មីយ៉ាន់ម៉ា៖ អាជ្ញាធរយោធាមីយ៉ាន់ម៉ាបាននិងកំពុងស្វែងរកជំនួយពីសហគមន៍អន្តរជាតិ ក្នុងការប្រយុទ្ធប្រឆាំងនឹងជំងឺកូវីដ១៩ ស្របពេលដែលប្រទេសនេះ កំពុងតស៊ូជាមួយរលកថ្មីនៃការឆ្លងដ៏អាក្រក់ ។មេដឹកនាំយោធាមីយ៉ាន់ម៉ាលោក មីន អោង ហ្លេង បានប្រាប់កិច្ចប្រជុំស្តីពីការសម្របសម្រួល ដើម្បីបង្កើនកិច្ចសហប្រតិបត្តិការជាមួយសហគមន៍អន្តរជាតិថា មីយ៉ាន់ម៉ាគួរតែស្វែងរកថវិកាពីមូលនិធិឆ្លើយតបកូវីដ-១៩ ដែលបង្កើតឡើងដោយអាស៊ាន ។ កាសែត Global New Light of Myanmar បានរាយការណ៍ថា កិច្ចខិតខំប្រឹងប្រែងកំពុងធ្វើឡើងជាមួយអាស៊ាននិងបណ្តាប្រទេសជាមិត្តផ្សេងទៀត ប៉ុន្តែមិនបានផ្តល់ព័ត៌មានលំអិតទេ ។ប្រទេសមីយ៉ាន់ម៉ាបានជួបភាពច្របូកច្របល់ចាប់តាំងពីយោធាឡើងកាន់អំណាចកាលពីខែកុម្ភៈ ដោយមន្ទីរពេទ្យជាច្រើនមិនមានបំពាក់សម្ភារៈគ្រប់គ្រាន់ ដើម្បីទប់ទល់នឹងការកើនឡើងនៃអ្នកជំងឺទេ បន្ទាប់ពីបុគ្គលិកពេទ្យជាច្រើនបានចេញតវ៉ាប្រឆាំងនឹងរដ្ឋប្រហារ ។ ទន្ទឹមនេះ បទបញ្ជាអោយស្នាក់នៅក្នុងផ្ទះ ដែលប៉ះពាល់ដល់មនុស្សរាប់លាននាក់ មិនអាចបញ្ឈប់ការកើនឡើងនូវករណីឆ្លងបានទេ ហើយក្រុមបូជាសពកំពុងបំពេញការងារតាមសមត្ថភាព ខណៈអ្នកស្ម័គ្រចិត្តកំពុងធ្វើការដើម្បីយកសាកសពមនុស្សដែលបានស្លាប់ចេញពីផ្ទះរបស់ពួកគេ ៕ ប្រភព៖ AFP

ចិន៖​ ប្រទេសចិនបានបរិច្ចាគកញ្ចប់វ៉ាក់សាំង CoronaVac របស់ក្រុមហ៊ុន Sinovac បន្ថែមទៀតទៅដល់ប្រទេសហ្វីលីពីន នៅក្នុងថ្ងៃព្រហស្បតិ៍នេះ ដើម្បីគាំទ្រដល់យុទ្ធនាការប្រយុទ្ធប្រឆាំងនឹងការឆ្លងរាតត្បាតនៃវីរុសកូវីដ១៩ នៅក្នុងប្រទេសអាស៊ីអាគ្នេយ៍មួយនេះ ។ ចិនគឺជាប្រទេសដំបូងគេដែលបានផ្តល់វ៉ាក់សាំងបង្ការជំងឺវីរុសដល់ហ្វីលីពីន ។ ចិនបានបរិច្ចាគបញ្ចប់ដំបូងនៃវ៉ាក់សាំង CoronaVac ដល់ទីក្រុងម៉ានីល កាលពីថ្ងៃទី២៨ ខែកុម្ភៈកន្លងទៅ ដែលអនុញ្ញាតអោយប្រទេសនេះ ចាប់ផ្តើមដំណើរការចាក់វ៉ាក់សាំងបង្ការនៅថ្ងៃទី០១ ខែមិនា ។ គិតត្រឹមថ្ងៃព្រហស្បតិ៍សប្តាហ៍នេះ ប្រទេសចិនគឺជាអ្នកផ្គត់ផ្គង់វ៉ាក់សាំងការពារជំងឺកូវីដ១៩ធំបំផុតដល់ហ្វីលីពីន ។ បន្ថែមលើនេះ ហ្វីលីពីនក៏ទទួលបានវ៉ាក់សាំងប្រមាណជាង៣១.