បារាំង៖ រដ្ឋាភិបាលបារាំងបានសម្រេចដកកាតព្វកិច្ចពាក់ម៉ាសនៅពេលចេញទៅខាងក្រៅ ហើយនឹងបិទបញ្ចប់បម្រាមគោចរនៅពេលយប់លឿនជាងកាលកំណត់ពីមុន ដោយយោងលើស្ថានភាពរីករាលដាលនៃជំងឺកូវីដ-១៩បានប្រសើរឡើងវិញហើយ ។ នាយករដ្ឋមន្រ្តីបារាំងលោក Jean Castex បានប្រាប់អ្នកយកព័ត៌មាននៅថ្ងៃពុធនេះថា ករណីឆ្លងប្រចាំថ្ងៃបានធ្លាក់មកនៅត្រឹមជាង៣ពាន់ករណីប៉ុណ្ណោះ ដែលស្ថិតនៅក្រោមកម្រិត៥ពាន់ករណីសម្រាប់ការរក្សាករណីឆ្លងអោយស្ថិតក្រោមការគ្រប់គ្រង ។ លោកបន្ថែមថា ស្ថានភាពបច្ចុប្បន្នបាននិងកំពុងវិលត្រឡប់ទៅរកភាពប្រសើរឡើងជាងការរំពឹងទុក ។ ជាមួយគ្នានេះ លោក Castex ក៏បានប្រកាសដែរថា កាតព្វកិច្ចពាក់ម៉ាសនៅពេលចេញទៅខាងក្រៅ ដែលត្រូវបានដាក់អោយអនុវត្តចាប់តាំងពីខែសីហាកន្លងមក នឹងលែងទាមទារទៀតហើយគិតចាប់ពីថ្ងៃព្រហស្បតិ៍សប្តាហ៍នេះ (ម៉ោងក្នុងតំបន់) ។ ដោយឡែកបម្រាមគោចរនៅម៉ោង១១៖០០នាទីយប់នោះ ក៏ត្រូវដកចេញវិញផងដែរគិតចាប់ពីថ្ងៃអាទិត្យសប្តាហ៍នេះ ពោលគឺ១០ថ្ងៃលឿនជាងកាលកំណត់ពីមុន ។ បើតាមលោក Castex រដ្ឋាភិបាលមានផែនការអោយ៦០ភាគរយនៃប្រជាជនសរុបរបស់ប្រទេសបារាំង ឬស្មើនឹង៤០លាននាក់បានទទួលការចាក់វ៉ាក់សាំងបង្ការជំងឺកូវីដ១៩យ៉ាងហោចណាស់១ដូសនៅត្រឹមចុងខែសីហាខាងមុខ ហើយ៣៥លាននាក់ទៀតបានចាក់វ៉ាក់សាំងពេញលេញ (ពីរដូស) ៕ ប្រភព៖ NHK

ជប៉ុន៖ រដ្ឋាភិបាលជប៉ុនមានផែនការអនុញ្ញាតអោយទីក្រុងនានា ចាប់ផ្តើមចេញលិខិតឆ្លងដែនវ៉ាក់សាំង ជាឯកសារបញ្ជាក់ពីការចាក់វ៉ាក់សាំងបង្ការជំងឺកូវីដ១៩គិតចាប់ពីពាក់កណ្តាលខែកក្កដាខាងមុខ នេះបើតាមសារព័ត៌មានក្នុងតំបន់ដកស្រង់ប្រភពពីរដ្ឋាភិបាលដែលបានបញ្ជាក់នៅថ្ងៃព្រហស្បតិ៍នេះ ។ បើតាមរដ្ឋាភិបាលជប៉ុន នៅចុងខែកក្កដា ការិយាល័យរដ្ឋាភិបាលក្នុងតំបន់ នឹងចាប់ផ្តើមចេញវិញ្ញាបនបត្រដោយផ្អែកលើកំណត់ត្រាចាក់វ៉ាក់សាំងដល់ប្រជាជនដែលមានលិខិតឆ្លងដែនត្រឹមត្រូវ ។ ក្នុងនោះ ឯកសារនេះ នឹងបង្ហាញឈ្មោះអ្នកដំណើរ សញ្ជាតិ លេខលិខិតឆ្លងដែន និងកាលបរិច្ឆេទចាក់វ៉ាក់សាំងការពារជំងឺកូវីដ១៩ជាដើម ។ រដ្ឋាភិបាលជប៉ុនបន្ថែមថា ខ្លួនក៏អាចចេញវិញ្ញាបនប័ត្រឌីជីថល ដែលអាចដាក់ពាក្យសុំតាមអ៊ីនធើណិតបានផងដែរ ។ គួរកត់សម្គាល់ សហភាពអឺរ៉ុបក៏បាននិងកំពុងពិចារណាដាក់ចេញនូវលិខិតវ៉ាក់សាំងផងដែរ ខណៈដែលមេដឹកនាំធុរកិច្ច និងអ្នកផ្សេងទៀតនៅក្នុងប្រទេសជប៉ុន ចង់អោយវិញ្ញាបនប័ត្របែបនេះចេញអោយអ្នកដែលធ្វើដំណើរទៅបរទេសអោយបានឆាប់ៗតាមដែលអាចធ្វើទៅបាន ៕ ប្រភព៖ ស៊ីនហួរ