-
ក្រុមហ៊ុន Amazon បោះទុន៣ពាន់លានដុល្លារ ដើម្បីបង្កើតមជ្ឈមណ្ឌលទិន្នន័យនៅអេស្ប៉ាញ ដែលនឹងចាប់ផ្តើមដំណើរការនៅពាក់កណ្តាលឆ្នាំ២០២២ (មានវីដេអូ)
អាមេរិក៖ ក្រុមហ៊ុន Amazon គ្រោងចំណាយប្រាក់២,៥ពាន់លានអឺរ៉ូ ឬស្មើនឹងជាង៣ពាន់លានដុល្លារ ក្នុងគោលបំណងបង្កើតមជ្ឈមណ្ឌលទិន្នន័យដ៏ធំមួយ ដែលមានទីតាំងស្ថិតនៅតំបន់ អារ៉ាហ្គន (Aragon) ភាគខាងជើងប្រទេសអេស្ប៉ាញ ។ ប្រភពបានអោយដឹងថា មជ្ឈមណ្ឌលទិន្នន័យថ្មីខាងលើ អាចនឹងចាប់ផ្ដើមដំណើការនៅពាក់ កណ្ដាលឆ្នាំ២០២២ខាងមុខនេះ ពីព្រោះ Amazon បានរៀបចំហេដ្ឋារចនាសម្ព័ន្ធមួយចំនួនរួចរាល់ហើយ ដោយនឹងផ្ដល់ឱកាសការងារថ្មីប្រមាណ១ពាន់៣រយនាក់ ។ បើតាមក្រុមហ៊ុនលក់ទំនិញតាមអនឡាញអាមេរិកមួយនេះ ខ្លួននឹងបោះទុនបន្ថែមទៀតទៅលើសេវាកម្ម Cloud ដែលមានឈ្មោះថា Amazon Web Services ក្នុងរយៈពេល១០ឆ្នាំទៀត ។ គួរកត់សម្គាល់ កាលពីឆ្នាំ២០២០កន្លងទៅ Amazon Web Services រកប្រាក់ចំណូលបាន៤៦ពាន់លានដុល្លារ និង ប្រាក់ចំណេញប្រតិបត្តិការ១៣.៥ពាន់លានដុល្លារ ៕ ប្រភព៖ Reuters
-
ក្រុមហ៊ុន Google ខាតបង់ប្រាក់២៦៨លានដុល្លារ ពាក់ព័ន្ធនឹងការផាកពិន័យពីបទរំលោភបំពានលើការផ្សព្វផ្សាយពាណិជ្ជកម្មក្នុងប្រទេសបារាំង (មានវីដេអូ)
អាមេរិក៖ ក្រុមហ៊ុន Google បានបង់ប្រាក់សំណង២២០លានអឺរ៉ូ ស្មើនឹងប្រមាណ២៦៨លានដុល្លារអាមេរិកពីបទប្រើប្រាស់អំណាចរបស់ខ្លួន ក្នុងការរំលោភបំពានលើការផ្សព្វផ្សាយពាណិជ្ជកម្មនៅក្នុងប្រទេសបារាំង ។ បើតាមក្រុមអ្នកឃ្លាំងមើកការប្រកួតប្រជែងរបស់បារាំង ក្រុមហ៊ុនបច្ចេកវិទ្យាខ្នាតយក្សរបស់អាមេរិកមួយនេះ បានប្រើប្រាស់ឥទ្ធិពលរបស់ខ្លួន ក្នុងការប្រម៉ូតសេវាកម្មផ្សព្វផ្សាយពាណិជ្ជកម្ម និងបានរារាំងដៃគូប្រកួតប្រជែងផ្សេងៗមិនអោយមានប្រៀបជាងខ្លួន តាមរយៈ Google AdX ដែលជាកន្លែងផ្ដល់សេវាកម្មផ្សព្វផ្សាយពាណិជ្ជកម្មដ៏ធំរបស់ Google ។ ស្របពេលជាមួយគ្នានោះដែរ ក្រុមហ៊ុន Google ក៏បានប្រកាសថា ខ្លួននឹងផ្លាស់ប្ដូរលក្ខខណ្ឌ និងគោលការណ៍មួយចំនួននៅលើ Google AdX ដើម្បីកុំអោយមានបញ្ហាកើនមានឡើងដដែលៗដូច្នេះទៀត ៕ ប្រភព៖ BBC