៣លានដូស ដែលវ៉ាក់សាំងប្រភេទផ្សេងៗគ្នា ដើម្បីចាក់ជូនដល់ប្រជាជនខ្លួនផងដែរ ។   គួរកត់សម្គាល់ គិតត្រឹមថ្ងៃទី២៧ ខែកក្កដានេះ ហ្វីលីពីនបានចាក់វ៉ាក់សាំងដល់ប្រជាជនខ្លួនប្រមាណជាង១៨លានដូសហើយ ហើយមានមនុស្សច្រើនជាង៦.៨លាននាក់បានចាក់វ៉ាក់សាំងពេញលេញ ឬពីរដូសប្រឆាំងនឹងជំងឺកូវីដ១៩ ខណៈដែលរដ្ឋាភិបាលមានគោលបំណងចាក់វ៉ាក់សាំង ជូនប្រជាជនអោយបាន៧០លាននាក់នៅក្នុងឆ្នាំនេះ ៕ ប្រភព៖ ស៊ីនហួរ

អាមេរិក៖ សហរដ្ឋអាមេរិកបានបង្ហាញនូវការគាំទ្រចំពោះការសិក្សាស្រាវជ្រាវបន្ថែមទៀតនៅក្នុងប្រទេសចិន ពីសំណាក់អង្គការសុខភាពពិភពលោក WHO ទៅលើប្រភពដើមនៃវីរុសកូវីដ១៩ ។ ការគាំទ្ររបស់អាមេរិកខាងលើនេះ ត្រូវបានធ្វើឡើងក្នុងអំឡុងរដ្ឋមន្រ្តីការបរទេសអាមេរិកលោក អាន់តូនី ប្លីងខិន បានជួបពិភាក្សាជាមួយអគ្គនាយកអង្គការសុខភាពពិភពលោក WHO លោក ថេដ្រូស អាដាណម ហ្គេប្រេយ៉េសឹស នៅក្នុងប្រទេសគុយវ៉ែត នៅថ្ងៃពុធសប្តាហ៍នេះ ។ បើតាមក្រសួងការបរទេសអាមេរិក លោក ប្លីងខិន បានអះអាងសាជាថ្មីពីការគាំទ្ររបស់ប្រទេសលោកចំពោះផែន ការរបស់អង្គការ WHO ក្នុងការសិក្សាស្រាវជ្រាវបន្ថែមទៀត ក្នុងនោះរួមមានប្រទេសចិន ដើម្បីយល់ដឹងអោយកាន់តែប្រសើរនូវជំងឺរាតត្បាតក្នុងពេលបច្ចុប្បន្ន ក៏ដូចជាត្រៀមខ្លួនទប់ស្កាត់ការផ្ទុះវីរុសថ្មីផ្សេងទៀតនាពេលអនាគត ។ បន្ថែមលើនេះ លោក ប្លីងខិន ក៏បានគូសបញ្ជាក់ផងដែរ ពីភាពចាំបាច់សម្រាប់ដំណាក់កាលបន្ទាប់ គឺទាន់ពេលវេលា, ភស្តុតាងផ្អែកលើតម្លាភាព, ការដឹកនាំដោយអ្នកជំនាញ និងគ្មានការជ្រៀតជ្រែក ។ សូមរំលឹកផងដែរថា អង្គការសុខភាពពិភពលោក WHO បានប្រកាសពីផែនការ ស្រាវជ្រាវរកប្រភពដើមនៃវីរុសកូវីដ១៩នៅក្នុងប្រទេសចិន ក្នុងដំណាក់កាលទី២កាលពីដើមខែកក្កដានេះ ប៉ុន្តែអាជ្ញាធរចិនបានច្រានចោលសំណើខាងលើ ៕ ប្រភព៖ NHK