-
សហរដ្ឋអាមេរិកអំពាវនាវអោយ WHO បើកការស៊ើបអង្កេតរកប្រភពដើមនៃវីរុស Covid-19 ដំណាក់កាលទី២ ក្នុងប្រទេសចិន (មានវីដេអូ)
-
ក្រុមប្រឹក្សាសិទ្ធិមនុស្សអង្គការសហប្រជាជាតិ ស្នើបើកការស៊ើបអង្កេតជាអន្តរជាតិ ជុំវិញការប៉ះទង្គិចគ្នារវាងអ៊ីស្រាអែល និងក្រុមហាម៉ាស់នៅតំបន់ហ្គាហ្សា (មានវីដេអូ)
-
មីយ៉ានម៉ាផ្ទុះកូវីដឡើងវិញ ក្រោយស្ងប់មួយរយៈ
ក្រសួងសុខាភិបាល និងកីឡានៃប្រទេសមីយ៉ាន់ម៉ាបានឲ្យដឹង នាថ្ងៃទី២៨ ឧសភានេះថា មីយ៉ាន់ម៉ាមានករណីជំងឺ Covid-19 ថ្មីចំនួន ៩៦ករណី ក្នុងរយៈពេល ២៤ម៉ោងចុងក្រោយនេះ ដែលបានធ្វើឲ្យចំនួនឆ្លងសរុបកើនឡើងដល់ ១៤៣៤១៤ករណី។ ជាការកត់សម្គាល់ មួយរយៈនេះ មីយ៉ាន់ម៉ា ដែលកំពុងជួបវិបត្តិនយោបាយក្រោយមានរដ្ឋប្រហារនោះ មិនសូវមានការឆ្លងច្រើនទេ ប៉ុន្តែទើបតែកាលពីថ្ងៃពុធ មាន២២នាក់ថ្មី ហើយប្រកាសនាថ្ងៃនេះថា ឆ្លងជិត១០០នាក់នេះតែម្តង។ ប្រភពថា ចំនួនអ្នកស្លាប់មានចំនួន ៣២១៦នាក់ ខណៈចំនួនអ្នកជាសះស្បើយបានកើនឡើងដល់ ១៣២២៦៩នាក់។ មីយ៉ាន់ម៉ារកឃើញកូវីដ១៩ លើកដំបូង កាលពីថ្ងៃទី២៣ ខែមីនា ២០២០៕
-
រថយន្ត Ferrari ធ្វើពីវីស និងប្រអប់លេខម៉ូតូចាស់ៗ
រថយន្ត Ferrari ប្រភេទស្ព័រមួយគ្រឿងត្រូវបានគេតំឡើងចេញជារូបរាងដោយយកវីស និងប្រអប់លេខម៉ូតូចាស់ៗ ដែលគេបោះចោលមកផ្គុំចូលគ្នា មួយតែមួយគ្មានពីរលើលោក។រថយន្តនេះត្រូវបានដាក់តាំង នៅប្រទេសអាល្លឺម៉ង់ ថ្មីៗនេះ។ យ៉ាងណាក៏ដោយ ពុំមានការបញ្ជាក់លម្អិតពីដើមចម ក្នុងការផលិតរថយន្ត១គ្រឿងនេះទេ៕ ប្រភពពី CGTN
-
ក្រុមប្រឹក្សាសិទ្ធិមនុស្សអង្គការសហប្រជាជាតិបើកការស៊ើបអង្កេតជាអន្តរជាតិ ជុំវិញការប៉ះទង្គិចគ្នារវាងអ៊ីស្រាអែល និងក្រុមហាម៉ាស់នៅតំបន់ហ្គាហ្សា
ស្វីស៖ ក្រុមប្រឹក្សាសិទ្ធិមនុស្សអង្គការសហប្រជាជាតិនៅថ្ងៃព្រហស្បតិ៍នេះបានព្រមព្រៀងគ្នាបើកការស៊ើបអង្កេតជាអន្តរជាតិមួយ ពាក់ព័ន្ធនឹងបទឧក្រិដ្ឋសង្គ្រាម អំឡុងពេល១១ថ្ងៃនៃការប៉ះទង្គិចគ្នារវាងកងកម្លាំងអ៊ីស្រាអែល និងក្រុមឧទ្ទាមហាម៉ាស់នៅក្នុងតំបន់ហ្គាហ្សា ។ ការស៊ើបអង្កេតឯករាជ្យនេះ នឹងមានភាពទូលំទូលាយ ដើម្បីពិនិត្យមើលរាល់ការរំលោភបំពានទាំងអស់ មិនត្រឹមតែនៅក្នុងតំបន់ហ្គាហ្សា និងតំបន់វេសប៊ែង ប៉ុណ្ណោះទេ ប៉ុន្តែក៏នៅក្នុងប្រទេសអ៊ីស្រាអែលផងដែរ អំឡុងពេលមានអរិភាពដែលទើបត្រូវបានបិទបញ្ឈប់ដោយបទឈប់បាញ់គ្នានៅថ្ងៃទី២១ ខែឧសភា ។ ឧត្តមស្នងការទទួលបន្ទុកសិទ្ធិមនុស្ស នៃអង្គការសហប្រជាជាតិលោកស្រី Michelle Bachelet បាននិយាយថា ការវាយប្រហារដ៏ប្រល័យរបស់អ៊ីស្រាអែលទៅលើតំបន់ហ្គាហ្សាប៉ាឡេស្ទីននៅដើមខែនេះ អាចជាបទឧក្រិដ្ឋកម្មសង្គ្រាម ប្រសិនបើត្រូវបានរកឃើញថា មិនមានសមាមាត្រ ។ សូមជម្រាបថា សង្រ្គាមរយៈពេល១១ថ្ងៃរវាងក្រុមហាម៉ាស់ប៉ាឡេស្ទីន និងអ៊ីស្រាអែលបានសម្លាប់មនុស្ស២៥៣នាក់នៅខាងតំបន់ហ្គាហ្សា ក្នុងនោះមានកុមារ៦៦នាក់ និងស្ត្រី៣៩នាក់ ព្រមទាំងមនុស្សចាស់១៧នាក់ ។ ភាគីទាំងពីរបានព្រមព្រៀងគ្នាលើបទឈប់បាញ់មួយកាលពីថ្ងៃសុក្រសប្ដាហ៍ ដោយមានការសម្របសម្រួលរបស់ប្រទេសអេហ្ស៊ីប ៕ ប្រភព៖ CNA
-
សហរដ្ឋអាមេរិកអំពាវនាវអោយ WHO បើកការស៊ើបអង្កេតរកប្រភពដើមនៃវីរុស Covid-19 ដំណាក់កាលទី២ក្នុងប្រទេសចិន
ស្វីស៖ សហរដ្ឋអាមេរិកបានអំពាវនាវអោយអង្គការសុខភាពពិភពលោក (WHO)បើកការស៊ើបអង្កេតរកប្រភពដើមនៃវីរុសកូរ៉ូណាដំណាក់កាលទីពីរ ដោយឱ្យក្រុមអ្នកជំនាញឯករាជ្យមានសិទ្ធិប្រើប្រាស់ទិន្នន័យ និងសំណាកដើមទាំងអស់នៅក្នុងប្រទេសចិន ។បេសកកម្មអាមេរិកប្រចាំអង្គការសហប្រជាជាតិនៅទីក្រុងហ្សឺណែវ បាននិយាយនៅក្នុងសេចក្តីថ្លែងការណ៍នៅថ្ងៃព្រហស្បតិ៍នេះថា ការសិក្សាជំហានដំបូងរបស់ WHO គឺមិនគ្រប់គ្រាន់ និងមិនប្រាកដប្រជា ដោយអំពាវនាវឱ្យមានអ្វីដែលខ្លួនហៅថា ការស៊ើបអង្កេតលើកទីពីរ ដែលមានតម្លាភាព និងផ្អែកលើភស្តុតាង ដែលនឹងត្រូវធ្វើឡើង រួមទាំងនៅក្នុងប្រទេសចិន ។ បើតាមសេចក្តីថ្លែងការណ៍របស់សហរដ្ឋអាមេរិកនោះ វាមានសារៈសំខាន់ណាស់ដែលចិនត្រូវផ្តល់ឱ្យអ្នកជំនាញឯករាជ្យនូវសិទ្ធិ ក្នុងការទទួលបានទិន្នន័យ និងសំណាកដើមពេញលេញដែលពាក់ព័ន្ធ ដើម្បីស្វែងយល់ពីប្រភពនៃវីរុសកូរ៉ូណា និងដំណាក់កាលដំបូងនៃជំងឺរាតត្បាត ។សូមរំលឹកថា ក្រុមស្រាវជ្រាវដឹកនាំដោយ WHO ដែលចំណាយពេល៤សប្តាហ៍នៅក្នុង និងជុំវិញទីក្រុងវូហាន កាលពីខែមករា និងខែកុម្ភៈ ជាមួយក្រុមអ្នកស្រាវ ជ្រាវចិនបាននិយាយនៅក្នុងរបាយការណ៍មួយកាលពីខែមីនាថា វីរុសកូរ៉ូណាប្រហែលជាត្រូវបានចម្លងពីសត្វប្រចៀវទៅមនុស្ស តាមរយៈសត្វមួយផ្សេងទៀតហើយដូច្នេះការបើកផ្លូវឱ្យស្រាវជ្រាវអំពីឧបទ្ទវហេតុក្នុងមន្ទីរពិសោធន៍ទំនងមិនអាចកើតឡើងបានឡើយ ៕ ប្រភព៖ CNA
