-
សារព័ត៌មាន India Today ៖ លោក អាស្រាហ្វ ហ្គានី កំពុងស្ថិតនៅប្រទេសអូម៉ង់ ហើយទំនងជានឹងបន្តដំណើរទៅកាន់សហរដ្ឋអាមេរិក
អូម៉ង់៖ សារព័ត៌មាន India Today បានចុះផ្សាយនៅថ្ងៃចន្ទនេះថា អតីតប្រធានាធិបតីអាហ្វហ្គានីស្ថានលោក ម៉ាហាំម៉ាត់ អាស្រាហ្វ ហ្គានី កំពុងស្ថិតនៅប្រទេសអូម៉ង់ ដោយរូបលោកអាចនឹងបន្តធ្វើដំណើរទៅកាន់សហរដ្ឋអាមេរិក ។ ដំណឹងខាងលើនេះត្រូវបានផ្សព្វផ្សាយបន្ទាប់ពីក្រសួងការបរទេសតាហ្ស៊ីគីស្ថាន ប្រកាសច្រានចោលព័ត៌មានដែលបានចេញផ្សាយកន្លងមកនេះថា លោក ម៉ាហាំម៉ាត់ អាស្រាហ្វ ហ្គានី បានភៀសខ្លួនចូលទៅក្នុងប្រទេសខ្លួន ។ ប្រភពដដែលបានអោយដឹងទៀតថា អតីតទីប្រឹក្សាសន្តិសុខជាតិអាហ្វហ្គានីស្ថានលោក ហាំឌុលឡាហ៍ ម៉ូហ៊ីប ក៏កំពុងស្ថិតនៅជាមួយលោក ហ្គានី ផងដែរ ។ សូមជម្រាបថា អតីតប្រធានាធិបតីអាហ្វហ្គានីស្ថានមួយរូបទៀត គឺលោក ហាមីដ កាហ្សៃ និងប្រធានក្រុមប្រឹក្សាផ្សះផ្សាជាតិជាន់ខ្ពស់ លោក អាប់ឌុលឡាហ៍ អាប់ឌុលឡាហ៍ កំពុងស្ថិតនៅក្នុងរដ្ឋធានីកាប៊ុលនៅឡើយ ដើម្បីចរចាបង្កើតរដ្ឋាភិបាលរួបរួមជាតិមួយជាមួយនឹងក្រុមតាលីបង់ ប៉ុន្តែគេនៅមិនទាន់ដឹងអំពីដំណើរវិវឌ្ឍចុងបញ្ចប់ថា នឹងទៅជាយ៉ាងណានោះឡើយ ៕ ប្រភព៖ Indiatoday
-
ព្រះមហាក្សត្រម៉ាឡេស៊ីរក្សាទុកលោក មូហៃយ៉ីដឌីន យ៉ាសស៊ីន សម្រាប់មុខតំណែងជានាយករដ្ឋមន្រ្តីស្តីទី ក្រោយលោកសុខចិត្តចុះចេញពីតំណែង
ម៉ាឡេស៊ី៖ វិមាននាយករដ្ឋមន្រ្តីនៅថ្ងៃចន្ទនេះបញ្ជាក់ថា នាយករដ្ឋមន្រ្តីម៉ាឡេស៊ី លោក មូហៃយ៉ីដឌីន យ៉ាសស៊ីន បានដាក់ពាក្យសុំលាលែងពីមុខតំណែងទៅកាន់ព្រះមហាក្សត្រហើយ បន្ទាប់ពីទទួលស្គាល់ថា លោកបានបាត់បង់សំឡេងគាំទ្រភាគច្រើននៅក្នុងសភា ប៉ុន្តែលោកនឹងស្ថិតក្នុងមុខតំណែងជានាយករដ្ឋមន្រ្តីស្តីទី ។ រដ្ឋមន្រ្តីវិទ្យាសាស្រ្តម៉ាឡេស៊ី លោក ខរី ចាម៉ាលុដឌីន បានប្រកាសលើបណ្តាញសង្គមថា គណៈរដ្ឋមន្រ្តីទាំងមូលក៏បានដាក់ពាក្យលាលែងរួចហើយដែរ ទៅកាន់ព្រះមហាក្សត្រ ក្រោយលោក មូហៃយ៉ីដឌីន បានចាកចេញពីរាជវាំង ក្រោយចូលគាល់ទ្រង់។ ភ្លាមៗនេះមិនទាន់ច្បាស់នោះទេថា នរណានឹងអាចបង្កើតរដ្ឋាភិបាលថ្មី ដ្បិតពុំមាននរណាម្នាក់មានសំឡេងគាំទ្រភាគច្រើនច្បាស់លាស់នោះឡើយ នៅក្នុងសភា ឬក៏ថាតើការបោះឆ្នោតសកលអាចនឹងធ្វើឡើងបានដែរឬអត់ កំឡុងការរាតត្បាតនៃជំងឺកូវីដ១៩។ យ៉ាងណាមិញ ការសម្រេចចិត្តប្រហែលជាត្រូវធ្លាក់ទៅក្នុងព្រះហស្ថរបស់ព្រះមហាក្សត្រម៉ាឡេស៊ី ព្រះចៅ អាល់ ស៊ូលតង់ អាប់ឌុលឡោះ ព្រោះទ្រង់មានអំណាចអាចតែងតាំងនាយករដ្ឋមន្រ្តី ពីក្នុងចំណោមសមា ជិកសភាបាន ដោយផ្អែកទៅលើអ្នកដែលទ្រង់យល់ថា ទំនងជាមានសំឡេងគាំទ្រភាគច្រើន៕ គួរកត់សម្គាល់ រដ្ឋាភិបាលរបស់លោក មូហៃយ៉ីដឌីន ដែលឡើងកាន់អំណាចកាលពីខែមីនា ឆ្នាំ២០២០ បានប្រឈមមុខនឹងសម្ពាធពីសំណាក់ក្រុមប្រឆាំង រួមទាំងសាធារណជន ដែលមានការខឹងសម្បារ ដោយសារតែការគ្រប់គ្រងវិបត្តិជំងឺកូវីដ១៩មិនបានល្អ។ ការលាលែងពីតំណែងនេះ ធ្វើអោយលោក មូហៃយ៉ីដឌីន ក្លាយជាមេដឹកនាំម៉ាឡេស៊ី ដែលកាន់អំណាចបានខ្លីជាងគេបំផុតក្នុងប្រវត្តិសាស្រ្ត ៕ ប្រភព៖ Reutes
-
រញ្ជួយដី៧.២រិចទ័រ មនុស្សស្លាប់ប្រមាណ១៣០០នាក់នៅហៃទី
-
លោក ដូណាល់ ត្រាំ អំពាវនាវអោយលោក ចូ បៃដិន ចុះចេញពីតំណែង ដោយសារក្រុមតាលីបង់ចូលគ្រប់គ្រងអំណាចនៅអាហ្វហ្គានីស្ថាន
អាមេរិក៖ អតីតប្រធានាធិបតីអាមេរិកលោក ដូណាល់ ត្រាំ បានអំពាវនាវអោយ អ្នកស្នងតំណែងរបស់លោកគឺលោក ចូ បៃដិន លាលែងពីតំណែងកាលពីថ្ងៃអាទិត្យម្សិលមិញ ជុំវិញការកាន់កាប់អាហ្វហ្គានីស្ថានយ៉ាងឆាប់រហ័សពីសំណាក់ក្រុមតាលីបង់ ដោយសារការសម្រេចដកកងទ័ពអាមេរិកចេញពីប្រទេសនេះ បន្ទាប់ពីរក្សាវត្តមានយោធាខ្លួនជិត២០ឆ្នាំ។ អតីតប្រធានាធិបតីបានសរសេរក្នុងសេចក្តីប្រកាសមួយថា វាជាពេលដែលលោក ចូ បៃដិន លាលែងពីតំណែងក្នុងរឿងអាម៉ាស់ចំពោះអ្វីដែលលោកបានអនុញ្ញាតឲ្យកើតឡើងនៅអាហ្វហ្គានីស្ថាន