អង់គ្លេស៖ នាយករដ្ឋមន្រ្តីអង់គ្លេសលោក បូរីស ចនសុន នៅថ្ងៃចន្ទនេះថ្លែងថា វិធានការរិតត្បិតទប់ស្កាត់ជំងឺកូវីដ១៩ ត្រូវបានកំណត់បញ្ចប់សុពលភាពនៅថ្ងៃទី១៩ ខែកក្កដាខាងមុខនេះ ជាផ្នែកមួយនៃការបោះជំហានចុងក្រោយ ក្នុងការនាំចក្រភពអង់គ្លេសចេញពីការបិទខ្ទប់ ។ លោក ចនសុន បានថ្លែងក្នុងសន្និសិទសារព័ត៌មានមួយនៅឯវិមាន Downing Street ថា ច្បាប់រក្សាគម្លាត និងពាក់ម៉ាសការពារជាដើម នឹងលែងមានការដាក់កំហិតទៀតហើយនៅក្នុងចក្រភពអង់គ្លេស គិតចាប់ពីថ្ងៃទី១៩ ខែកក្កដាខាងមុខនេះ ហើយថា ច្បាប់ដែលតម្រូវអោយប្រជាជនធ្វើការពីផ្ទះខ្លួនឯង ក៏នឹងត្រូវបានដកចេញផងដែរ ។ បើតាមរដ្ឋាភិបាលអង់គ្លេសនោះ ជំហ៊ានចុងក្រោយ ឬ ជំហ៊ានទី៤ត្រូវបានគេរំពឹងថា នឹងចាប់ផ្តើមនៅថ្ងៃទី១៩ ខែកក្កដាខាងមុខ ប្រសិនបើការសាកល្បងទាំងបួន របស់រដ្ឋាភិបាល ដើម្បីបន្ធូរបន្ថយវិធានការរឹតបន្តឹងលើការគ្រប់គ្រងជំងឺកូវីដ១៩ដំណើរការរលូនដូចតាមការគ្រោងទុក ។ ទោះជាយ៉ាងណាក៏ដោយ ការសម្រេចចិត្តនេះ នឹងត្រូវបានបញ្ជាក់ជាថ្មីនៅថ្ងៃទី១២ ខែកក្កដាខាងមុខ បន្ទាប់ពីការពិនិត្យឡើងវិញនូវទិន្នន័យចុងក្រោយ ៕ ប្រភព៖ ស៊ីនហួរ

បារាំង៖ ប្រទេសបារាំងអាចនឹងជួបប្រទះនូវរលកឆ្លងជំងឺកូវីដ១៩ជាលើកទី៤ នៅដំណាច់ខែកក្កដាខាងមុខនេះ ពីព្រោះការរីករាលដាលនៃវីរុសបម្លែងថ្មី Delta ដែលត្រូវបានរកឃើញដំបូងនៅប្រទេសឥណ្ឌា ។ ស្របពេលជាមួយគ្នានេះដែរ អ្នកនាំពាក្យរដ្ឋាភិបាលបារាំង លោក Gabriel Attal បានប្រាប់វិទ្យុបារាំងអន្តរជាតិថា កាលពីប៉ុន្មានសប្តាហ៍កន្លងទៅ ការឆ្លងរីករាលដាលនៃជំងឺកូវីដ១៩កំពុងឈានដល់ដំណាក់កាលថ្មី ហើយថា បច្ចុប្បន្នវីរុសបម្លែងថ្មី Delta បានរ៉ាប់រងរហូតដល់៣០ភាគរយសម្រាប់ករណីឆ្លងថ្មីៗនៅក្នុងប្រទេសបារាំង ។ លោកបន្ថែមថា នៅដំណាច់ខែនេះរលកឆ្លងទី៤អាចនឹងកើតមានឡើង ប្រសិនបើសន្ទុះបែបនេះបន្តទៅមុខ ខណៈដែលការអះអាងបែបនេះធ្វើឡើងដោយផ្អែកលើការព្រមានរបស់រដ្ឋមន្រ្តីសុខាភិបាលបារាំងលោក Oliver Veran កាលពីល្ងាចថ្ងៃអាទិត្យសប្តាហ៍មុននេះ ។ ដោយឡែកមន្រ្តីបារាំងបានទទួលស្គាល់ថា មិនមានប្រជាជនគ្រប់គ្រាន់ដែលទៅទទួលការចាក់វ៉ាក់សាំងបង្ការ បើទោះបីជាមានការផ្គត់ផ្គត់គ្រប់គ្រាន់ក៏ដោយ ដែលប្រការនេះ អាចនឹងនាំអោយមានការកើនឡើងករណីឆ្លង ៕ ប្រភព៖ CNA  

