-
ឥណ្ឌាផ្តើមបើកក្រុងធំៗវិញ ក្រោយពេលអត្រាឆ្លងកូវីដធ្លាក់ចុះច្រើន
រដ្ឋធានីញ៉ូវដេល្លី និងក្រុងប្លុកពាណិជ្ជកម្ម មុំបៃ បានចាប់ផ្តើមបន្ធូរបន្ថយការរឹតបន្តឹង បណ្តើរៗវិញហើយ នៅថ្ងៃទី៧ មិថុនានេះ ខណៈដែលអត្រាឆ្លងកូវីដ១៩ នៅឥណ្ឌាបានធ្លាក់ចុះច្រើនហើយ នៅខែមិថុនានេះ។ នៅថ្ងៃចន្ទនេះ ឥណ្ឌារាយការណ៍ពីវិជ្ជមានកូវីដ១៩ថ្មី ត្រឹមជាង១០ម៉ឺននាក់ ស្លាប់២៤២៧នាក់ តែបើធៀបនឹងបីឬបួនថ្ងៃជាប់ៗគ្នាកាលពីខែឧសភា ឆ្លងថ្មីជាង៤០ម៉ឺននាក់។ មន្ទីរពេទ្យក្នុងក្រុងធំៗទាំងពីរ ដែលមានមនុស្សប្រមាណ៤០លាននាក់ ពេញហូរហៀរដោយសារតែរលកកូវីដស្លាប់មនុស្សខ្លាំង កាលពីខែមេសា និងខែឧសភា ដោយពេលនោះ ខ្វះអ៊ុកស៊ីសែនផង និងឧបករណ៍វេជ្ជសាស្ត្រសម្រាប់អ្នកធ្ងន់ធ្ងរផង។ រកលកថ្មីពេលនោះ គេឃើញថា ឥណ្ឌាឡើងចំណាត់ថ្នាក់លេខ២ បន្ទាប់ពីអាមេរិក ដែលមានអត្រាឆ្លងខ្លាំងបំផុត និងស្លាប់ច្រើនបំផុត។ មន្ត្រីជាន់ខ្ពស់គ្រប់គ្រងរដ្ឋធានីញ៉ូវដេល្លី លោក Arvind Kejriwa បានសរសេរលើបណ្តាញសង្គម Tweeter នៅថ្ងៃទី៧ មិថុនានេះថា «ពួកយើងត្រូវតែជៀសឆ្ងាយពីកូរ៉ូណា ហើយក៏ឲ្យសេដ្ឋកិច្ចត្រលប់មកប្រក្រតីវិញដែរ» ។ លោកបានបញ្ជាឲ្យហាងលក់ដូរពាក់កណ្តាលបើកឡើងវិញ ដោយកំណត់ចំនួនថ្ងៃ និងចំនួនមនុស្ស ប៉ុន្តែការិយាល័យនិងបណ្តាផ្លូវរថភ្លើងក្រោមដី បើកតែ៥០ភាគរយទេ។ ប៉ុន្តែភោជនីយដ្ឋានពេលយប់ រោងភាពយន្ត និងកន្លែងហាត់ប្រាណ នៅតែរឹតត្បិតខ្លាំង៕ ប្រភពពី CNA
-
រដ្ឋមន្ត្រីការបរទេសវៀតណាម-ឡាវឆ្លៀតជួបគ្នា ក្រៅកិច្ចប្រជុំពិសេសនៅចិន
រដ្ឋមន្ត្រីការបរទេសវៀតណាមនិងរដ្ឋមន្ត្រីការបរទេសឡាវ កាលពីម្សិលមិញ បានជួបពិភាក្សាការងារជាមួយគ្នានៅចិន ក្នុងឳកាសពួកលោកត្រូវចូលរួមកិច្ចប្រជុំពិសេសចំនួន២ នៅប្រទេសចិន។ ទីភ្នាក់ងារសារព័ត៌មាន VNexpress បានចេញផ្សាយថា លោករដ្ឋមន្ត្រីវៀតណាម Bùi Thanh Sơn និងសមភាគីឡាវ Saleumxay Kommasith បានពិភាក្សាអំពីការគាំទ្រគ្នាទៅវិញទៅមក ក្នុងកិច្ចប្រយុទ្ធប្រឆាំងនឹងជំងឺកូវីដ១៩ និងស្វែងរកវិធីពង្រឹងទំនាក់ទំនងទ្វេភាគីកាន់តែល្អប្រសើរទៀត។ ភាគីទាំងពីរបានជជែកពីការជំរុញកិច្ចសហប្រតិបត្តិការប្រយុទ្ធប្រឆាំងជំងឺកូវីដ១៩ ក៏ដូចជាជំនួយរបស់វៀតណាមសម្រាប់ឡាវ ទប់ស្កាត់កូវីដ ជាដើម។ គួរបញ្ជាក់ថា រដ្ឋមន្ត្រីប្រទេសទាំងពីរបានជួបគ្នា នៅក្រុងឆុងឈីងប្រទេសចិន កាលពីថ្ងៃទី៦ មិថុនា ពោលគឺនៅក្រៅកិច្ចប្រជុំពិសេសអាស៊ាន និងកិច្ចប្រជុំរដ្ឋមន្ត្រីការបរទេសយន្តការមេគង្គ-ឡានឆាង៕
-
ចិននាំចេញវ៉ាក់សាំងបង្ការជំងឺ Covid-19 ទៅកាន់ប្រទេសជាង៤០ ហើយចិនសន្យាថា នឹងបង្កើនការផ្គត់ផ្គង់វ៉ាក់សាំងនៅជុំវិញពិភពលោក (មានវីដេអូ)
ចិន៖ ប្រធានស្ថាប័នពាណិជ្ជកម្មបរទេសនៃក្រសួងពាណិជ្ជកម្មចិន លោក លី ស៊ីងហ្ស៊ីន (Li Xingqian) បានអោយដឹងនៅក្នុងបទសម្ភាសន៍មួយជាមួយសារព័ត៌មាន CMG នៅថ្ងៃចន្ទនេះថា ប្រទេសចិនបាននាំចេញវ៉ាក់សាំងបង្ការជំងឺកូវីដ១៩ទៅកាន់បណ្តាប្រទេសជាង៤០ហើយ ។ ដោយឡែកអនុប្រធានគណៈកម្មការសុខាភិបាលជាតិចិនលោក ហ្សេង យីស៊ីន (Zeng Yixin) បានបញ្ជាក់ដែរថា ចិនបានចែកចាយវ៉ាក់សាំង COVID-19 ច្រើនជាង៣៥០លានដូសទៅកាន់បណ្ដាប្រទេសជាច្រើននៅជុំវិញពិភពលោក ហើយកំពុងបង្កើនការផលិតវ៉ាក់សាំងនៅក្នុងស្រុកបន្ថែមទៀត ដើម្បីបំពេញតម្រូវការនៅឯក្រៅប្រទេស ជាពិសេសនៅតាមបណ្ដាប្រទេសកំពុងអភិវឌ្ឍន៍ ។ អនុប្រធានគណៈកម្មការសុខាភិបាលជាតិចិនរូបនេះបានសង្កត់ធ្ងន់ថា ការអនុម័តដោយអង្គការសុខភាពពិភពលោក (WHO) ឱ្យប្រើប្រាស់ជាបន្ទាន់នូវវ៉ាក់សាំង COVID-19 របស់ក្រុមហ៊ុនចិនទាំងពីរ គឺក្រុមហ៊ុន Sinopharm និងក្រុមហ៊ុន Sinovac នឹងកាន់តែជួយសម្រួលដល់កម្មវិធី COVAX ក្នុងការចែកចាយវ៉ាក់សាំងសកល និងការប្រយុទ្ធប្រឆាំងជំងឺកូវីដ១៩ ៕ ប្រភព៖ CGTN
-
រដ្ឋមន្រ្តីសុខាភិបាលប្រទេស G7 ឯកភាពគ្នាលើគោលការណ៍ថ្មី ក្នុងការចែករំលែកទិន្នន័យគ្នា ដើម្បីប្រយុទ្ធប្រឆាំងនឹងជំងឺរាតត្បាតនាពេលអនាគត (មានវីដេអូ)
