ជប៉ុន៖ ជប៉ុនត្រៀមដកការប្រកាសស្ថានភាពអាសន្ននៅថ្ងៃអាទិត្យចុងសប្តាហ៍នេះ សម្រាប់ខេត្តចំនួន០៩ ក្នុងនោះរួមមានទាំងទីក្រុងតូក្យូ និងអូសាកាផងដែរ ហើយថា រដ្ឋាភិបាលនឹងដាក់ចេញនូវវិធានការណ៍ពាក់កណ្តាលគ្រាអាសន្នមកជំនួសនៅក្នុងខេត្តចំនួន៧ នៃខេត្តទាំងនោះ ។ នាយករដ្ឋមន្រ្តីជប៉ុនលោក ស៊ូហ្គា យ៉ូស៊ីហ៊ីដេ បានប្រាប់អ្នកយកព័ត៌មាននាពេលថ្មីៗនេះថា ការសម្រេចចិត្តនឹងត្រូវធ្វើឡើងនៅថ្ងៃព្រហស្បតិ៍សប្តាហ៍នេះ (ម៉ោងក្នុងតំបន់) ។ ទោះជាយ៉ាងណា អភិបាលក្រុងអូសាកា លោក Hirofumi Yoshimura បានជំទាស់នឹងសេចក្តីសម្រេចលុបស្ថានអាសន្ន ដោយនិយាយថា លោកនឹងស្នើរឱ្យចាត់វិធានការពាក់កណ្តាលគ្រាអាសន្ន ដើម្បីជៀសវាងការងើបឡើងវិញនៃការឆ្លង ។ ដោយឡែកអ្នកនាំពាក្យរដ្ឋាភិបាលជប៉ុនក៏បាននិយាយនៅថ្ងៃពុធនេះដែរថា ជប៉ុននឹងសម្រេចចិត្តក្នុងខែនេះ ថាតើនឹងអនុញ្ញាតអោយមានអ្នកទស្សនាក្នុងស្រុកអាចចូលរូមក្នុងព្រឹត្តិការណ៍អូឡាំពិកទីក្រុងតូក្យូដែរឬយ៉ាងណា បន្ទាប់ពីអ្នកជំនាញបានចុះហត្ថលេខាលើផែនការ ដើម្បីអនុញ្ញាតអោយមានមនុស្សរហូតដល់១ម៉ឺននាក់នៅក្នុងព្រឹត្តិការណ៍នេះ ៕ ប្រភព៖ CNA

ឥណ្ឌា៖ ឥណ្ឌាបានចាប់ផ្តើមដកចេញនូវវិធានការរឹតត្បិត ដើម្បីប្រយុទ្ធប្រឆាំងនឹងវីរុសកូវីដ១៩ សំដៅជួយសង្គ្រោះសេដ្ឋកិច្ចប្រទេសរបស់ខ្លួនឡើងវិញ ។ ជាក់ស្តែងប្រាសាទថ្មកែវពណ៌ស តាច់ ម៉ាហាល់ (Taj Mahal) ដ៏ល្បីល្បាញមួយនៅប្រទេសឥណ្ឌា នៅថ្ងៃពុធនេះ បានបើកទ្វារឡើងវិញសារជាថ្មីហើយ ។ បើទោះជាមានការបើកទ្វារឡើងវិញក៏ដោយ ប៉ុន្តែអ្នកទេសចរចំនួន៦៥០នាក់ប៉ុណ្ណោះ ដែលត្រូវបានអនុញ្ញាតអោយចូលទស្សនានៅក្នុងបរិវេណនៃប្រាសាទ ។ ប្រាសាទថ្មកែវពណ៌ស តាច់ ម៉ាហាល់ នេះ ស្ថិតនៅភាគខាងជើងទីក្រុងអាហ្គ្រា រដ្ឋអ៊ូតា ប្រាដេស ហើយជាធម្មតាបានទាក់ទាញភ្ញៀវទេសចរចន្លោះពី ៧ ទៅ ៨លាននាក់ជារៀងរាល់ឆ្នាំ ឬជាមធ្យមជាង២ម៉ឺននាក់ក្នុងមួយថ្ងៃ ។ សូមរំលឹកឡើងវិញថា ប្រាសាទថ្មកែវពណ៌ស ត្រូវបានបិទទ្វារកាលពីដើមខែមេសាកន្លងមក ចំពេលដែលប្រទេសឥណ្ឌាបានដាក់ចេញនូវវិធានការបិទខ្ទប់យ៉ាងតឹងរ៉ឹង ដើម្បីប្រយុទ្ធប្រឆាំងនឹងវីរុសកូវីដ១៩ ដែលបានចម្លង និងសម្លាប់មនុស្សរាប់ពាន់នាក់ជារៀងរាល់ថ្ងៃ ៕ ប្រភព៖ AP

ថៃ៖ នាយករដ្ឋមន្ត្រីថៃបានប្រកាសនៅក្នុងសុន្ទរកថាតាមកញ្ចក់ទូរទស្សន៍នៅថ្ងៃពុធនេះថា ឥឡូវនេះ វាដល់ពេលដែលយើងត្រូវសំឡឹងមើលទៅអនាគត និងបើកប្រទេសនេះឡើងវិញ ដើម្បីស្វាគមន៍ភ្ញៀវទេសចរអន្តរជាតិឲ្យត្រឡប់មកប្រទេសថៃម្តងទៀត លោកថា នេះជាមធ្យោបាយដ៏សំខាន់មួយ សំដៅកាត់បន្ថយការលំបាក ដែលប្រជាជនមិនអាចរកចំណូលបានជាយូរមកហើយ ។ នាយករដ្ឋមន្ត្រីថៃរូបនេះបន្ថែមថា ថ្ងៃនេះ ខ្ញុំសូមជូនដំណឹងថា ខ្ញុំមានគម្រោងបើកប្រទេសថៃបើកឡើងវិញ ក្នុងរយៈពេល១២០ថ្ងៃទៀត ដោយរាប់ចាប់ពីថ្ងៃនេះតទៅ ។ គោលដៅដែលបានកំណត់ដោយលោក ប្រាយុទ្ធ នេះ នឹងធ្វើឱ្យប្រទេសថៃអាចបើកដំណើរការឡើងវិញ នៅពាក់កណ្តាលខែតុលាខាងមុខនេះ ។ ទោះជាយ៉ាងណាក៏ដោយ លោក ប្រាយុទ្ធ ក៏បានអំពាវនាវដល់គោលដៅទេសចរណ៍សំខាន់ៗឱ្យបើកដំណើរការឡើងវិញឆាប់ៗនេះ ប្រសិនបើពួកគេត្រៀមខ្លួនរួចជាស្រេច លោកថា អ្នកដំណើរដែលបានចាក់វ៉ាក់សាំងបង្ការជំងឺកូវីដ១៩រួចគួរតែត្រូវបានរួចផុតពីការធ្វើចត្តាឡីស័ក ។ នាឱកាសនោះដែរ លោក ប្រយុទ្ធ ក៏បានប្រកាសដែរថា ប្រទេសថៃបាននិងកពុងសហការជាមួយក្រុមហ៊ុនផលិតឱសថធំៗចំនួន៦ មានដូចជា Pfizer Moderna AstraZeneca Sinovac និង Sinopharm លោកថា ថៃនឹងទទួលបានវ៉ាក់សាំងបង្ការជំងឺកូវីដ១៩ចំនួន១០៥,៥លានដូស ដោយពួកគេនឹងចាប់ផ្តើមដឹកជញ្ជូនមកនៅក្នុងឆ្នាំនេះ ៕ ប្រភព៖ CNA