-
អ៊ុយក្រែន ធ្វើសមយុទ្ធយោធាជាមួយអាមេរិក ប៉ូឡូញ និងលីទុយអានី
កៀវ៖ ប្រទេសអ៊ុយក្រែនកាលពីថ្ងៃអង្គារបានរៀបចំសមយុទ្ធដ៏ធំមួយជាមួយសហរដ្ឋអាមេរិក ប៉ូឡូញ និងលីទុយអានី ដោយគេឃើញមានឧទ្ធម្ភាគចក្រជំនួយពីលើអាកាស នាវាដឹកពាសដែកបើកកាត់វាល រួមទាំងទាហានបាញ់កាំភ្លើងលើគោលដៅសត្រូវជាដើម។ យោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ សមយុទ្ធនេះមានឈ្មោះថា Three Swords-2021 ដោយមានការចូលរួមពីទាហានជាង ១២០០ នាក់ និងរថយន្ដប្រយុទ្ធជាង ២០០ គ្រឿងនៅបន្ទាយហ្វឹកហាត់ក្រុង Yavoriv ក្នុងតំបន់ Lviv ហើយគ្រោងនឹងបញ្ចប់នៅថ្ងៃទី ៣០ ខែកក្កដា។ សមយុទ្ធនេះត្រូវគេឃើញថា ធ្វើឡើងចំពេលដែលភាពតានតឹងរវាងណាតូ និងក្រុងមូស្គូ ហើយវាកើនឡើងមួយកម្រិតទៀត ក្រោយពេលដែលរុស្ស៊ីកាលពីខែមិថុនានេះ បានបាញ់ព្រមាន និងទម្លាក់គ្រាប់បែកនៅលើផ្លូវនាវាចម្បាំងអង់គ្លេសឱ្យចេញពីដែនទឹកដែលខ្លួនអះអាងថាជារបស់ខ្លួនក្នុងសមុទ្រខ្មៅក្បែរឆ្នេរគ្រីមៀ។ មួយវិញទៀត ទំនាក់ទំនងរវាងក្រុងកៀវ និងក្រុងមូស្គូ ក៏បានធ្លាក់ចុះ បន្ទាប់ពីរុស្ស៊ីបានដណ្តើមកាន់កាប់តំបន់គ្រីមៀ និងជុំវិញការគាំទ្ររបស់រុស្ស៊ីចំពោះកងកម្លាំងបំបែកខ្លួននៅក្នុងជម្លោះក្នុងតំបន់ Donbass ភាគខាងកើតប្រទេសអ៊ុយក្រែន។ កាលពីខែមិថុនា អ៊ុយក្រែន និងសហរដ្ឋអាមេរិក បានធ្វើសមយុទ្ធយោធាដាច់ដោយឡែកមួយផ្សេងទៀតឈ្មោះ Sea Breeze ដែលចូលរួមដោយប្រទេសជាង ៣០ នៅសមុទ្រខ្មៅ និងភាគខាងត្បូងអ៊ុយក្រែន ទោះបីរុស្ស៊ីអំពាវនាវឱ្យលុបចោលសមយុទ្ធនេះក៏ដោយ។ ប្រភព៖ Reuters
-
ឥណ្ឌាមិនចូលរួមកិច្ចប្រជុំអំពីការប្រែប្រួលអាកាសធាតុដ៏សំខាន់ បន្ទាប់ពីមានការខ្វែងគំនិតក្នុងកិច្ចប្រជុំ G-20