ព្រមជាមួយនឹងការផ្ទុះជំងឺកូវីដ១៩ដ៏អាក្រក់នៅក្នុងសហរដ្ឋអាមេរិក បញ្ហាអន្តោប្រវេសន៍ក្នុងស្រុក គោលនយោបាយថាមពល និង សេដ្ឋកិច្ច ។ លោក ត្រាំ បាននិយាយនៅក្នុងសេចក្តីថ្លែងការណ៍មួយផ្សេងទៀតកាលពីថ្ងៃអាទិត្យម្សិលមិញថា អ្វីដែលលោក ចូ បៃដិន បានធ្វើជាមួយអាហ្វហ្គានីស្ថាន គឺជារឿងព្រេងនិទាន ។ វានឹងក្លាយជាការបរាជ័យដ៏ធំបំផុតមួយនៅក្នុងប្រវត្តិសាស្រ្តអាមេរិក ។ សូមបញ្ជាក់ថា ក្រុមតាលីបង់ប្រកាសថា សង្គ្រាមនៅអាហ្វហ្គានីស្ថានបានបញ្ចប់ហើយ ក្រោយកងកម្លាំងរបស់ពួកគេបានចូលទៅគ្រប់គ្រងវិមានប្រធានាធិបតីអាហ្វហ្គានីស្ថាននៅក្នុងរដ្ឋធានីកាប៊ុល ខណៈកងទ័ពអាមេរិកបានចាកចេញ ហើយប្រទេសលោកខាងលិចមួយចំនួនកំពុងបន្តជម្លៀសជនជាតិរបស់ពួកគេ ៕ ប្រភព៖ CGTN
-
ក្រុមតាលីបង់ប្រកាសថា សង្គ្រាមបានបញ្ចប់ហើយ បន្ទាប់ពីប្រធានាធិបតី និងមន្រ្តីទូតភៀសខ្លួនចេញពីរដ្ឋធានីកាប៊ុល
កាប៊ុល៖ ក្រុមតាលីបង់ប្រកាសថា សង្គ្រាមនៅអាហ្វហ្គានីស្ថានបានបញ្ចប់ហើយ ក្រោយកងកម្លាំងរបស់ពួកគេបានចូលទៅគ្រប់គ្រងវិមានប្រធានាធិបតីអាហ្វហ្គានីស្ថាននៅក្នុងរដ្ឋធានីកាប៊ុល ខណៈកងទ័ពអាមេរិកបានចាកចេញ ហើយប្រទេសលោកខាងលិចមួយចំនួនកំពុងបន្តជម្លៀសជនជាតិរបស់ពួកគេ ។ អ្នកនាំពាក្យការិយាល័យនយោបាយក្រុមតាលីបង់លោក ម៉ូហាំម៉ាត់ ណាអ៊ីម បានប្រាប់ទូរទស្សន៍ Al Jazeera ថា ថ្ងៃនេះគឺជាថ្ងៃដ៏អស្ចារ្យសម្រាប់ប្រជាជនអាហ្វហ្គានីស្ថាន និងកងកម្លាំងប្រយុទ្ធរបស់យើង។ ពួកគេបានមើលយ៉ាងច្បាស់នូវផលដែលទទួលបានមកពីការខិតខំប្រឹងប្រែង និងបូជារបស់ពួកគេអស់រយៈពេល ២០ឆ្នាំ។ អរគុណព្រះជាម្ចាស់! សង្គ្រាមបានបញ្ចប់ហើយនៅក្នុងប្រទេសនេះ។ អ្នកនាំពាក្យរបស់ក្រុមតាលីបង់បន្ថែមថា របបដឹកនាំថ្មីនៅអាហ្វហ្គានីស្ថាននឹងត្រូវបង្កើតឡើងយ៉ាងច្បាស់លាស់នាពេលឆាប់ៗខាងមុខ ហើយរដ្ឋាភិបាលតាលីបង់មិនចង់រស់នៅដោយឯកោនោះឡើយ ដោយយើងនឹងអំពាវនាវឲ្យមានទំនាក់ទំនងជាមួយអន្តរជាតិប្រកបដោយសន្តិភាព។ យើងបានទាមទារយកមកវិញ នូវអ្វីដែលយើងចង់បាន នោះគឺសេរីភាពនៃប្រទេសរបស់យើង និងឯករាជ្យភាពនៃប្រជាជន។ យើងនឹងមិនអនុញ្ញាតឲ្យនរណាម្នាក់ប្រើប្រាស់ទឹកដីរបស់យើង ដើម្បីគំរាមកំហែងអ្នកផ្សេងទៀតឡើយ ហើយយើងក៏មិនចង់បង្កការគំរាមកំហែង ចំពោះនរណាម្នាក់នោះដែរ ។ សម្រាប់ប្រធានាធិបតីអាហ្វហ្គានីស្ថានលោក ម៉ូហាំម៉ាត់ អាស្រាហ្វ ហ្គានី ដែលបានភៀសខ្លួនចេញពីប្រទេសនេះកាលពីថ្ងៃអាទិត្យម្សិលមិញបានអះអាងថា លោកសុខចិត្តធ្វើបែបនេះ គឺដើម្បីចៀសវាងការបង្ហូរឈាមគ្នា ៕ ហើយមកទល់ពេលនេះ មេបញ្ជាការក្រុមតាលីបង់ និងកងកម្លាំងប្រដាប់អាវុធឯទៀតកំពុងគ្រប់គ្រងនៅវិមានប្រធានាធិបតី ៕ ប្រភព៖ CNA
-
មន្ទីរបញ្ចកោណអនុញ្ញាតអោយបញ្ជូនកងទ័ព១ពាន់នាក់បន្ថែមទៅកាន់រដ្ឋធានីកាប៊ុល ដើម្បីជម្លៀសពលរដ្ឋអាមេរិក និងអាហ្វហ្កានីស្ថាន
អាមេរិក៖ មន្ទីរបញ្ចកោណរបស់ក្រសួងការពារជាតិអាមេរិកបានអនុញ្ញាតអោយបញ្ជូនទាហាន១ពាន់នាក់បន្ថែមទៀត ទៅជួយជម្លៀសពលរដ្ឋអាមេរិក និងអាហ្វហ្គានីស្ថានចេញពីទីក្រុងកាប៊ុល បន្ទាប់ពីស្ថានទូតខ្លួនព្រមានថា ស្ថានការណ៍សន្តិសុខនៅអាកាសយានដ្ឋានក្នុងទីក្រុងនេះអាចផ្លាស់ប្តូរយ៉ាងលឿន ។ អ្នកស្រុកបានរាយការណ៍អំពីការបាញ់រប៉េះរប៉ោះនៅក្នុងតំបន់អាកាសយានដ្ឋានអន្តរជាតិ Hamid Karzai ដែលជាចំណុចជម្លៀសមនុស្សចេញពីអាហ្វហ្កានីស្ថាន នៅពេលទាហានអាមេរិកជួយការចាកចេញរបស់ពលរដ្ឋខ្លួន ក្រោយពួកតាលីបង់ចូលក្នុងទីក្រុងកាប៊ុល ។ ស្ថានទូតអាមេរិកនិយាយថា មានសេចក្តីរាយការណ៍អំពីអគ្គិភ័យ ដូច្នេះយើងបានណែនាំអោយជនជាតិអាមេរិករកកន្លែងការពារខ្លួន ទោះជាយ៉ាងណារបាយការណ៍អំពីភ្លើងឆេះនេះមិនអាចសុំការបញ្ជាក់បានទេ នៅពេលជនបរទេស និងអាហ្វហ្កានីស្ថានសំរុកចាកចេញ ។ សូមបញ្ជាក់ថា ការបន្លែមកងកម្លាំងខាងលើនេះ នាំអោយទាហានអាមេរិកដែលត្រូបានបញ្ជូនទៅការពារ និងជួយជម្លៀសជនជាតិអាមេរិកចេញពីអាហ្វហ្គានីស្ថានឡើងដល់៦ពាន់នាក់ ។ ស្របពេលជាមួយគ្នានេះដែរ អង្គការ NATO ក៏កំពុងជួយការងារជម្លៀសនេះផងដែរ ដោយមន្ត្រីម្នាក់និយាយថា ជើងហោះហើរពាណិជ្ជកម្មទាំងអស់ត្រូវផ្អាក និងទុកតែយន្តហោះយោធាអោយដំណើរការ ៕ ប្រភព៖ CNA