-
ជនសង្ស័យពីរនាក់ត្រូវចាប់ខ្លួន នៅក្នុងហេតុការណ៍ទះកំផ្លៀងប្រធានាធិបតីបារាំង
បារាំង៖ ប្រធានាធិបតីបារាំងលោក អែមម៉ានុយអែល ម៉ាក្រុង ត្រូវបានគេទះកំផ្លៀងមួយទំហឹង ក្នុងកំឡុងដំណើរបំពេញទស្សនកិច្ចផ្លូវការនៅភាគអាគ្នេយ៍ប្រទេសបារាំង នៅថ្ងៃអង្គារសប្តាហ៍នេះ (ម៉ោងក្នុងតំបន់) ។ នៅក្នុងវីដេអូមួយដែលផ្សាយពាសពេញលើបណ្តាញសង្គម លោក ម៉ាក្រុង ត្រូវបានគេមើលឃើញថា កំពុងដើរឆ្ពោះទៅរកមហាជនដែលមានរនាំងនៅពីមុខ នៅពេលធ្វើដំណើរទៅដល់តំបន់ ធែន ហើមីថេក (Tain-l’Hermitage) ខាងក្រៅទីក្រុង វ៉ាឡង់ (Valence)។ ជាមួយគ្នានោះ មានបុរសមាឌធំសក់វែងម្នាក់ បានលើកដៃទះកំផ្លៀងលោក ម៉ាក្រុង ពេញមួយទំហឹង នៅចំពោះមុខមន្ត្រីប៉ូលីស ហើយភ្លាមៗនោះ លោកប្រធានាធិបតីត្រូវបានគេនាំចេញពីកន្លែងកើតហេតុ ។ បើតាមប្រព័ន្ធផ្សព្វផ្សាយបារាំងនោះ មានបុរសពីរនាក់ត្រូវបានចាប់ខ្លួន ក្រោយហេតុការណ៍នេះកើតឡើង ប៉ុន្តែមកទល់ពេលនេះ អត្តសញ្ញាណ និងគោលបំណងរបស់បុរសនោះនៅមិនទាន់ដឹងច្បាស់នៅឡើយទេ ។ នៅក្នុងសេចក្តីថ្លែងការណ៍មួយដែលត្រូវបានរាយការណ៍ដោយទីភ្នាក់ងារសារព័ត៌មាន AFP បានឲ្យដឹងថា អ្នកទះកំផ្លៀងលោក ម៉ាក្រុង និងបុគ្គលម្នាក់ទៀតកំពុងត្រូវបានសួរចម្លើយដោយកងកម្លាំងសន្តិសុខ ៕ ប្រភព៖ CNA
-
សហរដ្ឋអាមេរិកចាប់ផ្តើមបន្ធូរបន្ថយការរឹតត្បិតលើការធ្វើដំណើរមកពីប្រទេស និងដែនដីចំនួន១១០
អាមេរិក៖ មជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក (CDC) បានចេញអនុសាសន៍ស្តីពីការបន្ធូរបន្ថយការរឹតបន្តឹងលើការធ្វើដំណើរមកពីប្រទេស និងដែនដីជាង១១០នៅជុំវិញពិភពលោក ក្នុងនោះរួមមានសង្ហិបុរីផងដែរ ។ ការវាយតម្លៃថ្មីរបស់មជ្ឈមណ្ឌល CDC ដែលចេញផ្សាយដំបូងដោយសារព័ត៌ មានរ៉យទ័រ និងនៅលើគេហទំព័ររបស់ខ្លួនបានអោយដឹងថា ប្រទេសចំនួន៦១បានធ្លាក់ដល់កម្រិតទាបពីកម្រិតខ្ពស់របស់ខ្លួន “កម្រិត៤” ដែលបានលើកទឹកចិត្តអោយមានការធ្វើដំណើរទាំងអស់សម្រាប់អ្នកដែលបានចាក់វ៉ាក់សាំងរួចរាល់ ។ បើតាមអ្នកនាំពាក្យមជ្ឈមណ្ឌល CDC នោះ ប្រទេស និងដែនដីចំនួន៥០បន្ថែមទៀតត្រូវបានទម្លាក់មកនៅត្រឹម «កម្រិត១ ឬកម្រិត២» ។ បណ្តាប្រទេសដែលមានចំណាត់ថ្នាក់ហានិភ័យឆ្លងកូវីដ-១៩ទាបឥឡូវមានប្រទេសសិង្ហបុរី អ៉ីស្រាអែល កូរ៉េខាងត្បូង អ៊ីស្លង់ បេលីលី និងអាល់បានី ។ ក្នុងចំណោមប្រទេសដែលឥឡូវនេះស្ថិតនៅក្នុងបញ្ជី «កម្រិត៣» មានបារាំង អេក្វាទ័រ ហ្វីលីពីន អាហ្វ្រិកខាងត្បូង កាណាដា ម៉ិកស៊ិក រុស្ស៊ី អេស្ប៉ាញ ស្វិស តួកគី អ៊ុយក្រែន ហុងឌុយរ៉ាស ហុងគ្រី និងអ៊ីតាលី ៕ ប្រភព៖ CNA
-
ថៃមើលឃើញអ្នកស្លាប់ដោយសារជំងឺ Covid-19 ចំនួន៣៥នាក់ និងអ្នកឆ្លងថ្មីៗចំនួន២,៦៨០ករណីទៀតនៅក្នុងថ្ងៃពុធនេះ
ថៃ៖ ក្រសួងសុខាភិបាលសាធារណៈថៃ នៅថ្ងៃពុធនេះ បានរាយការណ៍អំពីអ្នកស្លាប់ដោយ សារជំងឺកូវីដ១៩ចំនួន៣៥នាក់ទៀត ដោយធ្វើឲ្យអ្នកស្លាប់សរុបកើនដល់១ពាន់៣៣២នាក់ ។ ជាមួយគ្នានេះ អាជ្ញាធរសុខាភិបាលថៃក៏បានប្រកាសពីការរកឃើញអ្នកឆ្លងថ្មីចំនួន២ពាន់៦៨០ករណីទៀតផងដែរ ដែលនាំឲ្យករណីសរុបកើនដល់១៨ម៉ឺន៤ពាន់៨២៨ករណី ។ ក្នុងចំណោមករណីសរុប ដែលត្រូវបានរកឃើញក្នុងរយៈពេល២៤ម៉ោងចុងក្រោយ មាន២ពាន់៤រយករណីគឺជាប្រជាជនទូទៅ និង២៨០ករណីទៀតគឺជាការឆ្លងនៅក្នុងពន្ធនាគារ ។ ដោយឡែកអ្នកជំងឺ៤ពាន់២៥៣នាក់បានជាសះស្បើយ និងត្រូវបានអនុញ្ញាតឲ្យចាកចេញពីមន្ទីរពេទ្យក្នុងរយៈពេល២៤ម៉ោងចុងក្រោយនេះ ។ គួរកត់សម្គាល់ ចាប់តាំងពីថ្ងៃទី០១ ខែមេសា នៅពេលផ្ទុះរលកទី៣នៃការចម្លងវីរុសកូវីដ១៩នោះ ប្រទេសថៃបានកត់ត្រាអ្នកឆ្លងថ្មីៗសរុប១៥ម៉ឺន៦ពាន់៣៦៥ករណី និងអ្នកជំងឺ១០ម៉ឺន៨ពាន់៨២៦នាក់បានជាសះស្បើយឡើងវិញ ៕ ប្រភព៖ Bangkok Post
-
