អង់គ្លេស៖ ប្រជាជននៅចក្រភពអង់គ្លេសចាប់ផ្តើមមានសេរីភាព និងប្រក្រតីឡើងវិញជាបណ្តើរៗហើយ ចាប់ពីថ្ងៃចន្ទដើមសប្តាហ៍នេះ ក្រោយបំរាមកូវីដ១៩ត្រូវបានដកឈានដល់ដំណាក់កាលទី៣ ពោលគឺស្ទើរតែទាំងស្រុងហើយ ដូច្នេះពល រដ្ឋអាចជួបជុំគ្នា ដើរកម្សាន្តទាំងយប់ថ្ងៃ ទៅមើលព្រឹត្តិការណ៍កីឡា ចូលហាង ក្លឹបកម្សាន្ត និង ភោជនីយដ្ឋានជាដើម ។ការដកបំរាមខាងលើនេះ បានធ្វើឡើងចំពេលដែលមានក្តីកង្វល់នៃចំនួនករណីវីរុសកូវីដ១៩បំប្លែងខ្លួនថ្មីមកពីឥណ្ឌាកំពុងកើនឡើងនៅចក្រភពអង់គ្លេស ខណៈដែលរដ្ឋាភិបាលបានអំពាវនាវថា ខ្លួនមិនបានយកអ្វីចេញពីតុក្នុងការប្រយុទ្ធប្រឆាំងនឹងវីរុសបំប្លែងខ្លួនឥណ្ឌានេះទេ ។ ជាមួយគ្នានេះដែរ រដ្ឋមន្រ្តីក្រសួងសុខាភិបាលអង់គ្លេសលោក Matt Hancock បាននិយាយថា វីរុសកូវីដ១៩បំប្លែងខ្លួនថ្មីឥណ្ឌា ដែលត្រូវបានគេស្គាល់ជាផ្លូវការថា B.1.617.2 គឺអាចចម្លងលឿនជាងវីរុសកូវីដ១៩បំប្លែងខ្លួនថ្មីអង់គ្លេស ដោយកន្លងមក អង្គការសុខភាពពិភពលោក WHO ចាត់ទុកវា (វីរុសកូវីដ១៩បំប្លែងខ្លួនថ្មីឥណ្ឌា) ជាការព្រួយបារម្ភកម្រិតសកល ។រដ្ឋមន្រ្តីក្រសួងសុខាភិបាលអង់គ្លេសរូបនេះ បានថ្លែងប្រាប់ទូរទស្សន៍ BBC នៅថ្ងៃអាទិត្យម្សិលមិញថា រឿងនេះនៅមិនទាន់ចប់ទេ… វីរុសដ៏កាចសាហាវនេះទើបតែមានសន្ទុះបន្តិចប៉ុណ្ណោះ ដូច្នេះហើយ យើងទាំងអស់គ្នាត្រូវតែមានការយកចិត្តទុក និង ប្រុងប្រយ័ត្នបន្តិចបន្ថែមទៀត ៕ ប្រភព៖ CNA

ថៃ៖ អាជ្ញាធរសុខាភិបាលថៃបានរកឃើញអ្នកឆ្លង COVID-19 ថ្មីៗរហូតដល់៩,៦៣៥នាក់ក្នុងពេលរយៈ២៤ម៉ោងមកនេះ ដោយ៦,៨៥៣នាក់ក្នុងចំណោមអ្នកឆ្លងថ្មីៗទាំងនេះ ត្រូវបានរាយការណ៍ចេញពីពន្ធនាគារមួយចំនួន ។មជ្ឈមណ្ឌលគ្រប់គ្រងស្ថានការណ៍ COVID-19 នៅក្នុងប្រទេសថៃ ក៏បានរាយការណ៍ពីអ្នកជំងឺ២៥នាក់ទៀតបានស្លាប់ផងដែរ នៅក្នុងរយៈពេលដូចគ្នា ។ បច្ចុប្បន្នប្រទេសថៃកំពុងតែស្ថិតនៅក្នុងដំណាក់កាលទប់ទល់រលកទី ៣ នៃការឆ្លងរាតត្បាត COVID-19 ។គួរបញ្ជាក់ថា ក្រោយការបូកសរុបទិន្នន័យថ្មីៗខាងលើនេះ នាំឲ្យចំនួនករណីឆ្លង COVID-19 សរុបទូទាំងប្រទេសថៃកើនឡើងដល់១១ម៉ឺន១ពាន់៨២ករណី ក្នុងនោះមានអ្នកស្លាប់៦១៤នាក់ និងជាសះស្បើយវិញជាង៦ម៉ឺន៧ពាន់នាក់ ៕ CNA