Video: https://fb.watch/6DRwkBzTr5/ អង់គ្លេស៖ នាយករដ្ឋមន្រ្តីអង់គ្លេសលោក បូរីស ចនសុន បានថ្លែងប្រាប់សភាថា កងទាហានអង់គ្លេសភាគច្រើនត្រូវបានដកចេញពីទឹកដីអាហ្វហ្គានីស្ថានហើយ ដើម្បីបិទបញ្ចប់តួនាទីផ្លូវការរបស់អង់គ្លេស ក្នុងជម្លោះដែលមានរយៈពេលពីរទសវត្ស បើទោះជាក្រុមតាលីបង់កំពុងមានជំហររឹងមាំ និងចំពេលមានការព្រួយបារម្ភថា ការចាកចេញរបស់ទាហានបរទេសអាចនាំអោយមានសង្គ្រាមស៊ីវិល ។ លោក បូរីស ចនសុន បានគូសបញ្ជាក់ថា កងទ័ពអង់គ្លេសទាំងអស់ដែលត្រូវបានចាត់អោយទៅបំពេញបេសកម្មរបស់អង្គការ NATO នៅប្រទេសអាហ្វហ្គានីស្ថាននោះ ឥឡូវនេះកំពុងវិលត្រឡប់មកកាន់មាតុភូមិវិញហើយ… សូមកោតសរសើរនូវអ្វីដែលកងកម្លាំងអង់គ្លេសទទួលបាន ។ លោក ចនសុន បន្ថែមថា សម្រាប់ហេតុផលជាក់ស្តែងខ្ញុំនឹងមិនបង្ហាញពីពេលវេលា នៃការចាកចេញរបស់យើងទេ បើទោះបីជាខ្ញុំអាចប្រាប់ទៅសភាបានថា កងកម្លាំងរបស់យើងភាគច្រើនបានចាកចេញរួចរាល់ហើយ ។   គួរកត់សម្គាល់ កងកម្លាំងអង់គ្លេសត្រូវបានដាក់ពង្រាយលើកដំបូងនៅប្រទេសអាហ្វហ្គានីស្ថានក្នុងឆ្នាំ២០០១ ក្រោយមានការវាយប្រហារភេរវកម្មថ្ងៃទី១១ ខែកញ្ញា ក្នុងឆ្នាំដដែលនេះទៅលើសហរដ្ឋអាមេរិក និងបានដើរតួនាទីធំមួយនៅក្នុងប្រតិបត្តិការប្រយុទ្ធរហូតដល់ឆ្នាំ២០១៤ ។ ជាសរុបមានកងទាហានអង់គ្លេសប្រមាណ៤៥៧នាក់ត្រូវបានសម្លាប់នៅក្នុងប្រទេសអាហ្វហ្គានីស្ថាន ៕ ប្រភព៖ CNA

Video: https://fb.watch/v/1Rv7T6rfY/ អាមេរិក៖ ប្រភពចំនួនពីរបានប្រាប់សារព័ត៌មានរ៉យទ័រថា រដ្ឋបាលរបស់លោក ចូ បៃដិន គ្រោងដាក់បញ្ចូលក្រុមហ៊ុនរបស់ចិនប្រមាណជាង១០បន្ថែមទៀត ទៅក្នុងបញ្ជីខ្មៅជាប់ទណ្ឌកម្មសេដ្ឋកិច្ចរបស់សហរដ្ឋអាមេរិក ជុំវិញការចោទប្រកាន់ពីការរំលោភសិទ្ធិមនុស្សនៅតំបន់ស៊ីនជាំង ។ ប្រភពមួយក្នុងចំនោមពីរបានបញ្ជាក់ថា ក្រសួងពាណិជ្ជកម្មអាមេរិកមានផែនការដាក់បន្ថែមក្រុមហ៊ុនរបស់ចិនចំនួន១៤ ទៅក្នុងបញ្ជីខ្មៅជាប់ទណ្ឌកម្មសេដ្ឋកិច្ចរបស់សហរដ្ឋអាមេរិក ។ ហើយភ្លាមៗនេះ មិនទាន់មានការបញ្ជាក់ពីឈ្មោះ នៃក្រុមហ៊ុនចិនទាំងនោះឡើយ ខណៈដែលស្ថានទូតចិនប្រចាំរដ្ឋធានីវ៉ាស៊ីនតោនក៏ពុំទាន់ធ្វើការឆ្លើយតបភ្លាមៗណាមួយនៅឡើយដែរ ។ បើតាមប្រភពសុំមិនបញ្ចេញអត្តសញ្ញាណខាងលើ ក្រុមហ៊ុនរបស់ចិនទាំងនេះ នឹងត្រូវបញ្ចូលទៅក្នុងបញ្ជីខ្មៅរបស់ក្រសួងពាណិជ្ជកម្មអាមេរិក នៅថ្ងៃសុក្រសប្ដាហ៍នេះ (ម៉ោងក្នុងតំបន់) ដែលជាផ្នែកមួយនៃកិច្ចខិតខំប្រឹងប្រែងរបស់រដ្ឋបាល លោក ចូ បៃដិន ឱ្យចិនទទួលខុសត្រូវ ចំពោះការចោទប្រកាន់ដោយអាមេរិកថា ចិនបានរំលោភសិទ្ធិមនុស្សនៅក្នុងតំបន់ស៊ីនជាំង ។ ទោះជាយ៉ាង ទីក្រុងប៉េកាំងតែងតែបានចេញមុខច្រានចោលជារឿយៗ ចំពោះការចោទប្រកាន់នេះ ៕ ប្រភព៖ Reuters

Video: https://fb.watch/6DQ-9GB964/ អាមេរិក៖ ប្រធានាធិបតីអាមេរិក លោក ចូ បៃដិន ប្រកាសថា បេសកកម្មយោធាអាមេរិកនៅអាហ្វហ្គានីស្ថាន នឹងត្រូវបិទបញ្ចប់នៅថ្ងៃទី៣១ ខែសីហាខាងមុខនេះ ពោលគឺមានរយៈពេលជិត២០ឆ្នាំបន្ទាប់ពីវាបានចាប់ផ្ដើម ។ ប៉ុន្តែលោក បៃដិន ក៏បានសន្យាដែរថា នឹងបន្តគាំទ្រដល់រដ្ឋាភិបាល និងកងកម្លាំងសន្តិសុខអាហ្វហ្គានីស្ថានដដែល ។ លោក បៃដិន បានគូសបញ្ជាក់ក្នុងសុន្ទរកថាមួយនៅឯសេតវិមានថា យោធាអាមេរិកបានសម្រេចគោលដៅរបស់ខ្លួននៅក្នុងប្រទេសអាហ្វហ្គានីស្ថាន ដោយបានសម្លាប់អតីតមេដឹកនាំក្រុមភេវរករអាល់កៃដាលោក អូសាម៉ា ប៊ិន ឡាដិន និងបានរារាំងការវាយប្រហារបន្ថែមទៀតលើសហរដ្ឋអាមេរិក ។ លោក បៃដិន បានសង្កត់ធ្ងន់ទៀតថា យើងកំពុងបញ្ចប់សង្គ្រាមដ៏យូរបំផុត របស់សហរដ្ឋអាមេរិកនេះហើយ.. ខ្ញុំនឹងមិនបញ្ជូនទាហានអាមេរិកជាថ្មីអោយទៅធ្វើសង្គ្រាមនៅអាហ្វហ្គានីស្ថានទៀតឡើយ ។ ពេលនេះវាជាសិទ្ធិ និងទំនួលខុសត្រូវរបស់ប្រជាជនអាហ្វហ្គានីស្ថានតែម្នាក់ឯង ដើម្បីសម្រេចនូវអនាគតរបស់ពួកគេ ។ សូមជម្រាបថា សហរដ្ឋអាមេរិកបានដកកងទ័ពរបស់ខ្លួនចេញពីអាហ្វហ្គានីស្ថានបានជាង៩០ភាគរយ ហើយនឹងត្រូវដកចេញទាំងស្រុងអោយបានមុនថ្ងៃទី១១ ខែកញ្ញាខាងមុខនេះ ដែលចំនឹងថ្ងៃខួបនៃការវាយប្រហារភេរវកម្មថ្ងៃទី១១ ខែកញ្ញា ឆ្នាំ២០០១ ៕ ប្រភព៖ CNA