ស៊ីរី៖ ក្រុមអង្គការឃ្លាំមើលសិទ្ធិមនុស្សស៊ីរី បានគូសបញ្ជាក់ថា កងទ័ពអាកាសរុស្ស៊ី បានបន្តការវាយប្រហារតាមដែនអាកាសរបស់ខ្លួនឡើងវិញ ដើម្បីប្រឆំាងនឹងក្រុមឧទ្ទាមស៊ីរីនៅឯភាគនិរតីប្រទេស ដែលប្រតិបត្តិការនេះ ធ្វើឡើងក្រោយក្រុមឧទ្ទាមបានប្រកាសថា ការចរចាជាមួយរដ្ឋាភិបាលទីក្រុងម៉ូស្គូទទួលបរាជ័យ។ បើតាមអង្គការសហប្រជាជាតិ ការវាយប្រយុទ្ធគ្នាអស់រយៈពេលច្រើនជាងពីរសប្ដាហ៍មកនេះ រវាងពួកឧទ្ទាម និងកងកម្លាំងរដ្ឋាភិបាលស៊ីរី ដែលមានជំនួយពីរុស្ស៊ី បានធ្វើឲ្យមនុស្សប្រមាណជាង១៣០នាក់បាត់បង់ជីវិត និងបង្ខំឲ្យមនុស្ស ២៧០.០០០នាក់ បង្ខំចិត្តភៀសខ្លួនចេញពីផ្ទះសម្បែងរបស់ពួកគេ នៅឯភាគនិរតី ប្រទេសស៊ីរី ។ ទន្ទឹមគ្នានោះដែរ អង្គការឃ្លាំមើលសិទ្ធិមនុស្សស៊ីរីបានអះអាងថា យន្ដហោះចម្បាំងរុស្ស៊ីបានទម្លាក់គ្រាប់បែករាប់សិបគ្រាប់លើមូលដ្ឋានរបស់ក្រុមឧទ្ទាម ក្នុងទីក្រុង តាហ្វាស និងទីក្រុងសៃដា។ ការវាយប្រហារតាមដែនអាកាសដែលបានផ្អាកកាលពីល្ងាចថ្ងៃសៅរ៍ សប្ដាហ៍មុននេះ និងបានធ្វើឡើងជាថ្មីឡើងវិញកាលពីថ្ងៃពុធ ម្សិលមិញនេះ តែប៉ុន្មានម៉ោងប៉ុណ្ណោះបន្ទាប់ពីក្រុមឧទ្ទាមស៊ីរីប្រកាសថា ការចរចាជាមួយជាមួយរុស្ស៊ីបានបរាជ័យ ខណៈកងកម្លាំងរដ្ឋាភិបាលស៊ីរីកំពុងវាយលុកយ៉ាងសន្ធាប់ ដោយដណ្ដើមទឹកដីមួយផ្នែកធំពីក្រុមឧទ្ទាម៕ ម.ន

សហរដ្ឋអាមេរិក៖  ទិវាឯករាជ្យជាតិ ត្រូវបានប្រារព្ធធ្វើឡើងនៅទូទាំងសហរដ្ឋអាម៉េរិកនៅថ្ងៃពុធ សប្តាហ៍នេះ (ម៉ោងក្នុងតំបន់) ស្របពេលមានការរឹតបន្តឹងសន្តិសុខ ដើម្បីទប់ស្កាត់ការវាយប្រហារពីក្រុមភេរវករដែលអាចកើតឡើងបាន។ ប្រធានាធិបតីសហរដ្ឋអាម៉េរិក លោក ដូណាល់ ត្រាំ បានសម្តែងការកោតសរសើរ និងស្ញប់ស្ញែងចំពោះកងកម្លាំងយោធាដែលបានពលី និងខិតខំការពារសិទ្ធិសេរីភាព នៃប្រទេសជាតិរបស់ពួកគេនាពេលកន្លងមកនេះ ។ ថ្លែងពីសេតវិមានក្នុងឱកាសប្រារព្ធខួបទី២៤២ នៃបុណ្យឯករាជ្យជាតិរបស់សហរដ្ឋអាម៉េរិក លោក ដូណាល់ ត្រាំ បានគូសបញ្ជាក់ទៀតថា សេរីភាពរបស់សហរដ្ឋអាម៉េរិក គឺបានមកពីការបង្ហូរញើស-ឈាម