-
អធិការបតីអាល្លឺម៉ង់ចុះទស្សនកិច្ចតំបន់រងគ្រោះទឹកជំនន់ ខណៈដែលចំនួនអ្នកស្លាប់នៅអឺរ៉ុបខាងលិចកើនឡើងជាង១៨០នាក់
អាល្លឺម៉ង់៖ អធិការបតីអាល្លឺម៉ង់លោកស្រី អាន់ជែលឡា មឺហ្គែល នៅថ្ងៃអាទិត្យសប្តាហ៍មុននេះ (ម៉ោងក្នុងតំបន់) បានចុះទស្សនកិច្ចតំបន់ដែលរងការខូចខាតដោយទឹកជំនន់ ដើម្បីធ្វើការស្ទាបស្ទង់ពីទំហំនៃការខូចខាត និងជួបអ្នកនៅរស់រានមានជីវិត បន្ទាប់ពីមានភ្លៀងធ្លាក់ខ្លាំងនៅអឺរ៉ុបខាងលិច បណ្តាលអោយមនុស្សយ៉ាងហោចណាស់១៨៣នាក់ស្លាប់ និងរាប់សិបនាក់ទៀតកំពុងបាត់ខ្លួន ។ លោកស្រី មឺហ្គែល បានធ្វើដំណើរទៅកាន់ភូមិនៃទីក្រុង Schul នៅរដ្ឋ Rhineland-Palatinate ជាតំបន់មួយក្នុងចំណោមពីរដែលរងគ្រោះធ្ងន់ធ្ងរខ្លាំងបំផុតនៅភាគខាងលិចប្រទេសអាល្លឺម៉ង់ ។ លោកស្រី មឺហ្គែល បានប្រាប់ក្រុមអ្នកយកព័ត៌មានថា វាគួរអោយតក់ស្លុតណាស់ ហើយសន្យាផ្តល់ជំនួយអោយបានលឿនដើម្បីស្តារប្រព័ន្ធហេដ្ឋារចនាសម្ព័ន្ធឡើងវិញ ។ លោកស្រី មឺហ្គែល បានអំពាវនាវអោយមានការប្រយុទ្ធប្រឆាំងនឹងបម្រែបម្រួលអាកាសធាតុ ។ មានកត្តាជាច្រើនរួមចំណែកដល់ទឹកជំនន់ដ៏អាក្រក់នេះ ប៉ុន្តែបរិយាកាសក្តៅដែលបណ្តាលមកពីការប្រែប្រួលអាកាសធាតុ បានធ្វើឲ្យមានភ្លៀងធ្លាក់ខ្លាំង ។ ដោយឡែកប្រទេសផ្សេងៗទៀតរួមមានបែលហ្ស៊ិក ស្វីស លុចហ្សំបួ និងហូឡង់ក៏ទទួលរងផលប៉ះពាល់ផងដែរ ។ បែលហ្ស៊ិកបាននិយាយថា យ៉ាងហោចណាស់មនុស្ស២៧នាក់បានបាត់បង់ជីវិត ៕ ប្រភព៖ CGTN
-
វេជ្ជបណ្ឌិតឥណ្ឌូនេស៊ី១១៤នាក់បានស្លាប់ដោយសារ Covid-19 គិតចាប់ពីថ្ងៃទី០១ ដល់១៧ ខែកក្កដា ដែលនេះជាតួលេខខ្ពស់បំផុត
ឥណ្ឌូនេស៊ី៖ សមាគមវេជ្ជបណ្ឌិតឥណ្ឌូនេស៊ី (IDI) បានរាយការណ៍ថា នៅពាក់កណ្តាលដើមខែកក្កដានេះ ករណីស្លាប់វេជ្ជបណ្ឌិតដោយសារជំងឺកូវីដ១៩ បានកើនឡើងយ៉ាងខ្លាំង ស្របពេលដែលវីរុសបម្លែងថ្មី Delta បានវាយប្រហារខ្លាំងនៅទូទាំងប្រទេសឥណ្ឌូនេស៊ី ។ នៅក្នុងសន្និសីទសារព័ត៌មានមួយ មន្ត្រីមកពីសមាគមវេជ្ជបណ្ឌិតឥណ្ឌូនេស៊ី (IDI) បានបញ្ជាក់ថា វេជ្ជបណ្ឌិតចំនួន១១៤នាក់បានស្លាប់ គិតចាប់ពីថ្ងៃទី០១ ដល់១៧ ខែកក្កដា ដែលនេះជាចំនួនខ្ពស់បំផុតត្រូវបានរាយការណ៍ក្នុងរយៈពេលដូចគ្នាកាលពីពេលមុន ហើយជាង២០%នៃចំនួនវេជ្ជបណ្ឌិត៥៤៥នាក់បានស្លាប់ដោយសារជំងឺកូវីដ១៩ចាប់តាំងពីវីរុសរាតត្បាតនេះកើតឡើង ។ ការស្លាប់ក្រុមវេជ្ជបណ្ឌិតបានកើនឡើងនៅក្នុងប្រទេសឥណ្ឌូនេស៊ី ដែលជាប្រទេសមានប្រជាជនច្រើនបំផុតលំដាប់ទី៤ក្នុងពិភពលោក បើទោះជាការចាក់វ៉ាក់សាំងបង្ការជំងឺកូវីដ១៩មានចំនួនរហូតដល់៩៥% ក្នុងចំណោមបុគ្គលិកសុខាភិបាល ។ ប្រការនេះបានធ្វើអោយរដ្ឋាភិបាលសម្រេចចិត្តប្រើប្រាស់វ៉ាក់សាំង Moderna ដើម្បីចាក់បន្ថែមទៅលើវ៉ាក់សាំងរបស់ចិន Sinovac សម្រាប់បុគ្គលិកសុខាភិបាល ៕ ប្រភព៖ Reuters
-
វៀតណាមមានអ្នកឆ្លង Covid-19 ថ្មីៗជិត៦ពាន់ករណីទៀតនៅក្នុងរបាយការណ៍ថ្ងៃអាទិត្យម្យិលមិញ
វៀតណាម៖ ក្រសួងសុខាភិបាលវៀតណាមនៅល្ងាចថ្ងៃអាទិត្យម្សិលមិញ បានប្រកាសរកឃើញអ្នកឆ្លងជំងឺកូវីដ១៩ថ្មីៗចំនួន៥ពាន់៩២៦ករណី ដែលជាចំនួនករណីឆ្លងប្រចាំថ្ងៃច្រើនបំផុតមិនធ្លាប់មាន ។ ក្នុងចំណោមករណីឆ្លងថ្មីៗទាំងនេះ មាន៥ពាន់៨៨៧ជាករណីឆ្លងនៅក្នុងស្រុក និងមាន៣៩នាក់ប៉ុណ្ណោះជាករណីឆ្លងនាំចូលពីក្រៅប្រទេស ហើយទីក្រុងហូជីមិញតែឯងរ៉ាប់រ៉ងករណីឆ្លងរហូតដល់ចំនួន៤ពាន់៦៩២ករណី ។ គិតត្រឹមថ្ងៃអាទិត្យសប្តាហ៍មុននេះ វៀតណាមមានអ្នកឆ្លងជំងឺកូវីដ១៩សរុបនៅទូទាំងប្រទេសកើនឡើងដល់៥ម៉ឺន៣ពាន់៨៣០នាក់ ក្នុងនោះស្លាប់២៥១នាក់ ខណៈដែលមនុស្សប្រមាណជាង៤,២លាននាក់ហើយបានចាក់វ៉ាក់សាំងបង្ការរោគ ៕ ប្រភព៖ Viet Nam News
-
អ្នកឆ្លង COVID-19 នៅទូទាំងពិភពលោកកើនឡើងដល់១៩១លាន២២ម៉ឺននាក់ ក្នុងនោះស្លាប់ជាង៤លាន១០ម៉ឺននាក់ និងជាសះស្បើយ១៧៤លាន១៦ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១៩១លាន២២ម៉ឺន១២៦ករណី ក្នុងនោះមានអ្នកជម្ងឺសរុបចំនួន៤លាន១០ម៉ឺន៥ពាន់៧៤៣នាក់ស្លាប់ និង ជាសះស្បើយឡើងវិញសរុបចំនួន១៧៤លាន១៦ម៉ឺន៧ពាន់៩២៧នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី១៩ ខែកក្កដា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន៣៤លាន៩៦ម៉ឺន៣ពាន់៩០៧នាក់ ស្លាប់ចំនួន៦២ម៉ឺន៤ពាន់៧៤៦នាក់ និងជាសះស្បើយចំនួន២៩លាន៣៧ម៉ឺន៦ពាន់៥៩០នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន៣១លាន១៤ម៉ឺន៣ពាន់៥៧៥នាក់ ស្លាប់៤១ម៉ឺន៤ពាន់១៤១នាក់ និងជាសះស្បើយ៣០លាន៣០ម៉ឺន៧៦២នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន១៩លាន៣៧ម៉ឺន៦ពាន់៥៧៤នាក់ ស្លាប់ចំនួន៥៤ម៉ឺន២ពាន់២៦២នាក់ និងជាសះស្បើយ១៨លាន២ម៉ឺន៣ពាន់៥១២នាក់ ៕ ប្រភព៖ worldometers
-
ព្រឹកនេះ ថៃប្រកាសពីការឆ្លងកូវីដ ជាង១ម៉ឺននាក់ទៀត ស្លាប់ថ្មី៨១នាក់
អាជ្ញាធរសុខាភិបាលថៃ នាព្រឹកថ្ងៃទី១៩ កក្កដា ២០២១នេះ បានប្រកាសពីការឆ្លងជំងឺកូវីដ១៩ក្នុងប្រទេសចំនួន១១៧៨៤នាក់ និងស្លាប់មនុស្សព្រោះជំងឺនេះ៨១នាក់បន្ថែមទៀត ក្នុងរយៈពេល២៤ម៉ោងចុងក្រោយមកនេះ។ ក្រសួងសុខាភិបាលបានបញ្ជាក់ដែរថា ក្នុងចំណោមឆ្លងថ្មីជាង១ម៉ឺននាក់នេះ មាន១០០នាក់ជាអ្នកទោសក្នុងពន្ធនាគារ។ ចាប់តាំងពីកើតមានរលកទី៣ កាលពីខែមេសាមក មានមនុស្សជាង៣៨ម៉ឺននាក់បានឆ្លងថ្មី ជាសះស្បើយវិញជាង២៦ម៉ឺននាក់។ ចាប់តាំងពីមានឆ្លងដំបូង កាលពីដើមឆ្នាំមក ថៃមានករណីឆ្លងសរុបចំនួនជាង៤១ម៉ឺននាក់ហើយ ជាសះស្បើយវិញជិត២៩ម៉ឺននាក់។ រីឯអ្នកស្លាប់កើនដល់ ៣៤២២នាក់ហើយ។ ជាការកត់សម្គាល់ មានរយៈពេល៣ថ្ងៃជាប់ៗគ្នាហើយ ដែលថៃឆ្លងជាង១ម៉ឺននាក់ ក្នុងមួយថ្ងៃៗ៕ ប្រភពពីបាងកកប៉ុស្តិ៍
-
ភ្លៀងធ្លាក់ខ្លាំងនៅអឺរ៉ុបខាងលិចបានបណ្តាលអោយមានមនុស្សស្លាប់