កិច្ចប្រឹងប្រែងដើម្បីដោះស្រាយការប្រែប្រួលអាកាសធាតុបានជួបប្រទះនឹងឧបសគ្គមួយទៀតនៅសប្ដាហ៍នេះ បន្ទាប់ពីប្រទេសឥណ្ឌា ជាអ្នកបញ្ចេញឧស្ម័នផ្ទះកញ្ចក់ច្រើនជាងគេទី៣ក្នុងពិភពលោក មិនបានចូលរួមកិច្ចប្រជុំការទូតដ៏សំខាន់មួយនៅទីក្រុងឡុងដុង ចក្រភពអង់គ្លេសមួយនេះ។ ក្នុងចំណោមប្រទេសចំនួន៥១ ត្រូវបានអញ្ជើញឱ្យចូលរួម មានតែប្រទេសឥណ្ឌាគឺតែមួយគត់មិនបានចូលរួមកិច្ចប្រជុំថ្នាក់រដ្ឋមន្ត្រីរយៈពេល ២ ថ្ងៃនេះ ដែលរៀបចំឡើងដោយអនាគតប្រធានកិច្ចប្រជុំការប្រែប្រួលអាកាសធាតុ COP26 របស់អង្គការសហប្រជាជាតិ។ កិច្ចប្រជុំនេះ ត្រូវបានរៀបចំឡើងដើម្បីរៀបចំមូលដ្ឋានគ្រឹះសម្រាប់ការទទួលជោគជ័យក្នុងកិច្ចប្រជុំ COP26 ដែលនឹងត្រូវរៀបចំឡើងនៅទីក្រុង Glasgow ក្នុងរយៈពេល ៣ ខែទៀត។ ប្រធាន COP26 លោក Alok Sharma បាននិយាយថានេះជាឱកាសចុងក្រោយដើម្បីធានាការកើនឡើងសីតុណ្ហភាពពិភពលោកមិនឱ្យលើសពី ១,៥ អង្សាសេក្នុងទសវត្សនេះ ដែលជាដែនកំណត់នៃកិច្ចព្រមព្រៀងក្រុងប៉ារីស។ ចំណុចខាងលើនេះបានបង្កការខ្វែងគំនិតគ្នាក្នុងកិច្ចប្រជុំការប្រែប្រួលអាកាសធាតុរបស់ក្រុមប្រទេសអ្នកមាន G-20 ដោយឥណ្ឌាបានបដិសេធចុះហត្ថលេខាលើសេចក្ដីថ្លែងការណ៍មួយ ដែលរួមមានចំណុចមួយដែលចង់ពន្លឿនការឈានទៅរកគោលដៅនេះមុនពេលកំណត់ក្នុងកិច្ចព្រមព្រៀងក្រុងប៉ារីស។ ការជួបប្រជុំនៅទីក្រុងឡុងដុងរៀបចំឡើងបន្ទាប់ពីកិច្ចប្រជុំ G-20 ដើម្បីឱ្យការមានការចូលរួមប្រទេសមួយចំនួនបន្ថែមទៀតក្នុងការពិភាក្សាអំពីការប្រែប្រួលអាកាសធាតុ។ អ្នកនាំពាក្យក្រសួងបរិស្ថាន ព្រៃឈើ និងការប្រែប្រួលអាកាសធាតុឥណ្ឌា បាននិយាយថាប្រទេសឥណ្ឌាមិនបានចូលរួមក្នុងកិច្ចប្រជុំនេះដោយផ្ទាល់គឺពីព្រោះខ្លួនបានបង្ហាញជំហររួចស្រេចក្នុងកិច្ចប្រជុំG-20 ហើយដោយសារបញ្ហាបច្ចេកទេសទើបមិនបានចូលរួមតាមរយៈអ៊ីនធឺណិត៕ ប្រភព៖ Straitstimes
-
ហុងកុង: បុគ្គលទី១ ត្រូវបានផ្ដន្ទាទោសក្រោមច្បាប់សន្តិសុខជាតិ
លោក Tong Ying-kit បានក្លាយជាបុគ្គលទី១ ដែលជាប់ចោទពីបទល្មើសច្បាប់សន្តិសុខជាតិហុងកុង ត្រូវបានតុលាការកំពូលនៃតំបន់ស្វយ័តមួយនេះ រកឃើញថាជាប់ទោសកំហុសពាក់ព័ន្ធនឹងរឿងញុះញង់ឱ្យផ្ដាច់ទឹកដី និងអំពើភេរវកម្ម។ បុរសវ័យ ២៤ឆ្នាំនេះត្រូវបានចាប់ខ្លួន កាលពីថ្ងៃទី១ ខែកក្កដា ឆ្នាំ២០២០ ពោលគឺត្រឹមតែមួយថ្ងៃក្រោយពីសភារដ្ឋធានីប៉េកាំងបានអនុម័តច្បាប់សន្តិសុខជាតិហុងកុង។ លោក Tong ត្រូវបានប៉ូលិសចាប់ខ្លួន បន្ទាប់ពីលោកជិះម៉ូតូទៅបុកប៉ូលិសបីរូប ហើយបានលើកស្លាកបដាមួយ ដែលមានពាក្យស្លោកថា «រំដោះហុងកុង បដិវត្តន៍ក្នុងជំនាន់របស់យើង»។ សាមីខ្លួនបានបដិសេធថា ខ្លួនមិនមានទោសកំហុសអ្វីនោះទេ ដោយលើកឡើងថា ពាក្យស្លោករបស់លោកមិនមែនមានន័យថា ការប៉ុនប៉ងផ្ដាច់ទឹកដីនោះទេ។ បុរសរូបនេះប្រឈមមុខនឹងជាប់ពន្ធនាគារអស់មួយជីវិត តែមេធាវីការពារក្ដីរបស់លោក គ្រោងនឹងតតាំងក្ដីឱ្យសម្រួលបន្ធូរបន្ថយទោសដល់លោក Tong។ សវនាការសម្រេចទោសនឹងធ្វើឡើងនៅក្នុងថ្ងៃព្រហស្បតិ៍ ខាងមុខនេះ។ ចាប់តាំងពីច្បាប់សន្តិសុខជាតិត្រូវបានអនុម័តកាលពីឆ្នាំ២០២០កន្លងទៅ មានមនុស្សប្រមាណ ១០០នាក់ហើយត្រូវបានចាប់ខ្លួន ហើយត្រៀមនឹងឡើងតុលាការដូចលោក Tong នេះបើតាមការចុះផ្សាយរបស់សារព័ត៌មាន AP៕ ប្រភព៖ AP News
-
ស្ថាប័ននីតិប្បញ្ញត្តិជាន់ខ្ពស់ចិន នឹងពិចារណាលើច្បាប់ថ្មីសម្រាប់ក្រុងហុងកុង និងម៉ាកាវ
ប៉េកាំង៖ ទីភ្នាក់ងារសារព័ត៌មានចិនស៊ីនហួបានរាយការណ៍កាលពីថ្ងៃអង្គារនេះថា ស្ថាប័ននីតិប្បញ្ញត្តិជាន់ខ្ពស់របស់ចិន នឹងពិភាក្សាអំពីការបង្កើតច្បាប់ថ្មីលើក្រុងហុងកុង និងម៉ាកាវនៅខែក្រោយ ហើយគេមើលឃើញថាជាវិធានការមួយអាចឱ្យក្រុងប៉េកាំងបន្ថែមឥទ្ធិពលរបស់ខ្លួនលើអតីតក្រុងអាណានិគមទាំងពីរ។ គណៈកម្មាធិការអចិន្ត្រៃយ៍នៃសភាប្រជាជាតិ (NPC) នឹងពិនិត្យឡើងវិញនូវសំណើដើម្បីបន្ថែមច្បាប់ជាតិទៅក្នុងឧបសម្ព័ន្ធនៃច្បាប់ដែនដី ដែលជារដ្ឋធម្មនុញ្ញជាក់ស្តែងនៅក្នុងកិច្ចប្រជុំនាពេលខាងមុខនេះចាប់ពីថ្ងៃទី ១៧ ដល់ថ្ងៃទី ២០ ខែ សីហា។ កាលពីឆ្នាំមុន ចិនបានដាក់ចេញនូវច្បាប់សន្តិសុខជាតិស្តីពីហុងកុង ហើយចាប់តាំងពីពេលនោះមក ច្បាប់នេះត្រូវបានប្រើដើម្បីចាប់ខ្លួនអ្នកតស៊ូមតិដើម្បីលទ្ធិប្រជាធិបតេយ្យ ហើយក៏បានបង្កជាការព្រួយបារម្ភក្នុងចំណោមអាជីវកម្មបរទេស និងជនបរទេស អំពីផលប៉ះពាល់របស់ច្បាប់នេះទៅលើសេរីភាពស៊ីវិល។ ខណៈពេលដែល មិនទាន់មានការបញ្ជាក់ច្បាស់លាស់ថាច្បាប់ថ្មីអ្វីកំពុងត្រូវបានពិចារណា ក៏មានការរំពឹងទុកថាប្រទេសចិនប្រហែលជាត្រូវដាក់ចេញច្បាប់ប្រឆាំងនឹងការដាក់ទណ្ឌកម្មទៅលើក្រុងទាំងពីរ ដើម្បីធ្វើឱ្យវាមានប្រសិទ្ធិភាពនៅទីនោះ ស្របពេលដែលក្រុងប៉េកាំងព្យាយាមប្រឆាំងនឹងការដាក់ទណ្ឌកម្មរបស់អាមេរិក និងសម្ព័ន្ធមិត្ត។មន្ត្រីជាន់ខ្ពស់ចិន ក៏បានលើកឡើងថា ក្រុងប៉េកាំងអាចពង្រឹងច្បាប់សន្តិសុខរបស់ហុងកុងបន្ថែមទៀត។ លោក Zhang Yong អនុប្រធានគណៈកម្មការកិច្ចការនីតិកម្មនៃ NPC បាននិយាយថា ច្បាប់សន្តិសុខផ្ទាល់ខ្លួនរបស់ប្រទេសចិនគ្របដណ្តប់លើបទឧក្រិដ្ឋចំនួន ១១ ប្រភេទ។ បើប្រៀបធៀបទៅនឹងច្បាប់សន្តិសុខរបស់ហុងកុង មានតែបទឧក្រិដ្ឋចំនួនបួនប៉ុណ្ណោះ រួមមានការធ្វើអបគមន៍ ការធ្វើវិទ្ធង្សនា ការឃុបឃិតជាមួយកម្លាំងបរទេស និងការចូលរួមសកម្មភាពភេរវកម្ម។ ប្រភព៖ Straitstimes
-
សមាជិកសភាសហរដ្ឋអាមេរិកបានរិះគន់ក្រុមហ៊ុនអាមេរិកមួយចំនួនទាក់ទងនឹងកីឡាអូឡាំពិករដូវរងា
កាលពីថ្ងៃអង្គារនេះ គណៈរដ្ឋមន្រ្តីនៃគណៈបក្សភាគីទាំងពីររបស់សហរដ្ឋអាមេរិកបានបន្ទោសអ្នកឧបត្ថម្ភព្រឹត្តការណ៍អូឡាំពិករដូវរងារឆ្នាំ ២០២២ ដែលក្នុងនោះរួមមានក្រុមហ៊ុនកូកាកូឡា ក្រុមហ៊ុន Visa Inc និងក្រុមហ៊ុន Airbnb ។ តាមការស្រង់សម្តីរបស់សារព័ត៌មានរ៉យទ័រ សមាជិកសភាមកពីគណបក្សសាធារណរដ្ឋ លោក Chris Smith បានប្រាប់គណៈកម្មការប្រតិបត្តិសភាស្តីពីប្រទេសចិនដែលឧបត្ថម្ភព្រឹត្តការណ៍នេះចាំបាច់ត្រូវពិចារណាឡើងវិញ។ លោក Smith បាននិយាយថា ការឧបត្ថម្ភនេះជាការឧបត្ថម្ភប្រាក់ទៅកីឡាអូឡាំពិកដែលប្រទេសជាម្ចាស់ផ្ទះកំពុងធ្វើសកម្មភាពរំលោភសិទ្ធិមនុស្សយ៉ាងសកម្ម។ លោក Smith បានសួរនាយកប្រតិបត្តិនីមួយៗនៅឯសភាដែលរួមមានក្រុមហ៊ុន Airbnb (ABNB.O), កូកាកូឡា (KO.N), ក្រុមហ៊ុន Intel (INTC.O), Visa Inc (VN) និង Procter & Gamble (PG.N) ពីយោបល់ដែលថា គួរព្រឹត្តការណ៍នេះមានការផ្លាស់ប្តូរប្រទេសដែលជាម្ចាស់ផ្ទះ ឬពន្យារពេលដោយសារតែការព្រួយបារម្ភអំពីការរំលោភសិទ្ធិមនុស្ស។ ជាការឆ្លើយតបពីបណ្តាក្រុមហ៊ុនទាំងនោះ ពួកគេទាំងអស់បានបដិសេធមិនចូលរួមឬបាននិយាយថា ពួកគេមិនទទួលខុសត្រូវចំពោះការជ្រើសរើសទីតាំងសម្រាប់ព្រឹត្តការណ៍នោះឡើយ។ ប្រភព៖ Reuters
-
រោងចក្រនៅប្រទេសចិន ពិបាកក្នុងការរើសពលករចំណាកស្រុកវ័យក្មេង
រោងចក្រនៅប្រទេសចិនប្រឈមនឹងការបាត់បង់បុគ្គលិកនាពេលអនាគតដោយចំនួនមនុស្សវ័យក្មេងធ្វើការនៅរោងចក្រមានចំនួនតិចទៅៗ។ តាមការរាយការណ៍របស់សារព័ត៌មាន South China Morning Post ការិយាល័យស្ថិតិជាតិរបស់ប្រទេសចិន (NBS) បានឱ្យដឹងថា នៅក្នុងឆ្នាំ ២០១៩ ភាគរយនៃពលករចំណាកស្រុកដែលមានអាយុលើសពី ៥០ ឆ្នាំឡើងមានដល់ ២៤,៦ ភាគរយនៃក្រុមអាយុនេះកើនឡើងទ្វេដងពី ១១,៤ ភាគរយក្នុងឆ្នាំ ២០០៨ ។ ចាប់តាំងពីឆ្នាំ ២០១៣ មកតួលេខនេះបានកើនឡើងប្រហែលពី ១ ទៅ ២ ភាគរយក្នុងមួយឆ្នាំតែប៉ុណ្ណោះ។ ចំនួននេះមិនត្រឹមបង្ហាញពីការថយចុះនៃចំនួនមនុស្សវ័យចំណាស់ដែលធ្វើការក្នុងវិស័យផលិតកម្មក្នុងរោងចក្រឡើយ ការអន់ថយនេះក៏បង្ហាញពីទីផ្សារទូលាយដែលមាននៅក្នុងវិស័យនេះនាពេលបច្ចុប្បន្ន។ អត្រាកំណើននៃចំនួនពលករចំណាកស្រុកបានកើនឡើងដល់ ៥,៤២ ភាគរយក្នុងឆ្នាំ ២០១០ ប៉ុន្តែបានថយចុះមកនៅត្រឹម ០,៨៤ ភាគរយនៅឆ្នាំ ២០១៩ ។ នៅក្នុងកំលុងពេលមានរោគរាតត្បាតជាសកល ចំនួនពលករធ្វើការក្នុងរោងចក្រក៏មានការថយចុះចំនួន ១,៧៨ ភាគរយបន្ថែមទៀត ។ តាមការរាយការណ៍របស់សារព័ត៌មាន CNBC កាលពីខែមេសា ឆ្នាំ ២០២១ តួលេខផ្លូវការរបស់ប្រទេសចិនបានបង្ហាញថា ចំនួនប្រជាពលរដ្ឋគ្រប់អាយុធ្វើការបានមានការថយចុះជាង ៥ លាននាក់ក្នុងមួយទសវត្សចុងក្រោយនេះ។ ការធ្លាក់ចុះនេះគឺដោយសារអត្រាកំណើតបានធ្លាក់ចុះ ទោះបីជាមានការដកចេញនៃគោលនយោបាយកូនមួយក្នុងមួយគ្រួសារនៅប្រទេសចិនក៏ដោយ។ ការធ្លាក់ចុះនៃកម្មករធ្វើការក្នុងរោងចក្រនៅប្រទេសចិនបានធ្វើអោយបណ្តារោងចក្រមួយចំនួនងាកទៅរកវិស័យបច្ចេកវិទ្យាដើម្បីជាជំនួយដោះស្រាយបញ្ហានេះ។…
