ភ្នំពេញ ៖ បុរសម្នាក់ស្រវឹងស្រាឡើងជោកជាំ បានបើករថយន្តយ៉ាងលឿន ហើយជ្រុលទៅបុករថយន្តដែលចតនៅចញ្ចើមផ្លូវចំនួន៣គ្រឿង បណ្ដាលឲ្យរងការខូចខាតយ៉ាងដំណំ សំណងល្អមិនបង្កឲ្យមនុស្សរងរបួស។

អឺរ៉ុប៖ ប្រធានាធិបតីសហរដ្ឋអាម៉េរិក លោក ដូណាល់ ត្រាំ នឹងជួបពិភាក្សាការងារជាមួយ ក្រុមមេដឹកនាំអង្គការណាតូ សម្រាប់កិច្ចប្រជុំដ៏ផុយស្រួយមួយ នៅឯជំនួបកំពូលក្នុង ទីក្រុងព្រុចសែល ប្រទេសប៊ែលហ្ស៊ិក នៅក្នុងថ្ងៃពុធ នេះ។ មុនដំណើរទស្សនកិច្ចរបស់ខ្លួន លោក ដូណាល់ ត្រាំ បានបង្ហាញនូវប្រតិកម្មយ៉ាងខ្លាំងចំពោះសហភាពអឺរ៉ុប ពាក់ព័ន្ធនឹងបញ្ហាពាណិជ្ជកម្មទៅលើប្រទេសសម្ព័ន្ធមិត្តអង្គការណាតូ សម្រាប់ការខកខានចំណាយលុយគ្រប់គ្រាន់ទៅលើវិស័យការពារជាតិ។

សហរដ្ឋអាម៉េរិក៖ ក្រុមហ៊ុនបណ្តាញសង្គម Facebook នឹងត្រូវពិន័យជាប្រាក់ចំនួន ៥០០.០០០ផោន ដែលស្មើនឹងប្រមាណ៦៦៣.០០០ដុល្លារអាម៉េរិកលើការរំលោភបំពានលើទិន្នន័យ ដែលជាប់ពាក់ព័ន្ធនឹងរឿងអាស្រូវរបស់អង្គភាពទិន្នន័យ Cambridge Analytica ។ រឿងអាស្រូវនេះ បានកើតឡើងមុនពេលច្បាប់ថ្មី ស្តីពីការការពារទិន្នន័យរបស់សហភាពអឺរ៉ុប ដែលអនុញ្ញាតឲ្យមានការពិន័យកាន់តែច្រើន ។

អង់គ្លេស៖ នាយករដ្ឋមន្រ្តីអង់គ្លេសលោកស្រី ថេរ៉េសា ម៉ាយ បាននិយាយថា លោកស្រីមានសមត្ថភាពអាចសម្រេចគម្រោងដកខ្លួនចេញពីសហភាពអឺរ៉ុបបាន បើទោះជាមន្រ្តីធំៗបានដាក់ពាក្យលាឈប់ជាបន្តបន្ទាប់ ដោយសារបញ្ហាវិវាទនៃការចរចាគម្រោងព្រីហ្ស៊ីតនេះ។ ស្របពេលជាមួយគ្នានោះដែរ អ្នកវិភាគក៏បានធ្វើការទស្សន៍ទាយផងដែរថា មន្រ្តីបក្សអភិរក្សនិយមឯទៀតៗនឹងដើរចេញពីតួនាទីរបស់ខ្លួនថែមទៀតនៅប៉ុន្មានថ្ងៃខាងមុខនេះ ។

ក្រិច៖ រដ្ឋាភិបាលក្រិកត្រូវបានគេរាយការណ៍ថា បានសម្រេចចិត្តបណ្តេញមន្រ្តីការទូតរុស្ស៊ីចំនួន២រូប ហើយថែមទំាងដាក់បម្រាមហាមឃាត់ជនជាតិរុស្ស៊ីពីរនាក់ផ្សេងទៀតចូលមកកាន់ប្រទេសខ្លួនផងដែរ ។ បើតាមប្រព័ន្ធផ្សព្វផ្សាយក្នុងតំបន់ មន្រ្តីការទូតរុស្ស៊ីទំាង៤រូបនេះ ត្រូវបានចោទប្រកាន់ពីបទរំលោភលើកិច្ចការក្នុងស្រុករបស់ក្រិក និងសកម្មភាពខុសច្បាប់ប្រឆាំងនឹងសន្ដិសុខជាតិរបស់ប្រទេសនេះ៕ម.ន 

សហរដ្ឋអាម៉េរិក៖ ប្រធានាធិបតីអាម៉េរិកលោក ដូណាល់ ត្រាំ បាននិយាយថា ជំនួបជាមួយសមភាគីរុស្ស៊ីលោក វ៉្លាឌីមៀ ពូទីន ទំនងជានឹងដំណើរការទៅបានយ៉ាងរលូន ដែលជាផ្នែកមួយនៃដំណើរបំពេញទស្សនកិច្ចរបស់លោកនាពេលឆាប់ៗនេះទៅកាន់តំបន់អឺរ៉ុប ខណៈរូបលោកផ្ទាល់បានប៉ះទង្គិចគ្នាជាមួយបណ្តាប្រទេសនៅអឺរ៉ុប មុនពេលចូលរួមកិច្ចប្រជុំកំពូលអង្គការណាតូ។

អ៊ីរ៉ង់៖ អនុប្រធានាធិបតីអ៊ីរ៉ង់លោក អេសាដ ចាហាន់ហ្គីរី បានគូសបញ្ជាក់ក្នុងថ្ងៃអង្គារ៍ ថា ទណ្ឌកម្មរបស់សហរដ្ឋអាម៉េរិកបានធ្វើឲ្យសេដ្ឋកិច្ចអ៊ីរ៉ង់ទទួលរងផល ប៉ះពាល់ក៏ពិតមែន ក៏ប៉ុន្តែទន្ទឹមគ្នានេះ រូបលោកបានសន្យាថា នឹងបង្កើនការចែកចាយប្រេងឲ្យបានច្រើនតាមដែលអាចធ្វើទៅបាន ក៏ដូចជាចាត់វិធានការការពារប្រព័ន្ធធនាគាររបស់ខ្លួន ។អនុប្រធានាធិបតីអ៊ីរ៉ង់រូបនេះ បាននិយាយថា រដ្ឋាភិបាលក្រុងវ៉ាស៊ីនតោនបាននឹងកំពុងព្យាយាមបញ្ឈប់ការនំាចេញគីមីឥន្ធនៈ ដែកថែប និងទង់ដែង ក៏ដូចជាខិតខំប្រឹងប្រែងបង្ទុចបង្អក់ដល់ការចរាចរកំពង់ផែ និងសេវាដឹកជញ្ជូនរបស់ប្រទេសអ៊ីរ៉ង់។ បន្ថែមលើនេះ សហរដ្ឋអាម៉េរិកក៏បានស្វះស្វែងកាត់បន្ថយការចែកចាយប្រេង ដែលជាប្រភពដ៏សំខាន់នៃប្រាក់ចំណូលរបស់អ៊ីរ៉ង់ផងដែរ។ លោក ចាហាន់ ហ្គីរី បានសង្កត់ធ្ងន់ថា ការគាបសង្កត់បែបនេះ វានឹងក្លាយជាកំហុសមួយក្នុងការគិតថា សង្រ្គាមពាណិជ្ជកម្មរបស់សហរដ្ឋអាម៉េរិកប្រឆាំងនឹងអ៊ីរ៉ង់ អាចនឹងមិនមានផលប៉ះពាល់ដល់អ៊ីរ៉ង់នោះឡើយ ហើយថា យើងនឹងធ្វើឲ្យប្រជាជនអាម៉េរិកដឹងនៅ ឆ្នាំនេះថា ពួកគេមិនអាចបញ្ឈប់ការលក់ប្រេងរបស់អ៊ីរ៉ង់បានឡើយ ។សូមរំលឹកថា ប្រធានាធិបតីអាម៉េរិកលោក ដូណាល់ ត្រាំ កាលពីខែឧសភា កន្លង ទៅនេះ បានសម្រេចចិត្តដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរង់ ព្រមទំាងដាក់ទណ្ឌកម្មរបស់ខ្លួនឡើងវិញ មិនតែប៉ុណ្ណោះ អាម៉េរិកថែមទំាងប្រាប់ដល់បណ្តាប្រទេសសម្ព័ន្ធមិត្តរបស់ខ្លួន ឲ្យបញ្ឈប់ការទិញប្រេងពីអ៊ីរ៉ង់ចាប់ពីថ្ងៃទី៤ ខែវិច្ឆិកា ខាងមុខនេះ បើមិនដូច្នោះ នឹងប្រឈមមុខជាមួយការដាក់ទណ្ឌកម្មហិរញ្ញវត្ថុ ៕

