គិតត្រឹមថ្ងៃចុងសប្តាហ៍កន្លងទៅ វ៉ាក់សាំងបង្ការជំងឺកូវីដ១៩ចំនួនជិត៣៩២.៩លានដូសត្រូវបានចាក់ជូនប្រជាពលរដ្ឋនៅទូទាំងប្រទេសចិន នេះបើតាមរបាយការណ៍របស់គណៈកម្មការជាតិទទួលបន្ទុកសុខាភិបាលចិន ចេញផ្សាយ កាលពីថ្ងៃអាទិត្យ ទី១៦ ឧសភា ២០២១ម្សិលមិញ៕

វ៉ាក់សាំង AstraZeneca ជើងទី២ ចំនួនជិត១.៧លានដូស ក្រោមយន្តការកូវ៉ាក់នៃអង្គការសុខភាពពិភពលោកត្រូវបានបញ្ជូនទៅដល់ក្រុងហាណូយប្រទេសវៀតណាមហើយ នាថ្ងៃអាទិត្យ ទី១៦ ឧសភា ២០២១នេះ។ វៀតណាមថា នេះគឺផ្នែកមួយទៀតនៃជំនួយពីកូវ៉ាក់ចំនួនសរុប ៤.១លានដូស។ ជើងទី១ បញ្ជូនមក កាលពីខែមីនា។ វៀតណាមក៏ទិញវ៉ាក់សាំងអង់គ្លេសនេះដែរ ក្រៅពីជំនួយមិនគិតថ្លៃនោះ។ ជាក់ស្តែង វ៉ាក់សាំងប្រភេទនេះជាង១១ម៉ឺនដូសក៏ត្រូវបានបញ្ជូនមកដល់វៀតណាម តាមការបញ្ជាទិញដែរ កាលពីខែកុម្ភៈ ២០២១ ដោយគេដឹងថា វៀតណាមកម្មង់ទិញដល់ទៅ៣០លានដូស។ វៀតណាមបានផ្តើមចាក់ AstraZeneca នេះជូនពលរដ្ឋ តាំងពីខែមីនា តែទើបចាក់បានប្រមាណ១ភាគរយប៉ុណ្ណោះ គឺជាង៩៧ម៉ឺននាក់ លើក្រុមអាទិភាពសិន ហើយអ្នកចាក់ដូសទី២ ទើបបានជាង២ម៉ឺននាក់៕

វ៉ាក់សាំងចំនួន ជាង១.៤៣ ពាន់លានដូសហើយ ដែលត្រូវបានចាក់ជូនមនុស្សទូទាំងពិភពលោក គិតត្រឹមថ្ងៃទី១៦ ឧសភា ២០២១ នេះបើតាមទិន្នន័យប្រមូលដោយទីភ្នាក់ងារព័ត៌មាន Bloomberg។ ប្រភពថា ចំនួននេះមានក្នុង១៧៦ប្រទេស ដោយមួយថ្ងៃចុងក្រោយមកនេះ ចាក់បានប្រមាណជាង២៣លានដូស។ បើគិតជាភាគរយវិញប្រភពថាចាក់បានប្រមាណ៩.៤ភាគរយនៃចំនួនប្រជាជនសរុបលើពិភពលោក។ ប្រភពបន្ថែមទៀតថា បណ្តាប្រទេសនិងតំបន់ចំណូលខ្ពស់ខ្លាំងមានអ្នកចាក់វ៉ាក់សាំងលឿនជាងក្រុមប្រទេសមានចំណូលទាបខ្លាំង ដល់ទៅ ២៥ដងឯណោះ៕

ស្ថានទូតចិនប្រចាំប្រទេសថៃបានអះអាង ថ្មីៗនេះថា ក្នុងសហ្តហ៍នេះ ចិនបានផ្គត់ផ្គង់វ៉ាក់សាំងដែលថៃបញ្ជាទិញ ចំនួន១លានដូសទៀត។ ស្ថានទូតថា ៥០ម៉ឺនដូសបានមកដល់កាលពីថ្ងៃសុក្រ ទី១៤ ឧសភា និង៥០ម៉ឺនដូសទៀត មកដល់ កាលពីថ្ងៃសៅរ៍ ទី១៥ ឧសភា ២០២១។ មកទល់ពេលនេះ វ៉ាក់សាំងស៊ីណូវ៉ាក់៤លាន៥សែនដូសហើយ ដែលត្រូវបានដឹកទៅដល់ប្រទេសថៃ បើបូកនឹង១លាននេះទៀត៕

អង្គការសុខភាពពិភពលោកហៅកាត់ថា WHO បានព្រមានថ្មីៗនេះថា នៅឆ្នាំ២០២១ ដែលជាឆ្នាំទី២នៃរលកកូវីដ១៩ នឹងមានមនុស្សស្លាប់ច្រើនជាងឆ្នាំទី១ ឆ្ងាយណាស់។ អគ្គនាយក WHO លោក Tedros Adhanom Ghebreyesusបាននិយាយថា “ពួកយើងកំពុងស្ថិតក្នងឆ្នាំទី២នៃជំងឺកូវីដ១៩ ដែលនឹងមានមនុស្សស្លាប់ច្រើនជាងកាលពីឆ្នាំដំបូងខ្លាំងណាស់”។ មនុស្សជាង៣លានហើយដែលបានស្លាប់ព្រោះជំងឺកូវីដ១៩ ទូទាំងពិភពលោក៕ ប្រភពពី VN Express

ទីភ្នាក់ងារសារព័ត៌មាន The Nation បានចេញផ្សាយដោយដាក់ចំណងជើងថា “ម្ចាស់ក្សត្រីមិនបានឆ្លងកូវីដ១៩ទេ នេះបើតាមខុទ្ទកាល័យនាយករដ្ឋមន្ត្រី”។ ផ្អែកតាមប្រភព ចេញផ្សាយនារសៀលថ្ងៃទី១៥ ឧសភា ២០២១ថា ស្ថាប័នមួយនេះបានច្រានចោលនូវពាក្យចចាមអារ៉ាមតាមអនឡាញថា ម្ចាស់ក្សត្រីបានឆ្លងកូវីដ១៩។ ប្រភពបានជំរុញដល់សាធារណៈជនត្រួតពិនិត្យព័ត៌មានកូវីដ ពីបណ្តាញផ្សព្វផ្សាយជឿទុកចិត្តបាន ដូចជាមជ្ឈមណ្ឌលគ្រប់គ្រងស្ថានភាពកូវីដ១៩ ហៅកាត់ថា CCSA ជាដើម។ សូមបញ្ជាក់ថា ម្ចាស់ក្សត្រី របស់ព្រះមហាក្សត្រថៃ ព្រះនាម Suthida Bajrasudhabimalalakshana ៕