ចិន៖ រដ្ឋាភិបាលចិននៅថ្ងៃចន្ទនេះបានចោទប្រកាន់ប្រទេស G7 ទៅលើការ “កេងចំណេងផ្នែកនយោបាយ” បន្ទាប់ពីមេដឹកនាំក្រុមប្រទេសមានសេដ្ឋកិច្ចជឿនលឿនទាំងប្រាំពីរនេះ បានធ្វើការរិះគន់ទីក្រុងប៉េកាំងពាក់ព័ន្ធនឹងបញ្ហាសិទ្ធិមនុស្សរបស់ប្រទេសចិន ដែលត្រូវបានគេរាយការណ៍នៅខេត្តស៊ិនជាំង និងទីក្រុងហុងកុង ។ ស្ថានទូតចិនប្រចាំចក្រភពអង់គ្លេសបានចេញសេចក្តីថ្លែងការណ៍មួយ កាលពីថ្ងៃអាទិត្យម្សិលមិញថា យុគសម័យ នៃក្រុមប្រទេសមួយចំនួនតូចដែលមានបំណងចង់កែវាសនាពិភពលោកនោះ បានកន្លងហួសផុតទៅហើយ ។ សេចក្តីថ្លែង ការណ៍ដដែលបន្ថែមថា គេមានជំនឿថា ប្រទេសទាំងអស់ទោះធំ ឬតូច ខ្លាំងឬខ្សោយ មានឬក្រ គឺមានសិទ្ធិស្មើគ្នា… កិច្ចការរបស់ពិភពលោក គប្បីត្រូវបានដោះស្រាយតាមរយៈការពិគ្រោះគ្នាដោយប្រទេសទាំងអស់ ។ ប្រទេសចិនតែងតែធ្វើការឆ្លើយតបវាយបកទៅវិញនូវអ្វីដែលសហរដ្ឋអាមេរិក និងក្រុមសម្ព័ន្ធមិត្តបានធ្វើសំដៅចង់ប្រឆាំងនឹងរដ្ឋាភិបាលក្រុងប៉េកាំង ដែលកំពុងមានសន្ទុះសេដ្ឋកិច្ច យោធា បច្ចេកវិទ្យាកាន់តែលេចធ្លោឡើងជាមួយនឹងឥទ្ធិពលនៃគោលនយោបាយផ្លូវ និងខ្សែក្រវាត់ ដែលកំពុងមានការទាក់ទាញពីប្រទេសជាច្រើនក្នុងសកលលោក ៕ ប្រភព៖ CNA

អង់គ្លេស៖ មេដឹកនាំប្រទេសមានសេដ្ឋកិច្ចជឿនលឿន G7 នៅថ្ងៃអាទិត្យម្សិលមិញបានស្តីបន្ទោសចិនជុំវិញបញ្ហាសិទ្ធិមនុស្សនៅខេត្តស៊ិនជាំង ការអំពាវនាវអោយចិនគោរពសិទ្ធិសេរីភាព និងកម្រិតខ្ពស់នៃភាពស្វយ័តសម្រាប់ទីក្រុងហុងកុង ក៏ដូចជាទាមទារអោយស៊ើបអង្កេតរកប្រភពដើមនៃវីរុសកូវីដ១៩នៅក្នុងប្រទេសចិន ។ សេចក្តីថ្លែងការណ៍របស់ប្រទេស G៧ បានអំពាវនាវអោយចិនត្រូវគោរពសិទ្ធិមនុស្ស និងសេរីភាពជាគោលការណ៍គ្រឹះ ជាពិសេសទាក់ទងក្នុងតំបន់ស៊ិនជាងនិងសិទ្ធិរបស់ពួកគេទាំងឡាយ សេរីភាព និង កម្រិតខ្ពស់នៃភាពស្វយ័តសម្រាប់ ហុងកុង ។ សេចក្តីថ្លែងការណ៍ប្រទេសទាំង៧បន្តថា យើងសូមអំពាវនាវអោយមានការសិក្សាទាន់ពេលវេលា និង ដោយតម្លាភាពរបស់ក្រុមអ្នកជំនាញវិទ្យាសាស្ត្រដឹកនាំដោយអង្គការសុខភាពពិភពលោក (WHO) ក្នុងដំណាក់កាលទី២ ដើម្បីស្វែងរកប្រភពដើមកំណើតនៃវីរុសកូវីដ១៩ ដូចបានធ្លាប់ណែនាំដោយក្រុមជំនាញក្នុងការស្រាវជ្រាវនៅក្នុងប្រទេសចិនកន្លងមក ៕ ប្រភព៖ CNA