ចិន៖ ប្រធានាធិបតីចិនលោក ស៊ី ជីនពីង បានជួបប្រជុំតាមវីដេអូជាមួយសមភាគីរុស្ស៊ីលោក វ្ល៉ាឌីមៀ ពូទីន នៅថ្ងៃចន្ទនេះ នៅ០៣ថ្ងៃមុននៃការឈានមកដល់គម្របខួបមួយសតវត្សរ៍ នៃបក្សកុម្មុយនិស្តចិន និងក្នុងឱកាសខួបទី២០ឆ្នាំនៃការចុះហត្ថលេខាលើសន្ធិសញ្ញារុស្ស៊ី-ចិន ស្តីពីអ្នកជិតខាងល្អ និងកិច្ចសហប្រតិបត្តិជាមិត្តល្អនឹងគ្នា ។ ក្នុងឱកាសនោះ លោក ស៊ី បានអះអាងថា កិច្ចសហប្រតិបត្តិការរវាងចិន និងរុស្ស៊ីបានផ្តល់សន្ទុះវិជ្ជមានដល់សហគមន៍អន្តរជាតិ នៅពេលដែលពិភពលោកកំពុងមានការផ្លាស់ប្តូរយ៉ាងជ្រាលជ្រៅ ខណៈដែលមនុស្សជាតិកំពុងជួបនឹងវិបត្តិជាច្រើនក្នុងការអភិវឌ្ឍន៍ ហើយថា កិច្ចសហប្រតិបត្តិការចិន-រុស្ស៊ីជាគំរូសម្រាប់ទំនាក់ទំនងអន្តរជាតិថ្មីមួយ ។ ជាមួយគ្នានេះ លោក ពូទីន បានអបអរសាទរបក្សកុម្មុយនិស្តចិន (CPC) សម្រាប់គម្រប់ខួបមួយសតវត្សរ៍របស់ខ្លួន ហើយថា រុស្ស៊ីបានវាយតម្លៃខ្ពស់ចំពោះការផ្លាស់ប្តូរផលប្រយោជន៍គ្នាជាមួយ CPC នៅក្នុងប្រវត្តិសាស្ត្រ ហើយក៏សង្ឃឹមថា ក្រោមការដឹកនាំរបស់ CPC ចិននឹងបង្កើតសមិទ្ធិផលថ្មីៗក្នុងការអភិវឌ្ឍសង្គម និងដើរតួនាទីកាន់តែសំខាន់នៅក្នុងកិច្ចការអន្តរជាតិ ។ គួរកត់សម្គាល់ សេចក្តីថ្លែងការណ៍រួមមួយដែលត្រូវបានចេញផ្សាយ បន្ទាប់ពីកិច្ចប្រជុំរវាងលោក ស៊ី និងលោក ពូទីន បានបញ្ជាក់ថា ទីក្រុងប៉េកាំង និងទីក្រុងមូស្គូ បានយល់ព្រមអូសបន្លាយពេលសន្ធិសញ្ញារវាងចិន និងរុស្ស៊ី ស្តីអំពីភាពជាអ្នកជិតខាងល្អ និងមិត្តល្អ ៕ ប្រភព៖…

អាមេរិក៖ សហរដ្ឋអាមេរិកបាននិងកំពុងការពារការវាយប្រហារតាមផ្លូវអាកាសរបស់ខ្លួន ដែលធ្វើឡើងទៅលើតំបន់ព្រំដែនអ៊ីរ៉ាក់-ស៊ីរីកាលពីចុងសប្តាហ៍កន្លងទៅ ប្រឆាំងនឹងកងជីវពលគាំទ្រដោយអ៊ីរ៉ង់ ប៉ុន្តែជាមួយគ្នានេះ ទាំងរដ្ឋាភិបាលអ៊ីរ៉ាក់ និងស៊ីរីបានហៅការវាយប្រហារនេះ ជាការបង្កអំពើហិង្សាលើអធិបតេយ្យភាពរបស់ពួកគេ ហើយក្រុមឧទ្ទាមក៏បានប្តេជ្ញាសងសឹកអាមេរិកវិញផងដែរ ។ រដ្ឋមន្រ្តីការបរទេសអាមេរិកលោក អាន់តូនី ប្លីងខិន (Antony Blinken) បានថ្លែងប្រាប់អ្នកសារព័ត៌មាននៅទីក្រុងRome ប្រទេសអ៊ីតាលី ក្នុងថ្ងៃចន្ទនេះថា យើងបានចាត់វិធានការចាំបាច់ សមស្រប និងចេតនា ដែលត្រូវបានបង្កើតឡើងដើម្បីកំណត់ការកើនឡើងហានិភ័យ ប៉ុន្តែក៏ដើម្បីបញ្ជូនសារស្តីពីការទប់ស្កាត់ដែលច្បាស់ និងមិនច្បាស់ផងដែរ ។ គួរកត់សម្គាល់ សហរដ្ឋអាមេរិកកាលពីថ្ងៃអាទិត្យសប្តាហ៍មុនបញ្ជាក់ថា ខ្លួនបានបើកការវាយប្រហារតាមផ្លូវអាកាសមួយប្រឆាំងនឹងកងជីវពលដែលគាំទ្រដោយអ៊ីរ៉ង់ នៅក្នុងប្រទេសអ៊ីរ៉ាក់ និងស៊ីរី ដើម្បីឆ្លើយតបទៅនឹងការវាយប្រហារដោយយន្ដហោះដ្រូនប្រឆាំងយោធាអាមេរិនៅអ៊ីរ៉ាក់ ។ បើតាមមន្រ្តីអាមេរិក០២រូបសុំមិនបញ្ចេញឈ្មោះបានប្រាប់សារព័ត៌មានរ៉យទ័រថា ក្រុមឧទ្ទាមគាំទ្រដោយអ៊ីរ៉ង់បានដឹកនាំការវាយប្រហារដោយយន្តហោះដ្រូនយ៉ាងហោចណាស់០៥គ្រឿង ប្រឆាំងនឹងមូលដ្ឋានកងកម្លាំងចម្រុះ និងអាមេរិកនៅលើទឹកដីអ៊ីរ៉ាក់ចាប់តាំងពីខែមេសា ឆ្នាំនេះ ៕ ប្រភព៖ Reuters

អ៊ីរ៉ង់៖ អគ្គមេបញ្ជាការ នៃកងកម្លាំឆ្មាំបដិវត្តឥស្លាមលោក Hossein Salami បានគូសបញ្ជាក់ថា ប្រទេសលោកបានបង្កើតយន្តហោះគ្មានមនុស្សបើកយោធា(ដ្រូន) ដែលមានសមត្ថភាពបំពេញបេសកកម្មបានចម្ងាយ៧ពាន់គីឡូម៉ែត្រ ។ នៅក្នុងបទសម្ភាសន៍ជាមួយប្រព័ន្ធផ្សព្វផ្សាយក្នុងស្រុកមួយ លោក Salami បាននិយាយថា ចម្ងាយ៧ពាន់គីឡូម៉ែត្រនេះ គឺជារយៈចម្ងាយអតិបរមានៃបេសកកម្មរបស់យានគ្មានមនុស្សបើក (UAV) ដែលរួមបញ្ចូលទាំងការវិលត្រឡប់ទៅមូលដ្ឋាន ដែលវាឈរជើងវិញផងដែរ ។ គួរកត់សម្គាល់ ជាមួយនឹងប្រតិបត្តិការបែបនេះ យន្តហោះដ្រូនថ្មីរបស់អ៊ីរ៉ង់អាចនឹងធ្វើដំណើរទៅដល់តំបន់ឆ្ងាយៗនៃទ្វីបអឺរ៉ុប ទ្វីបអាហ្វ្រិក អាស៊ី និងរុស្ស៊ីជាដើម ហើយនឹងវិលត្រលប់មកវិញ បន្ទាប់ពីបេសកកម្មជោគជ័យ ៕ ប្រភព៖ Sputnik