អាមេរិក៖ ប្រធានាធិបតីអាមេរិកលោក ចូ បៃដិន នៅថ្ងៃអង្គារនេះ បានផ្តល់កិត្តិយសចូលរួមគោរពវិញ្ញាណក្ខន្ធ ពលរដ្ឋអាមេរិកដើមកំណើតអាហ្វ្រិករាប់រយនាក់ ដែលត្រូវបានពលរដ្ឋអាមេរិកស្បែកស សម្លាប់យ៉ាងរង្គាលកាលពីឆ្នាំ១៩២១ក្នុងសង្កាត់គ្រីនវូដ ទីក្រុងធូលសា (Tulsa) រដ្ឋអូក្លាហូម៉ា (Oklahoma) ។ ថ្លែងអំឡុងដំណើរទស្សនកិច្ចនេះ លោក ចូ បៃដិន បានអះអាងថា អ្វីដែលបានកើតឡើងនៅក្នុងសង្កាត់គ្រីនវូដ គឺជាហិង្សានៃការស្អប់ខ្ពើម និងជាភេរវកម្មនៅក្នុងស្រុក ។ លោកសង្កត់ធ្ងន់ថា អំពើមួយនេះស្ថិតក្នុងចំណោមទង្វើដ៏អាក្រក់ដទៃទៀតនៅក្នុងប្រវត្តិសាស្ត្ររបស់យើង ដែលយើងទាំងអស់គ្នាគួរតែរៀនសូត្រ ហើយចងចាំទុកនូវហិង្សារើសអើងពូជសាសន៍បែបនេះ ដើម្បីទប់ស្កាត់កុំអោយវាកើតឡើងសាជាថ្មី ។ សូមរំលឹកឡើងវិញថា ក្រុមពលរដ្ឋអាមេរិកស្បែកសមួយចំនួននៅក្នុងទីក្រុងធូលសា កាលពីថ្ងៃទី៣១ ខែឧសភា និងថ្ងៃទី១ ខែមិថុនា ឆ្នាំ១៩២១ បានសម្លាប់ពល រដ្ឋអាមេរិកស្បែកខ្មៅដល់ទៅជាង៣០០នាក់ ក្រោយពួកគេផ្ទុះកំហឹងដោយសារតែបុរសស្បែកខ្មៅម្នាក់ត្រូវគេចោទថា បានវាយប្រហារលើស្ត្រីស្បែកសម្នាក់ ប៉ុន្តែ ការវាយប្រហារនេះមិនមានភស្ដុតាងបញ្ជាក់ថា វាជាការពិតនោះទេមកទល់នឹងបច្ចុប្បន្ន ៕ ប្រភព៖ Reuters

អាមេរិក៖ រដ្ឋបាលលោក ចូ បៃដិន បានសម្រេចផ្អាកអាជីវកម្មរុករកប្រេង និងឧស្ម័ននៅឯតំបន់ជម្រកសត្វព្រៃជាតិអាក់ទិច (Arctic National Wildlife Refuge) ក្នុងរដ្ឋអាឡាស្កា (Alaska) ស្របពេលកំពុងត្រួតពិនិត្យឡើងវិញពីផលប៉ះពាល់ដល់បរិស្ថាន ។លោក ចូ បៃដិន បានចេញបទបញ្ជាប្រតិបត្តិមួយនៅថ្ងៃទី២០ ខែមករា ដើមឆ្នាំនេះ ដោយបង្គាប់អោយមានការត្រួតពិនិត្យឡើងវិញ ពីផលប៉ះពាល់ដល់បរិស្ថាន ដែលអាចបង្កឡើងដោយសកម្មភាពរុករកប្រេង និងឧស្ម័ន ឬចន្លោះប្រហោងផ្នែកច្បាប់នៃគម្រោងរុករកនេះ ដែលត្រូវបានអនុម័តដោយអតីតរដ្ឋបាលលោក ដូណាល់ ត្រាំ ។ ទីជម្រកសត្វព្រៃនេះ មានផ្ទៃ៧ម៉ឺន៨ពាន់គីឡូម៉ែត្រក្រឡា និងជាទីជម្រកសម្រាប់សត្វព្រៃដ៏កម្រជាច្រើន ជាពិសេសគឺខ្លាឃ្មុំទឹកកក ។បើតាមមន្ត្រីអាមេរិកពីរនាក់នៅក្នុងលក្ខខណ្ឌមិនបញ្ចេញឈ្មោះបាននិយាយថា ការផ្អាកការរុករកប្រេង និងឧស្ម័ននៅឯតំបន់ជម្រកសត្វព្រៃជាតិអាក់ទិច ធ្វើឡើងតាមការសន្យារបស់លោក ចូ បៃដិន នៅពេលឡើងកាន់តំណែងជាប្រធានាធិបតីនៅថ្ងៃដំបូង ៕ ប្រភព៖ BBC