ម៉ាឡេស៊ី៖ វិធានការបិទប្រទេសទាំងស្រុងលើគ្រប់វិស័យទាំងអស់ ដូចដែលបានដាក់ចេញកាលពីឆ្នាំមុន អាចធានាសុវត្ថិភាពប្រជាជនពីវីរុសកូវីដ១៩បានពិតមែន តែសកម្មភាពនេះ អាចនឹងនាំអោយសេដ្ឋកិច្ចជួបវិបត្តិធ្ងន់ធ្ងរ នេះបើតាមការបញ្ជាក់របស់នាយករដ្ឋមន្ត្រីម៉ាឡេស៊ី លោក មូហៃយ៉ីដឌីន យ៉ាស់ស៊ីន នៅក្នុងបទសម្ភាសន៍មួយ ជាមួយទូរទស្សន៍ម៉ាឡេស៊ី RTM និង Bernama TV នៅថ្ងៃអាទិត្យម្សិលមិញ ។នាឱកាសនោះដែរ លោក មូហៃយ៉ីដឌីន បានអះអាងថា យើងអាចបិទអ្វីៗគ្រប់យ៉ាង ហើយអង្គុយយ៉ាងស្ងៀម ។ បិទរោងចក្រ ហើយគ្រប់គ្នាត្រូវនៅក្នុងផ្ទះ ជាការពិតណាស់ វាអាចធានាសុវត្ថិភាពបាន ហើយក៏ងាយស្រួលសម្រាប់រដ្ឋាភិបាល និងក្រសួងសុខាភិបាលក្នុងការគ្រប់គ្រងផងដែរ… ក៏ប៉ុន្តែផលប៉ះពាល់ដល់សេដ្ឋកិច្ច គឺមានទំហំធំធេងណាស់ ដែលនេះជាហេតុផលមួយមិនអាចឱ្យយើងបិទសេដ្ឋកិច្ច ។នាយករដ្ឋមន្ត្រីម៉ាឡេស៊ីរូបនេះបានសង្កត់ធ្ងន់ទៀតថា ក្នុងអំឡុងពេលបិទប្រទេសទាំងស្រុងកាលពីឆ្នាំ២០២០ សេដ្ឋកិច្ចម៉ាឡេស៊ីស្ទើរតែដួលរលំដោយត្រូវខាតបង់ដល់ទៅ៥៧៩លានដុល្លារក្នុងមួយថ្ងៃ ។ កាលពីដើមខែឧសភាកន្លងទៅនេះ លោក មូហៃយ៉ីដឌីន បានប្រកាសថា ម៉ាឡេស៊ីនឹងត្រូវស្ថិតនៅក្រោមវិធានការបិទប្រទេសថ្នាក់ជាតិចាប់ពីថ្ងៃទី១២ ខែឧសភា ដល់ថ្ងៃទី០៧ ខែមិថុនាខាងមុខ ស្របពេលប្រឈមមុខនឹងការកើនឡើងករណីឆ្លងសាជាថ្មី ៕ ប្រភព៖ Reuters

ឥណ្ឌា៖ រដ្ឋធានីញូវដេលី របស់ប្រទេសឥណ្ឌា នឹងចាប់ផ្តើមបន្ធូរបន្ថយការរឹតត្បិត ដើម្បីប្រយុទ្ធប្រឆាំងនឹងវីរុសកូវីដ១៩នៅក្នុងសប្តាហ៍នេះ ប្រសិនបើករណីឆ្លងថ្មីៗត្រូវបានគេមើលឃើញថា បន្តធ្លាក់ចុះនៅក្នុងទីក្រុង នេះបើតាមការអះអាងរបស់អភិបាលក្រុងញូវដេលី លោក អាវីន កេចរីវ៉ាល់ នៅថ្ងៃអាទិត្យម្សិលមិញ ។លោក កេចរីវ៉ាល់ បានបញ្ជាក់នៅក្នុងសន្និសីទសារព័ត៌មានថា ទីក្រុងញូវដេលីដែលរងគ្រោះខ្លាំងជាងគេបានបិទចាប់តាំងពីថ្ងៃទី២០ ខែមេសាមក ប៉ុន្តែករណីឆ្លងថ្មីៗបានធ្លាក់ចុះក្នុងរយៈពេលប៉ុន្មានសប្តាហ៍ថ្មីៗនេះ ហើយអត្រាលទ្ធផលតេស្តវិជ្ជមានបានធ្លាក់ចុះក្រោម ២,៥ភាគរយ បើធៀបទៅនឹង៣៦ភាគរយកាលពីខែមុន ។ លោកបន្ថែមថា ប្រសិនបើករណីនៅតែបន្តធ្លាក់ចុះសម្រាប់មួយសប្តាហ៍ទៀត ដូច្នេះចាប់ពីថ្ងៃទី៣១ ខែឧសភាខាងមុខនេះ យើងនឹងចាប់ផ្តើមដំណើរបន្ធូរបន្ថយការបិទខ្ទប់ ។សូមបញ្ជាក់ផងដែរថា អស់រយៈពេលជាច្រើនសប្តាហ៍មកហើយ ដែលឥណ្ឌាបានប្រយុទ្ធប្រឆាំងនឹងរលកទីពីរនៃជំងឺកូវីដ១៩ ដែលបានបំផ្លាញប្រព័ន្ធសុខាភិបាលរបស់ខ្លួន និងធ្វើឱ្យមានការផ្គត់ផ្គង់អុកស៊ីសែនខ្វះខាតធ្ងន់ធ្ងរ ។ រដ្ឋជាច្រើនក៏នៅតែស្ថិតក្នុងការបិទខ្ទប់ ដែលនាំឱ្យមានការព្រួយបារម្ភអំពីផលប៉ះពាល់សេដ្ឋកិច្ចពីវីរុសដ៏កាចសាហាវមួយនេះផងដែរ ៕ ប្រភព៖ Reuters

វៀតណាម៖ អាជ្ញាធរសុខាភិបាលវៀតណាមបានរាយការណ៍ពីការរកឃើញអ្នកឆ្លងជំងឺកូវីដ១៩ចំនួន៥៦ករណីបន្ថែមទៀតនៅព្រឹកថ្ងៃចន្ទដើមសប្តាហ៍នេះ ដោយអ្នកជំងឺថ្មីៗទាំងនោះ ត្រូវបានរកឃើញនៅ៦ទីតាំងនៅវៀតណាមខាងជើង។ក្នុងចំណោមអ្នកឆ្លងទាំងអស់ខាងលើនេះ ក្នុងនោះមាន៣៣ករណីត្រូវបានរកឃើញនៅក្នុងខេត្តបាក់យ៉ាង និង ៨ករណីទៀតនៅក្នុងទីក្រុងហាណូយ ។ ដោយឡែកខេត្តបាក់នីន ក៏បានរកឃើញ៧ករណីដែរ ខណៈដែលខេត្តឡាងសុនរកឃើញ៥ករណី និង២ករណីទៀតនៅខេត្តទៀនបៀន ។ជាមួយនឹងចំនួនឆ្លងថ្មីនេះ វៀតណាមបានរកឃើញអ្នកកើតជំងឺកូវីដ១៩សរុប២.២២១នាក់នៅ៣០ខេត្ត-ក្រុង ចាប់តាំងពីការវាយប្រហារដោយវីរុសកូវីដ១៩នៅរលកថ្មីកាលពីថ្ងៃ២៧ ខែមេសាកន្លងមកនេ ៕ ប្រភព៖ VNExpress