សុខ ស្រីលុច នៅប្រទេសអាល្លឺម៉ង់មនុស្សយ៉ាងតិច ១៣៣ នាក់បានស្លាប់ដោយសារទឹកជំនន់ដែលបណ្តាលមកពីភ្លៀងធ្លាក់ខ្លាំង។ ទឹកជំនន់នៅប្រទេសអាល្លឺម៉ង់ និងអ៊ឺរ៉ុបលើកនេះក្លាយជាគ្រោះមហន្តរាយធម្មជាតិដ៏អាក្រក់បំផុតដែលបានវាយប្រហារប្រទេសនេះក្នុងរយៈពេលជិត ៦០ ឆ្នាំ។ តំបន់ Ahrweiler ស្ថិតនៅភាគខាងត្បូងនៃទីក្រុង Cologne បានរាយការណ៍ថា មានមនុស្សស្លាប់យ៉ាងតិចណាស់ ៩០ នាក់ក្នុងនោះមានអ្នកពិការចំនួន ១២ នាក់ដែលស្នាក់នៅមជ្ឈមណ្ឌលថែទាំងជនពិការ។ តាមការរាយការណ៍របស់សារព័ត៌មាន CNN នៅតាមដងទន្លេ Rur នៅរដ្ឋ North Rhine-Westphalia ភាគខាងលិចប្រទេសអាឡឺម៉ង់មានទំនប់វារីអគ្គិសនីមួយបានបាក់កាលពីយប់ថ្ងៃទី ១៦ កក្កដា។ នៅថ្ងៃដដែលនោះ អាជ្ញាធរអាល្លឺម៉ង់បានចាប់ផ្តើមជម្លៀសប្រជាជនប្រហែល ៧០០ នាក់នៅ Ophoven ក្នុងទីក្រុង Wassenberg ។ យោងតាមប្រព័ន្ធផ្សព្វផ្សាយរបស់អាឡឺម៉ង់បានផ្សាយថា គេហដ្ឋានប្រហែល ២៥ ខ្នងកំពុងស្ថិតក្នុងគ្រោះថ្នាក់នៃការដួលរលំនៅក្នុងស្រុក Schuldbei Adenau ក្នុងតំបន់ភ្នំ Eifel ដែលជាកន្លែងប្រកាសអាសន្ន។ ផ្ទះមួយចំនួនត្រូវបានកាត់ផ្តាច់ទាំងស្រុងដោយសារលំហូរទឹក ហើយក្រុមជួយសង្រ្គោះមិនអាចទៅដល់តាមទូកបានទេ។ រដ្ឋរបស់ប្រទេសអាឡឺម៉ង់ដូចជា Rhineland-Palatinate និង North Rhine-Westphalia ក្នុងប្រទេសអាល្លឺម៉ង់រងការវាយប្រហារខ្លាំងជាងគេ ប៉ុន្តែប្រទេសហូឡង់ក៏រងផលប៉ះពាល់យ៉ាងធ្ងន់ធ្ងរផងដែរ។…
-
អាសាដ៖ប្រាក់ជាប់កកនៅក្នុងធនាគារលីបង់ គឺជាឧបសគ្គធំបំផុតដល់ការវិនិយោគក្នុងស៊ីរី
កាលពីថ្ងៃសៅរ៍ ទី១៧ កក្កដាប្រធានាធិបតីប្រទេសស៊ីរីលោកបាសា អាល់អាសាដ បាននិយាយថាបង្កកប្រាក់ពាន់លាននៅធនាគារប្រទេសលីបង់ គឺឧបសគ្គចម្បងចំពោះការវិនិយោគនៅក្នុងប្រទេសរបស់លោក។ ប្រទេសលីបង់កំពុងប្រឈមនឹងវិបត្តិសេដ្ឋកិច្ចដ៏ធំមួយ ដែលធ្វើឱ្យប្រទេសនេះប្រឈមនឹងអស្ថិរភាពផ្ទៃក្នុង។ ជាហេតុធ្វើឱ្យធនាគារលីបង់ជាច្រើនធ្វើការហាមឃាត់មិនឱ្យអ្នកដាក់ប្រាក់បញ្ញើ ដកប្រាក់ចេញពីគណនីរបស់ពួកគេ ឬធ្វើការផ្ទេរចេញ។ នៅការថ្លែងសុន្ទរកថាមួយបន្ទាប់ពីបានស្បថចូលកាន់តំណែងជាប្រធានាធិបតីអាណត្តិទី ៤ លោកអាសាដបាននិយាយថាការប៉ាន់ស្មានបានលើកឡើងថាមូលនិធិដែលជាប់គាំង គឺមានតម្លៃចន្លោះពី ៤០ ពាន់លានដុល្លារទៅ ៦០ ពាន់លានដុល្លារ។ លោកបាននិយាយថា៖ «តួលេខទាំងពីរនេះគឺគ្រប់គ្រាន់សម្រាប់ធ្វើឱ្យសេដ្ឋកិច្ចដូចយើងធ្លាក់ចុះ»។ ក្រុមហ៊ុនស៊ីរីជាច្រើន បានបញ្ចៀសទណ្ឌកម្មលោកខាងលិច ដោយការប្រើប្រព័ន្ធធនាគារប្រទេសលីបង់ដើម្បីទូទាត់ការទិញទំនិញ ដែលនឹងនាំចូលមកប្រទេសស៊ីរីតាមផ្លូវគោក។ អាជ្ញាធរស៊ីរីបន្ទោសការដាក់ទណ្ឌកម្មរបស់លោកខាងលិចចំពោះការលំបាកយ៉ាងខ្លាំង ដែលរួមមានទាំងការឡើងថ្លៃ និងការលំបាករបស់ប្រជាជនក្នុងទិញស្បៀងអាហារ និងផលិតផលប្រើប្រាស់ទូទៅ៕
-
ឥណ្ឌូនេស៊ីកំពុងពិចារណាការបន្តដាក់បម្រាមកូវីដ-១៩
ឥណ្ឌូនេស៊ី កំពុងតែពិចារណាការបន្តដាក់បម្រាមក្នុងការរឹតបន្តឹងការធ្វើដំណើរ ដើម្បីទប់ស្កាត់ការរីករាលដាលនៃជំងឺកូវីដ១៩បន្តទៀត ខណៈករណីវិជ្ជមាននៃជំងឺនេះនៅតែបន្តកើនឡើង នេះបើតាមការលើកឡើងរបស់លោករដ្ឋមន្ត្រីទទួលបន្ទុកការប្រយុទ្ធប្រឆាំងកូវីដ១៩ Luhut Pandjaitan កាលពីថ្ងៃសៅរ៍ទី១៧ កក្កដា។ បម្រាមរឹតបន្ដឹងលើការធ្វើដំណើររួមមានដូចជា ការបិទផ្សារនានា ក៏ដូចជាបទបញ្ជាឱ្យធ្វើការពីផ្ទះ លើកលែងតែអ្នកធ្វើការជួរមុខ ដែលដាក់នៅលើទីក្រុងនៅលើកោះជ្វា កោះបាលី និងទីក្រុង ១៥ ផ្សេងទៀតនៅក្នុងប្រទេស។ បម្រាមបច្ចុប្បន្ននឹងអស់សុពលភាពនៅថ្ងៃទី២០ ខែកក្កដានេះហើយ។ ទន្ទឹមនឹងការដាក់បម្រាមនេះ លោក Luhut ក៏បានធ្វើការសុំទោសទៅកាន់ប្រជាជនឥណ្ឌូនេស៊ី ប្រសិនបើគោលនយោបាយរបស់រដ្ឋាភិបាលមិនមានភាពសមស្របក្នុងប្រការណាមួយ។ ប្រទេសអាស៊ីអាគ្នេយ៍ដីកោះមួយនេះបានរកឃើញករណីវិជ្ជមាននៃជំងឺកូវីដ១៩ ចំនួនរាប់ម៉ឺនករណីក្នុងមួយថ្ងៃៗចាប់តាំងពីខែមិថុនាមក ខណៈកាលពីថ្ងៃសៅរ៍កន្លងទៅ ប្រទេសនេះរកឃើញប្រមាណ ៥២ ០០០ ករណី មានមានមនុស្សស្លាប់ជាង ១ពាន់នាក់។ ល្បឿននៃការចាក់វ៉ាក់សាំងនៅយឺតនៅឡើយ ដោយមកទល់ពេលនេះឥណ្ឌូនេស៊ីទើបតែចាក់បាន ៦% ប៉ុណ្ណោះនៃចំនួនប្រជាជនសរុបជាង ២៥០លាននាក់៕