អង់គ្លេស៖ រដ្ឋមន្រ្តីសុខាភិបាលមកពីក្រុមប្រទេសមហាអំណាចសេដ្ឋកិច្ចពិភពលោក G7 បានប្តេជ្ញាចិត្តលើកិច្ចព្រមព្រៀងថ្មីមួយ ចំពោះការធ្វើអោយខ្លួនមានភាពកាន់តែងាយស្រួយ និងលឿនរហ័សជាងមុន ក្នុងការចែករំលែកលទ្ធផលរបស់វ៉ាក់សាំង និងការសាកល្បងព្យាបាល ដើម្បីដោះស្រាយបញ្ហាជំងឺកូវីដ១៩ ក៏ដូចជាការការពារការគំរាមកំហែងផ្នែកសុខភាពនាពេលអនាគត ។ស្របពេលជាមួយគ្នានេះដែរ រដ្ឋមន្រ្តីសុខាភិបាលអង់គ្លេសលោក ម៉េត ហាន់ខុក ដែលប្រទេសរបស់លោកកាន់តំណែងជាប្រធាននៃកិច្ចប្រជុំ G7 បានគូសបញ្ជាក់ថា កិច្ចព្រមព្រៀងនេះបានបង្ហាញពីការប្តេជ្ញាចិត្ត មិនត្រឹមតែដើម្បីឆ្លងកាត់វិបត្តិកូវីដ១៩ប៉ុណ្ណោះទេ ប៉ុន្តែថែមទាំងធ្វើអោយយើងត្រៀមខ្លួនកាន់តែប្រសើរជាងមុន សម្រាប់ការគំរាមកំហែងនាពេលអនាគត ។ លោកបានសង្កត់ធ្ងន់ថា យើងប្តេជ្ញាធ្វើការជាមួយគ្នា… យើងនឹងយកជ័យជំនះលើវីរុសរាតត្បាតដ៏កាចសាហាវមួយនេះ ហើយកសាងអ្វីៗអោយល្អឡើងវិញ ។សូមបញ្ជាក់ថា សមាជិកក្រុមប្រទេស G7 រួមមានកាណាដា បារាំង អាល្លឺម៉ង់ អ៊ីតាលី ជប៉ុន អង់គ្លេស និងសហរដ្ឋអាមេរិក ។ នាយករដ្ឋមន្រ្តីអង់គ្លេសលោក បូរីស ចនសុន នឹងចូលរួមជាមួយមេដឹកនាំក្រុមប្រទេស G7 សម្រាប់កិច្ចប្រជុំកំពូលនៅឯរមណីយដ្ឋានឆ្នេរសមុទ្រភាគនិរតីនៃឆ្នេរសមុទ្រ Carbis Bay ក្នុងទីក្រុង Cornwall ដែលនឹងចាប់ផ្តើមធ្វើឡើងពីថ្ងៃទី១១ ដល់ទី១៣ ខែមិថុនាខាងមុខ ៕ ប្រភព៖ CGTN
-
អនុប្រធានាធិបតីអាមេរិកធ្វើទស្សនកិច្ចទៅកាន់តំបន់អាមេរិកឡាទីន ក្នុងគោលបំណងដោះស្រាយបញ្ហាជនអន្តោប្រវេសន៍ និងអំពើពុករលួយ (មានវីដេអូ)