អ្នកឆ្លង COVID-19 នៅទូទាំងពិភពលោកកើនឡើងដល់១៧៤លាន៧៤ម៉ឺននាក់ ក្នុងនោះស្លាប់៣លាន៧៦ម៉ឺននាក់ និងជាសះស្បើយ១៥៨លាន១៤ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១៧៤លាន៧៤ម៉ឺន៦ពាន់៨៦៣ករណី ក្នុងនោះមានអ្នកជម្ងឺសរុបចំនួន៣លាន៧៦ម៉ឺន២ពាន់៨៧៧នាក់ស្លាប់ និង ជាសះស្បើយឡើងវិញសរុបចំនួន១៥៨លាន១៤ម៉ឺន៩ពាន់៦១០នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៩ ខែមិថុនា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន៣៤លាន២៤ម៉ឺន២ពាន់៨៦៦នាក់ ស្លាប់ចំនួន៦១ម៉ឺន៣ពាន់៥២នាក់ និងជាសះស្បើយចំនួន២៨លាន២២ម៉ឺន៨៦៣នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន២៩លាន៨ម៉ឺន៨ពាន់១៧៦នាក់ ស្លាប់៣៥ម៉ឺន៣ពាន់៥៥៧នាក់ និងជាសះស្បើយ២៧លាន៤៩ម៉ឺន៦ពាន់១៩៨នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន១៧លាន៣ម៉ឺន៨ពាន់២៦០នាក់ ស្លាប់ចំនួន៤៧ម៉ឺន៧ពាន់៣០៧នាក់ និងជាសះស្បើយ១៥លាន៤៩ម៉ឺន៤ពាន់៧១នាក់ ៕ ប្រភព៖ worldometers
-
ចិនសន្យាបន្តជួយអាស៊ានបន្ថែមទៀត ទប់ទល់នឹងកូវីដ
ប្រទេសចិន កាលពីថ្ងៃទី៧ មិថុនា ម្សិលមិញ បានសន្យាថា នឹងផ្តល់ជំនួយបន្ថែមទៀត ដល់បណ្តាប្រទេសអាស៊ាន ក្នុងកិច្ចប្រយុទ្ធប្រឆាំងនឹងជំងឺរាតត្បាតកូវីដ១៩។ លោក Wang Yi រដ្ឋមន្ត្រីការបរទេសចិនបានមានប្រសាសន៍បែបនេះ ប្រាប់ទៅសមាជិកអាស៊ានទាំង១០ប្រទេស ក្នុងកិច្ចប្រជុំ នៅប្រទេសចិន។ លោកថា ចិនបានបញ្ជូនវ៉ាក់សាំងបង្ការជំងឺកូវីដ១៩ ចំនួន១០០លានដូសហើយ ទៅកាន់បណ្តាប្រទេសនៃប្រជាជាតិអាស៊ាន ព្រមទាំងជាមួយនឹងសម្ភារវេជ្ជសាស្ត្រប្រយុទ្ធប្រឆាំងជំងឺ និងការជួយផ្សេងៗទៀត។ អំឡុងកិច្ចប្រជុំពិសេសថ្នាក់រដ្ឋមន្ត្រីការបរទេសចិន-អាស៊ាន ដើម្បីអបអរខួប៣០ឆ្នាំនៃការបង្កើតទំនាក់ទំនងសន្ទនាចិន-អាស៊ាន នាពេលនោះ លោក Wang Yi ថា ភាគីនានា គួរតែបង្កើតឲ្យមានយន្តការជំនាញមួយ ពង្រឹងកិច្ចសហប្រតិបត្តិការតាមរយៈ ដំណើរការវ៉ាក់សាំង កិច្ចការស្រាវជ្រាវលើការប្រើ និង ធ្វើការស្ថាបនាមជ្ឈមណ្ឌលចែកចាយនិងការពារ ដើម្បីជួយធ្វើយ៉ាងណាឲ្យវ៉ាក់សាំងបញ្ជូនទៅក្នុងតំបន់អាស៊ាន៕
-
ស្ថាបនិកក្រុមហ៊ុន Amazon លោក Jeff Bezos នឹងធ្វើដំណើរទៅកាន់ទីអវកាសនៅខែក្រោយនេះ (មានវីដេអូ)
