អង់គ្លេស៖ នាយករដ្ឋមន្រ្តីអង់គ្លេសលោក បូរីស ចនសុន និងប្រធានាធិបតីអាមេរិកលោក ចូ បៃដិន បានព្រមព្រៀងគ្នាលើការងារបើកការធ្វើដំណើរឡើងវិញរវាងប្រទេសទាំងពីរ ក៏ដូចជាបានចុះហត្ថលេខាលើធម្មនុញ្ញអាត្លង់ទិចថ្មីមួយ មុនពេលមេដឹកនាំទាំងពីរចូលរួមកិច្ចប្រជុំកំពូល G7 ។ ធម្មនុញ្ញថ្មីខាងលើនេះ បានគូសបញ្ជាក់ពីការគំរាមកំហែងនាពេលបច្ចុប្បន្ន រួមមានហិរញ្ញវត្ថុខុសច្បាប់ ជម្លោះហិង្សា និងភាពជ្រុលនិយម ការប្រែប្រួលអាកាសធាតុ និងវិបត្តិសុខភាពពិភពលោក ដូចជាជំងឺរាតត្បាតរ៉ាំរ៉ៃ (COVID) ជាដើម ។ អ្នកនាំពាក្យរដ្ឋាភិបាលអង់គ្លេសបានបញ្ជាក់នៅក្នុងសេចក្តីថ្លែងការណ៍មួយថា មេដឹកនាំទាំងពីរបានព្រមបើកការធ្វើដំណើរឡើងវិញ និងបន្តចែករំលែកព័ត៌មានទាក់ទងនឹងការប្រយុទ្ធប្រឆាំងជំងឺកូវីដ១៩ ទាំងនៅក្នុងប្រទេស និងអន្តរជាតិ ។ បន្ថែមលើនេះ មេដឹកនាំទាំងពីរក៏បានសន្យាធ្វើឱ្យកិច្ចសហប្រតិបត្តិការកាន់តែស៊ីជម្រៅ តាមរយៈធម្មនុញ្ញអាត្លង់ទិកថ្មីដែលបានធ្វើឱ្យប្រសើរឡើងនូវច្បាប់ដើមដែលបានចុះហត្ថលេខាដោយនាយករដ្ឋមន្រ្តីអង់គ្លេសលោក Winston Churchill និង ប្រធានាធិបតីអាមេរិកលោក Franklin Roosevelt កាលពីឆ្នាំ១៩៤១ ៕ ប្រភព៖ ស៊ីនហួរ

បារាំង៖ តុលាការបារាំងនៅថ្ងៃព្រហស្បតិ៍ម្សិលមិញ (ម៉ោងក្នុងតំបន់) បានកាត់ទោសបុរសម្នាក់ដែលបានទះកំផ្លៀងប្រធានាធិបតីបារាំងលោក អែមម៉ានុយអែល ម៉ាក្រុង នៅចំពោះមុខមហាជននៅក្នុងសប្តាហ៍នេះ អោយជាប់ពន្ធធនាគាររយៈពេល៤ខែ ។ លោក Damien Tarel អាយុ២៨ឆ្នាំក៏ត្រូវបានផ្តល់ការព្យួរទោសរយៈពេល១៤ខែបន្ថែមទៀតផងដែរ ។ បន្ថែមលើនេះ លោក Tarel ក៏ត្រូវបានហាមឃាត់មិនអោយធ្វើការក្នុងការិយាល័យសាធារណៈ និងមិនអោយកាន់កាប់អាវុធរយៈពេល៥ឆ្នាំផងដែរ ។ លោក Damien Tarel បានប្រាប់តុលាការទីក្រុង Valence ថា ទង្វើរបស់គាត់ គឺមិនបានគ្រោងទុកជាមុនទេ និងកើតឡើងដោយសារតែកំហឹងចំពោះការធ្លាក់ចុះសេដ្ឋកិច្ចរបស់ប្រទេសបារាំង ៕ ប្រភព៖ France24