-
ថៃពន្យារពេលបិទខ្ទប់ប្រឆាំងនឹងជំងឺ Covid-19 រយៈពេលពីរសប្តាហ៍ទៀត (មានវីដេអូ)
-
ថៃបន្តរកឃើញអ្នកឆ្លង Covid-19 ថ្មីៗចំនួន១ម៉ឺន៧ពាន់៩៧០ករណី និងស្លាប់១៧៨នាក់ទៀតនៅក្នុងរបាយការណ៍ថ្ងៃចន្ទនេះ (មានវីដេអូ)
-
បារាំងថា នឹងទទួលទេសចរបរទេសជាង៥០លាននាក់ក្នុងឆ្នាំ២០២១ ភ្ញៀវចាក់វ៉ាក់សាំង និងតេស្តគ្មានកូវីដ
រដ្ឋមន្ត្រីទេសចរបារាំង Jean-Baptiste Lemoyne បាននិយាយកាលពីថ្ងៃទី១ សីហា ម្សិលមិញថា ប្រទេសបារាំងមានក្តីសង្ឃឹមថា នឹងទទួលបានទេសចរបរទេសជាង៥០លាននាក់ នៅឆ្នាំ២០២១ កំណើន៤៣ភាគរយ បើធៀបនឹងឆ្នាំ២០២០។ លោកថា នេះគឺអរគុនដល់ការងើបឡើងវិញ នៃទីផ្សារអឺរ៉ុប។ លោកបានប្រាប់កាសែត Le Journal de Dimanche ថា «ឆ្នាំនេះ ពួកយើងសង្ឃឹមថា នឹងស្វាគមន៍ទេសចរបរទេស៥០លាននាក់ ខណៈដែលឆ្នាំមុនមាន៣៥លាននាក់ ហើយកាលពីឆ្នាំ២០១៩ មាន៩០លាននាក់។ រដូវក្តៅនេះគឺជាក្តីសង្ឃឹមខ្លាំងមួយ»។លំហូរភ្ញៀវទេសចរបារាំងត្រូវបានគេមើលឃើញថា មានមកពីបណ្តាប្រទេសអឺរ៉ុប ដូចជាអាល្លឺម៉ង់ ហូឡង់ ប៊ែលហ្សិក លើកលែងតែអង់គ្លេសដែលសម្រេចឲ្យពលរដ្ឋខ្លួនដាច់ដោយឡែក១៤ថ្ងៃ ពេលមកពីបារាំងវិញនោះ នេះបើតាមលោករដ្ឋមន្ត្រីដដែល។ លោកក៏លើកឡើងពីការងើបឡើងវិញនៃទីផ្សារអាមេរិក តែភ្ញៀវទេសចរអាស៊ីនឹងមិនទាន់ប្រសើរវិញទេ អាចរហូតដល់ឆ្នាំ២០២២ឯណោះ។ ទាក់ទងនឹងបញ្ហាកូវីដ១៩វិញ លោករដ្ឋមន្ត្រីសន្យាថា នឹងឆ្លើយតបចំពោះជំងឺរាតត្បាតនេះ ក្នុងនោះ ភ្ញៀវទេសចរបរទេសត្រូវតែចាក់វ៉ាក់សាំងរួច ឬ តេស្តថាគ្មានកូវីដ១៩ ជាដើម៕
-
មេដឹកនាំយោធាមីយ៉ាន់ម៉ាសន្យាថា នឹងរៀបចំការបោះឆ្នោត និងត្រៀមខ្លួនរួចរាល់ដើម្បីធ្វើការជាមួយអាស៊ាន
មីយ៉ាន់ម៉ា៖ មេដឹកនាំយោធាមីយ៉ាន់ម៉ា លោក មីន អោង ហ្លេង នៅថ្ងៃអាទិត្យម្សិលមិញ បានសន្យាជាថ្មីម្តងទៀតអំពីការបោះឆ្នោតពហុបក្ស ហើយថា រដ្ឋាភិបាលរបស់លោកបានត្រៀមខ្លួនរួចជាស្រេច ដើម្បីធ្វើការជាមួយបេសកជនពិសេសណាមួយ ដែលត្រូវបានជ្រើសរើសដោយសមាគមប្រជាជាតិអាស៊ីអាគ្នេយ៍ (អាស៊ាន) ។ មេដឹកនាំយោធាមីយ៉ាន់ម៉ារូបនេះបានសង្កត់ធ្ងន់ថា យើងនឹងដកចេញវិញនូវបទបញ្ញតិនៃការប្រកាសដាក់រដ្ឋក្នុងភាពអាសន្ននៅក្នុងខែសីហា ឆ្នាំ២០២៣ខាងមុខ ហើយលោកបានសន្យាថា