-
អាល្លឺម៉ង់គ្រោងចាក់វ៉ាក់សាំងបង្ការជំងឺ Covid-19 ដល់មនុស្សវ័យជំទង់ចាប់ពីថ្ងៃទី៧ ខែមិថុនាខាងមុខនេះ
អាល្លឺម៉ង់៖ អធិការបតីអាល្លឺម៉ង់លោកស្រី Angela Merkel បញ្ជាក់ថា ប្រទេសរបស់លោកស្រីគ្រោងនឹងចាក់វ៉ាក់សាំងបង្ការជំងឺ Covid-19 សម្រាប់ដូសដំបូងដល់ក្មេងជំទង់ដែលមានអាយុចាប់ពី១២ដល់១៦ឆ្នាំ គិតចាប់ពីថ្ងៃទី៧ ខែមិថុនាខាងមុខនេះ ។ លោកស្រី Angela Merkel បានថ្លែងនៅក្នុងសន្និសិទសារព័ត៌មានថា ប្រជាពលរដ្ឋអាល្លឺម៉ង់គ្រប់គ្នានឹងទទួលបាននូវការចាក់វ៉ាក់សាំងបង្ការជំងឺកូវីដ១៩នៅចុងរដូវក្តៅ ដែលក្នុងនោះក៏រួមមានទាំងក្មេងជំទង់ដែលមានអាយុចាប់ពី១២ដល់១៦ឆ្នាំផងដែរ ។ ការអះអាងខាងលើរបស់អធិការបតីអាល្លឺម៉ង់រូបនេះ ត្រូវបានធ្វើឡើងស្របពេលដែលទីភ្នាក់ងារឱេសថអឺរ៉ុប (EMA) អាចនឹងអនុម័តអោយប្រើប្រាស់វ៉ាក់សាំងប្រឆាំងវីរុស Covid-19 របស់ក្រុមហ៊ុនផលិតឱសថអាមេរិក-អាល្លឺម៉ង់ (Pfizer-BioNTech) សម្រាប់កុមារដែលមានអាយុចាប់ពី១២ដល់១៥ឆ្នាំនៅក្នុងថ្ងៃសុក្រសប្តាហ៍នេះ (ម៉ោងក្នុងតំបន់) ៕ ប្រភព៖ CNA
-
លោក Bashar al-Assad ជាប់ឆ្នោតជាប្រធានាធិបតីស៊ីរីសម្រាប់អាណត្តិទី៤ ខណៈប្រទេសលោកខាងលិចចោទថា ការបោះឆ្នោតគ្មានភាពសេរី និងយុត្តិធម៌
ស៊ីរី៖ លទ្ធផលផ្លូវការបង្ហាញថា លោក បាហ្សា អាល់អាស្សាដ ត្រូវបានបោះឆ្នោតជ្រើសតាំងអោយធ្វើជាប្រធានាធិបតីស៊ីរីសម្រាប់អាណត្តិទី៤ បើទោះបីជាបណ្តាប្រទេសលោកខាងលិចបានចោទប្រកាន់ថា វាជាការបោះឆ្នោតដោយគ្មានភាពសេរី និងយុត្តិធម៌ ។ ប្រធានសភាស៊ីរីបានប្រកាសពីជោគជ័យរបស់លោក បាហ្សា អាល់អាស្សាដ ក្នុងការបោះឆ្នោតជាមួយនឹងសំឡេងគាំទ្រ ៩៥.១% ។ លទ្ធផលនៃការបោះឆ្នោតខាងលើនេះ ត្រូវបានប្រកាសចេញនៅថ្ងៃព្រហស្បតិ៍សប្តាហ៍នេះ ខណៈប្រទេសស៊ីរីត្រូវបានគេមើលឃើញថា បន្តស្ថិតក្នុងសង្គ្រាម និងការបែងចែកទឹកដីនៅឡើយ។ សូមបញ្ជាក់ផងដែរថា សង្គ្រាមនៅស៊ីរីដែលបានផ្ទុះឡើងអំឡុងបដិវត្តន៍ផ្កាម្លិះកាលពីឆ្នាំ២០១១ រហូតមកទល់នឹងពេលនេះ បានផ្តាច់ជីវិតមនុស្សជាង ៣៨ម៉ឺន៨ពាន់នាក់ ប្រជាជនស៊ីរីរាប់លាននាក់ទៀតរត់ភៀសខ្លួន និងហេដ្ឋរចនាសម្ព័ន្ធស្ទើរគ្រប់ខេត្ត-ក្រុងបានរងការបំផ្លិចបំផ្លាញយ៉ាងធ្ងន់ធ្ងរ ៕ ប្រភព៖ AFP
-