-
អ៊ីស្រាអែលខឹងសម្បារ ខណៈប្រទេសប៉ូឡូញអនុម័តច្បាប់កំណត់ការទាមទារទ្រព្យសម្បត្តិបាត់បង់
ប្រធានាធិបតីប្រទេសប៉ូឡូញបានសម្រេចចុះហត្ថលេខាលើច្បាប់មួយដែលនឹងកំណត់សមត្ថភាពរបស់ជនជាតិជ្វីបក្នុងការទាមទារទ្រព្យសម្បត្តិរឹបអូសដោយរបបណាស៊ីអាល្លឺម៉ង់កាលពីសង្គ្រាមលោកលើកទី២ និងគ្រប់គ្រងដោយរបបកុម្មុយនិស្តក្រោយសង្គ្រាម ធ្វើឱ្យខឹងសម្បារពីប្រទេសអ៊ីស្រាអែល ដែលនិយាយថាច្បាប់នេះ«រើសអើងជនជាតិជ្វីប»។ កាលពីថ្ងៃសៅរ៍ទី ១៤ សីហា លោកប្រធានាធិបតី Andrzej Duda បាននិយាយនៅក្នុងសេចក្ដីថ្លែងការណ៍មួយថា៖ «ខ្ញុំបានធ្វើការសម្រេចនៅថ្ងៃនេះទៅលើច្បាប់នេះ ដែលក្នុងរយៈពេលប៉ុន្មានថ្ងៃនេះគឺជាប្រធានបទនៃការតស៊ូមតិយ៉ាងរស់រវើកទាំងក្នុងនិងក្រៅប្រទេស»។ លោកបានបន្តថា៖ «បន្ទាប់ពីការវិភាគស៊ីជម្រៅ ខ្ញុំបានសម្រេចចុះហត្ថលេខាលើច្បាប់នេះ»។ មុនសង្គ្រាមលោកលើកទី២ ប្រទេសប៉ូឡូញមានសហគមន៍ជនជាតិជ្វីបធំជាងគេក្នុងពិភពលោក ប៉ុន្តែត្រូវបានបំផ្លាញស្ទើរទាំងស្រុងដោយយុទ្ធនាការប្រល័យពូជសាសន៍របស់របបណាស៊ីអាល្លឺម៉ង់ ដែលបានធ្វើការរឹបអូសទ្រព្យសម្បត្តិទាំងអស់របស់ពួកគេ។ តាំងពីពេលនោះមកអតីតម្ចាស់ទ្រព្យសម្បត្តិទាំងនេះ និងកូនចៅរបស់ពួកគេបានព្យាយាមធ្វើការទាមទារសំណង។ មុនការអនុម័តច្បាប់ខាងលើ ជនជាតិជ្វីប ដែលបានចាកចេញពីប្រទេសប៉ូឡូញ និងកូនចៅរបស់ពួកគេ អាចដាក់ពាក្យបណ្ដឹងថាទ្រព្យសម្បត្តិរបស់ពួកគេត្រូវបានរឹបអូសដោយខុសច្បាប់ ហើយអាចទាមទារឱ្យប្រគល់មកវិញ ប៉ុន្តែអាជ្ញាធរប៉ូឡូញបានអះអាងថាការធ្វើបែបនេះអាចបង្កបញ្ហាភាពមិនច្បាស់លាស់អំពីកម្មសិទ្ធិទ្រព្យសម្បត្តិទាំងនេះ។ ច្បាប់ថ្មីនេះបានដាក់កំណត់រយៈពេល ៣០ឆ្នាំសម្រាប់ការដាក់ពាក្យបណ្ដឹង ខណៈពេលដែលសង្គ្រាមលោកលើកទី២បានបញ្ចប់អស់ជិត ៧៦ឆ្នាំមកហើយ។ នាយករដ្ឋមន្ត្រីអ៊ីស្រាអែលលោក Naftalli Bennett និងរដ្ឋមន្ត្រីការបរទេសលោក Yair Lapid បានធ្វើការរិះគន់ច្បាប់នេះថារើសអើងជនជាតិជ្វីប ហើយបានបញ្ជាឱ្យមន្ត្រីការទូតជាន់ខ្ពស់ប្រចាំប្រទេសប៉ូឡូញឱ្យត្រឡប់មកមាតុភូមិវិញ ខណៈឯកអគ្គរដ្ឋទូតដែលទើបតែងតាំងត្រូវបានបញ្ជាមិនឱ្យធ្វើដំណើរទៅប្រទេសប៉ូឡូញ៕
-
រដ្ឋាភិបាលអាហ្វហ្គានីស្ថានព្យាយាមការពារបន្ទាយចុងក្រោយ ខណៈតាលីបង់ពង្រីកការកាន់កាប់
កាលពីថ្ងៃសៅរ៍ ទី១៤ សីហាក្រុមឧទ្ទាមតាលីបង់បានចូលកាន់កាប់ទីក្រុងដ៏សំខាន់ Mazar-i-Sharif នៅភាគខាងជើងប្រទេសអាហ្វហ្គានីស្ថាន ធ្វើឱ្យកងទ័ពរដ្ឋាភិបាលរត់គេចពីតំបន់នេះ ហើយធ្វើឱ្យសមរភូមិកាន់តែខិតជិតរដ្ឋធានីកាប៊ុល ខណៈពេលដែលបណ្ដាប្រទេសលោកខាងលិចបានចាប់ផ្ដើមជម្លៀសប្រជាជនរបស់ពួកគេចេញពីទីក្រុងនេះ។ ក្រុមតាលីបង់បានចូលកាន់កាប់ទីក្រុងMazar-i-Sharif ដោយស្ទើរតែគ្មានការប្រឆាំង ខណៈពេលដែលកងកម្លាំងរដ្ឋាភិបាលបានធ្វើការភៀសខ្លួនចេញពីទីក្រុងនេះទៅកាន់ប្រទេសជិតខាងអ៊ូបេគីស្ថាន មានចម្ងាយប្រមាណ ៨០ គីឡូម៉ែត្រខាងជើងទីក្រុងនេះ។ មេដឹកនាំកងកម្លាំងជនជាតិភាគតិចនៅទីក្រុងនេះ បានអះអាងថាការចូលកាន់កាប់ដោយងាយស្រួលនេះគឺបង្កដោយ «ការសមគំនិត»។ ស្របពេលជាមួយការវាយលុកដ៏រហ័សនេះ រដ្ឋាភិបាលបណ្ដាប្រទេសលោកខាងលិច គឺកំពុងពន្លឿនផែនការដើម្បីជម្លៀសបុគ្គលិកស្ថានទូត ពលរដ្ឋ និងជនជាតិអាហ្វហ្គានីស្ថានដែលបានធ្វើការឱ្យពួកគេ។ កងទ័ពអាមេរិកបានមកដល់ទីក្រុងកាប៊ុលដើម្បីការពារប្រតិបត្តិការនិងរក្សាការគ្រប់គ្រងអាកាសយានដ្ឋានអន្តរជាតិរបស់ទីក្រុងនេះ។ កាលពីថ្ងៃសៅរ៍ ប្រធានាធិបតីអាមេរិកលោកចូ បៃដិនបានអនុម័តការដាក់ពង្រាយទាហានអាមេរិកបន្ថែម ៥០០០ នាក់ទៅអាហ្វហ្គានីស្ថានដើម្បីជួយជម្លៀសប្រជាជន និងធានាឱ្យមានការដកខ្លួនមាន «សណ្ដាប់ធ្នាប់ និងសុវត្ថិភាព» របស់បុគ្គលិកយោធាអាមេរិក។ ការដាក់ពង្រាយនេះ នឹងរួមមានទាហាន ១០០០ នាក់មកពីកងពលធំឆត្រយោងទី៨២។ សារព័ត៌មានអង់គ្លេសបានរាយការណ៍ថាឯកអគ្គរាជទូតអង់គ្លេសប្រចាំអាហ្វហ្គានីស្ថានត្រូវបានគេរំពងថានឹងចាកចេញពីប្រទេសនេះនៅល្ងាចថ្ងៃអាទិត្យ។ អង់គ្លេស ដែលបានបញ្ជូនទាហានបន្ថែមចំនួន ៦០០ នាក់ បានពន្លឿនការខ្លួនជនជាតិអង់គ្លេសដោយសារការព្រួយបារម្ភអំពីការធ្លាក់អាកាសយានដ្ឋានក្នុងដៃក្រុមតាលីបង់៕
-
យន្តហោះពន្លត់អគ្គិភ័យរុស្ស៊ី ធ្លាក់នៅភាគខាងត្បូងប្រទេសតួកគី
ក្រសួងការពារជាតិរុស្ស៊ីនិយាយថា យន្តហោះពន្លត់អគ្គិភ័យ Be-200 របស់ខ្លួន បានធ្លាក់នៅភាគខាងត្បូងប្រទេសតួកគីកំឡុងពេលបំពេញបេសកកម្មពន្លត់ភ្លើងឆេះព្រៃក្នុងតំបន់ Bertiz កាលពីថ្ងៃសៅរ៍ចុងសប្ដាហ៍មុន ដោយសម្លាប់មនុស្សទាំង ៨ នាក់នៅលើយន្តហោះ។ ក្រសួងដដែលថា អ្នកដែលស្លាប់រួមមានជនជាតិរុស្ស៊ី ៥ នាក់ និងតួកគី ៣ នាក់។ យោងតាមសារព័ត៌មានក្នុងស្រុករបស់តួកគី មកទល់ពេលនេះ គេមិនទាន់ដឹងពីមូលហេតុច្បាស់លាស់ថាយន្តហោះនេះធ្លាក់បណ្ដាលមកពីអ្វីនោះទេ ប៉ុន្តែក្រុមអ្នកស៊ើបអង្កេតកំពុងតែដំណើរការការស្រាវជ្រាវរបស់ខ្លួន។ Be-200 គឺជាយន្តហោះ ដែលមានម៉ាស៊ីនពីរត្រូវបានប្រើនៅក្នុងប្រទេសរុស្ស៊ី និងប្រទេសដទៃទៀតដើម្បីពន្លត់ភ្លើងឆេះព្រៃ និងអាចហោះហើរបានច្រើនជើង ដោយមានសមត្ថភាពទម្លាក់ទឹកបានរហូតដល់ ២៧០ តោនក្នុងបេសកកម្មតែមួយ។ ភ្លើងឆេះព្រៃនៅតំបន់មេឌីទែរ៉ាណេរបស់ប្រទេសទួរគី បានចាប់ផ្តើមកាលពីចុងខែកក្កដា ដោយដុតបំផ្លាញព្រៃឈើរាប់ពាន់ហិចតា ដែលភាគច្រើននៅខេត្តជាប់សមុទ្ររួមមានខេត្ត Mugla និង Antalya និងបានសម្លាប់មនុស្សយ៉ាងហោចណាស់ ៨ នាក់។ អ្នកជំនាញខាងអាកាសធាតុនិយាយថា គ្មានអ្វីដែលគួរឱ្យសង្ស័យនោះទេដែលថាការប្រែប្រួលអាកាសធាតុពីការដុតធ្យូងថ្ម ប្រេង និងឧស្ម័នធម្មជាតិ ជាកត្តាជំរុញឱ្យមានព្រឹត្តិការណ៍ធ្ងន់ធ្ងរដូចជារលកកំដៅ គ្រោះរាំងស្ងួត ភ្លើងឆេះព្រៃ ទឹកជំនន់ និងព្យុះ។