និងពលីរបស់អ្នកស្នេហាជាតិដែលបានតស៊ូប្រយុទ្ធនៅលើសមរភូមិតាំងពីសម័យមុនៗរហូតមកដល់បច្ចុប្បន្ននេះ។ ស្របពេលជាមួយគ្នានេះដែរ លោក ដូណាល់ ត្រាំ ក៏បានលើកឡើង ពាក់ព័ន្ធនឹងគម្រោងមហិច្ឆតារបស់លោកផ្ទាល់ ស្តីពីការបង្កើតកងអង្គភាពថ្មីនៅក្នុងជួរកម្លាំងប្រដាប់អាវុធសហរដ្ឋអាម៉េរិកផងដែរ គឺកងទ័ពនៅទីអវកាស ដោយលោកបានអះអាងថា វានឹងលេចចេញជារូបរាងនាពេលឆាប់ៗខាងមុខ។ សូមរំលឹកផងដែរថា ថ្ងៃបុណ្យឯករាជ្យ ឬក៏ទិវាជាតិ ៤ កក្កដា គឺជាថ្ងៃឈប់សម្រាក ទូទាំងសហរដ្ឋអាមេរិក ដើម្បីអបអរថ្ងៃប្រកាសឯករាជ្យនៃមហាអំណាចមួយនេះ កាលពីថ្ងៃទី៤ ខែកក្កដា ឆ្នាំ១៧៧៦ ។ កាលពីជាង២៤០ឆ្នាំមុននេះ ក្រុមចំណុះអាម៉េរិកទាំង១៣ បានប្រកាសខ្លួនជាប្រជាជាតិឯករាជ្យមួយហៅថា សហរដ្ឋអាម៉េរិក ដែលវាមានន័យថា ក្រុមទាំងនោះលែងស្ថិតក្រោមនឹមអាណានិគមរបស់ចក្រភពអង់គ្លេសទៀតហើយ៕

អាល្លឺម៉ង់៖ ប្រធានាធិបតីសហរដ្ឋអាម៉េរិក លោក ដូណាល់ ត្រាំ បានព្រមានថា ប្រទេសលោកនឹងធ្វើការដំឡើងពន្ធ២០ភាគរយលើការនាំចូលរថយន្ដអឺរ៉ុប មកកាន់សហរដ្ឋអាម៉េរិក បើសិនជាសហភាពអឺរ៉ុបមិនព្រមដកចេញរបាំងពាណិជ្ជកម្មរបស់ខ្លួនទេនោះ។ ឆ្លើយតបទៅនឹងការព្រមានរបស់មេដឹកនំាសហរដ្ឋអាម៉េរិកខាងលើនេះ នាអំឡុងពេលថ្លែងសុន្ទរកថាទៅកាន់ក្រុមអ្នកតំណាងរាស្ត្រអាល្លឺម៉ង់ក្នុងថ្ងៃពុធ សប្តាហ៍នេះ អធិការបតីអាល្លឺម៉ង់ លោកស្រី អាន់ជែលឡា មឺគែល បានព្រមានរដ្ឋបាលលោក ដូណាល់ ត្រាំ ថា គម្រោងដំឡើងពន្ធលើការនាំចូលរថយន្ដពីអឺរ៉ុបនោះ ទំនងជាអាចក្លាយជាចំណុចចាប់ផ្ដើមសង្រ្គាមពាណិជ្ជកម្ម ដែលនឹងបង្កវិបាកយ៉ាងធ្ងន់ដល់ សេដ្ឋកិច្ច ។ អធិការបតីអាល្លឺម៉ង់រូបនេះ បានគូសបញ្ជាក់ថា បច្ចុប្បន្នយើងមានពន្ធលើអាលុយមីញ៉ូម និងដែកថែប ហើយយើងមានកិច្ចពិភាក្សាមួយកាន់តែមានសភាពធ្ងន់ទៅៗ ដែលកំពុងឆ្ពោះទៅរកជម្លោះពាណិជ្ជកម្ម។ ប៉ុន្តែលោកស្រីមិនចង់ប្រើពាក្យ បែបនេះនៅពេលអនាគតទេ ត្បិតវាពិតជាតម្លៃណាស់ សម្រាប់កិច្ចខិតខំប្រឹងប្រែងបញ្ជៀសមិនឲ្យជម្លោះនេះក្លាយជាសង្រ្គាមពាណិជ្ជកម្ម៕