ចិន៖ អ្នកជំនាញមកពីមជ្ឈមណ្ឌលត្រួតពិនិត្យ និងបង្ការជំងឺឆ្លងចិន លោក Shao Yiming បាននិយាយថា ការស្រាវជ្រាវថ្មីបង្ហាញថា វ៉ាក់សាំងផលិតនៅប្រទេសចិនមានប្រសិទ្ធភាពប្រឆាំងនឹងវីរុសបម្លែងថ្មី ដែលមានប្រភពដើមនៅឥណ្ឌា ។ អ្នកជំនាញចិនរូបនេះបានបញ្ជាក់នៅក្នុងសន្និសីទសារព័ត៌មានមួយថា ដំណើរការផលិតវ៉ាក់សាំងបច្ចុប្បន្នបានបំពេញតាមស្ដង់ដារគ្រប់គ្រាន់ ដូច្នេះមិនចាំបាច់ផលិតវ៉ាក់សាំងថ្មី ដើម្បីប្រឆាំងនឹងវីរុសបម្លែងខ្លួនថ្មីទេ ។ លោក Shao Yiming បន្ថែមថា ក្រុមអ្នកស្រាវជ្រាវចិនបានចាប់ផ្តើមសិក្សា និងប្រមូលទិន្នន័យពីវីរុសបម្លែងថ្មីឥណ្ឌា ដែលគេជឿជាក់ថា វាមានផ្ទុកមេរោគច្រើនជាងវីរុសកូវីដ១៩ ។ បើតាមលទ្ធផលបឋមនោះ វ៉ាក់សាំងដែលកំពុងប្រើសព្វថ្ងៃនេះ នៅតែមានប្រសិទ្ធភាពប្រឆាំងនឹងវីរុសបម្លែងខ្លួនថ្មីផ្សេងៗទៀតផងដែរ ៕ ប្រភព៖ Nation Thailand

ឥណ្ឌា៖ មន្ត្រី​ជាន់​ខ្ពស់​នៅ​នាយកដ្ឋានប៉ូលិស​ក្រុង​ Mumbai លោក Vishal Thakur បញ្ជាក់​ថា យ៉ាង​ហោច​ណាស់​មាន​កន្លែង​​ចាក់​វ៉ាក់សាំង​ក្លែង​ក្លាយ​​​១២​ត្រូវ​បាន​​រៀប​ចំ​ឡើង​ ឬ​នៅ​ជិត​ទី​ក្រុង Mumbai នៅ​រដ្ឋ Maharashtra ភាគ​លិច​ប្រទេស ។ មន្ត្រី​ជាន់​ខ្ពស់ឥណ្ឌារូបនេះបានគូសបញ្ជាក់ថា ពួក​គេ​​​ប្រើ​ទឹក​អំបិល​ចាក់គ្រប់​ទីតាំង​​ចាក់​វ៉ាក់សាំង​​ដែល​ពួក​គេ​បាន​រៀប​ចំឡើង​ គឺ​​ចាក់​​​ក្លែង​ក្លាយ ហើយថា តាម​ការ​ប៉ាន់​ស្មានមាន​មនុស្ស​២ពាន់៥រយ​នាក់​បាន​ចាក់​វ៉ាក់សាំង​ក្លែង​ក្លាយ ។ ជាមួយគ្នានេះ យើង​បាន​ចាប់​ខ្លួន​ក្រុម​វេជ្ជបណ្ឌិតជា​ច្រើន​នាក់… ពួក​គេ​បាន​និងកំពុង​ប្រើ​ប្រាស់​មន្ទីរ​ពេទ្យ​មួយ​កន្លែង​​ ដើម្បី​​​ផលិត​ប័ណ្ណ លេខ​កូដ និង​បរិក្ខា​ពេទ្យ​ជា​ដើម ។ សូមជម្រាបផងដែរថា ក្រោយ​​ករណី​ឆ្លងថ្មីៗ​ឡើង​ខ្ពស់​បំផុត​កាលពី​ខែ​ឧសភាកន្លងទៅ ករណី​ឆ្លង​ប្រចាំ​​ថ្ងៃ​បាន​ធ្លាក់​ចុះ​ជា​បណ្តើរ​ៗ ដែលធ្វើអោយ​ធូរ​ស្រាល​សម្ពាធលើ​ប្រព័ន្ធ​សុខាភិបាល ​និងអោយ​អាជ្ញាធរ​ចាប់​ផ្តើម​បង្កើន​កម្មវិធី​ចាក់​វ៉ាក់សាំង​ ដើម្បី​ធ្វើ​អោយ​ប្រទេស​ប្រសើរ​ឡើង​វិញ ៕ ប្រភព៖ CNN