អាមេរិក៖ ប្រេសិតពិសេសអាមេរិក ទទួលបន្ទុកកិច្ចការកូរ៉េខាងជើងលោក Sung Kim ដែលទើបនឹងតែងតាំងថ្មីៗនេះ បាននិយាយពីទីក្រុងសេអ៊ូល នៅថ្ងៃចន្ទនេះថា រូបលោកកំពុងទន្ទឹងរង់ចាំការឆ្លើយតបណាមួយជាវិជ្ជមាននាពេលឆាប់ៗនេះ សម្រាប់កិច្ចចរចាគ្នាពីសំណាក់កូរ៉េខាងជើង ។ សម្រាប់កិច្ចប្រជុំត្រីភាគីជាមួយសមភាគីមកពីកូរ៉េខាងត្បូងនោះលោក Sung Kim កំពុងស្ថិតនៅក្នុងប្រទេសកូរ៉េខាងត្បូងសម្រាប់ដំណើរទស្សនកិច្ចរយៈពេល៥ថ្ងៃ ហើយកិច្ចប្រជុំនេះកើតឡើងនៅពេលដែលការចរចាជាមួយកូរ៉េខាងជើង ស្តីពីការរំសាយអាវុធនុយក្លេអ៊ែរ គឺស្ថិតក្នុងភាពស្រពិចស្រពិល ។ គួរកត់សម្គាល់ លោក Sung Kim ត្រូវបានតែងតាំងអោយកាន់មុខតំណែងនេះ បន្ទាប់ពីរដ្ឋបាលរបស់ប្រធានាធិបតីអាមេរិកលោក ចូ បៃដិន បានពិនិត្យឡើងវិញនូវគោលនយោបាយរបស់កូរ៉េខាងជើង និងបានសន្និដ្ឋានថា សហរដ្ឋអាមេរិកនឹងរកមធ្យោបាយជាក់ស្តែង ដើម្បីធ្វើឱ្យទីក្រុងព្យុងយ៉ាងបោះបង់ចោលអាវុធនុយក្លេអ៊ែររបស់ខ្លួន ៕ ប្រភព៖ Reuters

អាមេរិក៖ សហរដ្ឋអាមេរិកបញ្ជាក់ថា ខ្លួនបានមើលឃើញនូវសញ្ញាគួរអោយមានការចាប់អារម្មណ៍មួយ ជុំវិញការកត់សម្គាល់របស់មេដឹកនាំកំពូលកូរ៉េខាងជើងលោក គីម ជុងអ៊ុន ដែលថា លោក (លោក គីម) បានត្រៀមខ្លួនរូចរាល់ហើយ សម្រាប់កិច្ចចរចា និងការប្រឈមមុខដាក់គ្នា ហើយថា ទីក្រុងវ៉ាស៊ីនតោនបាននិងកំពុងទន្ទឹងរង់ចាំការទំនាក់ទំនងគ្នាដោយផ្ទាល់ពីទីក្រុងព្យុងយ៉ាង ដើម្បីចាប់ផ្តើមកិច្ចពិភាក្សាពាក់ព័ន្ធនឹងកម្មវិធីនុយក្លេអ៊ែរនៅលើតំបន់ឧបទ្វីបកូរ៉េ ។ ថ្លែងក្នុងកិច្ចសម្ភាសន៍មួយជាមួយទូរទស្សន៍ ABC News ទីប្រឹក្សាសន្តិសុខជាតិអាមេរិកលោក Jake Sullivan បានគូសបញ្ជាក់ថា ទីក្រុងវ៉ាស៊ីនតោននៅតែត្រូវការការឆ្លើយតបដោយផ្ទាល់ និងច្បាស់លាស់ពីសំណាក់ទីក្រុងព្យុងយ៉ាង ដើម្បីបង្ហាញពីការប្តេជ្ញាចិត្តរបស់ខ្លួនសម្រាប់កិច្ចចរចាគ្នានាពេលអនាគត ។ ការអត្ថាធិប្បាយបែបនេះរបស់លោក Sullivan បានកើតមានឡើងពីរថ្ងៃបន្ទាប់ពីរដ្ឋបាលលោក ចូ បៃដិន បានតែងតាំងលោក Sung Kim ជាប្រេសិតពិសេសថ្មីរបស់អាមេរិក ទទួលបន្ទុកកិច្ចការកូរ៉េខាងជើង និងក្រោយពេលដែលលោក គីម ជុងអ៊ុន កាលពីសប្តាហ៍មុន បាននិយាយថា ប្រទេសរបស់លោកចាំបាច់ត្រូវតែប្រុងប្រៀបខ្លួនជានិច្ចសម្រាប់កិច្ចចរចា និងការប្រឈមមុខដាក់គ្នាជាមួយអាមេរិក ដែលស្ថិតក្រោមការដឹកនាំរបស់រដ្ឋបាលលោក ចូ បៃដិន ៕ ប្រភព៖ Reuters

អាមេរិក៖ ប្រធានាធិបតីអាមេរិកលោក ចូ បៃដិន គ្រោងរៀបចំកិច្ចប្រជុំមួយនៅឯសេតវិមានជាមួយសមភាគីអាហ្វហ្គានីស្ថានលោក អាស្រាហ្វ ហ្គានី និងប្រធានក្រុមប្រឹក្សាជាន់ខ្ពស់សម្រាប់ការផ្សះផ្សារជាតិរបស់អាហ្វហ្គានីស្ថាន លោក អាឌុលឡា អាឌុលឡា នៅក្នុងថ្ងៃសុក្រសប្តាហ៍នេះ (ម៉ោងក្នុងតំបន់) ដើម្បីពិភាក្សាគ្នាស្តីពីការដកកងទ័ពអាមេរិក ចំពេលផ្ទុះការប្រយុទ្ធគ្នាខ្លាំងរវាងកងកម្លាំងអាហ្វហ្គានីស្ថាន និងក្រុមឧទ្ទាមតាលីបង់នៅទូទាំងប្រទេសមួយនេះ ។ បើតាមសេចក្តីថ្លែងការណ៍របស់សេតវិមាន នៅក្នុងជំនួបទល់មុខគ្នាលើកដំបូងនេះ លោក បៃដិន នឹងធ្វើការធានាអះអាងជាថ្មីដល់លោក ហ្គានី និងលោក អាប់ឌុលឡា ចំពោះការគាំទ្ររបស់សហរដ្ឋអាមេរិកដល់ប្រជាជនអាហ្វហ្គានីស្ថាន ក្នុងនោះរួមមានទាំងការទូត សេដ្ឋកិច្ច និងជំនួយមនុស្សធម៌ជាដើម ។ បន្ថែមលើនេះ លោក បៃដិន ក៏នឹងសង្កត់ធ្ងន់ពីការប្តេជ្ញាចិត្តរបស់ខ្លួនសារជាថ្មីម្តងទៀត ដើម្បីធ្វើអោយប្រាកដថា ប្រទេសអាហ្វហ្គានីស្ថាននឹងគ្មានថ្ងៃក្លាយជាឋានសួគ៌សុវត្ថិភាពសម្រាប់ក្រុមភេវរករនោះឡើយ ។ គួរកត់សម្គាល់ ចាប់តាំងពីការសម្រេចចិត្តរបស់លោក ចូ បៃដិន កាលពីខែមេសា ក្នុងការដកកងទ័ពអាមេរិកចេញពីអាហ្វហ្គានីស្ថាននៅថ្ងៃទី១១ ខែកញ្ញាខាងមុខនេះ ដើម្បីបិទបញ្ចប់ភ្លើងសង្គ្រាមដ៏យូរបំផុតរបស់សហរដ្ឋអាមេរិក បន្ទាប់ពីការប៉ះទង្គិចគ្នាជិត២០ឆ្នាំមកនោះ យ៉ាងហោចណាស់មានសង្កាត់ចំនួន៣០ក្នុងប្រទេសនោះ ត្រូវបានវាតទីគ្រប់គ្រងដោយក្រុមឧទ្ទាមតាលីបង់ ៕ ប្រភព៖ Reuters