អាមេរិក៖ លោកស្រី ខាម៉ាឡា ហារីស ក្នុងដំណើរទស្សនកិច្ចលើកដំបូងរបស់លោកស្រីក្នុងនាមជាអនុប្រធានាធិបតីអាមេរិក បាននិងកំពុងព្យាយាមបង្កើនទំនាក់ទំនងផ្នែកការទូតស៊ីជម្រៅជាមួយហ្គាតេម៉ាឡា និងម៉ិកស៊ិក ព្រមទាំងប្រទេសអាមេរិកឡាទីនចំនួនពីរទៀត ដែលនេះជាយុទ្ធសាស្រ្តនៃកិច្ចខិតខំប្រឹងប្រែងរបស់រដ្ឋបាលលោក ចូ បៃដិន ដើម្បីដោះស្រាយបញ្ហាជនអន្តោប្រវេសន៍នៅតំបន់ព្រំដែនសហរដ្ឋអាមេរិក ។ លោកស្រី ហារីស ដែលបានចាកចេញពីរដ្ឋធានីវ៉ាស៊ីនតោនកាលពីថ្ងៃអាទិត្យម្សិលមិញ ក្រោយពន្យារពេលដោយសារតែបញ្ហាបច្ចេកទេសដែលបានកើតឡើងលើយន្តហោះដ៏ទំនើប Air Force Two នោះ កំពុងស្វែងរកការប្តេជ្ញាចិត្តសម្រាប់កិច្ចសហប្រតិបត្តិការកាន់តែខ្លាំងទៅលើសន្តិសុខតាមព្រំដែន និងការវិនិយោគសេដ្ឋកិច្ច ប៉ុន្តែអំពើពុករលួយនៅក្នុងតំបន់ដែលជាបញ្ហាប្រឈមគួរអោយចាប់អារម្មណ៍ នឹងធ្វើអោយការខិតខំប្រឹងប្រែងរបស់លោកស្រីកាន់តែស្មុគស្មាញ ។ គួរបញ្ជាក់ថា បញ្ហាបច្ចេកទេសដែលមិនពាក់ព័ន្ធនឹងការព្រួយបារម្ភអំពីសុវត្ថិភាពធំដុំបានបង្ខំឱ្យយន្តហោះរបស់លោកស្រី ខាម៉ាឡា ហារីស វិលត្រឡប់ទៅកាន់មូលដ្ឋានរួម អេនឌ្រូ នៅរដ្ឋម៉ារីលែន ប្រហែលជា៣០នាទី ក្រោយលោកស្រីបានចាកចេញកាលពីថ្ងៃអាទិត្យក្នុងដំណើរទៅកាន់ប្រទេសហ្គាតេម៉ាឡា និងម៉ិកស៊ិក ។ បន្ទាប់ពីជួបរឿងហេតុនេះ អ្នកនាំពាក្យឈ្មោះ សាយម៉ូណេ សាន់ឌ័រ ដែលធ្វើដំណើរជាមួយលោកស្រី ហារីស បានប្រាប់អ្នកយកព័ត៌មានថា វាជាបញ្ហាបច្ចេក ទេស… ពុំមានការព្រួយបារម្ភអំពីសុវត្ថិភាពធំដុំទេ ៕ ប្រភព៖ CNA
-
អតីតមេដឹកនាំពិភពលោករាប់រយនាក់ អំពាវនាវអោយប្រទេស G7 ផ្តល់វ៉ាក់សាំងដល់ប្រទេសក្រីក្រ ដើម្បីប្រយុទ្ធប្រឆាំងនឹងជំងឺកូវីដ-១៩ (មានវីដេអូ)
-
អតីតមេដឹកនាំពិភពលោករាប់រយនាក់អំពាវនាវអោយប្រទេស G7 ផ្តល់វ៉ាក់សាំងដល់ប្រទេសក្រីក្រ ដើម្បីប្រយុទ្ធប្រឆាំងនឹងជំងឺកូវីដ-១៩
អង់គ្លេស៖ អតីតប្រធានាធិបតី នាយករដ្ឋមន្រ្តី និងរដ្ឋមន្រ្តីការបរទេសរាប់រយនាក់បានស្នើអោយក្រុមប្រទេសមហាអំណាចសេដ្ឋកិច្ចពិភពលោក (G7) ចំណាយប្រាក់ដើម្បីការចាក់វ៉ាក់សាំងបង្ការជំងឺកូវីដ១៩ទូទាំងពិភពលោក សំដៅបញ្ឈប់ការឆ្លងរាតត្បាតនៃវីរុសដ៏កាចសាហាវមួយនេះ ។ ការអំពាវនាវខាងលើនេះ បានកើតមានឡើងនៅមុនកិច្ចប្រជុំកំពូល G7 ក្នុងចក្រភពអង់គ្លេសដែលនឹងចាប់ផ្តើមនៅថ្ងៃសុក្រសប្តាហ៍នេះ(ម៉ោងក្នុងតំបន់) នៅពេលដែលប្រធានាធិបតីអាមេរិកលោក ចូ បៃដិន នឹងជួបជាមួយមេដឹកនាំអង់ គ្លេស បារាំង អាល្លឺម៉ង់ អ៊ីតាលី កាណាដា និងជប៉ុន ។ នៅក្នុងលិខិតរបស់អតីតមេដឹកនាំពិភពលោកទៅកាន់ក្រុមប្រទេស G7 នោះ ពួកគេបានសង្កត់ធ្ងន់ថា មេដឹកនាំ G7 និងមេដឹកនាំដទៃទៀត ដែលត្រូវបានអញ្ជើញឲ្យចូលរួមក្នុងកិច្ចប្រជុំកំពូលនេះ គួរតែធានាអោយបាននូវទឹកប្រាក់ប្រមាណ៣០ពាន់លានដុល្លារក្នុងមួយឆ្នាំ រយៈពេលពីរឆ្នាំ ដើម្បីឆ្ពោះទៅរកការប្រយុទ្ធប្រឆាំងនឹងរោគរាតត្បាតនៅទូទាំងពិភពលោក ៕ ប្រភព៖ Reuters
-
វៀតណាមទទួលបានថវិកា៣២៩លានដុល្លារ នៅក្នុងយុទ្ធនាការរៃអង្គាសប្រាក់ទិញវ៉ាក់សាំងបង្ការជំងឺកូវីដ-១៩
វៀតណាម៖ គិតត្រឹមថ្ងៃអាទិត្យម្សិលមិញ វៀតណាមទទួលបានថវិកាប្រមាណ៧.៦ទ្រីលានដុង ឬស្មើនឹង៣២៩លានដុល្លារហើយ បន្ទាប់ពីនាយករដ្ឋមន្ត្រីវៀតណាមបានអំពាវនាវអោយមានការបរិច្ចាគថវិកា ដើម្បីទ្រទ្រង់កម្មវិធីទិញ និងចែកចាយវ៉ាក់សាំងបង្ការ COVID-19 ។ ក្រសួងហិរញ្ញវត្ថុវៀតណាមដែលទទួលបន្ទុកកិច្ចការនេះបានអោយដឹងថា ថវិកាដែលត្រូវបានប្រមូលជាក់ស្តែង គឺ១.០៣ទ្រីលានដុល្លារ ឬស្មើនឹង៤៤.៦លានដុល្លារ ក្នុងគ្រាដែលក្រុមធំៗនៅវៀតណាមបានសន្យាផ្តល់ថវិកា៦.៦ទ្រីលានដុង ឬស្មើនឹង២៨៥លានដុល្លារទៀតនៅក្នុងពេលបន្តបន្ទាប់ខាងមុខនេះ ។ សូមជម្រាបថា មូលនិធិខាងលើនេះ នឹងប្រើសម្រាប់ការទិញវ៉ាក់សាំងបង្ការជំងឺកូវីដពីបរទេស ក៏ដូចជាដើម្បីគាំទ្រដល់ការផលិតវ៉ាក់សាំងនៅក្នុងប្រទេសវៀតណាម ក្នុងគោលបំណងឆ្ពោះទៅរកការសម្រេចគោលដៅ នៃការចាក់ថ្នាំបង្ការអោយបាន៧០ភាគរយនៃប្រជាជន៩៨លាននាក់របស់វៀតណាម ៕ ប្រភព៖ VNExpress
-
ថៃបន្តមើលឃើញអ្នកឆ្លងកូវីដ-១៩ថ្មីៗចំនួន២,៤១៩ករណី និងស្លាប់ចំនួន៣៣នាក់ទៀតនៅក្នុងថ្ងៃចន្ទនេះ
