ឥណ្ឌា៖ អាជ្ញាធរសុខាភិបាលឥណ្ឌាបានប្រកាសពីការរកឃើញវីរុសបម្លែងខ្លួនថ្មីមួយប្រភេទទៀត ដែលអាចបង្កជាការព្រួយបារម្ភខ្លាំង និងថា ករណីឆ្លងវីរុសនេះមួយចំនួនត្រូវបានគេរកឃើញនៅក្នុងរដ្ឋចំនួន៣ហើយ ។ អគ្គលេខាធិការសុខភាពសហព័ន្ធរបស់ឥណ្ឌា លោក រ៉ាចេស ប៊ូសាន (Rajesh Bhushan) បាននិយាយនៅក្នុងសន្និសិទសារព័ត៌មានមួយថា វីរុសបម្លែងខ្លួនថ្មីនេះ ត្រូវគេកំណត់អត្តសញ្ញាណក្នុងតំបន់ថា ជាវីរុស ឌែលតា ផ្លាស់ “Delta Plus” វាត្រូវបានគេរកឃើញរហូតដល់១៦ករណីឯណោះនៅក្នុងរដ្ឋ ម៉ាហារ៉ាស្ត្រា (Maharashtra)  ។ ទន្ទឹមគ្នានេះ ក្រសួងសុខាភិបាលឥណ្ឌាក៏បានសម្តែងពីការព្រួយបារម្ភរបស់ខ្លួនផងដែរ ពាក់ព័ន្ធនឹងវីរុសបម្លែងខ្លួនថ្មី Delta Plus ដែលកំពុងកើនឡើងការឆ្លងរីករាលដាល និងបានណែនាំអោយបណ្តារដ្ឋនានាបង្កើនការធ្វើតេស្តជាបន្ទាន់ ។ គួរកត់សម្គាល់ គិតត្រឹមថ្ងៃចន្ទដើមសប្តាហ៍នេះ ឥណ្ឌាបានចាក់វ៉ាក់សាំងបង្ការជំងឺកូវីដ១៩ដល់មនុស្សចំនួន៨,៦លាននាក់ ខណៈដែលប្រទេសនេះបានចាប់ផ្តើមយុទ្ធនាការចាក់វ៉ាក់សាំងឥតគិតថ្លៃដល់មនុស្សពេញវ័យទាំងអស់ ៕ ប្រភព៖ CNA

អ៊ីស្រាអែល៖ មន្ត្រីសុខាភិបាលអ៊ីស្រាអែលបានរាយការណ៍ពីករណីឆ្លងជំងឺកូវីដ១៩ថ្មីៗចំនួន១២៥ករណី ហើយវាជាលើកដំបូងក្នុងរយៈពេល២ខែ សម្រាប់ករណីឆ្លងមានលើសពី១០០ករណី ។ ក្រសួងសុខាភិបាលអ៊ីស្រាអែលបញ្ជាក់ថា ៧០ ភាគរយនៃករណីឆ្លងថ្មីៗទាំងនេះ គឺជាវីរុសបម្លែងខ្លួនថ្មី ឌែលតា “Delta” ដែលមានប្រភពដើមនៅប្រទេសឥណ្ឌា ។ ជាការឆ្លើយតបនោះ រដ្ឋាភិបាលអ៊ីស្រាអែលកំពុងជំរុញអោយប្រជាជនចៀសវាងការធ្វើដំណើរដែលមិនចាំបាច់ទៅបរទេស និងអំពាវនាវដល់ឪពុកម្តាយអនុញ្ញាតអោយកូនរបស់ពួកគេ ដែលមានអាយុពី១២ទៅ១៥ឆ្នាំទទួលការចាក់វ៉ាក់សាំង ។ គួរកត់សម្គាល់ កន្លងមក ប្រទេសអ៊ីស្រាអែលបានបន្ធូរបន្ថយវិធានការណ៍រឹតត្បិតដើម្បីទប់ស្កាត់ជំងឺកូវីដ១៩ ខណៈដែលចំនួនករណីឆ្លងប្រចាំថ្ងៃថ្មីបានធ្លាក់ចុះ ដោយសារអត្រាចាក់វ៉ាក់សាំងការពារខ្ពស់ ៕ ប្រភព៖ NHK