អ្នកឆ្លង COVID-19 នៅទូទាំងពិភពលោកកើនឡើង១៦៩លាន៦៣ម៉ឺននាក់ ក្នុងនោះស្លាប់៣លាន៥២ម៉ឺននាក់ និងជាសះស្បើយ១៥១លាន៣៣ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១៦៩លាន៦៣ម៉ឺន២ពាន់៥៦១ករណី ក្នុងនោះមានអ្នកជម្ងឺសរុបចំនួន៣លាន៥២ម៉ឺន៥ពាន់១១៣នាក់ស្លាប់ និង ជាសះស្បើយឡើងវិញសរុបចំនួន១៥១លាន៣៣ម៉ឺន៧ពាន់៧២១នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៨ ខែឧសភា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន៣៣លាន៩៩ម៉ឺន៩ពាន់៦៨០នាក់ ស្លាប់ចំនួន៦០ម៉ឺន៧ពាន់៧២៦នាក់ និងជាសះស្បើយចំនួន២៧លាន៧០ម៉ឺន១ពាន់៨៧៩នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន២៧លាន៥៤ម៉ឺន៧ពាន់៧០៥នាក់ ស្លាប់៣១ម៉ឺន៨ពាន់៨២១នាក់ និងជាសះស្បើយ២៤លាន៨៤ម៉ឺន៣២៦នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន១៦លាន៣៤ម៉ឺន២ពាន់១៦២នាក់ ស្លាប់ចំនួន៤៥ម៉ឺន៦ពាន់៧៥៣នាក់ និងជាសះស្បើយ១៤លាន៧៨ម៉ឺន៦ពាន់២៩២នាក់ ៕ ប្រភព៖ worldometers
-
វៀតណាម៖ វិនិយោគបរទេសផ្ទាល់៥ខែដំបូងកើនឡើង មាន១៤ពាន់លានដុល្លារ
ទំហំវិនិយោគផ្ទាល់ពីបរទេសនៅប្រទេសវៀតណាមបានកើនឡើង០.៨ភាគរយ ក្នុងពេល៥ខែដំបូងនៃឆ្នាំ២០២១ បើធៀបនឹងពេលដូចគ្នា កាលពីឆ្នាំ២០២០ នេះបើតាមក្រសួងផែនការនិងវិនិយោគវៀតណាម ចេញផ្សាយកាលពីថ្ងៃទី២៧ ឧសភា ២០២១។ ក្រសួងថា ការវិនិយោគបរទេសក្នុងពេល៥ខែ មកនេះ មានចំនួន១៤ពាន់លានដុល្លារអាមេរិក ក្នុងចំណោមនេះ មានគម្រោងចុះបញ្ជីថ្មីចំនួន៦១៣គម្រោង មានទំហំវិនិយោគ៨.៨៣ពាន់លានដុល្លារអាមេរិក។ សិង្ហបុរីគឺជាប្រទេសវិនិយោគបរទេសធំជាងគេ មានជាង៣៧ភាគរយ ហើយក្រៅពីនេះ ក៏មានជប៉ុន កូរ៉េខាងត្បូង ចិន ជាដើម។ ប្រភពបន្ថែមទៀតថា ការវិនិយោគទាំងនោះមាននៅខេត្តក្រុងចំនួន៥៦ ក្នុងនោះ តំបន់ភាគខាងត្បូងចំនួន៤ មានច្រើនជាងគេ មានដូចជា Long An និង Can Tho ជាដើម ដែលបានទាក់ទាញការវិនិយោគ ៣.៣៥ពាន់លានដុល្លារ និង ១.៣២ពាន់លានដុល្លារ ខណៈតំបន់ពាណិជ្ជកម្មហូជីមីញ មាន១.៣៤ពាន់លានដុល្លារអាមេរិក និងក្រុង Binh Duong ១.១ពាន់លានដុល្លារអាមេរិក។ គួររម្លឹកថា កាលពីឆ្នាំ២០២០ ទំហំវិនិយោគផ្ទាល់ពីបរទេស (FDI) នៅវៀតណាមបានធ្លាក់ចុះ២៥ភាគរយ ដោយសារតែការរាត្បាតនៃជំងឺកូវីដ១៩ ក្នុងនោះ មានសរុប២៨.៥ពាន់លានដុល្លារអាមេរិក៕ ប្រភពពីVNexpress