ឥណ្ឌូណេស៊ី៖ ក្រុមអ្នកជួយសង្គ្រោះម្នាក់បាននិយាយថា ពួកគេបានរកឃើញសាកសពមនុស្សចំនួន៣៤នាក់ និងជួយសង្គ្រោះបាន១៥៥នាក់ បន្ទាប់ពីកើតមានហេតុការណ៍លិចសាឡាងដឹកអ្នកដំណើរមួយគ្រឿងនៅដែនទឹកភាគកណ្តាលប្រទេសឥណ្ឌូណេស៊ី ។ អ្នកនាំពាក្យមកពីការិយាល័យជួយសង្គ្រោះជាតិម៉ាស៊ូឌី បាននិយាយថា បេសកកម្មនៃការរុករកនឹងមិនឈប់នោះទេ ដោយនៅតែបន្តធ្វើដដែល តាមដែលអាចធ្វើទៅបាន ដើម្បីការស្វែងរកក្រុមជនរងគ្រោះដែលកំពុងបាត់ខ្លួន។ ដោយឡែកបើតាមទីភ្នាក់ងារ គ្រប់គ្រងគ្រោះមហន្តរាយជាតិ ឥណ្ឌូណេស៊ីសរុបចំនួនមនុស្ស ដែលនៅលើសាឡង់ដឹ អ្នកដំណើរមួយគ្រឿងនោះ មានចំនួនមនុស្សសរុប១៨៩នាក់។ ទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូណេស៊ី បានបញ្ជាក់ដែរថា សាឡង់ដឹកអ្នកដំណើរដែលមានឈ្មោះ KMP Lestari Maju (ខេអឹមភី ឡេសស្តារី ម៉ាជូ) បានជួបគ្រោះ ថ្នាក់លិចនៅឯដែនទឹកនៃកោះ សេឡេយ៉ា នៅវេលាម៉ោង២និង៣០នាទីល្ងាច (ម៉ោងក្នុង តំបន់) ស្ថិតនៅដែនទឹកក្នុងខេត្ត South Sulawesi (ស៊ោ ស៊ូឡាវេស៊ី) កាលពីថ្ងៃ អង្គារ៍ សប្តាហ៍នេះ ក្រោយពេលដែលទើបតែចាកចេញពីកំពង់ផែបានចម្ងាយប្រមាណ៣០០ម៉ែត្រប៉ុណ្ណោះ ។ ស្របពេលជាមួយគ្នានោះដែរ មិនទាន់មានរបាយការណ៍បញ្ជាក់អំពីមូលហេតុនៃការលិចសាឡង់នេះឡើយ ដោយគ្រាន់ករណីបែបនេះ មិនមែនទើបកើតឡើងជាលើក ទីមួយនោះទេ នៅក្នុងប្រទេសឥណ្ឌូនេស៊ីសម្រាប់ឆ្នាំ២០១៨នេះ ។ មូលហេតុនៃសោកនាដកម្មបែបនេះ ភាគច្រើនគឺបណ្ដាលមកពីការដឹកលើសចំណុះ…

កាណាដា៖ ប្រព័ន្ធផ្សព្វផ្សាយកាណាដាបានរាយការណ៍ថា ហេតុការណ៍កើនឡើងកម្តៅខុសពីធម្មតារហូតដល់៤០អង្សាសេ នៅឯតំបន់ភាគកណ្ដាល និងភាគ កណ្ដាលប្រទេសកាណាដាចាប់តាំងចុងសប្ដាហ៍មុនមក បានបណ្តាលឲ្យមនុស្សសរុប១៥នាក់ហើយ បានបាត់បង់ជីវិត ។ ប្រភពដដែលបានឲ្យដឹងទៀតថា ជនរងគ្រោះដែលបានស្លាប់ទំាងអស់នេះ គឺនៅក្នុងទីក្រុងម៉ុងត្រេអាល់ ជាទីដែលសីតុណ្ហភាពកើនដល់៤០អង្សាសេនៅថ្ងៃ ពុធសប្ដាហ៍នេះ ខណៈរលកកម្ដៅត្រូវបានគេរំពឹងថា នឹងអូសបន្លាយរហូតដល់ថ្ងៃសុក្រ សប្តាហ៍នេះ (ម៉ោងក្នុងតំបន់)។ ដោយឡែកនៅក្នុងខេត្តអនតារីយ៉ូ ស្ថិតនៅភាគ ខាងត្បូងប្រទេសក៏កំពុងរងការវាយប្រហារដោយរលកកម្ដៅផងដែរ ស្របពេលនៅក្នុងទីក្រុងអ៊ុតតាវ៉ា សីតុណ្ហភាពកើនដល់៤៧អង្សាសេនៅក្នុងថ្ងៃពុធ សប្តាហ៍នេះ ដែលជាកម្រិតសីតុណ្ហភាពខ្ពស់ជាប់កំណត់ត្រាថី្មមួយ សម្រាប់រដ្ឋធានីរបស់កាណាដាមួយនេះ ។ ស្ថិតក្នុងគោលបំណងឆ្លើយតប ក៏ដូចជាទប់ទល់នឹងរលកកម្ដៅដ៏អាក្រក់ខាងលើនេះ ក្រុមអាជ្ញាធរកាណាដាបានធ្វើការអំពាវនាវឲ្យប្រជាជនរបស់ខ្លួន ត្រូវ បង្កើនការប្រុងប្រយ័ត្នខ្ពស់ទាំងនៅក្នុងលំនៅដ្ឋាន និងនៅពេលចេញទៅខាងក្រៅ ៕

ថៃ៖ រហូតមកទល់ពេលនេះ ក្រុមជួយសង្គ្រោះបាននឹងកំពុងខិតខំព្យាយាមយ៉ាងដុតដៃ ដុតជើង ដើម្បីជម្លៀសខ្លួនក្មេងៗទំាង១២នាក់ ព្រមទំាងគ្រួបង្វឹកបាល់ទាត់របស់ ពួកគេម្នាក់ទៀតចេញពីរូងភ្នំថាំលួង។ ក្រុមអ្នកមុជទឹកក៏កំពុងជំរុញបន្ទាន់នួវការបណ្តុះបណ្តាលពួកគេវិធីសាស្រ្តក្នុងការហែល និងមុជទឹក ដូច្នេះពួកគេអាចនឹងធ្វើ ដំណើរចេញពីរូងភ្នំដែលជន់លិចដោយជំនន់ទឹកភ្លៀងនេះ និងជាកន្លែងដែលពួកគេត្រូវបានជាប់នៅក្នុងនោះអស់រយៈពេល១១ថ្ងៃមកនេះ ។ ស្របពេលជាមួយគ្នានោះដែរ ព្រះមហាក្សត្រថៃ តាមរយៈឧបនាយករដ្ឋមន្រ្តីថៃ លោក ប្រាវីត វង់ស៊ូវ៉ុន បានធ្វើការជំរុញក្រុមជួយសង្គ្រោះពន្លឿនការរំដោះខ្លួន អ្នកទាំង១៣ ឲ្យបានឆាប់តាមដែលអាចធ្វើទៅបាន។ ដោយឡែកនាយករដ្ឋមន្រ្តីថៃលោក ប្រាយុទ្ធ ចាន់អូចា បានលើកឡើងថា រូងភ្នំថាំលួង ជាទីដែលក្រុមអ្នកជួយ សង្រ្គោះថៃ និងអន្តរជាតិកំពុងដុតដៃ ដុតជើងយកក្មេងៗទំាង១២នាក់ និងគ្រូបង្វឹកបាល់ទាត់របស់ពួកគេម្នាក់ទៀតចេញ មកខាងក្រៅ អាចនឹងក្លាយជា គោលដៅទេសចរណ៍ដ៏ល្បីល្បាញទាំងនៅក្នុងស្រុក និងពិភពលោក ហើយវាក៏អាចនឹងក្លាយជាតំបន់ទេសចរណ៍ដ៏សំខាន់ផងដែររបស់ប្រទេសថៃ ហើយថា ដូច្នេះយើងត្រូវតែចាត់វិធានការធានាសុវត្ថិភាព ឲ្យស្របទៅតាមសកម្មភាពទេសចរណ៍ ។ សូមរំលឹកថា ក្មេងៗទាំង១២នាក់ និងគ្រូបង្វឹកបាល់ទាត់របស់ខ្លួនម្នាក់ ត្រូវបានក្រុមអ្នកខាងមុជទឹកមកពីអង់គ្លេសចំនួនពីរនាក់រកឃើញថា នៅមានជីវិតនៅឡើយ កាល ពីថ្ងៃ ច័ន្ទ នៅម៉ោងប្រមាណ១០និង២៥នាទីយប់ ដោយស្ថិតនៅចម្ងាយប្រហែល៤គីឡូម៉ែត្រពីមាត់រូងភ្នំ ។ ប៉ុន្តែក្រុមជំនាញថៃ…

