អាមេរិក៖ ប្រធានាធិបតីអាមេរិកលោក ចូ បៃដិន បានធ្វើការថ្កោលទោសប្រទេសចិន ពាក់ព័ន្ធនឹងការបិទកាសែតដែលមានទំនោរគាំទ្រលទ្ធិប្រជាធិបតេយ្យរបស់ទីក្រុងហុងកុង Apple Daily ដោយលោក បៃដិន បានគូសបញ្ជាក់ថា សហរដ្ឋអាមេរិកនឹងបន្តគាំទ្រដល់ប្រជាជនហុងកុង និងអ្នកដែលក្រោកឈរឡើង ដើម្បីសេរីភាពដែលមនុស្សទាំងអស់សមនឹងទទួលបាន ។សេតវិមានបានបញ្ជាក់នៅក្នុងសេចក្តីថ្លែងការណ៍មួយថា លោក បៃដិន បាននិយាយថា វាគឺជាថ្ងៃដ៏ក្រៀមក្រំមួយសម្រាប់សេរីភាពសារព័ត៌មានក្នុងទីក្រុងហុងកុង និងជុំវិញពិភពលោក ។ លោកបន្តថា ការបង្ក្រាបកាន់តែខ្លាំងឡើងដោយទីក្រុងប៉េកាំង បានឈានដល់កម្រិតមួយដែលកាសែត Apple Daily ដែលជាមូលដ្ឋានគ្រឹះនៃសារព័ត៌មានឯករាជ្យនៅហុងកុង ឥឡូវនេះបានបញ្ឈប់ការបោះពុម្ពផ្សាយហើយ ។ ទន្ទឹមនេះ លោក បៃដិន ក៏បានជម្រុញទីក្រុងប៉េកាំងអោយឈប់ផ្តោតគោលដៅលើសារព័ត៌មានឯករាជ្យ ហើយដោះលែងអ្នកកាសែត និងអ្នកសារព័ត៌មានដែលត្រូវបានឃុំខ្លួន ដោយលោកបន្ថែមថា សកម្មភាពសារព័ត៌មាន គឺមិនមែនជាបទឧក្រិដ្ឋទេ ។គួរកត់សម្គាល់ ថ្មីៗនេះ កាសែត Apply Daily ត្រូវបានអាជ្ញាធរហុងកុងបង្កកទ្រព្យសម្បត្តិ រួមទាំងចាប់ខ្លួនអ្នកសារព័ត៌មាន បន្ទាប់ពីកាសែតមួយនេះ បានចុះផ្សាយអត្ថបទមួយអំពាវនាវឱ្យបរទេសដាក់ទណ្ឌកម្មលើមេដឹកនាំចិន និងហុងកុង ។ ប្រធានប្រតិបត្តិហុងកុងលោកស្រី ការី ឡាំ បានការពាររដ្ឋាភិបាលខ្លួនថា វាមិនមែនជាបញ្ហាអ្វីឡើយ ដែលសារព័ត៌មានរិះគន់រដ្ឋាភិបាល…

រុស្ស៊ី៖ ក្រសួងការពារជាតិរុស្ស៊ីបានបង្ហាញការព្រួយបារម្ភថា សហរដ្ឋអាមេរិកបាននិងកំពុងពង្រឹងកិច្ចសហប្រតិបត្តិការយោធាជាមួយជប៉ុន ឥណ្ឌា និងអូស្ត្រាលី ដើម្បីគ្រប់គ្រងតំបន់អាស៊ី-ប៉ាស៊ីហ្វិក ។ក្រសួងការពារជាតិរុស្ស៊ីបានធ្វើជាម្ចាស់រៀបចំវេទិការសន្និសិទមួយស្តីពីសន្តិសុខអន្តរជាតិ ដែលចាប់ផ្តើមប្រព្រឹត្តិទៅកាលពីថ្ងៃអង្គារសប្តាហ៍នេះ (ម៉ោងក្នុងតំបន់) នៅក្នុងទីក្រុងមូស្គូ ។ ប្រធានទីភ្នាក់ងារចារកម្មយោធារុស្ស៊ី GRU គឺលោក អ៊ីហ្គោ ខូស្ទីយូកូវ (Igor Kostyukov) បាននិយាយថា បច្ចុប្បន្នរុស្ស៊ីបានដាក់ជាក្រុមលើសហរដ្ឋអាមេរិក ជប៉ុន ឥណ្ឌា និងអូស្ត្រាលី ថា ជា “ប្រទេស Quad” ហើយថា អាមេរិកកំពុងព្យាយាមបង្កើតអ្វីមួយដូចជាអង្គការ NATO នៅក្នុងតំបន់អាស៊ី-ប៉ាស៊ីហ្វិក ពាក់ព័ន្ធនឹងប្រទេសឥណ្ឌាដែលបានប្រកាន់យកគោលការណ៍ការទូតឯករាជ្យ ។គួរកត់សម្គាល់ ទីក្រុងមូស្គូទំនងជាមានការព្រួយបារម្ភចំពោះទីក្រុងវ៉ាស៊ីនតោន ដែលបានពង្រីកឥទ្ធិពលរបស់ខ្លួននៅក្នុងតំបន់អាស៊ី-ប៉ាស៊ីហ្វិក ដូចដែលធ្លាប់បានធ្វើនៅអឺរ៉ុប ដោយបន្ថែមអតីតសាធារណរដ្ឋសូវៀតចូលទៅក្នុងអង្គការ NATO ៕ ៕ ប្រភព៖ NHK

រុស្ស៊ី៖ មន្ត្រីការទូតជាន់ខ្ពស់រុស្ស៊ីម្នាក់នៅថ្ងៃព្រហស្បតិ៍នេះប្រកាសថា រុស្ស៊ីអាចនឹងបាញ់កម្ទេចរាល់នាវាចម្បាំងទាំងឡាយណា ដែលបានបំពានដែនទឹករបស់ខ្លួន ខណៈការព្រមាននេះ ធ្វើឡើងក្រោយឧប្បត្តិហេតុនៅសមុទ្រខ្មៅ ដែលនាវាពិឃាតអង់គ្លេសបានចុះចតនៅក្បែរតំបន់គ្រីមា ក្នុងតំបន់មួយដែលទីក្រុងមូស្គូអះអាងថា ជាដែនទឹករបស់ខ្លួន ។ ទន្ទឹមនេះ អនុរដ្ឋមន្រ្តីការបរទេសរុស្ស៊ីលោក សឺហ្គេ រីយ៉ាបកូវ (Sergei Ryabkov)ក៏បានបញ្ជាក់ដែរថា ភាពមិនអាចរំលោភបាននៃព្រំដែនរុស្ស៊ី គឺជាការចាំបាច់ដាច់ខាត ហើយថា វានឹងត្រូវបានការពារគ្រប់មធ្យោបាយការទូត នយោបាយ និងយោធាប្រសិនបើចាំបាច់ ។ បើតាមកងកម្លាំងរុស្ស៊ី នាវាចម្បាំងមួយគ្រឿងរបស់ខ្លួនបានបាញ់ព្រមាន ក្នុងគ្រាដែលយន្ដហោះចម្បាំងរបស់ខ្លួនមួយគ្រឿងទៀតបានទម្លាក់គ្រាប់បែកនៅលើផ្លូវរបស់នាវាពិឃាតអង់គ្លេស កាលពីថ្ងៃពុធសប្តាហ៍នេះ ដើម្បីបណ្ដេញនាវានោះ ចេញពីតំបន់ក្បែរក្រុងសេវ៉ាស្តូផូល (Sevastopol) ។ ពាក់ព័ន្ធនឹងភាពតានតឹងខាងលើនេះដែរ ភាគីអង់គ្លេសបានបដិសេធ ដោយនិយាយថា នាវារបស់ខ្លួនមិនត្រូវបានបណ្តេញចេញទេ ដោយគូសបញ្ជាក់ថា នាវានោះកំពុងបើកនៅលើដែនទឹករបស់ប្រទេសអ៊ុយក្រែន ៕ ប្រភព៖ CNA