ប្រេស៊ីល៖ ជាមួយនឹងចំនួនអ្នកស្លាប់ដោយសារជំងឺកូវីដ១៩កើនឡើងដល់ជាង៥០ម៉ឺននាក់នោះ បាតុកររាប់ពាន់នាក់បានប្រមូលផ្តុំគ្នាចេញមកធ្វើការតវ៉ាប្រឆាំងនឹងប្រធានាធិបតីប្រេស៊ីលលោក ហ្ស៊ែរ បូសូណារ៉ូ ព្រមទាំងវិធានការណ៍ឆ្លើយតបវីរុសដ៏កាចសាហាវមួយរបស់រដ្ឋាភិបាលលោកផងដែរ ។ជាមួយគ្នានេះ បាតុករមួយចំនួនបានស្រែកតវ៉ាថា សោកនាដកម្មនេះ គឺជាអំពើប្រល័យពុជសាសន៍ ។ អតីតប្រធាននិយតករសុខភាពប្រេស៊ីល លោក Gonzalo Vecina បានគូសបញ្ជាក់ថា ខ្ញុំគិតថា យើងនឹងឈានទៅដល់ការស្លាប់៧០ម៉ឺន ទៅ៨០ម៉ឺននាក់ មុនពេលយើងឃើញពីប្រសិទ្ធភាពវ៉ាក់សាំងបង្ការជំងឺកូវីដ១៩ ។ លោកបានសង្កត់ធ្ងន់ទៀតថា យើងកំពុងប្រឈមនឹងការមកដល់វីរុសបំប្លែងខ្លួនថ្មីទាំងនោះ ហើយវីរុសបំប្លែងខ្លួនឥណ្ឌាក៏នឹងធ្វើអោយយើងជួបបញ្ហាប្រឈមដែរ ។គួរកត់សម្គាល់ គិតត្រឹមចុងសប្តាហ៍កន្លងទៅនេះប្រេស៊ីលទើបចាក់វ៉ាក់សាំងបង្ការជំងឺកូវីដ១៩ដល់ប្រជាជនរបស់ខ្លួនពេញលេញ បានត្រឹមតែ១១ភាគរយប៉ុណ្ណោះ ដោយអ្នកឯកទេសជំងឺឆ្លងបានព្រមានថា ជាមួយនឹងការមកដល់រដូវត្រជាក់ និងវីរបុសបំប្លែងខ្លួនកំពុងរាតត្បាត ចំនួនអ្នកស្លាប់នឹងកាន់តែឡើងខ្ពស់ ប្រសិនបើការចាក់វ៉ា់ក់សាំងមានភាពយឺតយ៉ាវ ៕ ប្រភព៖ CGTN

រុស្ស៊ី៖ ប្រធានាធិបតីរុស្ស៊ីលោក វ្លាឌីមៀ ពូទីន ព្រមានថា ស្ថានភាពជំងឺកូវីដ១៩ នៅតំបន់ខ្លះនៃប្រទេសរុស្ស៊ីកំពុងវិវឌ្ឍន៍កាន់តែអាក្រក់ទៅហើយ ស្របពេលដែលអាជ្ញាធរចាប់ផ្តើមអំពាវនាវអោយប្រជាពលរដ្ឋ មកទទួលការចាក់វ៉ាក់សាំងឡើងវិញ ដើម្បីបង្ការការកើនឡើងនូវករណីឆ្លងថ្មីៗ ។ ប្រធានាធិបតីរុស្ស៊ីរូបនេះបានប្រាប់ទៅសភាជាន់ទាបនៅថ្ងៃចន្ទដើមសប្តាហ៍នេះថា ជាអកុសលការគំរាមកំហែង នៃមេរោគឆ្លងមិនបានថយចុះទេនៅក្នុងតំបន់ជាច្រើន… ស្ថានភាពកាន់តែអាក្រក់ទៅៗ ។ ជាការឆ្លើយតបនោះ អាជ្ញាធររុស្ស៊ីកំពុងព្យាយាមលួងលោម និងបង្ខំប្រជាជនឱ្យចាក់វ៉ាក់សាំងជាមួយការផ្តល់ជូនអ្នកដែលទៅចាក់មានឱកាសឈ្នះរថយន្ត និងផ្ទះថ្មី ខណៈអ្នកដទៃដែលមិនព្រមទៅចាក់វ៉ាក់សាំង អាចនឹងបាត់បង់ប្រាក់ចំណូល និងបណ្តេញចេញពីការងារ ៕ ប្រភព៖ Reuters

