-
ជប៉ុនបន្ថែមការដាក់ភាពអាសន្ន ដើម្បីទប់ស្កាត់ជំងឺ COVID-19 នៅមុនពេលព្រឹត្តិការណ៍កីឡា Tokyo Olympics ធ្វើឡើង (មានវីដេអូ)
ជប៉ុន៖ ជប៉ុន នៅថ្ងៃសុក្រនេះ បានអូសបន្ថាយពេលដាក់ភាពអាសន្នបន្ថែមទៀត ដើម្បីទប់ស្កាត់ជំងឺ Covid-19 ពោលគឺនៅត្រឹមរយៈពេល១០សប្តាហ៍ប៉ុណ្ណោះ មុនពេលព្រឹត្តិការណ៍កីឡា Tokyo Olympics ធ្វើឡើង ។ជាមួយគ្នានេះ នាយករដ្ឋមន្ត្រីជប៉ុន លោក យ៉ូស៊ីហ៊ីដេ ស៊ូហ្គា ថ្លែងថា នៅថ្ងៃនេះយើងបានសម្រេចចិត្តដាក់បន្ថែមខេត្ត Hokkaido Okayama និង Hiroshima ជាតំបន់ស្ថិតនៅក្រោមភាពអាសន្ន ចាប់ពីថ្ងៃទី១៦ ដល់ថ្ងៃទី៣១ ខែឧសភានេះ លោកថា តំបន់ទាំងនេះ មានចំនួនប្រជាជនច្រើន ហើយចំនួនករណីឆ្លងថ្មីកំពុងតែកើនឡើងយ៉ាងឆាប់រហ័ស ។ទន្ទឹមគ្នានោះដែរ អ្នកធ្វើយុទ្ធនាការបានដាក់ញត្តិដែលមានហត្ថលេខាជាង៣៥ម៉ឺន ដោយបានអំពាវនាវអោយលុបចោលព្រឹត្តិការកីឡា Tokyo Olympics ដោយញ្ញតិដើម្បីលុបចោលព្រឹត្តិការណ៍នេះ ត្រូវបានដាក់ទៅកាន់គណៈកម្មាធិការអូឡាំពិកអន្តរជាតិ និងគណៈកម្មាធិការប៉ារ៉ាឡាំពិកអន្តរជាតិ ព្រមទាំងអ្នករៀបចំ និងរដ្ឋាភិបាលក្នុងតំបន់ផងដែរ ៕ ប្រភព៖ AP
-
ប្រមុខ WHO អំពាវនាវដល់ប្រទេសអ្នកមានអោយបញ្ឈប់ការចាក់វ៉ាក់សាំង Covid-19 ដល់កុមារ ហើយគួរបរិច្ចាគថ្នាំបង្ការដល់ប្រទេសក្រីក្រវិញ (មានវីដេអូ)
ស្វីស៖ អង្គការសុខភាពពិភពលោក (WHO) បានជំរុញដល់ប្រទេសអ្នកមាន ឲ្យបញ្ឈប់ការចាក់វ៉ាក់សាំងប្រឆាំងនឹងវីរុស Covid-19 ដល់កុមារ ហើយបរិច្ចាគថ្នាំបង្ការដល់ប្រទេសក្រីក្រវិញ ស្របពេលមានការព្រមានថា ឆ្នាំទី២នៃជំងឺរាតត្បាតនេះនឹងសម្លាប់មនុស្សកាន់តែច្រើនបន្ថែមទៀត ។ស្របពេលជាមួយគ្នានេះដែរ អគ្គនាយកអង្គការសុខភាពពិភពលោក (WHO) លោក ថេដ្រូស អាដាណម ហ្គេប្រេយេសឹស បានបង្ហាញការខឹងសម្បាថា ប្រទេសអ្នកមានមួយចំនួនកំពុងចាក់វ៉ាក់សាំងដល់កុមារ និងក្មេងជំទង់ ក្នុងគ្រាដែលប្រទេសក្រីក្រវិញ ទើបតែចាប់ផ្តើមចាក់វ៉ាក់សាំងដល់បុគ្គលិកសុខាភិបាល និងក្រុមងាយរងគ្រោះបំផុតប៉ុណ្ណោះ ។ ជំនួសឲ្យការចាក់វ៉ាក់សាំងដល់មនុស្សវ័យក្មេង និងមានសុខភាពល្អ លោក ថេដ្រូស បានទទូចដល់ប្រទេសនានាឲ្យផ្តល់ថ្នាំបង្ការរបស់ពួកគេទៅក្នុងគម្រោង COVAX ហើយធានាថា អ្នកដែលត្រូវការបំផុតនៅក្នុងប្រទេសទាំងអស់ ពិតជាទទួលបានការការពារ ។ប្រភពបានអោយដឹងថា វ៉ាក់សាំងប្រមាណ៤៤ភាគរយត្រូវបានចាក់នៅក្នុងប្រទេសដែលមានប្រាក់ចំណូលខ្ពស់ ពោលគឺស្មើនឹង១៦ភាគរយនៃចំនួនប្រជាជនពិភពលោក ។ ចំនែកឯវ៉ាក់សាំងត្រឹម០,៣ភាគរយប៉ុណ្ណោះ ដែលត្រូវបានចាក់នៅក្នុងប្រទេសដែលមានប្រាក់ចំណូលទាបបំផុតចំនួន២៩ ស្មើនឹង៩ភាគរយនៃប្រជាជនពិភពលោក ៕ ប្រភព៖ Reuters