សហរដ្ឋអាម៉េរិក៖ ភ្លើងសង្គ្រាមពាណិជ្ជកម្មរវាងសហរដ្ឋអាម៉េរិក និងចិនកាន់តែកើនឡើងកម្តៅ ស្របពេលដែលរដ្ឋាភិបាលក្រុងវ៉ាស៊ីនតោនបានប្រកាសពីគម្រោងដំឡើងពន្ធបន្ថែមទៀតលើផលិតផលនាំចូលពីរដ្ឋាភិបាលក្រុងប៉េកំាង ដែលមានទំហំទឹកប្រាក់ជាង២០០ពាន់លានដុល្លារយ៉ាងយូរនៅត្រឹមខែកញ្ញាខាងមុខនេះ ។ សេតវិមានបានឲ្យដឹងថា ការដំឡើងពន្ធ២០០ពាន់លានដុល្លារនេះ គឺជាការឆ្លើយតបទៅនឹងការធ្វើការពាណិជ្ជកម្មមិនស្មើភាពរបស់ចិន ហើយវានឹងត្រូវអនុវត្តន៍លើផលិតនាំចូលពីចិនច្រើនជាង៦.០០០មុខ ក្នុងនោះរួមមានផលិតផល ចំណីអាហារ រ៉ែ និងរបស់របរប្រើប្រាស់ដូចជាកាបូបយួរដៃជាច្រើន ។ ចំណែកឯ បណ្ដាក្រុមហ៊ុននៅក្នុងសហរដ្ឋអាម៉េរិកនឹងមានពេលរហូតដល់ខែសីហា ខាងមុខ ដើម្បីតវ៉ាមុននឹងការដំឡើងពន្ធនេះចូលជាធរមាន ។ ការប្រកាសពីគម្រោងដំឡើងពន្ធខាងលើនេះដែរ ត្រូវបានធ្វើឡើងតែប៉ុន្មានថ្ងៃប៉ុណ្ណោះ ក្រោយប្រទេសមហាអំណាចសេដ្ឋកិច្ចទាំងពីរដំឡើងពន្ធ៣៤ពាន់លានដុល្លារដាក់គ្នាទៅវិញទៅមក និងបន្ទាប់ពីប្រធានាធិបតីអាម៉េរិកលោក ដូណាល់ ត្រាំ បានព្រមានថា នឹងដំឡើងពន្ធបន្ថែមប្រឆាំងនឹងចិន បើសិនជាទីក្រុងប៉េកាំងចាត់វិធានការសងសឹក៕

ជប៉ុន៖ ប្រព័ន្ធផ្សព្វផ្សាយជប៉ុនបានរាយការណ៍ថា តួលេខជនរងគ្រោះបាត់បង់ជីវិត ដោយសារគ្រោះបំណាក់ដី និងគ្រោះទឹកជំនន់បង្កឡើងដោយភ្លៀងធ្លាក់ខ្លំាង នៅតាមតំបន់ភាគខាងលិចប្រទេសជប៉ុន បានបន្តកើនឡើងដល់១៧៩នាក់ និង៥៦នាក់ទៀតកំពុងបន្តបាត់ខ្លួននៅឡើយ។ ខេត្តហ៊ីរ៉ូស៊ីម៉ា គឺជាតំបន់រងគ្រោះធ្ងន់ជាងគេ ដោយមានមនុស្ស៦០នាក់បានស្លាប់។

ឈៀវរ៉ៃ ប្រទេសថៃ៖ ក្មេងៗទាំង ១២ នាក់ មកពីក្រុមបាល់ទាត់ដែលមានរហ័សនាមថា ជ្រូកព្រៃ រួមជាមួយនឹងគ្រូបង្វឹករបស់ពួកគេ ត្រូវបានជួយសង្រ្គោះយកចេញពីរូងភ្នំដោយ​ជោគជ័យ​ហើយនៅល្ងាចថ្ងៃអង្គារទី ១០ ដើមសប្តាហ៍នេះ បន្ទាប់ពីពួកគេបានជាប់ក្នុងរូងភ្នំ​ដ៍ស្មុកស្មាញដែលពោរពេញដោយទឹកជំនន់ពោរពាស ច្រើនជាងពីរសប្តាហ៍មកហើយនោះ។