បរទេស៖ អ្នកត្រួតពិនិត្យសុខភាពនៅរដ្ឋអូរ៉េហ្គន សហរដ្ឋអាមេរិក និយាយថា ចំនួនអ្នកស្លាប់នៅក្នុងរដ្ឋមួយនេះ បានកើនឡើងដល់៧៩នាក់ហើយ ដែលភាគច្រើនបានកើតឡើងនៅតំបន់ Multnomah County ដែលស្ថិតនៅទីក្រុង Portland ហើយពួកគេមានអាយុជាមធ្យម៦៧ឆ្នាំ និងចាស់ជាងគេមានអាយុ៩៧ឆ្នាំ ។ ឆ្លើយតបនឹងបញ្ហាខាងលើនេះ អាជ្ញាធរបានបង្កើតមជ្ឈមណ្ឌលផ្ដល់ភាពត្រជាក់ ដើម្បីចែកចាយទឹកដល់អ្នកគ្មានផ្ទះសម្បែង និងចាត់វិធានការផ្សេងៗនានាផងដែរ ។ តែទោះជាយ៉ាងណា មនុស្សរាប់រយនាក់ត្រូវបានគេជឿថា បានស្លាប់គិតចាប់ពីថ្ងៃសុក្រសប្ដាហ៍មុន រហូតមកដល់ថ្ងៃអង្គារសប្ដាហ៍នេះ ។ ប្រធានក្រុមអ្នកធ្វើកោសលវិច្ច័យលើសាកសពនៃខេត្ត British Columbia ប្រទេសកាណាដា លោកស្រី Lisa Lapointe បាននិយាយដែរថា ការិយាល័យរបស់លោកស្រីក៏បានទទួលរបាយការណ៍អ្នកស្លាប់យ៉ាងហោចណាស់៤៨៦នាក់ផងដែរ ចាប់តាំងពីថ្ងៃសុក្រសប្ដាហ៍មុន រហូតមកដល់ថ្ងៃពុធសប្ដាហ៍នេះ ដែលវាជារឿងនឹកស្មានមិនដល់សោះ ព្រោះជាធម្មតាលោកស្រីបានប៉ាន់ស្មានថា មនុស្សប្រហែល ១៦៥នាក់ប៉ុណ្ណោះ ដែលអាចស្លាប់នៅខេត្តនេះក្នុងរយៈពេល០៥ថ្ងៃ ៕ ប្រភព៖ CNA

សៀមរាប៖ យោងតាមទិនិ្នន័យផ្លូវការរបស់គ្រឹះស្ថានអង្គរ បានអោយដឹងថា ក្នុងរយៈពេល០៦ខែឆ្នាំ២០២១នេះ គ្រឹះស្ថានអង្គរបានលក់បណ្ណចូលទស្សនាតំបន់អង្គរបានចំនួន៥ពាន់៣២៩នាក់ ធ្លាក់ចុះ៩៨.៦៣ភាគរយ បើធៀបនឹងរយៈពេលដូចគ្នាឆ្នាំ២០២០ ដោយទទួលបានចំណូល២១ម៉ឺន៩ពាន់២១៨ដុល្លារ ធ្លាក់ចុះ៩៨.៧៩ភាគរយ ។បើតាមទិន្ននន័យខាងលើនេះ សម្រាប់ថវិកាចំណូលបានពីការលក់បណ្ណចូលទស្សនាអង្គរក្នុងរយៈពេលពេញមួយខែមិថុនា ឆ្នាំ២០២១នេះ បានលក់បណ្ណជូនភ្ញៀវចំនួន៥៥៥នាក់ ធ្លាក់ចុះ៦៨.២៣ភាគរយ បើធៀបនឹងខែដូចគ្នាឆ្នាំ២០២០ ដោយទទួលបានចំណូល២ម៉ឺន២ពាន់១០ដុល្លារ ធ្លាក់ចុះ៦៩.០៩ភាគរយ ។នៅក្នុងខែមិថុនា ឆ្នាំ២០២១នេះដែរ គឺថវិកាចំនួន១ពាន់១១០ដុល្លារត្រូវបានឧបត្ថម្ភដល់មូលនិធិគន្ធបុប្ផា ដើម្បីទ្រទ្រង់ដំណើរការរបស់មន្ទីរពេទ្យគន្ធបុប្ផា សម្រាប់ជួយសង្គ្រោះជីវិត និងព្យាបាលជំងឺកុមារកម្ពុជា ហើយបើសរុបថវិកាទាំង០៦ខែ គឺមានចំនួន១ម៉ឺន៦៥៨ដុល្លារ សម្រាប់ឧត្ថម្ភមូលនិធិមន្ទីរពេទ្យគន្ធបុប្ផាកម្ពុជា ៕