-
សិង្ហបុរីជំរុញឱ្យពលរដ្ឋខ្លួនចាកចេញពីមីយ៉ាន់ម៉ា ខណៈប្រទេសនេះញាំញីដោយបញ្ហាសន្តិសុខ និងវិបត្តិជំងឺកូវីដ-១៩
ស្ថានទូតសិង្ហបុរីប្រចាំប្រទេសមីយ៉ាន់ម៉ាបានអំពាវនាវឱ្យពលរដ្ឋរបស់ខ្លួនចាកចេញពីប្រទេសនេះ ឱ្យបានឆាប់ ខណៈពេលដែលស្ថានភាពសន្តិសុខនៅមីយ៉ាន់ម៉ានៅមិនប្រសើរឡើង ហើយស្ថានភាពជំងឺកូវីដ-១៩កាន់តែធ្ងន់ធ្ងរឡើង នេះបើតាមសារអេឡិចត្រូនិកមួយរបស់ស្ថានទូតចុះថ្ងៃទី១៥ ខែកក្កដា ដែលបានឃើញដោយសារព័ត៌មាន Channel News Asia។ ចំពោះបញ្ហាសន្តិសុខនៅមីយ៉ាន់ម៉ា ស្ថានទូតសិង្ហបុរីបានមើលឃើញថា ក្រោយច្បាប់អាជ្ញាសឹកបានចូលជាធរមាននៅស្រុកមួយចំនួននៅតំបន់យ៉ាំងហ្គូន អាជ្ញាធរស៊ីវិលទាំងអស់ត្រូវបានផ្អាកជាបណ្ដោះអាសន្ន ដោយជំនួសវិញដោយអាជ្ញាធរយោធា។ ហេតុដូចនេះហើយ ស្ថានទូតបានផ្ដល់យោបល់ឱ្យពលរដ្ឋសិង្ហបុរីទាំងអស់គោរពច្បាប់ទម្លាប់ និងបម្រាមនៅតាមតំបន់រៀងៗខ្លួន។ ចំណែកឯស្ថានភាពកូវីដ១៩វិញ ស្ថានទូតបានមើលឃើញថា នៅមីយ៉ាន់ម៉ាស្ថានភាពមានសភាព «ធ្ងន់ធ្ងរខ្លាំង» ដោយវីរុសបម្លែងខ្លួនកំពុងតែឆ្លងពាសពេញមីយ៉ាន់ម៉ា ខណៈប្រព័ន្ធសុខាភិបាលនៅប្រទេសនេះនៅមានកម្រិត ហើយមានកង្វះថ្នាំពេទ្យ និងអុកស៊ីហ្សែន។ ក្នុងស្ថានភាពបែបនេះហើយ ស្ថានទូតក៏បានជូនយោបល់ឱ្យពលរដ្ឋសិង្ហបុរីចាកចេញពីប្រទេសនេះឱ្យបានឆាប់តាមតែអាចធ្វើបាន តែស្ថានទូតនឹងមិនរៀបចំជើងហោះហើរមាតុភូមិនិវត្តន៍ណាមួយនោះទេ។ បន្ថែមពីលើនេះទៅទៀត អ្នកដែលមានបំណងមកវិញ ត្រូវតែគោរពនូវបម្រាមក្នុងការចូលសិង្ហបុរី ដូចជាបង្ហាញលទ្ធផលអវិជ្ជមានតេស្ត PCR កូវីដ១៩ រយៈពេល ៧២ម៉ោងមុនឡើងយន្តហោះ ក៏ដូចជាធ្វើតេស្តល្បឿនលឿននៅពេលមកវិញ ហើយត្រូវចត្តាឡឺស័ក ១៤ថ្ងៃផងដែ៕
-
សហរដ្ឋអាមេរិកចោទប្រកាន់អ៊ីរ៉ង់ថាបានព្យាយាមបង្វែរការបន្ទោសចំពោះភាពជាប់គាំងការចរចានុយក្លេអ៊ែរ