អូស្រ្តាលី៖ ប្រជាពលរដ្ឋដែលរស់នៅទីក្រុងស៊ីដនី ត្រូវបានហាមឃាត់មិនអោយចាកចេញពីទីក្រុង ក្នុងគ្រាដែលអាជ្ញាធរអូស្រ្តាលីកំពុងប្រឹងប្រែងកាត់ផ្តាច់ការកើនឡើងករណីឆ្លងវីរុសកូវីដ១៩បប្លែងខ្លួនថ្មី Delta (ដែលមានប្រភពដើមនៅឥណ្ឌា) កុំអោយឆ្លងទៅតំបន់ផ្សេងទៀត ។ អភិបាលរដ្ឋ New South Wales លោកស្រី Gladys Berejiklian បានប្រកាសពីការរឹតបន្តឹងថ្មី ដែលនឹងត្រូវអនុវត្តសម្រាប់សប្តាហ៍ក្រោយ រួមទាំងការហាមឃាត់ជាបន្ទាន់លើការធ្វើដំណើរដែលមិនចាំបាច់ចេញពីទីក្រុងស៊ីដនី និងការដាក់កម្រិតលើការជួបជុំ ។ លោកស្រីបានសង្កត់ធ្ងន់ថា ប្រជាជនចំនួន៥លាននាក់នៅទីក្រុងស៊ីដនី គឺស្ថិតនៅក្រោមការហាមឃាត់ការធ្វើដំណើរ ដែលអនុវត្តទៅលើតំបន់របស់រដ្ឋាភិបាលក្នុងតំបន់ចំនួន៧ ដែលករណីឆ្លងកូវីដ១៩ត្រូវបានរកឃើញ ។ គួរកត់សម្គាល់ ការផ្ទុះករណីឆ្លងចុងក្រោយបង្អស់ត្រូវបានរកឃើញលើក្រុមអ្នកបើកយន្តហោះអន្តរជាតិ ដែលបានឆ្លងវីរុសបំប្លែងខ្លួនថ្មី Delta ដែលត្រូវបានគេរកឃើញដំបូងនៅឥណ្ឌា ។ ទន្ទឹមនេះ ក្រុមមន្រ្តីអូស្រ្តាលីបានអំពាវនាវឱ្យអ្នករស់នៅទីក្រុងស៊ីដនី អនុវត្តតាមច្បាប់ថ្មីខាងលើ ដោយសារតែវីរុសបំប្លែងខ្លួនថ្មីដែលរកឃើញនេះគ្រោះថ្នាក់ជាងមុន ៕ ប្រភព៖ AFP

អាមេរិក៖ សេតវិមានបានប្រកាសថា ខ្លួននឹងមិនអាចឈានទៅសម្រេចគោលដៅរបស់ប្រធានាធិបតីអាមេរិកលោក ចូ បៃដិន ក្នុងការចាក់វ៉ាក់សាំងបង្ការជំងឺ COVID-19 យ៉ាងហោចណាស់១ដូសជូនដល់មនុស្សពេញវ័យរបស់ខ្លួនប្រមាណ ៧០ភាគរយនៅត្រឹមថ្ងៃទី០៤ ខែកក្កដា ដែលជាថ្ងៃបុណ្យឯករាជ្យនោះទេ ខណៈ បច្ចុប្បន្នមានតែរដ្ឋចំនួន១៥ និង ទីក្រុងវ៉ាស៊ីនតោនប៉ុណ្ណោះ ដែលបានសម្រេចនូវគោលដៅនោះ ។ ការប្រកាសខាងលើនេះបានកើតមានឡើងក្រោយប្រធានាធិបតីអាមេរិកលោក ចូ បៃដិន និងអនុប្រធានាធិបតីអាមេរិក លោកស្រី កាម៉ាឡា ហារីស កាលពីថ្ងៃសុក្រសប្ដាហ៍មុន បានជំរុញឱ្យជនជាតិអាមេរិកមកទទួលការចាក់វ៉ាក់សាំង ខណៈមានការគំរាមកំហែងពីវីរុសបម្លែងខ្លួនថ្មី Delta ដែលមានប្រភពដើមពីឥណ្ឌា កំពុងបង្កឱ្យមានការព្រួយបារម្ភយ៉ាងខ្លាំង ។ សូមជម្រាបផងដែរថា យោងតាមទិន្នន័យចុងក្រោយរបស់សហព័ន្ធ ដែលបានធ្វើបច្ចុប្បន្នភាពកាលពីថ្ងៃចន្ទដើមសប្តាហ៍នេះបង្ហាញថា ប្រជាជនប្រមាណជាង១៥០លាននាក់នៅក្នុងសហរដ្ឋអាមេរិក ឬច្រើនជាង៤៥ភាគរយនៃចំនួនប្រជាជនសរុប បានទទួលការចាក់វ៉ាក់សាំងបង្ការជំងឺកូវីដ១៩ពេញលេញ (ពីរដូស) ៕ ប្រភព៖ Reuters