បារាំង៖ ការិយាល័យប្រធានាធិបតីបារាំងនៅយប់ថ្ងៃអង្គារសប្តាហ៍នេះបញ្ជាក់ថា បារាំងបានស្នើអោយមានដំណោះស្រាយ ជាមួយក្រុមប្រឹក្សាសន្តិសុខអង្គការសហប្រជាជាតិ (UNSC) ក្នុងការសម្របសម្រួលជាមួយអេហ្ស៊ីប និងហ៊្សកដានី ដើម្បីអំពាវនាវអោយមានបទឈប់បាញ់រវាងអ៊ីស្រាអែល និងក្រុមឧទ្ទាមហាម៉ាសប៉ាឡេស្ទីន ។សេចក្តីថ្លែងការណ៍បានអោយដឹងថា ប្រធានាធិបតីបារាំងលោក អែមម៉ានុយអែល ម៉ាក្រុង និងសមភាគីអេហ្ស៊ីបលោក អាប់ឌែល ហ្វាដតា អាល់ស៊ីស៊ី អំឡុងចូលរួមកិច្ចប្រជុំកំពូលក្នុងទីក្រុងប៉ារីស ស្តីពីប្រទេសអាហ្វ្រិក នោះ បានឯកភាពគ្នាលើដំណោះស្រាយនេះ នៅក្នុងការសន្ទនាតាមប្រព័ន្ធវីដេអូអនឡាញជាមួយព្រះមហាក្សត្រហ្ស៊កដានី អាប់ឌុលឡា ២ (Abdullah II) ។បើតាមសេចក្តីថ្លែងការណ៍របស់វិមានអេលីហ្សេ របស់ប្រទេសបារាំងនោះ មេដឹកនាំប្រទេសទាំង៣បានព្រមព្រៀងគ្នាលើគោលការណ៍ចំនួន៣ចំនុច ក្នុងនោះរួមមានការបញ្ឈប់ការវាយប្រហារជាបន្ទាន់… ដល់ពេលវេលាហើយសម្រាប់បង្កើតបទឈប់បាញ់ ហើយក្រុមប្រឹក្សាសន្តិសុខអង្គការសហប្រជាជាតិត្រូវតែចាត់វិធានការដោះស្រាយបញ្ហានេះជាបន្ទាន់ ៕ ប្រភព៖ CGTN

ចិន៖ រដ្ឋាភិបាលចិន នៅថ្ងៃអង្គារ៍នេះ បានថ្កោលទោសសហរដ្ឋអាមេរិក ចំពោះការបង្កើនភាពតានតឹង ជុំវិញជម្លោះរវាងអ៊ីស្រាអែល និងប៉ាឡេស្ទីន ក្រោយមហាអំណាចមួយនេះ បានរារាំងដល់សេចក្តីថ្លែងការណ៍រួមរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) សម្រាប់បទឈប់បាញ់គ្នាជាបន្ទាន់មួយជាលើកទី៣ ។អ្នកនាំពាក្យក្រសួងការបទេសចិនលោក ចាវ លីជៀន បញ្ជាក់ថា ភាគច្រើននៃរដ្ឋសមាជិកអង្គការ UNSC បាននិងកំពុងអំពាវនាវឲ្យមានការឈប់បាញ់គ្នាជាបន្ទាន់ ដើម្បីជៀសវាងវិបត្តិពេញបន្ទុកមួយ និងកាត់បន្ថយគ្រោះថ្នាក់ដល់អាយុជីវិត ។ ប៉ុន្តែជាមួយគ្នានេះ អាមេរិកផ្ទុយពីកិច្ចខិតខំប្រឹងបញ្ឈប់វិបត្តិ បែរជាជ្រើសរើសនូវការជំរុញភាពតានតឹងដោយគ្រាន់តែសំឡេងជំទាស់ បង្កើតបានជាបញ្ហារាំងស្ទះដល់កិច្ចខិតខំប្រឹងប្រែងអន្តរជាតិ ។ លោក ចាវ បានសង្កត់ធ្ងន់ថា ជំនួសឲ្យគិតតែលើផលប្រយោជន៍ផ្ទាល់ខ្លួនទាំងស្រុងលើបញ្ហានេះ អាមេរិកគួរធ្វើការជាមួយសហគមន៍អន្តរជាតិ ចែករំលែកឲ្យកម្តៅនៃភាពតានតឹងថយចុះ និងគាំទ្រដល់តួនាទីអង្គការ UNSC ក្នុងការដោះស្រាយជម្លោះ និងកសាងទំនុកចិត្តជាថ្មី ។គួរបញ្ជាក់ផងដែរថា ដឹកនាំដោយប្រទេសចិន ន័រវែស និងទុយនេស៊ី ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអាទិត្យ បានរៀបចំកិច្ចប្រជុំបន្ទាន់មួយដើម្បីពិភាក្សាពីស្ថានភាពនៅហ្គាហ្សា ។ ទោះយ៉ាងណា ដោយមានការប្រឆាំងពីអាមេរិក កិច្ចប្រជុំនោះ បញ្ចប់ជាថ្មីម្តងទៀត គ្មានបានផ្លែផ្កាអ្វីសំខាន់សោះ ៕ ប្រភព៖ CGTN