ថៃ៖ អាជ្ញាធរសុខាភិបាលថៃបានរាយការណ៍ពីការរកឃើញអ្នកឆ្លងជំងឺកូវីដ១៩ថ្មីចំនួន២ពាន់៤១៩ករណី ដែលនាំអោយករណីឆ្លងសរុបកើនឡើងដល់១៧ម៉ឺន៩ពាន់៨៨៦ករណីហើយ គិតត្រឹមថ្ងៃចន្ទដើមសប្តាហ៍នេះ ។ ស្របពេលជាមួយគ្នានេះដែរ អាជ្ញាធរសុខាភិបាលថៃបានរាយការណ៍ពីតួលេខអ្នកស្លាប់ដោយសារជំងឺកូវីដ១៩ថ្មីៗចំនួន៣៣នាក់បន្ថែមទៀតផងដែរ ធ្វើអោយចំនួនអ្នកស្លាប់សរុបកើនឡើងដល់១ពាន់២៦៩នាក់ ។ បើតាមមជ្ឈមណ្ឌលតាមដានស្ថានភាពកូវីដ១៩របស់ថៃ (CCSA) ក្នុងចំណោមករណីឆ្លងសរុបដែលត្រូវបានរកឃើញក្នុងរយៈពេល២៤ម៉ោងចុងក្រោយ មានចំនួន២ពាន់៣២៨ករណីគឺជាប្រជាជនទូទៅ និង៩១ករណីទៀតគឺជាការឆ្លងនៅក្នុងពន្ធនាគារ ៕ ប្រភព៖ Bangkok Post
-
ឥណ្ឌាទុកឱកាសចុងក្រោយអោយក្រុមហ៊ុន Twitter ក្នុងការបំពេញបែបបទទៅតាមច្បាប់ប្រព័ន្ធព័ត៌មានវិទ្យា (IT) ថ្មី
អាមេរិក៖ រដ្ឋាភិបាលឥណ្ឌាបានប្រាប់ទៅកាន់ក្រុមហ៊ុន Twitter Inc ថា វាជាឱកាសចុងក្រោយ ក្នុងការបំពេញបែបទទៅតាមច្បាប់ប្រព័ន្ធព័ត៌មានវិទ្យាថ្មី (IT Rules) បើមិនដូច្នេះទេ ខ្លួននឹងអនុវត្តតាមវិធានការផ្លូវច្បាប់ នេះបើតាមការថតចម្លង នៃលិខិតផ្លូវការមួយដែលទីភ្នាក់ងារសារព័ត៌មានរ៉យទ័របានទទួល ។ រហូតទល់ពេលនេះ បើតាមឯកសារដែលរ៉យទ័រទទួលបាន គឺនៅមិនទាន់មានក្រុមហ៊ុនមួយណាបានបំពេញបែបបទទៅតាមច្បាប់ថ្មីខាងលើបាន១០០ភាគរយនោះទេ ខណៈដែលគេមើលឃើញថា រដ្ឋាភិបាលឥណ្ឌាបានបង្កើតច្បាប់ថ្មីនេះឡើងដើម្បីទប់ស្កាត់ការប្រើប្រាស់ឥទ្ធិពលរបស់ក្រុមហ៊ុនបច្ចេកវិទ្យាទាំងនោះ និងក្នុងគោលដៅមួយដែលស៊ីជម្រៅជាងនេះ ។ សូមរំលឹកថា រដ្ឋាភិបាលឥណ្ឌាបានប្រកាសអំពីច្បាប់ប្រព័ន្ធព័ត៌មានវិទ្យាថ្មី (IT) កាលពីខែកុម្ភៈកន្លងទៅនេះ និងបានដាក់ជាធរមានកាលពីចុងខែឧសភា ដោយក្នុងនោះតម្រូវឱ្យក្រុមហ៊ុនបណ្ដាញសង្គមទាំងអស់ ត្រូវបង្កើតក្រុមការងារ ឬមនុស្សដែលជាតំណាងម្នាក់សម្រាប់ទុកដោះស្រាយវិបត្តិ និងវិវាទផ្សេងៗ ដែលកើតមានឡើយដោយមិនបានត្រៀមទុកជាមុន ៕ ប្រភព៖ Reuters