ឥណ្ឌូណេស៊ី៖ អាជ្ញាធរឥណ្ឌូណេស៊ីបានរាយការណ៍ថា តួលេខជនរងគ្រោះបាត់បង់ជីវិតក្នុងហេតុការណ៍លិចសាឡង់ដឹកអ្នកដំណើរមួយគ្រឿងស្ថិតនៅខេត្តស៊ូឡាវេស៊ី ភាគកណ្តាលប្រទេសបានបន្តកើនឡើងដល់៣១នាក់ហើយ មកទល់ពេលនេះ ក្រុមអ្នកជួយសង្រ្គោះកំពុងតាមរកអ្នកបាត់ខ្លួនជាច្រើននាក់ផ្សេងទៀត ។ ដោយឡែកអាជ្ញាធរគ្រប់គ្រងគ្រោះមហន្តរាយឥណ្ឌូណេស៊ី បានឲ្យដឹងថា មនុស្ស៣១នាក់ ត្រូវបានគេអះអាងថា បានបាត់បង់ជីវិត ខណៈ១៣០នាក់ ត្រូវបានជួយសង្រ្គោះ និង៣នាក់ផ្សេងទៀតនៅតែបន្តបាត់ខ្លួននៅឡើយ ក្រោយសាឡង់មួយគ្រឿងផ្ទុកមនុស្ស១៦៤នាក់ ជួបប្រទះឧបទ្ទវហេតុលិចសាឡង់ នៅឯខេត្តស៊ូឡាវេស៊ី កាលពីថ្ងៃអង្គារ៍ សប្តាហ៍នេះ។ ស្របពេលជាមួយគ្នានោះដែរ មិនទាន់មានរបាយការណ៍បញ្ជាក់អំពីមូលហេតុនៃការលិចសាឡង់នោះឡើយ។ គួរបញ្ជាក់ថា ករណីបែបនេះ មិនមែនទើបកើតឡើងជា លើកទីមួយនោះទេ នៅក្នុងប្រទេសឥណ្ឌូនេស៊ីសម្រាប់ឆ្នាំ២០១៨នេះ។ ជាទូទៅមូលហេតុនៃសោកនាដកម្មបែបនេះ ភាគច្រើនគឺបណ្ដាលមកពីការដឹកលើសចំណុះ និងការមិនគោរពបទដ្ឋានដឹកជញ្ជូនជាដើម៕  

កូរ៉េខាងត្បូង៖ រដ្ឋាភិបាលទីក្រុងសេអ៊ូល និងព្យុងយ៉ាង នៅថ្ងៃពុធ សប្តាហ៍នេះ បានចាប់ផ្តើមធ្វើកិច្ចចរចាក្នុងកម្រិតការងារថ្មីមួយទៀត ដោយផ្តោត សំខាន់ទៅលើកិច្ចសហប្រតិបត្តិការព្រៃឈើ។ ក្រសួងបង្រួបបង្រួមកូរ៉េខាងត្បូងបានបញ្ជាក់ថា ក្រុមគណៈប្រតិភូជាន់ខ្ពស់មកពីប្រទេសបងប្អូនកូរ៉េទំាងពីរ បានចាប់ផ្តើមបើកកិច្ចពិភាក្សានៅវេលាម៉ោងប្រមាណ១០ព្រឹក ថ្ងៃពុធ សប្តាហ៍នេះ (ម៉ោងក្នុងតំបន់)នៅឯវិមានសន្តិភាព ដែលជាអគារមួយនៅខាងភាគី កូរ៉េខាងត្បូងនៅក្នុងភូមិ ជាប់ព្រំដែន ផាន់មុនជុម ។ អនុរដ្ឋមន្រ្តីសេវាព្រៃឈើកូរ៉េខាងត្បូងលោក រីយូ ក្វាងស៊ូ ដែលដឹកនំាក្រុមប្រតិភូ បានថ្លែងប្រាប់អ្នកយកព័ត៌មាន មុនពេលធ្វើដំណើរឆ្ពោះទៅកាន់ ទីកន្លែងប្រជុំជាមួយភាគីកូរ៉េខាងជើងថា