នឹងរៀបចំការបោះឆ្នោតពហុបក្ស ។ លោក មីន អោង ហ្លេង បាននិយាយបែបនេះនៅក្នុងសុន្ទរកថាតាមទូរទស្សន៍មួយ ពោលគឺរយៈពេលប្រាំមួយខែបន្ទាប់ពីកងយោធាបានដណ្តើមអំណាចពីរដ្ឋាភិបាលស៊ីវិលរបស់លោកស្រី អោង សាន ស៊ូជី ។ សូមជម្រាបផងដែរថា បណ្តារដ្ឋមន្រ្តីការបរទេសអាស៊ាននឹងជួបប្រជុំនៅថ្ងៃច័ន្ទដើមសប្តាហ៍នេះ នៅពេលដែលអ្នកការទូតនិយាយថា ពួកគេមានបំណងចាត់បេសកជនពិសេសដែលមានភារកិច្ចដើម្បីបញ្ចប់អំពើហិង្សា និងលើកកម្ពស់ការសន្ទនារវាងរបបយោធា និងក្រុមប្រឆាំង ៕ ប្រភព៖ Reuters
-
ថៃពន្យារពេលវិធានការណ៍បិទខ្ទប់ និងបំរាមគោចរដើម្បីទប់ស្កាត់ជំងឺ Covid-19 រយៈពេលពីរសប្តាហ៍ទៀត
ថៃ៖ រដ្ឋាភិបាលថៃបានសម្រេចពន្យារពេលបិទខ្ទប់ និងវិធានការរឹតបន្តឹងដើម្បីទប់ស្កាត់ជំងឺកូវីដ១៩រយៈពេលពីរសប្តាហ៍ទៀត ដែលនឹងចាប់ផ្តើមពីថ្ងៃទីអង្គារ ទី៣ ខែសីហានេះតទៅ នៅក្នុងរាជធានី និងនៅតាមបណ្តាខេត្តជុំវិញដែលមានហានិភ័យខ្ពស់ ខណៈដែលប្រទេសនេះកំពុងឆ្លើយតបទៅនឹងការរីករាលដាលដ៏អាក្រក់បំផុតរបស់ខ្លួន ។ ជំនួយការអ្នកនាំពាក្យរបស់មជ្ឈមណ្ឌលគ្រប់គ្រងស្ថានការណ៍ជំងឺកូវីដ១៩ថៃ (CCSA) លោកស្រី Apisamai Srirangson បាននិយាយនៅថ្ងៃអាទិត្យម្សិលមិញថា បម្រាមគោលចរនឹងចាប់ផ្តើមអនុវត្តពីម៉ោង៩យប់ ដល់ម៉ោង៤ព្រឹក ហើយវិធានការណ៍រឹតបន្តឹងផ្សេងទៀតនឹងត្រូវដាក់ទៅលើទីក្រុងបាងកក និង២៨ខេត្តផ្សេងទៀតរយៈពេលពីរសប្តាហ៍ ពោលគឺចាប់ផ្តើមពីថ្ងៃស្អែកនេះតទៅ ។ សូមរំលឹកផងដែរថា ទីក្រុងបាងកក និងបណ្តាខេត្តនៅជុំវិញ ត្រូវបានដាក់ឲ្យស្ថិតក្រោមវិធានការបិទខ្ទប់រយៈពេល៣សប្តាហ៍រួចមកហើយ ។ ការរឹតត្បិតបន្ថែមលើការធ្វើដំណើរ និងបម្រាមគោចរពេលយប់ត្រូវបានអនុវត្តកាន់តែតឹងតែង ដោយផ្សារ និងហាងលក់ទំនិញភាគច្រើនត្រូវបិទទ្វារ លើកលែងផ្សារទំនើបធំៗ និងឱសថស្ថាន ៕ ប្រភព៖ Bangkok Post
-
ថៃបន្តរកឃើញអ្នកឆ្លង Covid-19 ថ្មីៗចំនួន១ម៉ឺន៧ពាន់៩៧០ករណី និងស្លាប់១៧៨នាក់ទៀតនៅក្នុងរបាយការណ៍ថ្ងៃចន្ទនេះ