-
រដ្ឋមន្ត្រីការពារជាតិអ៊ីស្រាអែល នឹងចែករំលែកការរកឃើញដំបូងនៃការត្រួតពិនិត្យលើក្រុមហ៊ុន NSO ជាមួយបារាំង
រដ្ឋមន្ត្រីការពារជាតិអ៊ីស្រាអែលលោក Benny Gantz គឺគ្រោងនឹងចែករំលែកការរកឃើញដំបូងនៃការត្រួតពិនិត្យលើក្រុមហ៊ុនបច្ចេកវិទ្យាឃ្លាំមើល និងចារកម្មអ៊ីស្រាអែល NSO Groups ជាមួយបារាំង។ លេខទូរស័ព្ទប្រធានាធិបតីបារាំងលោកអេម៉ាញូអែល ម៉ាក្រូនត្រូវបានគេរកឃើញក្នុងបញ្ជីមនុស្សដែលអាចជាគោលដៅឃ្លាំមើលរបស់អតិថិជនប្រើប្រាស់កម្មវិធីចារកម្ម Pegasus របស់ក្រុមហ៊ុន NSO។ មេដឹកនាំបារាំងរូបនេះបានទាមទារឱ្យអ៊ីស្រាអែលបើកការស៊ើបលើការរំលោភបំពានដោយអតិថិជនរបស់ NSO។ ខុទ្ទកាល័យរបស់លោក Benny Gantz បាននិយាយថាលោកនឹងធ្វើដំណើរទៅបារាំងដើម្បីពិភាក្សាជាមួយរដ្ឋមន្ត្រីការពារជាតិបារាំងលោកស្រី Florence Parly អំពីវិបត្តិនៅប្រទេសលីបង់ និងការចរចានុយក្លេអ៊ែរជាមួយអ៊ីរ៉ង់ ហើយក្នុងកំឡុងពេលនេះលោក Gantz នឹងចែករំលែកការរកឃើញដំបូងក្នុងការពិនិត្យលើក្រុមហ៊ុន NSO។ ក្រសួងការពារជាតិអ៊ីស្រាអែល គឺកំពុងដឹកនាំក្រុមការងារអន្តរក្រសួងមួយដែលកំពុងស៊ើបអង្កេតពីការចោទប្រកាន់ថាអតិថិជនរបស់ NSO បានប្រើប្រាស់ Pegasus ដើម្បីឃ្លាំមើលអ្នកសារព័ត៌មាន អ្នកនយោបាយ មន្ត្រីរដ្ឋាភិបាល ដែលផ្ទុយពីគោលបំណងដើមសម្រាប់ការឃ្លាំមើលឧក្រិដ្ឋជន និងភេរវករ។ NSO បានច្រានចោលការចោទប្រកាន់ទាំងនេះ ប៉ុន្តែព័ត៌មានអ៊ីស្រាអែលបានរាយការណ៍ថាការស៊ើបអង្កេតរបស់រដ្ឋាភិបាលបានរកឃើញថាពិតជាមានការរំលោភបំពានបែបនេះពិតមែន។ រដ្ឋាភិបាលអ៊ីស្រាអែល និងក្រុមហ៊ុន NSO មិនបានអត្ថាធិប្បាយទៅលើរបាយការណ៍នេះទេ៕ ប្រភព៖ Reuters
-
រដ្ឋាភិបាលកូរ៉េខាងត្បូង និងកូរ៉េខាងជើង បានភ្ជាប់ប្រព័ន្ធទំនាក់ទំនងទូរស័ព្ទឡើយវិញ ក្រោយកាត់ផ្ដាច់អស់ជាង ១ឆ្នាំ
