អាមេរិក៖ ប្រធានាធិបតីអាមេរិកលោក ចូ បៃដិន នៅថ្ងៃព្រហស្បតិ៍នេះបានថ្លែងសាទរចំពោះបទឈប់បាញ់រវាងអ៊ីស្រាអែល និងក្រុមហាម៉ាស់ ហើយលោកបានសន្យាផ្តល់ជំនួយមនុស្សធម៌ និងធ្វើការសាងសង់តំបន់ហ្កាហ្សាឡើងវិញ ។លោក ចូ បៃដិន បានថ្លែងនៅឯសេតវិមាន បន្ទាប់ពីបទឈប់បាញ់ជាផ្លូវការរវាងអ៊ីស្រាអែល និងក្រុមហាម៉ាស់ចូលជាធរមានថា សហរដ្ឋអាមេរិកនឹងធ្វើការតាមរយៈអង្គការសហប្រជាជាតិ និងអ្នកចូលរួមចំណែកអន្តរជាតិដទៃទៀត ដើម្បីផ្តល់ជំនួយមនុស្សធម៌ដ៏ឆាប់រហ័ស ក៏ដូចជាកៀរគរការគាំទ្រអន្តរជាតិសំរាប់ប្រជាជននៅហ្គាហ្សាក្នុងការងារសាង់សង់តំបន់នេះឡើងវិញ ។ តែលោកអះអាងថា ជំនួយសាងសង់ឡើងវិញនឹងត្រូវផ្តល់ដល់អាជ្ញាធរប៉ាឡេស្ទីន មិនមែនជាមួយក្រុមហាម៉ាស់ ដែលអាមេរិកចាត់ទុកជាក្រុមភេវរកម្មទេ ។ បន្ថែមលើនេះ លោក បៃដិន ក៏បានសន្យាបន្ថែមប្រព័ន្ធការពារកាំជ្រួច Iron Dome របស់អ៊ីស្រាអែល បើទោះជាមានការតវ៉ាពីគណបក្សសាធារៈណរដ្ឋ អំពីការលក់សព្វាវុធរបស់អាមេរិកទៅអោយអ៊ីស្រាអែល ។សូមបញ្ជាក់ថា អ៊ីស្រាអែល និងក្រុមហាម៉ាស់បានយល់ព្រមទទួលយកបទឈប់បាញ់ជាផ្លូវការ បន្ទាប់ពីការវាយប្រយុទ្ធគ្នាដ៏បង្ហូរឈាមដែលបានផ្ដាច់ជីវិតជនជាតិប៉ាឡេស្ទីន២៣២នាក់ក្នុងតំបន់ហ្គាហ្សា និង១២នាក់នៅអ៊ីស្រាអែល ។ បទឈប់បាញ់ខាងលើសម្រេចបានក្រោមការសម្របសម្រួលរបស់អេហ្ស៊ីប ត្រូវបានប្រកាសកាលពីថ្ងៃព្រហស្បតិ៍សប្តាហ៍នេះ ក្រោយអន្តរជាតិដាក់សម្ពាធយ៉ាងខ្លាំងឱ្យភាគី ពាក់ព័ន្ធទាំងអស់បញ្ចប់ជម្លោះជាបន្ទាន់ ៕ ប្រភព៖ CNA

អន្តរជាតិ៖ យោងតាមការស្រង់ទិន្នន័យនៅក្នុងជម្លោះនៅតំបន់ហ្គាហ្សា, វេសន៍ប៊ែង និងអ៊ីស្រាអែលរបស់អង្គការសហប្រជាជាតិបានអោយដឹងនៅថ្ងៃពុធសប្តាហ៍នេះថា ការប៉ះទង្គិចគ្នារវាងអ៊ីស្រាអែល និងក្រុមហាម៉ាសប៉ាឡេស្ទីនបានកើនឡើងដល់២៥៦នាក់ ក្នុងនោះមានកុមារ៦៩នាក់ និងទាហានអ៊ីស្រាអែលម្នាក់ ខណៈដែលមនុស្សរាប់ពាន់នាក់ផ្សេងទៀតរងរបួស ។ជាមួយគ្នានេះ មន្ត្រីជាន់ខ្ពស់របស់ក្រុមហាម៉ាសបានព្យាករណ៍ពីបទឈប់បាញ់ក្នុងរយៈពេលប៉ុន្មានថ្ងៃខាងមុខនេះ ស្របពេលដែលអ៊ីស្រាអែល និងក្រុមសកម្មប្រយុទ្ធតំបន់ហ្គាហ្សាបានបន្តការវាយប្រហារឆ្លងកាត់ព្រំដែនរបស់ពួកគេចូលដល់ថ្ងៃទី១១ហើយគិតត្រឹមថ្ងៃព្រហស្បតិ៍នេះ ដោយយន្តហោះចម្បាំងរបស់អ៊ីស្រាអែលបានធ្វើការវាយប្រហារតាមអាកាសជាថ្មី និងប៉ាឡេស្ទីនបានបាញ់រ៉ុក្កែតបន្ថែមទៀត ។ បើតាមមន្ត្រីនយោបាយរបស់ក្រុមហាម៉ាស់ លោក ម៊ូសា អាប៊ូ ម៉ាហ្ស៊ូក ខ្ញុំគិតថា កិច្ចប្រឹងប្រែងដែលកំពុងបន្តជុំវិញបទឈប់បាញ់នឹងទទួលជោគជ័យ ដោយលោករំពឹងថា បទឈប់បាញ់នឹងត្រូវធ្វើឡើងក្នុងរយៈពេលពីរបីថ្ងៃទៀត ហើយបទឈប់បាញ់នឹងផ្អែកលើមូលដ្ឋាននៃកិច្ចព្រមព្រៀងគ្នាទៅវិញទៅមក ។សូមបញ្ជាក់ថា ទូរទស្សន៍ អាល់ ហ្សាហ្ស៊ីរ៉ា ដែលមានមូលដ្ឋាននៅប្រទេសកាតាបានរាយការណ៍ថា ប្រេសិតសន្តិភាពមជ្ឈឹមបូព៌ារបស់អង្គការសហប្រជាជាតិ គឺលោក ថូ វ៉េនណេសលែន កំពុងជួបជាមួយប្រធានក្រុមហាម៉ាស លោក អ៊ីស្មេល ហានីយ៉េ នៅប្រទេសកាតា ៕ ប្រភព៖ CNA