ស្វីស៖ គិតមកទល់ពេលនេះ តួលេខអ្នកស្លាប់ដោយសារជំងឺកូវីដ១៩ បានបន្តកើនឡើងរហូតដល់ជាង៤លាននាក់ហើយ នេះបើតាមអង្គការសុខភាពពិភពលោក (WHO) ។ ប្រធានអង្គការសុខភាពពិភពលោក (WHO) លោក ថេដ្រូស អាដាណម ហ្គេប្រេយ៉េសឹស បានថ្លែងក្នុងសន្និសីទសារព័ត៌មានមួយថា ពិភពលោកគឺស្ថិតនៅក្នុងចំណុចដ៏គ្រោះថ្នាក់មួយ ចំពោះមុខជំងឺរាតត្បាតសកល ។ ប្រមុខអង្គការ WHO រូបនេះបានសង្កត់ធ្ងន់ទៀតថា យើងទើបតែបានឆ្លងផុតនូវព្រឹត្តិការណ៍ដ៏គួរឲ្យសោកស្តាយ នៃការស្លាប់មនុស្សចំនួន៤លាននាក់ ដោយសារជំងឺកូវីដ១៩ ៕ ប្រភព៖ BNO

អាមេរិក៖ ស្ថានីយទូរទស្សន៍ ABC បានចុះផ្សាយថា ការស្ទង់មតិថ្មីៗនេះបានបង្ហាញថា ៣០ភាគរយនៃប្រជាជនពេញវ័យនៅក្នុងសហរដ្ឋអាមេរិក មិនបានទៅទទួលការចាក់វ៉ាក់សាំងប្រឆាំងនឹងជំងឺកូវីដ១៩នោះទេ ហើយក៏មិនមានផែនការដើម្បីធ្វើដូច្នេះដែរ ដែលប្រការនេះបានចោទជាសំណួរសម្រាប់ការងើបឡើងវិញរបស់ប្រទេសពីជំងឺរាតត្បាតជាសកលនេះ ។ការស្ទង់មតិរបស់សារព័ត៌មានវ៉ាស៊ីនតោន និង ABC News បានចេញផ្សាយអោយដឹងនៅថ្ងៃអាទិត្យសប្តាហ៍មុនថា ក្នុងចំណោមអ្នកដែលបដិសេធទៅទទួលការចាក់វ៉ាក់សាំងជាទូទៅ មាន៧៣ភាគរយនិយាយថា មន្ត្រីអាមេរិកកំពុងនិយាយបំផ្លើសពីហានិភ័យ នៃវីរុសកូវីដ១៩បម្លែងខ្លួនថ្មី Delta ហើយ៧៩ភាគរយទៀតគិតថា ពួកគេមានហានិភ័យតិចតួចក្នុងការឆ្លងជំងឺមួយនេះ ។គួរកត់សម្គាល់ ការបញ្ចេញរបាយការណ៍ នៃការស្ទង់មតិរបស់ប្រជាជនអាមេរិកខាងលើនេះ បានកើតមានឡើងបន្ទាប់ពីប្រធានាធិបតីអាមេរិកលោក ចូ បៃដិនបានព្រមានថា វីរុសកូវីដ១៩បម្លែងខ្លួនថ្មី Delta បានឆ្លងរីករាលដាលយ៉ាងឆាប់រហ័ស ក្នុងចំណោមអ្នកដែលមិនទាន់បានចាក់វ៉ាក់សាំងបង្ការនៅឡើយ ដោយលោកបានអំពាវនាវដល់ប្រជាជនអោយទៅចាក់អោយបានឆាប់តាមដែលអាចធ្វើទៅបាន ដើម្បីការពារពួកគេពីការឆ្លងជំងឺនេះ ៕ ប្រភព៖ CGTN

ជប៉ុន៖ រដ្ឋាភិបាលជប៉ុនបានប្រកាសដាក់ទីក្រុងតូក្យូ ក្នុងគ្រាមានអាសន្នជាលើកទី៤ ។ ការសម្រេចចិត្តនេះត្រូវបានធ្វើឡើងខណៈដែលវិធានការណ៍ផ្តោតលើការប្រយុទ្ធប្រឆាំងនឹងជំងកូវីដ១៩នៅក្នុងទីក្រុងតូក្យូ អូសាកា និងខេត្តចំនួន០៨ផ្សេងទៀតនឹងត្រូវផុតសុពលភាពនៅត្រឹមថ្ងៃអាទិត្យចុងសប្តាហ៍នេះ ។ រដ្ឋាភិបាលជប៉ុនមានផែនការរឹតបន្តឹងលើវិធានការណ៍ប្រយុទ្ធប្រឆាំងនឹងជំងឺឆ្លង តាមរយៈការប្រកាសដាក់ទីក្រុងតូក្យូ ស្ថិតក្នុងគ្រាមានអាសន្ន ជាទីដែលមានករណីឆ្លងវីរុសកូវីដ១៩បាននិងកំពុងកើនឡើងខ្លាំង ។ ជាក់ស្តែង មន្រ្តីក្នុងរដ្ឋធានីរបស់ប្រទេសជប៉ុនមួយនេះ បានរាយការណ៍ពីការរកឃើញករណីឆ្លងថ្មីៗរហូតដល់៩២០ករណីនៅក្នុងថ្ងៃពុធសប្តាហ៍នេះ ដែលវាជាតួលេខឆ្លងខ្ពស់បំផុតគិតចាប់តាំងពីពាក់កណ្តាលខែឧសភាកន្លងមក ។ គួរកត់សម្គាល់ ការប្រកាសដាក់រដ្ឋក្នុងគ្រាមានអាសន្នខាងលើនេះ នឹងត្រូវចូលជាធរមានរហូតដល់ថ្ងៃទី២២ ខែសីហាខាងមុខនេះ ៕ ប្រភព៖ NHK