ថៃ៖ ក្រសួងសុខាភិបាលថៃ នៅព្រឹកថ្ងៃចន្ទនេះ បានបន្តរកឃើញអ្នកឆ្លងជំងឺកូវីដ១៩ថ្មីៗចំនួន១ម៉ឺន៧ពាន់៩៧០ករណី និងស្លាប់១៧៨នាក់បន្ថែមទៀត នៅក្នុងរយៈពេល២៤ម៉ោងចុងក្រោយនេះ ។ នៅក្នុងចំណោមករណីឆ្លងថ្មីៗទាំងអស់ខាងលើនេះ មាន១ម៉ឺន៧ពាន់៧៩៥ករណីជាប្រជាជនទូទៅ និង ១៧៥ករណីទៀតជាអ្នកទោសក្នុងពន្ធនាគារ ។ ចាប់តាំងពីថ្ងៃទី១ ខែមេសាមក នៅពេលជំងឺកូវីដ១៩រលកទី៣ផ្ទុះឡើង នៅទូទាំងប្រទេសថៃមានអ្នកជំងឺកូវីដ១៩ចំនួន៦០ម៉ឺន៤ពាន់៤២១ករណី ក្នុងនោះមានអ្នកជំងឺ៣៩ម៉ឺន១ពាន់៨១៥នាក់បានជាសះស្បើយឡើងវិញ ។ ចាប់តាំងពីជំងឺរាតត្បាតនេះផ្ទុះឡើងកាលពីដើមឆ្នាំមុនមក នៅទូទាំងប្រទេសថៃមានអ្នកឆ្លងជំងឺកូវីដ១៩ចំនួន៦៣ម៉ឺន៣ពាន់២៨៤ករណី និងអ្នកជំងឺ៤១ម៉ឺន៩ពាន់២៤១នាក់បានជាសះស្បើយឡើងវិញ ។ ចំណែកចំនួនអ្នកស្លាប់ក្នុងរលកទី៣ មានចំនួន៥ពាន់៧៧នាក់ ធ្វើអោយអ្នកស្លាប់សរុបចាប់តាំងពីរោគរាតត្បាតផ្ទុះឡើងកាលពីដើមឆ្នាំមុនមក កើនឡើងដល់៥ពាន់១៦៨នាក់ ៕ ប្រភព៖ Bangkok Post
-
វៀតណាមបន្តរកឃើញអ្នកឆ្លង Covid-19 ថ្មីៗចំនួន៣ពាន់១៩៨ករណីបន្ថែមទៀតនៅក្នុងរបាយការណ៍ព្រឹកថ្ងៃចន្ទនេះ
វៀតណាម៖ ក្រសួងសុខាភិបាលវៀតណាម នៅព្រឹកថ្ងៃចន្ទនេះ បានរាយការណ៍ពីការរកឃើញអ្នកឆ្លងជំងឺកូវីដ១៩ថ្មីៗចំនួន៣ពាន់១៩៨ករណីបន្ថែមទៀតនៅ២០ទីតាំង ។ នៅក្នុងចំណោមករណីឆ្លងថ្មីៗទាំងអស់ខាងលើនេះ មាន១ពាន់៩៩៧ករណីនៅទីក្រុងហូជីមិញ ។ ជាមួយនឹងចំនួនករណីឆ្លងថ្មីៗនេះ វៀតណាមបានកត់ត្រាពីការរកឃើញអ្នកជំងឺកូវីដ១៩ចំនួន១៥ម៉ឺន៣ពាន់៦២១ករណីនៅក្នុង៦២ខេត្ត-ក្រុង ក្នុងចំណោមខេត្ត-ក្រុងសរុប៦៣របស់ប្រទេសនេះ ចាប់តាំងពីវីរុសកូវីដ១៩រលកថ្មីវាយប្រហារវៀតណាមកាលពី៣ខែមុន ។ ទីក្រុងហូជីមិញ មានអ្នកឆ្លងជំងឺកូវីដ១៩ខ្ពស់ជាងគេបំផុតរហូតដល់៩ម៉ឺន៦ពាន់២៩២ករណី ។ ជាមួយគ្នានេះ វៀតណាមក៏បានចាក់វ៉ាក់សាំងបង្ការជំងឺកូវីដ១៩ ជូនដល់ប្រជាជនខ្លួនបានជាង៦.៤១លាននាក់ផងដែរ តែមានមនុស្សប្រមាណ៦៥ម៉ឺន៩ពាន់៦៤នាក់ប៉ុណ្ណោះ ដែលបានទទួលការចាក់វ៉ាក់សាំងពេញលេញ ឬពីរដូស ៕ ប្រភព៖ VNExpress
-
អ្នកឆ្លង COVID-19 នៅទូទាំងពិភពលោកកើនឡើងដល់១៩៩លាន១ម៉ឺននាក់ ក្នុងនោះស្លាប់ជាង៤លាន២៤ម៉ឺននាក់ និងជាសះស្បើយ១៧៩លាន៦១ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១៩៩លាន១ម៉ឺន៤ពាន់៦៧៥ករណី ក្នុងនោះមានអ្នកជម្ងឺសរុបចំនួន៤លាន២៤ម៉ឺន៣៧៤នាក់ស្លាប់ និង ជាសះស្បើយឡើងវិញសរុបចំនួន១៧៩លាន៦១ម៉ឺន៩ពាន់៤១៦នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០២ ខែសីហា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន៣៥លាន៧៦ម៉ឺន៨ពាន់៩២៤នាក់ ស្លាប់ចំនួន៦២ម៉ឺន៩ពាន់៣៨០នាក់ និងជាសះស្បើយចំនួន២៩លាន៦៧ម៉ឺន៣ពាន់២៩០នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៣១លាន៦៩ម៉ឺន៥ពាន់៣៦៨នាក់ ស្លាប់៤២ម៉ឺន៤ពាន់៨០៨នាក់ និងជាសះស្បើយ៣០លាន៨៤ម៉ឺន៩ពាន់៦៨១នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន១៩លាន៩៣ម៉ឺន៨ពាន់៣៥៨នាក់ ស្លាប់ចំនួន៥៥ម៉ឺន៦ពាន់៨៨៦នាក់ និងជាសះស្បើយ១៨លាន៦៤ម៉ឺន៥ពាន់៩៩៣នាក់ ៕ ប្រភព៖ worldometers
-
ថៃអបអរសាទរព្រះរាជពិធីចម្រើនព្រះជន្មស្តេច តាមរយៈការតាំងពិព័រណ៍សិល្បៈតាមអនឡាញ
ការិយាល័យវិចិត្រសិល្បៈ និងសិល្បៈប្រពៃណីនៃប្រទេសថៃគ្រោងកំពុងរៀបចំព្រះរាជពិធីតាំងពិព័រណ៍ដើម្បីអបអរសាទរព្រះរាជពិធីចម្រើនព្រះជន្មព្រះមហាក្សត្រ Maha Vajiralongkorn តាមរយៈហ្វេសបុក រហូតដល់ថ្ងៃទី២០ សីហា។ នេះគឺជាលើកដំបូងហើយដែលមានការរៀបចំតាមអនឡាញ ដោយសារតែការរីករាលដាលនៃជំងឺកូវីដ១៩ ហើយការតាំងពិព័រណ៍នេះមានតាំងស្នាព្រហស្បសិល្បៈដ៏មានតម្លៃ នៃព្រះករុណាព្រះមហាក្សត្រ ម្ចាស់ក្សត្រី និង គ្រួសាររាជវង្ស មានទាំងសិល្បៈហត្ថកម្មក្នុងវិស័យផ្សេងៗរួមទាំងការគូរគំនូរ ឡៃរ៉ាត់ណាម ការឆ្លាក់ឈើនិងការដាក់មេគុជខ្យង ជាដើម។ ការិយាល័យសិល្បៈប្រពៃណីមានកាតព្វកិច្ចផ្សព្វផ្សាយនិងផ្តល់ចំណេះដឹងអំពីសិល្បៈថៃក៏ដូចជាអភិរក្សសិល្បៈនិងវប្បធម៌ដល់និស្សិតនិងសាធារណជន។ វាជាប្រភពនៃចំណេះដឹងសិល្បៈនិងជាមជ្ឈមណ្ឌលព័ត៌មាននៃវិចិត្រសិល្បៈជាតិ ដែលយកចិត្តទុកដាក់លើការរចនាម៉ូដសិល្បៈថៃ៕ ប្រភពពីបាងកកប៉ុស្តិ៍
-
កូវីដ៖ ថៃប្រកាសពីការស្លាប់ប្រចាំថ្ងៃខ្លាំង ពុំធ្លាប់មាន
ទីភ្នាក់ងារសារព័ត៌មាន The Nation បានចេញផ្សាយ នាព្រឹកថ្ងៃទី២ សីហា ២០២១នេះថា ក្នុងពេល២៤ម៉ោងចុងក្រោយមកនេះ ថៃមានមនុស្សស្លាប់ព្រោះជំងឺកូវីដ១៩ ថ្មី ចំនួន១៧៨នាក់បន្ថែមទៀត ជាចំនួនស្លាប់ប្រចាំថ្ងៃដ៏ច្រើន ពុំធ្លាប់មាន ដែលកន្លងមក មានត្រឹមជាង១០០នាក់ តិចតួចប៉ុណ្ណោះ។ ជាមួយគ្នានេះ ថៃក៏បានប្រកាសពីការឆ្លងថ្មីចំនួន១៧៩៧០នាក់ទៀតដែរ៕