អាមេរិក៖ ប្រធានាធិបតីអាមេរិកលោក ចូ បៃដិន និយាយថា សហរដ្ឋអាមេរិកនឹងនៅតែបន្តផ្តល់ការគាំទ្រដល់កិច្ចខិតខំប្រឹងប្រែងរបស់ប្រទេសអាហ្វហ្គានីស្ថាន ដើម្បីទទួលបាននូវសន្តិភាព និងសេ្ថរភាព បន្ទាប់ពីកងទ័ពអាមេរិកចាកចេញ ។ ការថ្លែងបែបនេះរបស់លោក បៃដិន បានធ្វើឡើងអំឡុងជំនួបពិភាក្សាជាមួយប្រធានាធិបតីអាហ្វហ្គានីស្ថានលោក Ashraf Ghani និងប្រធានឧត្តមក្រុមប្រឹក្សាសម្រាប់ការផ្សះផ្សាជាតិអាហ្វហ្គានីស្ថាន លោក Abdullah Abdullah នៅឯសេតវិមាននៅថ្ងៃសុក្រសប្តាហ៍នេះ ។ នាឱកាសនោះ លោក បៃដិន បានបញ្ជាក់ថា ការគាំទ្រផ្នែកការទូត និងសេដ្ឋកិច្ចរបស់សហរដ្ឋអាមេរិកដល់អាហ្វហ្គានីស្ថាននៅតែមិនមានការផ្លាស់ប្តូរឡើយ ប៉ុន្តែថា ជនជាតិអាហ្វហ្គានីស្ថានត្រូវតែសម្រេចពីអនាគតរបស់ខ្លួន ។ ជាមួយគ្នានេះ លោក Ghani ក៏បានប្រាប់ពីដំណាក់កាលថ្មីនៅក្នុងទំនាក់ទំនងរវាងសហរដ្ឋអាមេរិក-អាហ្វហ្គានីស្ថាន ដោយផ្អែកលើផលប្រយោជន៍ទៅវិញទៅមក ហើយមិនត្រឹមតែការរៀបចំយោធាប៉ុណ្ណោះទេ ។ គួរកត់សម្គាល់ កាលពីដើមឆ្នាំនេះ លោក ចូ បៃដិន បានប្រកាសពីការដកកងកម្លាំងអាមេរិកទាំងស្រុងចេញពីអាហ្វហ្គានីស្ថាននៅត្រឹមថ្ងៃទី១១ ខែកញ្ញាខាងមុខនេះ ចំថ្ងៃខួបលើកទី២០នៃការវាយប្រហាររបស់ក្រុមភេវរករនៅក្នុងសហរដ្ឋអាមេរិក ។ ប៉ុន្តែចាប់តាំងពីខែឧសភា នៅពេលការដកកងទ័ពបានចាប់ផ្តើមដំណើរការនោះ ក្រុមឧទ្ទាមតាលីបង់បានពង្រីកដែនដីស្ថិតក្រោមការគ្រប់គ្រងរបស់ខ្លួន ហើយសម្ព័ន្ធមិត្តក្នុងតំបន់ នៃក្រុមសកម្មប្រយុទ្ធរដ្ឋឥស្លាមក៏បាននិងកំពុងបង្កើនការវាយប្រហាររបស់ពួកគេផងដែរ ៕ ប្រភព៖ NHK