តួកគី៖ នាពេលឆាប់ៗនេះ ប្រទេសតួកគីនឹងដកចេញវិញនូវវិធានការណ៍បិទខ្ទប់ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ នេះបើតាមការបញ្ជាក់របស់ប្រធានាធិបតីតួកគីលោក តាយយីព អឺដូហ្គាន់ នៅថ្ងៃចន្ទម្សិលមិញ ។ លោក តាយយីព អឺដូហ្គាន់ បាននិយាយបន្ទាប់ពីកិច្ចប្រជុំគណៈរដ្ឋមន្រ្តីថា វិធានការណ៍បិទខ្ទប់ប្រទេសដែលត្រូវបានដាក់កាលពីថ្ងៃអាទិត្យ និងបំរាមគោចរនឹងត្រូវដកចេញវិញចាប់ពីថ្ងៃទី០១ ខែកក្កដាខាងមុខនេះ ។ ការប្រកាសខាងលើនេះបានកើតមានឡើងស្របពេលដែលចំនួនអ្នកឆ្លងជំងឺកូវីដ១៩ថ្មីៗប្រចាំថ្ងៃនៅទូទាំងប្រទេសតួកគីបានថមថយចុះពីជាង៦ម៉ឺននាក់នៅមុនពេលវិធានការណ៍បិទខ្ទប់ ឥឡូវនេះធ្លាក់ចុះនៅត្រឹមជិត៥ពាន់នាក់ប៉ុណ្ណោះក្នុងខែនេះ ៕ ប្រភព៖ CGTN

ហ្វីលីពីន៖ ប្រធានាធិបតីហ្វីលីពីនលោក រ៉ូឌ្រីហ្គា ឌូទើតេ បានព្រមានថា នឹងដាក់គុកអ្នកដែលបដិសេដចាក់វ៉ាក់សាំងបង្ការជំងឺកូវីដ១៩ ខណៈដែលប្រទេសខ្លួនកំពុងប្រយុទ្ធប្រឆាំងនឹងការផ្ទុះឡើងដ៏អាក្រក់បំផុតមួយក្នុងតំបន់អាស៊ី ។ លោក ឌូទើតេ បាននិយាយនៅក្នុងសុន្ទរកថាតាមទូរទស្សន៍មួយនៅថ្ងៃចន្ទនេះថា អ្នកជ្រើសរើសទៅ… រវាងវ៉ាក់សាំង ឬអោយខ្ញុំដាក់គុក ។ លោកបាននិយាយបែបនេះ​ ក្រោយមានរបាយការណ៍អំពីចំនួនអ្នកចេញទៅចាក់វ៉ាក់សាំងទាប ក្នុងរដ្ឋធានីម៉ានីល ។ លោកបន្ថែមថា កុំធ្វើឲ្យខ្ញុំខុសឲ្យសោះ… មានវិបត្តិនៅក្នុងប្រទេសនេះ… ខ្ញុំគ្រាន់តែខឹងជនជាតិហ្វីលីពីនដែលមិនយកចិត្តទុកដាក់លើរដ្ឋាភិបាល ប៉ុណ្ណោះ ។ ការលើកឡើងរបស់លោក ឌូទើតេ គឺផ្ទុយពីការបញ្ជាក់របស់មន្រ្តីសុខាភិបាលហ្វីលីពីន ដែលថា ទោះប្រជាជនត្រូវបានគេជំរុញឲ្យទទួលវ៉ាក់សាំងការពារជំងឺកូវីដ១៩ក៏ដោយ តែវាជាការស្ម័គ្រចិត្ត ។ គិតត្រឹមថ្ងៃទី២០ ខែមិថុនានេះ ហ្វីលីពីនបានចាក់វ៉ាក់សាំងគ្រប់ដូសដល់ប្រជាជនចំនួន២.១លាននាក់ ដែលនេះបង្ហាញពីកម្មវិធីចាក់វ៉ាក់សាំងយឺតយ៉ាវ ខណៈរដ្ឋាភិបាលមានគោលដៅចាក់ដល់ប្រជាជនរហូតដល់ទៅ៧០លាននាក់ ក្នុងចំណោមប្រជាជន១១០លាននាក់របស់ខ្លួននៅឆ្នាំ២០២១នេះ ៕ ប្រភព៖ Reuters