អ៊ីតាលី៖ រដ្ឋមន្ត្រីការបរទេសអ៊ីស្រាអែលលោក Yair Lapid បានអះអាងទៅកាន់សមភាគីអាមេរិកលោក Antony Blinken ថា ភាគីអ៊ីស្រាអែលមានការសង្ស័យជាខ្លាំង ជុំវិញកិច្ចចរចាស្ដីពីកិច្ចព្រមព្រៀងនុយក្លេអ៊ែរអ៊ីរ៉ង់នៅក្នុងទីក្រុងវីយ្យែន ។ លោក Lapid បាននិយាយថា អ៊ីស្រាអែលពិតជាមានការសង្ស័យជាខ្លាំង ចំពោះកិច្ចចរចាស្ដីពីកិច្ចព្រមព្រៀងនុយក្លេអ៊ែរអ៊ីរ៉ង់នៅឯទីក្រុងវីយ្យែន ដោយពួកយើងជឿជាក់ថា កិច្ចពិភាក្សាគួរតែធ្វើឡើងតាមកិច្ចសន្ទនាដោយផ្ទាល់ និងប្រកប ដោយវិជ្ជាជីវៈ មិនមែនធ្វើឡើងតាមរយៈសន្និសីទសារព័ត៌មាននោះទេ ។ បើតាមមន្រ្តីអាមេរិក លោក Blinken បានឆ្លើយតបទៅកាន់លោក Lapid វិញថា ទីក្រុងវ៉ាស៊ីនតោននឹងបន្តរក្សាការទំនាក់ទំនងជិតស្និតជាមួយអ៊ីស្រាអែល ពាក់ព័ន្ធនឹងកិច្ចចរចាស្ដីពីកិច្ចព្រមព្រៀងនុយក្លេអ៊ែរអ៊ីរ៉ង់ ។ នៅក្នុងជំនួបទល់មុខជាលើកដំបូង ចាប់តាំងពីរដ្ឋាភិបាលអ៊ីស្រាអែលថ្មីស្បថចូលកាន់តំណែងកាលពីជាង២សប្ដាហ៍មុន លោក Blinken និងលោក Lapid បានពិភាក្សាគ្នាប្រកបដោយភាពកក់ក្ដៅ និងវិជ្ជមាន ហើយលោក Lapid ផ្ទាល់ក៏បានសន្យាដែរថា នឹងជួសជុលឡើងវិញនូវកំហុសដែលកើតមាននៅក្នុងទំនាក់ទំនងរវាងអាមេរិក និងអ៊ីស្រាអែលនារយៈពេលប៉ុន្មានឆ្នាំចុងក្រោយនេះ ៕ ប្រភព៖ CNA

បរទេស៖ សមាជិកជាន់ខ្ពស់ម្នាក់របស់ក្រុមតាលីបង់បានលើកឡើងថា ក្រុមខ្លួនបាននិងកំពុងជំរុញអោយសហរដ្ឋអាមេរិក គោរពតាមកិច្ចព្រមព្រៀងសន្តិភាពដែលបានបង្កើតឡើងដោយភាគីទាំងពីរកាលពី០២ឆ្នាំមុន ។ នៅក្នុងបទសម្ភាសន៍មួយជាមួយទូរទស្សន៍ជប៉ុន NHK លោក Suhail Shaheen បាននិយាយថា ក្រុមតាលីបង់បាននិងកំពុងបន្តចរចាជាមួយមន្រ្តីអាមេរិក នៅពីក្រោយកិច្ចប្រជុំផ្លូវការ ។ លោក Shaheen បន្តថា កិច្ចព្រមព្រៀងសន្តិភាពបានអំពាវនាវអោយសហរដ្ឋអាមេរិក ធ្វើការឆ្ពោះទៅរកការដោះលែងអ្នកទោសតាលីបង់ដែលនៅសេសសល់ទាំងអស់ និងការដកទណ្ឌកម្មរបស់អង្គសហប្រជាជាតិទៅលើសមាជិកតាលីបង់ជាន់ខ្ពស់ ។ លោកបន្ថែមថា សហរដ្ឋអាមេរិកត្រូវបានគេរំពឹងថា នឹងឆ្ពោះទៅរកគោលដៅក្នុងរយៈពេលបីខែ បន្ទាប់ពីការចាប់ផ្តើមនៃកិច្ចពិភាក្សាសន្តិភាពរវាងក្រុមតាលីបង់ និងរដ្ឋាភិបាលអាហ្វហ្គានីស្ថាន ។ គួរកត់សម្គាល់ កិច្ចចរចាសន្តិភាពរវាងក្រុមតាលីបង់ និងរដ្ឋាភិបាលអាហ្វហ្គានីស្ថានបានចាប់ផ្តើមឡើងកាលពីខែកញ្ញា ហើយបានកើតមានឡើងតែមួយរយៈប៉ុណ្ណោះ ។ ប៉ុន្តែពួកគេនៅតែស្ថិតក្នុងជម្លោះលើប្រព័ន្ធនយោបាយ និងលក្ខខណ្ឌឈប់បាញ់ ៕ ប្រភព៖ NHK

កូរ៉េខាងជើង៖ មេដឹកនាំកំពូលកូរ៉េខាងជើងលោក គីម ជុងអ៊ុន ត្រូវបានគេមើលឃើញថា បានស្រកទម្ងន់យ៉ាងឆាប់រហ័ស ដែលប្រការនេះ ធ្វើអោយប្រជាជនរដ្ឋកម្មុយនីស្តដ៏ឯកោមួយនេះមានការព្រួយបារម្ភ ជុំវិញបញ្ហាសុខភាពរបស់គាត់ ។ យោងតាមប្រព័ន្ធផ្សព្វផ្សាយដែលគ្រប់គ្រងយ៉ាងតឹងរ៉ឹងរបស់កូរ៉េខាងជើង ហើយតាមរយៈវីដេអូមុន និងក្រោយ ដែលបានចងក្រងដោយសារព័ត៌មានរ៉យទ័រនោះ ពិតជាបានបង្ហាញថា គាត់ (លោក គីម) ហាក់ដូចជាមានរាងស្តើងជាងមុនគួរអោយកត់សម្គាល់ ។ ជាក់ស្តែងនៅដើមខែនេះ ទូរទស្សន៍របស់កូរ៉េខាងជើងបានចាក់ផ្សាយវីដេអូរបស់លោក គីម ដែលបានចូលរួមក្នុងពិធីជប់លៀងមួយ ប៉ុន្តែវីដេអូប្លែកមួយដែលត្រូវបានគេនិយាយថា មានរយៈពេលប្រហែលជា៤ខែប៉ុណ្ណោះនៅក្នុងខែកុម្ភៈ ហើយត្រូវបានថតពីមុំដូចគ្នាបានបង្ហាញពីភាពខុសគ្នានៃរូបរាងរបស់លោក គីម ។ យ៉ាងណាមិញ វាមិនច្បាស់ទេថាតើហេតុអ្វីបានលោក គីម ស្រកទម្ងន់លឿនយ៉ាងនេះ ហើយរបាយការណ៍ក៏មិនបានផ្តល់ព័ត៌មានលម្អិតនោះដែរ ៕ ប្រភព៖ Reuters