុងសន្និសីទសារព័ត៌មានជាមួយនាយករដ្ឋមន្ត្រីអេស្តូនី លោកស្រីមឺកែលបាននិយាយថា៖ «លោកប្រធានាធិបតីលូកាសិនកូ គឺកំពុងប្រើជនភៀសខ្លួន ជាឧទាហរណ៍មកពីប្រទេសអ៊ីរ៉ាក់ ក្នុងវិធីកូនកាត់មួយដើម្បីបំផ្លាញសន្តិសុខ ហើយយើងថ្កោលទោសការធ្វើបែបនេះក្នុងលក្ខខណ្ឌខ្លាំងបំផុត»។ សហភាពអឺរ៉ុបបានចោទប្រកាន់លោកលូកាសិនកូថាប្រើប្រាស់វិបត្តិជនភៀសខ្លួន ដាក់សម្ពាធឱ្យពួកគេដកការដាក់ទណ្ឌកម្មលើបេឡារូស ដែលដើមឡើយត្រូវបានដាក់ដោយសារការបង្ក្រាបចលនាប្រឆាំងនៅបេឡារូស បន្ទាប់មានជម្លោះការបោះឆ្នោតកាលពីខែសីហាឆ្នាំមុន។ ប្រទេសលីទុយអានី ដែលមានព្រំដែនជាប់ជាមួយបេឡារូស បានចោទប្រកាន់ប្រទេសបេឡារូសថាបានជួយដឹកជញ្ជូនជនភៀសខ្លួនមកពីមជ្ឈិមបូព៌ាជាច្រើន ដើម្បីបញ្ជូនទៅសហភាពអឺរ៉ុប។ លោកស្រីមឺកែលបាននិយាយថា៖ «យើងកំពុងសម្របសម្រួលយ៉ាងជិតស្និទ្ធជាមួយដៃគូអឺរ៉ុបលើអ្វីៗ គ្រប់យ៉ាង។ យើងក៏នឹងព្យាយាមប្រកាន់យកជំហររួមមួយដែរ ពីព្រោះការប្រឈមមុខដាក់គ្នាបែបកូនកាត់នេះ ដែលត្រូវបានប្រើដោយបេឡារុស គឺជាការវាយប្រហារមកលើយើងទាំងអស់គ្នានៅក្នុងសហភាពអឺរ៉ុប»។ ស្របពេលជាមួយការដួលរលំរដ្ឋាភិបាលអាហ្វហ្គានីស្ថានបន្ទាប់ពីការដកចេញកងទ័ពអាមេរិក និងលោកខាងលិច គេបានរំពឹងថាវិបត្តិភៀសខ្លួនអឺរ៉ុបនឹងកើនឡើង ធ្វើឱ្យមេដឹកនាំអឺរ៉ុបនានាចាប់ធ្វើការពិភាក្សារកដំណោះស្រាយ៕