រដ្ឋាភិបាលកូរ៉េខាងត្បូង និងកូរ៉េខាងជើងបានភ្ជាប់ប្រព័ន្ធទំនាក់ទំនងទូរស័ព្ទឡើងវិញកាលពីថ្ងៃអង្គារ ក្រោយខាងព្យុងយ៉ាងកាត់ផ្ដាច់អស់ជាង ១ឆ្នាំ។ យោងតាមការលើកឡើងរបស់លោក Park Soo-hyunអ្នកនាំពាក្យរបស់ប្រធានាធិបតីកូរ៉េខាងត្បូងលោក Moon Jae-in បានឱ្យដឹងថា ការភ្ជាប់ប្រព័ន្ធទូរស័ព្ទនេះធ្វើឡើង ក្រោយពេលដែលលោក Moon និងមេដឹកនាំកូរ៉េខាងជើង Kim Jong Un ផ្ញើសារលិខិតទៅឱ្យគ្នាទៅវិញទៅមកតាំងពីខែមេសាមក ដើម្បីគម្រប់ខួប ៣ឆ្នាំនៃកិច្ចប្រជុំលើកទីមួយរវាងថ្នាក់ដឹកនាំទាំងពីរ។ ចំណែកសារព័ត៌មានរដ្ឋកូរ៉េខាងជើង KCNA វិញបានចុះផ្សាយថា ប្រព័ន្ធទំនាក់ទំនងរវាងប្រទេសកូរ៉េទាំងពីរបានភ្ជាប់ឡើងវិញនៅម៉ោង ១០ព្រឹក (ម៉ោងនៅកូរ៉េខាងជើង) កាលពីថ្ងៃអង្គារ។ បន្ថែមពីលើនេះទៅទៀត ទាំងកូរ៉េខាងជើង និងខាងត្បូងបានលើកឡើងស្រដៀងគ្នាថា តាមរយៈប្រព័ន្ធទំនាក់ទំនងនេះ ពួកគេសង្ឃឹមថា ទំនាក់ទំនងរវាងប្រទេសទាំងពីរនឹងកាន់តែប្រសើរឡើង។ កូរ៉េខាងជើងបានកាត់ផ្ដាច់ប្រព័ន្ធទូរស័ព្ទជាមួយកូរ៉េខាងត្បូងកាលពីខែមិថុនា ឆ្នាំ២០២០កន្លងទៅ ក្រោយពេលដែលទំនាក់ទំនងប្រទេសទាំងពីរបានឈានដល់ចំណុចទាបមួយ បន្ទាប់ពីកិច្ចប្រជុំរវាងលោក Kim និងលោកដូណាល់ ត្រាំ អតីតប្រធានាធិបតីសហរដ្ឋអាមេរិកកាលពីឆ្នាំ២០១៩ ជួបរឿងបរាជ័យ ដោយសារតែមិនបានព្រមព្រៀងគ្នាលើរឿងលុបបំបាត់អាវុធនុយក្លេអ៊ែរនៅឧបទ្វីបកូរ៉េ៕ ប្រភព៖ Reuters
-
មនុស្ស២នាក់ស្លាប់ និងបាត់ខ្លួន៥នាក់ក្នុងហេតុការណ៍ផ្ទុះតំបន់រោងចក្រផលិតសារធាតុគីមីអាល្លឺម៉ង់
មនុស្សពីរនាក់ស្លាប់ និងប្រាំនាក់ទៀតកំពុងបាត់ខ្លួន បន្ទាប់ពីការផ្ទុះដ៏ធំបានធ្វើឱ្យរញ្ជួយសួនឧស្សាហកម្មមួយ ដែលជាទីស្នាក់ការរោងចក្រផលិតនិងប្រើប្រាស់សារធាតុគីមីជាច្រើន នៅក្នុងទីក្រុង Leverkusen នៅខាងលិចប្រទេសអាល្លឺម៉ង់។ ហេតុការណ៍ ផ្ទុះនេះបានកើតឡើងកាលពី ថ្ងៃអង្គារនៅឯកន្លែងដុតកាកសំណល់របស់សួនឧស្សាហកម្ម Chempark ប៉ុន្តែកន្លែងនេះគឺដាច់ដោយឡែកពីទីតាំងរោងចក្រធំៗរបស់ក្រុមហ៊ុនBayer Lanxess និង Evonik Industries។ ហេតុការណ៍ដ៏គួរឱ្យរន្ធត់នេះ បានកើតឡើងប្រមាណ មុនម៉ោង ១០ ព្រឹកម៉ោងនៅអាល្លឺម៉ង់។ សាលាក្រុង Leverkusenបាននិយាយនៅក្នុងសេចក្ដីថ្លែងការណ៍មួយថា ការផ្ទុះនេះបានបង្កឱ្យមានអគ្គីភ័យនៅកន្លែងទុកធុងសារធាតុរំលាយដែលងាយឆេះនៅជិតនោះ។ មានមនុស្ស ១៦ នាក់បានរងរបួស ក្នុងនោះ ៤ នាក់រងរបួសធ្ងន់។ អ្នកគ្រប់គ្រងសួន Chempark លោក Lars Friedrich បាននិយាយ នៅក្នុងសេចក្ដីថ្លែងការណ៍ថា៖ «យើងមានការព្រួយបារម្ភយ៉ាងខ្លាំង ចំពោះគ្រោះថ្នាក់ដ៏រន្ធត់នេះ និងការបាត់បង់ជីវិតរបស់បុគ្គលិកយើង»។ នៅក្នុងហេតុការណ៍នោះ អ្នកពន្លត់អគ្គិភ័យចំណាយពេលអស់រយៈពេលជិត ៤ ម៉ោងដើម្បីពន្លត់ភ្លើងដែលបានកើតឡើងបន្ទាប់ពីការផ្ទុះ។ ការិយាល័យសហព័ន្ធការពារជនស៊ីវិល និងជំនួយគ្រោះមហន្តរាយ របស់អាល្លឺម៉ង់ដំបូង បានចាត់ថ្នាក់ឧប្បត្តិហេតុនេះ ថាជាការគំរាមកំហែងយ៉ាងខ្លាំង ហើយបានជំរុញឱ្យប្រជាជនមួយចំនួនត្រូវនៅខាងក្នុងផ្ទះដោយបិទបង្អួចនិងបិទទ្វារផងដែរ។ប្រជាជននៅក្បែរៗ តំបន់កើតហេតុក៏គួរតែបិទប្រព័ន្ធម៉ាស៊ីន ត្រជាក់ផងដែរ ខណៈពេលដែលខ្យល់នៅជុំវិញនោះត្រូវបានសង្ស័យថាពោរពេញដោយ ឧស្ម័នពុល។ ប្រភព៖…
-
ប្រទេសម៉ាឡេស៊ីនឹងមិនបន្តច្បាប់សម្រាប់គ្រាហ៍មានអាសន្ន
កាលពីថ្ងៃច័ន្ទនេះ ប្រទេសម៉ាឡេស៊ីសម្រេចមិនបន្តច្បាប់ក្នុងគ្រាមានអាសន្ននៅពេលដែលច្បាប់នេះបញ្ចប់នៅថ្ងៃទី ១ ខែសីហា។ ប្រទេសម៉ាឡេស៊ីស្ថិតនៅក្រោមការច្បាប់នេះចាប់តាំងពីខែមករាដោយនាយករដ្ឋមន្រ្តី Muhyiddin Yassin បានប្រកែកថាច្បាប់នេះចាំបាច់ក្នុងការទប់ស្កាត់ការរីករាលដាលនៃកូវីដ-១៩ ។ ប៉ុន្តែក្រុមអ្នករិះគន់បានរិះគន់ទង្វើនេះ ហើយបានចោទនាយករដ្ឋមន្រ្តីរូបនេះថាបានព្យាយាមកាន់អំណាចកំឡុងពេលមានសំឡេងភាគតិចគាំទ្រលោក។ លោក Muhyiddin ក៏បានការពារការសម្រេចចិត្តរបស់រដ្ឋាភិបាលលោកនៅក្នុងសុន្ទរកថាមួយទៅកាន់អង្គនីតិបញ្ញត្តិផងដែរដោយលោកនិយាយថា លោកយល់ពីការព្រួយបារម្ភរបស់សាធារណជនកំឡុងពេលមានការរីករាលដាលកូវីដ-១៩ នេះ ។ លោកបានបន្តនិយាយថា រដ្ឋាភិបាលមិនអង្គុយមើលប្រជាជនរងគ្រោះនោះទេ ។ ប្រភព៖ CNA