បរទេស៖ ស្ថាបនិកក្រុមហ៊ុន Amazon លោក ជេហ្វ បេហ្សូស (Jeff Bezos) អះអាងថា រូបលោកនឹងហោះហើរទៅកាន់ទីអវកាសនៅខែកក្កដាខាងមុខនេះ នៅលើជើងហោះហើរមានមនុស្សដំបូងបំផុត ដែលដំណើរការដោយក្រុមហ៊ុនរ៉ុក្កែត Blue Origin របស់លោកផ្ទាល់ ។ តាមរយៈបណ្តាញសង្គម Instagram របស់ខ្លួន កំពូលមហាសេដ្ឋីពិភពលោករូបនេះបាននិយាយថា តាំងពីខ្ញុំមានអាយុ៥ឆ្នាំ ខ្ញុំសុបិន្តចង់ធ្វើដំណើរទៅទីអវកាស… នៅថ្ងៃទី២០ ខែកក្កដាខាងមុខនេះ ខ្ញុំនឹងធ្វើដំណើរជាមួយបងប្រុសរបស់ខ្ញុំ ។ បើតាមក្រុមហ៊ុន Blue Origin នោះ លោក បេហ្សូស និងបងប្រុសរបស់លោកឈ្មោះMark នឹងធ្វើដំណើរតាមជើងហោះហើរដំបូងរបស់យាន New Shepard របស់ក្រុមហ៊ុន ។ ដំណើរកម្សាន្តដ៏អស្ចារ្យខាងលើនេះ នឹងមានរយៈពេលសរុប១០នាទី ដោយអ្នកដំណើរទាំងបួននាក់នៅលើនោះនឹងចំណាយពេលនៅលើខ្សែបន្ទាត់កាម៉ាន់ ដែលកំណត់ព្រំដែនរវាងបរិយាកាសផែនដី និងទីអវកាស ។ បច្ចុប្បន្នក្រុមហ៊ុនកំពុងដាក់ដេញថ្លៃកៅអីទីបី ហើយការដេញថ្លៃនេះឥឡូវមានតម្លៃ២,៨លានដុល្លារ ដោយមានអ្នកចូលរួមជិត៦ពាន់នាក់មកពី១៤៣ប្រទេស ៕ ប្រភព៖ CNA
-
អាជ្ញាធរសុខាភិបាលអាមេរិកអនុម័តអោយប្រើថ្នាំ Alzheimer ថ្មី ដើម្បីព្យាបាលជំងឺភ្លេចភ្លាំងរបស់មនុស្ស (មានវីដេអូ)
Video Link: https://fb.watch/5_UwJS836Y/ អាមេរិក៖ រដ្ឋបាលចំណីអាហារ និងឱសថអាមេរិក (FDA) បានអនុញ្ញាតអោយប្រើថ្នាំថ្មីមួយមានឈ្មោះថា អាល់ហ្សេមើ (Alzheimer) សម្រាប់ព្យាបាលជំងឺភ្លេចភ្លាំង ហើយថ្នាំ អាដូកានូម៉ាប (Aducanumab) នេះ គឺជាថ្នាំព្យាបាលថ្មីដំបូងគេ សម្រាប់ជំងឺនេះក្នុងរយៈពេលជិត២០ឆ្នាំ ។ ថ្នាំថ្មីនេះត្រូវបានបង្កើតឡើងដោយក្រុមហ៊ុនអាមេរិក បាយអូជេន (Biogen) និងក្រុមហ៊ុនជប៉ុន អ៊ីអ៊ិសៃ (Eisai) ហើយវាផ្តោតលើសេរីរាង្គនៅក្នុងខួរក្បាល ដែលអ្នកស្រាវជ្រាវជឿថា អាចប៉ះពាល់ដល់ការគិត ។ កាលពីខែមីនាឆ្នាំ២០១៩ ការសាកល្បងជាលក្ខណៈអន្ដរជាតិដំណាក់កាលចុងក្រោយ នៃថ្នាំ អាដូកានូម៉ាប ដែលពាក់ព័ន្ធនឹងអ្នកជំងឺប្រមាណ៣ពាន់នាក់ត្រូវបានបញ្ឈប់ ព្រោះការវិភាគបានបង្ហាញថា វាមិនប្រសើរជាងថ្នាំដ៏ទៃក្នុងការកាត់បន្ថយបញ្ហាចងចាំ និងការគិតនោះទេ ។ ប៉ុន្តែក្រោយមកនៅឆ្នាំដដែលនោះ ក្រុមហ៊ុនផលិតអាមេរិក បាយអូជេន បានវិភាគបន្ថែមលើទិន្នន័យ ហើយសន្និដ្ឋានថា កំរិតខ្ពស់នៃថ្នាំ អាដូកានូម៉ាប អាចកាត់បន្ថយបញ្ហាចងចាំរបស់មនុស្សបានយ៉ាងគួរអោយកត់សម្គាល់ ៕ ប្រភព៖ BBC
-
លោក ចូ បៃដិន និយាយទូរស័ព្ទជាមួយប្រធានាធិបតីអ៊ុយក្រែន នៅមុនកិច្ចប្រជុំកំពូលរវាងសហរដ្ឋអាមេរិក-រុស្ស៊ី (មានវីដេអូ)
អាមេរិក៖ ប្រធានាធិបតីអាមេរិកលោក ចូ បៃដិន នៅថ្ងៃចន្ទនេះ បានបញ្ជាក់ជាថ្មីនូវការគាំទ្ររបស់ប្រទេសលោកដល់រដ្ឋាភិបាលទីក្រុងគៀវ អំឡុងពេលនិយាយទូរស័ព្ទជាមួយសមភាគីអ៊ុយក្រែនរបស់លោក គឺលោក វ៉ូឡូឌីមី ហ្សេឡិនស្គី ដែលជាការខិតខំដើម្បីធានាដល់អ៊ុយក្រែន នៅមុនពេលកិច្ចប្រជុំកំពូលរវាងសហរដ្ឋអាមេរិក និងរុស្ស៊ីនៅចុងខែមិថុនាខាងមុខនេះ ។ ទីប្រឹក្សាសន្តិសុខជាតិអាមេរិកលោក ចេក ស៊ុលលីវែន បានបញ្ជាក់នៅក្នុងសន្ទរកថាខ្លីមួយនៅឯសេតវិមានថា លោក បៃដិន បានប្រាប់លោក ហ្សេឡិនស្គី ថា រូបលោករង់ចាំស្វាគមន៍ដំណើរទស្សនកិច្ចរបស់លោក ហ្សេឡិកស្គី មកកាន់សេតវិមានក្នុងរដ្ឋធានីវ៉ាស៊ីនតោនអំឡុងរដូវក្តៅនេះ ។ បើតាមសេចក្តីថ្លែងការណ៍ លោក ហ្សេឡិកស្គី បានឆ្លើយតបវិញថា រូបលោកបានទទួលយកការអញ្ជើញរបស់លោក បៃដិន ។ លោក ស៊ុលលីវែន បន្ថែមថា នៅក្នុងការសន្ទនាគ្នាតាមទូរស័ព្ទរបស់មេដឹកនាំទាំងពីរ លោក បៃដិន បានអះអាងជាថ្មីនូវការគាំទ្រចំពោះការត្រួសត្រាយផ្លូវសម្រាប់អ៊ុយក្រែន ដើម្បីចូលរួមជាមួយអង្គការ NATO ។ ការជជែកគ្នាតាមទូរស័ព្ទខាងលើនេះបានកើតមានឡើងស្របពេលដែលអ៊ុយក្រែនបានបង្ហាញការព្រួយបារម្ភពាក់ព័ន្ធនឹងកិច្ចប្រជុំរបស់លោក បៃដិន និងប្រធានា ធិបតីរុស្ស៊ីលោក វ៉្លាឌីមៀ ពូទីន ហើយនឹងគំរោងបំពង់បង្ហូរប្រេង Nord Stream 2 រវាងរុស្ស៊ី…