-
វីតធឺរបិទគណនីបក្សប្រឆាំងរបស់ឥណ្ឌា ជុំវិញការបង្ហាញអត្តសញ្ញាណកុមារីដែលរងគ្រោះដោយការរំលោភ និងសម្លាប់
ញូវដេលី៖ គណបក្សសមាជជាតិឥណ្ឌា ដែលជាបក្សប្រឆាំងដ៏ធំរបស់ឥណ្ឌា បានចោទប្រកាន់ Twitter ថាបានរារាំងសេរីភាពនៃការបញ្ចេញមតិ ក្រោយក្រុមហ៊ុនបណ្ដាញសង្គមមួយនេះ ចាត់វិធានការប្រឆាំងនឹងធ្វីតរាប់រយដែលបង្ហាញអត្តសញ្ញាណក្រុមគ្រួសាររបស់កុមារីម្នាក់ដែលត្រូវបានរំលោភ និងសម្លាប់។ ចំណាត់ការរបស់ Twitter ធ្វើឡើងបន្ទាប់ពីមានការអំពាវនាវពីទីភ្នាក់ងារការពារកុមាររបស់ឥណ្ឌា ដើម្បីបិទរាល់ធ្វីតដែលខ្លួននិយាយថា បានបង្ហាញអត្តសញ្ញាណក្មេងស្រីអាយុ ៩ ឆ្នាំម្នាក់ដែលត្រូវបានសម្លាប់នៅទីក្រុងញូវដេលីកាលពីដើមខែនេះ។ កាលពីថ្ងៃទី ៤ ខែសីហា មេដឹកនាំសភាជាន់ខ្ពស់ និងជាសមាជិកនៃគណបក្សសមាជជាតិ លោក Rahul Gandhi បានបង្ហោះនៅបណ្ដាញសង្គមធ្វីតធឺរដោយភ្ជាប់នូវរូបថតរបស់លោកជាមួយឪពុកម្ដាយរបស់ក្មេងស្រីជនរងគ្រោះ និងសរសេរថា «ទឹកភ្នែករបស់ឪពុកម្ដាយបង្ហាញពីរឿងមួយ គឺកូនស្រីរបស់ពួកគេ ជាកូនស្រីរបស់ប្រទេសនេះ សមនឹងទទួលបានយុត្តិធម៌»។ អ្នកនាំពាក្យគណបក្ស លោក Rohan Gupta និយាយថា ក្រោយពីរបស់លោក Gandhi បានបង្ហោះបែបនេះ គណនីរបស់ខ្លួនចំនួន ៥ ០០០ ត្រូវបានបិទ។ លោកបានចោទប្រកាន់ក្រុមហ៊ុននេះថា «ធ្វើសកម្មភាពក្រោមសម្ពាធរបស់រដ្ឋាភិបាល»។ អ្នកនាំពាក្យរបស់ក្រុមហ៊ុនធ្វីតធឺរនិយាយថា ខ្លឹមសារជាក់លាក់ដែលស្ថាប័នសិទ្ធិកុមាររបស់ឥណ្ឌាបានដៅ ត្រូវបានពិនិត្យ និងចាត់ទុកថាបានរំលោភលើច្បាប់របស់ក្រុមហ៊ុន ព្រោះវាអាចបង្ហាញពីអត្តសញ្ញាណរបស់ឪពុកម្ដាយជនរងគ្រោះនៃការរំលោភបំពានផ្លូវភេទ។ យោងតាមច្បាប់របស់ធ្វីតធ័រ ប្រសិនបើអ្នកប្រើប្រាស់បង្ហោះអ្វីដោយបំពានគោលការណ៍របស់ខ្លួន ហើយបើមិនលុបចោលទេ នោះក្រុមហ៊ុននឹងបិទគណនី។…