អ៊ីរ៉ង់៖ ប្រធានាធិបតីអ៊ីរ៉ង់លោក អ៊ីប្រាហ៊ីម រ៉ៃស៊ី និយាយថា ការ “បរាជ័យយោធា” របស់សហរដ្ឋអាមេរិកនៅអាហ្វហ្គានីស្ថាន បានផ្តល់ឱកាសដើម្បីបង្កើតសន្តិភាពយូរអង្វែងនៅក្នុងប្រទេស។ទូរទស្សន៍រដ្ឋរបស់អ៊ីរ៉ង់បានដកស្រង់សម្តីរបស់លោក រ៉ៃស៊ី ចុះផ្សាយថា ការបរាជ័យផ្នែកយោធារបស់អាមេរិក និងការដកខ្លួនរបស់ពួកគេ វានឹងត្រូវតែក្លាយជាឱកាសដើម្បីស្តារឡើងវិញនូវជីវិតរស់នៅ សន្តិសុខ និងសន្តិភាពយូរអង្វែងនៅក្នុងប្រទេសអាហ្វហ្គានីស្ថាន ។ លោកបន្ថែមថា អ៊ីរ៉ង់គាំទ្រកិច្ចខិតខំប្រឹងប្រែង ដើម្បីស្តារស្ថិរភាពនៅអាហ្វហ្គានីស្ថាន ហើយក្នុងនាមជាប្រទេសជិតខាង និងជាប្រទេសបងប្អូនផងនោះ អ៊ីរ៉ង់អញ្ជើញក្រុមទាំងអស់នៅអាហ្វហ្គានីស្ថាន ឱ្យឈានដល់កិច្ចព្រមព្រៀងថ្នាក់ជាតិមួយ។ទោះជាយ៉ាងណា ប្រធានាធិបតីអាមេរិក លោក ចូ បៃដិន បានចេញមុខថ្លែងការពារការសម្រេចចិត្តរបស់លោក ក្នុងការបន្តដកកងទ័ពអាមេរិកចេញពីអាហ្វហ្កានីស្ថាន ដោយបន្ទោសទៅលើរដ្ឋាភិបាលទីក្រុងកាប៊ុលខ្លួនឯង ដែលជាអ្នកបណ្ដោយឱ្យក្រុមតាលីបង់ឡើងកាន់អំណាចគ្រប់គ្រងប្រទេសជាថ្មី៕ ប្រភព៖ CGTN

អង់គ្លេស៖ រដ្ឋមន្រ្តីការពារជាតិអង់គ្លេសលោក បេន វ៉លឡេស បានគូសបញ្ជាក់ថា ក្រុមតាលីបង់ចូលគ្រប់គ្រងប្រទេសអាហ្វហ្គានីស្ថានបានសម្រេច គឺបង្ហាញពីភាពបរាជ័យមួយរបស់សហគមន៍អន្តរជាតិ ។ ការអះអាងបែបនេះធ្វើឡើងស្របពេលទីក្រុងឡុងដ៍ អំពាវនាវអោយមានកិច្ចប្រជុំមួយនៃមេដឹកនាំក្រុមប្រទេសមានសេដ្ឋកិច្ចជឿនលឿនទាំង ៧ ឬហៅថា G7 ស្តីពីវិបត្តិនៅអាហ្វហ្គានីស្ថាន ។លោក បេន វ៉លឡេស បានប្រាប់ទូរទស្សន៍ BBC ថា យើងទាំងអស់គ្នាដឹងថា អាហ្វហ្គានីស្ថានមិនទាន់បញ្ចប់ទេ… វាជាបញ្ហាមិនទាន់បញ្ចប់សម្រាប់ពិភពលោក…ហើយពិភពលោកត្រូវការជួយស្រោចស្រង់វា ។ ប្រមុខការពារជាតិអង់គ្លេសរូបនេះបន្ថែមថា ការងាររបស់បស្ចិមប្រទេសនៅអាហ្វហ្គានីស្ថាន គឺសម្រេចបានតែពាក់កណ្ដាលប៉ុណ្ណោះ… ប្រសិនបើវាជាការបរាជ័យនោះ វាគឺជាការបរាជ័យរបស់សហគមន៍អន្តរជាតិទាំងមូល ។សូមបញ្ជាក់ថា បន្ទាប់ពីការស្តារអំណាចឡើងវិញរបស់ក្រុមតាលីបង់នោះ នាយករដ្ឋមន្រ្តីអង់គ្លេសលោក បូរីស ចនសុន ក៏បានជំរុញអោយមេដឹកនាំ G7 ពិភាក្សាអំពីស្ថានភាពនៅក្នុងប្រទេសអាស៊ីខាងត្បូង និងដើម្បីការពារការធ្លាក់ចុះផ្នែកមនុស្សធម៌៕ ប្រភព៖ CGTN

អន្តរជាតិ៖ អគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គូដទែរ៉េស បានអំពាវនាវទៅកាន់បណ្តាប្រទេសនានាលើពិភពលោកធ្វើការងាររួមគ្នា ក្នុងការប្រយុទ្ធប្រឆាំងនឹងការគំរាមកំហែងជាសកលពីសំណាក់ក្រុមភេវរករ ដែលកំពុងគ្រប់គ្រងទឹកដីរបស់ប្រទេសអាហ្វហ្គានីស្ថាន ។ លោក ហ្គូដទែរ៉េស បានថ្លែងនៅក្នុងកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខអង្គការសហប្រជាជាតិស្តីពីអាហ្វហ្គានីស្ថានថា សហគមន៍អន្តរជាតិត្រូវតែរួបរួមគ្នាជាធ្លុងមួយ ដើម្បីធ្វើអោយប្រាកដថា ប្រទេសអាហ្វហ្គានីស្ថាននឹងគ្មានថ្ងៃក្លាយជាឋានសួគ៌ដ៏មានសុវត្ថិភាពរបស់ក្រុមភេវរករសាជាថ្មីម្តងទៀតឡើយ ។ លោក ហ្គូដទែរ៉េស បន្ថែមថា ខ្ញុំសូមអំពាវនាវដល់ក្រុមប្រឹក្សាសន្តិសុខ និងសហគមន៍អន្តរជាតិទាំងមូលដើម្បីឈរជាមួយគ្នា ធ្វើការជាមួយគ្នា និងធ្វើសកម្មភាពរួមគ្នា ។ បន្ថែមលើនេះ លោកបានដាស់តឿនប្រទេសនានាឱ្យប្រើគ្រប់វិធីសាស្រ្តទាំងអស់ ដើម្បីកំចាត់ការគំរាមកំហែងជាសកលពីសំណាក់ក្រុមភេវរករនៅអាហ្វហ្គានីស្ថាន និងធានាថា មូលដ្ឋានសិទ្ធិមនុស្សនឹងត្រូវបានគោរព ។ គួរកត់សម្គាល់ កិច្ចប្រជុំខាងលើនេះត្រូវបានរៀបចំឡើងភ្លាមៗនៅឯទីស្នាក់ការកណ្តាលរបស់អង្គការសហប្រជាជាតិ នៅបុរីញូវយ៉ក បន្ទាប់ពីក្រុមសកម្មប្រយុទ្ធតាលីបង់បានចូលកាន់កាប់រដ្ឋធានីកាប៊ុល កាលពីថ្ងៃអាទិត្យសប្តាហ៍មុន ដោយនាំអោយប្រធានាធិបតីអាហ្វហ្គានីស្ថានលោក អាស្រាហ្វ ហ្គានី ភៀសខ្លួនទៅក្រៅប្រទេស ៕ ប្រភព៖ CGTN