អាមេរិក៖ មន្រ្តីក្រសួងការបរទេសអាមេរិកនៅថ្ងៃពុធនេះបញ្ជាក់ថា មកទល់ពេលនេះ នៅពុំទាន់មានគម្រោងរៀបចំជំនួបរវាងរដ្ឋមន្រ្តីការបរទេសអាមេរិកលោក Antony Blinken និងសមភាគីចិនលោក Wang Yi ដែលពួកលោកនឹងត្រូវធ្វើដំណើរទៅកាន់ប្រទេសអ៊ីតាលីនាសប្តាហ៍ក្រោយនេះនៅឡើយទេ បន្ទាប់ពីសារព័ត៌មាន Financial Times បានចុះផ្សាយថា ទីក្រុងប៉េកាំង និងទីក្រុងវ៉ាស៊ីនតោនបាននិងកំពុងពិភាក្សាគ្នាលើកិច្ចប្រជុំទ្វេភាគីមួយ ។ អ្នកនាំពាក្យក្រសួងការបរទេសចិនលោក Zhao Lijian ត្រូវបានគេសាកសួរនៅក្នុងសន្និសិទសារព័ត៌មានមួយ ជុំវិញការចុះផ្សាយរបស់កាសែត Financial Times អំពីជំនួបដែលអាចកើតឡើងរវាងលោក Blinken និងមន្រ្តីជាន់ខ្ពស់ចិននៅអំឡុង កិច្ចប្រជុំថ្នាក់រដ្ឋមន្រ្តីនៃបណ្តាប្រទេសG20នោះ លោកបានឆ្លើយតបវិញថា ខ្ញុំគ្មានព័ត៌មានផ្តល់ជូនអ្នកទេនាពេលបច្ចុប្បន្ន ។ គួរកត់សម្គាល់ បើតាមប្រព័ន្ធផ្សព្វផ្សាយរបស់អង់គ្លេស សេតវិមានបានធ្វើកិច្ចពិភាក្សាផ្ទៃក្នុងបឋមអំពីការបញ្ជូនលោក Blinken ឬទីប្រឹក្សាសន្តិសុខជាតិអាមេរិកលោក Jake Sullivan ទៅកាន់ប្រទេសចិននាប៉ុន្មានខែខាងមុខ ដើម្បីត្រៀមរៀបចំជំនួបទ្វេភាគីរវាងប្រធានាធិបតីអាមេរិកលោក ចូ បៃដិន និងសមភាគីចិនលោក ស៊ី ជិនពីង ដាច់ដោយឡែកពីកិច្ចប្រជុំកំពូលនៃមេដឹកនាំប្រទេស G20 ដែលនឹងប្រព្រឹត្តទៅនៅទីក្រុងរ៉ូម ប្រទេសអ៊ីតាលី នៅខែតុលា ឆ្នាំ២០២១ ៕ ប្រភព៖ CNA

អាមេរិក៖ អនុប្រធានាធិបតីអាមេរិកលោក ខាម៉ាឡា ហារីស មានគម្រោងធ្វើដំណើរទស្សនកិច្ចទៅកាន់តំបន់ព្រំដែនរវាងសហរដ្ឋអាមេរិក និងម៉ិកស៊ិកនៅក្នុងថ្ងៃសុក្រសប្តាហ៍នេះ ដើម្បីឆ្លើយតបទៅនឹងការកើនឡើងនៃប្រជាជនដែលប៉ុនប៉ងចូលក្នុងទឹកដីសហរដ្ឋអាមេរិក ។ អ្នកនាំពាក្យរបស់លោកស្រី ហារីស បានប្រកាសនៅថ្ងៃពុធនេះថា លោកស្រីអនុប្រធានាធិបតីនឹងទៅបំពេញទស្សនកិច្ចនៅតំបន់ព្រំដែនស្ថិតនៅភាគខាងត្បូងរដ្ឋតិចសាស់ ។ វានឹងក្លាយជាដំណើរទស្សនកិច្ចលើកដំបូងរបស់លោកស្រី ចាប់តាំងពីឡើងកាន់មុខតំណែងជាផ្លូវការ ។ លោកស្រី ហារីស ត្រូវបានប្រគល់ភារកិច្ចអោយដោះស្រាយបញ្ហាអន្តោប្រវេសន៍ដោយប្រធានាធិបតីអាមេរិកលោក ចូ បៃដិន ។ មនុស្សមួយចំនួនធំមកពីបណ្តាប្រទេសអាមេរិកកណ្តាលបានសម្រុកចូលទៅកាន់តំបន់ព្រំដែន ដោយសង្ឃឹមថា នឹងចូលទឹកដីសហរដ្ឋអាមេរិក ដើម្បីមានជីវិតប្រសើរឡើង ។ គួរកត់សម្គាល់ លោកស្រី ហារីស បានធ្វើទស្សនកិច្ចនៅប្រទេសម៉ិកស៊ិក និង ហ្គាតេម៉ាឡាកាលពីដើមខែនេះ ដើម្បីពិភាក្សាពីដំណោះស្រាយចំពោះភាពក្រីក្រ និងអំពើពុករលួយ ដែលជាកត្តានៅពីក្រោយការកើនឡើងនៃជនចំណាកស្រុក ។ លោកស្រីត្រូវបានគណបក្សសាធារណរដ្ឋរិះគន់ថា មិនបានទៅទស្សនកិច្ចតំបន់ព្រំដែន ៕ ប្រភព៖ NHK