កាលពីថ្ងៃសៅរ៍ ទី១៧ កក្កដារដ្ឋបាល Biden បានចោទប្រកាន់ក្រុងតេអេរ៉ង់ពីការព្យាយាមបង្វែរការស្តីបន្ទោសចំពោះភាពជាប់គាំងនៅក្នុងកិច្ចចរចានុយក្លេអ៊ែរអ៊ីរ៉ង់ និងបានបដិសេធថា មិនមានកិច្ចព្រមព្រៀងក្នុងការដោះដូរអ្នកទោសទេ។ ប្រធានអ្នកចរចានុយក្លេអ៊ែរអ៊ីរ៉ង់ លោក Abbas Araqchi បាននិយាយនៅលើបណ្តាញសង្គមថា ការចរចាបន្ទាប់នៅទីក្រុង Vienna ប្រទេសអូទ្រីសត្រូវរង់ចាំរហូតដល់រដ្ឋបាលអ៊ីរ៉ង់ចូលកាន់តំណែងនៅខែសីហានេះ។ ប៉ុន្តែលោកបានទទូចពីកិច្ចព្រមព្រៀងដោះដូរអ្នកទោសអាចនឹងកើតឡើង ប្រសិនបើសហរដ្ឋអាមេរិក និងអង់គ្លេសបញ្ឈប់ការភ្ជាប់កិច្ចព្រមព្រៀងនេះជាមួយនឹងកិច្ចព្រមព្រៀងនុយក្លេអ៊ែរឆ្នាំ ២០១៥ ។ អ៊ីរ៉ង់បានលើកឡើងកាលពីដើមសប្តាហ៍នេះថា ខ្លួនកំពុងធ្វើកិច្ចចរចាស្តីពីការធានាការដោះលែងអ្នកទោសអ៊ីរ៉ង់នៅក្នុងពន្ធនាគារអាមេរិក និងទីតាំងអន្តរជាតិផ្សេងៗគ្នាជុំវិញការរំលោភលើទណ្ឌកម្មរបស់សហរដ្ឋអាមេរិក។ ប៉ុន្តែកាលពីខែឧសភា ទីក្រុងវ៉ាស៊ីនតោនបានបដិសេធការរាយការណ៍របស់ទូរទស្សន៍រដ្ឋអ៊ីរ៉ង់ថា ទីតាំងអន្តរជាតិបានឈានដល់កិច្ចព្រមព្រៀងដោះដូរអ្នកទោសក្នុងការដោះដូរជាទឹកប្រាក់ប្រមាណ ៧ ពាន់លានដុល្លារក្នុងមូលនិធិប្រេងអ៊ីរ៉ង់ក្រោមការដាក់ទណ្ឌកម្មរបស់សហរដ្ឋអាមេរិកនៅក្នុងទីតាំងអន្តរជាតិផ្សេងៗគ្នា។ អ្នកនាំពាក្យក្រសួងការបរទេសអាមេរិក លោក Ned Price បាននិយាយថា ការអត្ថាធិប្បាយរបស់អ៊ីរ៉ង់នេះគឺជាការព្យាយាមបង្វែរការស្តីបន្ទោសចំពោះភាពជាប់គាំងនៃកិច្ចព្រមព្រៀងនុយក្លេអ៊ែរនាពេលបច្ចុប្បន្ននេះ។ លោក Price បាននិយាយបន្ថែមថា៖ « យើងបានធ្វើកិច្ចចរចាដោយប្រយោលស្តីពីអ្នកជាប់ឃុំក្នុងបរិបទនៃដំណើរការចរចានៅទីក្រុង Vienna ប្រទេសអូទ្រីស ហើយការពន្យាពេលក្នុងការចាប់ផ្តើមដំណើរការនោះឡើងវិញគឺមិនបានជួយអ្វីទេ។ ប្រសិនបើយើងបានជួបគ្នានៅទីក្រុងវីយែនកាន់តែលឿន យើងនឹងត្រៀមបន្តការពិភាក្សាអំពីអ្នកជាប់ឃុំក្នុងអំឡុងពេលនោះផងដែរ »។