រូបលោកនឹងធ្វើកិច្ចពិភាក្សាជាមួយសមភាគីកូរ៉េខាងជើង ពាក់ ព័ន្ធនឹងបញ្ហាស្តីអំពីកិច្ចសហប្រតិបត្តិការព្រៃឈើ ទំាងមូលរវាងប្រទេសទំាងពីរ ។ ភាគីទំាងពីរត្រូវបានគេរំពឹងថា នឹងអាចឈានដល់ការព្រមព្រៀងគ្នាក្នុងការចូលរួមការសិក្សាស្រាវជ្រាវរួមគ្នាមួយ ដោយផ្តោតសំខាន់លើបញ្ហាព្រៃឈើរបស់កូរ៉េខាងជើង ។ សូមជម្រាបថា កិច្ចចរចាស្តីពីកិច្ចសហប្រតិបត្តិការព្រៃឈើរវាងមន្រ្តីជាន់ខ្ពស់កូរ៉េខាងត្បូង និងកូរ៉េខាងជើង ត្រូវបានធ្វើឡើងបន្ទាប់ពីរដ្ឋាភិបាល កូរ៉េទំាងពីរបានបើកកិច្ចប្រជុំក្នុងកម្រិតការងារជាបន្តបន្ទាប់កាលពីសប្តាហ៍មុន ទៅលើកិច្ចសហប្រតិបត្តិការផ្លូវរថភ្លើង និងផ្លូវយានយន្ត ដោយភាគីទំាង ពីរបានព្រមព្រៀងគ្នាចូលរួមសិក្សា រួមគ្នាលើកដំបូងស្តីពីស្ថានភាពផ្លូវរថភ្លើង និងផ្លូវយានយន្តរបស់កូរ៉េខាងជើង ៕  

អ៊ីរ៉ង់៖ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា រដ្ឋមន្ត្រីការបរទេសអ៊ីរ៉ង់លោក ម៉ូហាម៉េដ ចាវ៉ាដ ហ្ស៊ារីស និងមន្រ្តីជាន់ខ្ពស់បណ្តាប្រទេសជាមហាអំណាច ពិភព លោកទាំង៥ ដែលនៅតែជាភាគីក្នុងកិច្ចព្រមព្រៀងនុយក្លេអ៊ែរអ៊ីរ៉ង់កាលពីឆ្នាំ២០១៥នោះ នឹងត្រូវជួបគ្នាក្នុងទីក្រុងវីយ៉ែន ប្រទេសអូទ្រីស នៅក្នុងថ្ងៃសុក្រ សប្ដាហ៍នេះ ស្ថិតក្នុងគោលបំណងស្វែងរកមធ្យោបាយការពារកិច្ចព្រមព្រៀងអន្តរជាតិនេះ ។ កិច្ចប្រជុំនៅក្នុងថ្ងៃ សុក្រ សប្ដាហ៍នេះ គឺជាជំនួបលើកដំបូងបំផុតរវាងអ៊ីរ៉ង់ និងបណ្តាប្រទេសមហាអំណាចពិភពលោកទាំង៥ ដែលក្នុងនោះរួមមាន៖ អង់គ្លេស ចិន បារាំង អាល្លឺម៉ង់ និងរុស្ស៊ី បន្ទាប់ពីសហរដ្ឋអាម៉េរិកប្រកាសដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់កាលពីឆ្នាំ២០១៥ ។នៅក្នុងជំនួប ដែលធ្វើឡើងតាមសំណើរបស់រដ្ឋាភិបាលក្រុងតេហេរ៉ង់នេះដែរ រដ្ឋមន្ត្រីការបរទេសអ៊ីរ៉ង់ និងរដ្ឋមន្ត្រីការបរទេសប្រទេសមហាអំណាចពិភពលោកទាំង៥ គ្រោងនឹងធ្វើកិច្ចពិភាក្សាគ្នាលើសំណើរបស់សហភាពអឺរ៉ុប និងវិធានការការពារកិច្ចព្រមព្រៀងនុយក្លេអ៊ែរអ៊ីរ៉ង់ ៕