-
នៅអាស៊ាន! ប្រទេសមួយនេះឆ្លងកូវីដតិចជាងគេ ក៏មិនមែនឡាវដែរ
ព្រុយណេគឺជាប្រទេសមានករណីកូវីដ១៩តិចជាងគេ ក្នុងសហគមអាស៊ាន ១០ប្រទេស ក្នុងនោះ គិតត្រឹមថ្ងៃទី១៤ ឧសភា ព្រុយណេមានត្រឹម២៣២ករណី ស្លាប់មនុស្ស៣នាក់។ រីឯប្រទេសក្នុងតំបន់ ដែលឆ្លងច្រើនជាងគេវិញ គឺឥណ្ឌូនេស៊ី មានជាង១.៧លាននាក់ លេខ២គឺហ្វីលីពីន មានជាង១.១លាននាក់ លេខ៣គឺម៉ាឡេស៊ី បន្ទាប់មកគឺមីយ៉ាន់ម៉ា ហើយលេខ៥គឺថៃ បន្តទៀត មានសិង្ហបុរី កម្ពុជា វៀតណាម និងឡាវ។ ក្នុងតំបន់អាស៊ាននេះដែរ ឡាវគឺជាប្រទេសមានមនុស្សស្លាប់ព្រោះកូវីដ១៩តិចជាងគេ គឺមានតែ២នាក់ ខណៈដែលប្រទេសមានមនុស្សច្រើនជាងគេវិញ គឺឥណ្ឌូនេស៊ី ដដែល ហើយថៃជាប់លេខ៥ ខណៈកម្ពុជាជាប់លេខ៦៕ ប្រភពពី The Nation
-
កូវីដព្រឹកនេះ! ថៃប្រកាសឆ្លងថ្មី ជាង៣ពាន់នាក់ទៀត
ទីភ្នាក់ងារសារព័ត៌មានបាងកកប៉ុស្តិ៍បានចេញផ្សាយ នាព្រឹកថ្ងៃទី១៥ ឧសភា ២០២១នេះថា មានអ្នកឆ្លងជំងឺកូវីដ ថ្មីៗ ចំនួន៣០៩៥នាក់ទៀត និងស្លាប់១៧នាក់ ក្នុងរយៈពេល២៤ម៉ោងចុងក្រោយនេះ។ ចំនួនឆ្លងថ្មីនេះបានធ្វើឲ្យថៃមានអ្នកកើតកូវីដ១៩ សរុបជិត១០ម៉ឺននាក់ហើយ។ មជ្ឈមណ្ឌលគ្រប់គ្រងស្ថានភាពកូវីដ១៩របស់ថៃ ហៅកាត់ថា CCSA បានឲ្យដឹងថា ក្នុងចំណោមជាង៣ពាន់នាក់ មាន២២១៨ករណីនៅទីទាំងសាធារណៈទូទៅ ហើយ៨៧៧នាក់គឺជាអ្នកទោស។ ក្នុងរលកទី៣នៃជំងឺកូវីដ១៩ ចាប់ផ្តើមពីដើមខែមេសាមក មានឆ្លងថ្មី៧០២៨២នាក់ហើយ ប៉ុន្តែជាសះស្បើយវិញ ៣៦២៤១នាក់ ១៣៥១នាក់ឲ្យទៅផ្ទះវិញ កាលពីម្សិលមិញ៕
-
UN ស្នើអតីតមេរដ្ឋប្រហារនៅថៃជួយបញ្ចប់អំពើហិង្សាស្លាប់មនុស្ស នៅភូមា
ប្រេសិតពិសេសរបស់អង្គការសហប្រជាជាតិ ទទួលបន្ទុកកិច្ចការបញ្ហាប្រទេសភូមាបានជួបនាយករដ្ឋមន្ត្រីថៃ ប្រាយុទ្ធ ចាន់អូចា កាលពីថ្ងៃសុក្រទី១៤ ឧសភា ២០២១ ខណៈដែលលោកស្រីបន្តកិច្ចប្រឹងប្រែងបញ្ចប់អំពើហិង្សាស្លាប់មនុស្សនៅប្រទេសមីយ៉ាន់ម៉ា ដែលផ្តើមចេញពីរដ្ឋប្រហារយោធា កាលពីខែកុម្ភៈ ២០២១។ លោកស្រី Christine Schraner Burgener បានប្រាប់លោកឧត្តមសេនីយ៍ ប្រាយុទ្ធ ក្នុងជំនួបនាក្រុងបាងកក ពីក្តីសង្ឃឹមថា ថៃនឹងស្វែងរកវិធីសាស្ត្រ ធ្វើការជាមួយយោធាមីយ៉ាន់ម៉ា បញ្ចប់អំពើហិង្សា នេះបើតាមសេចក្តីថ្លែងការណ៍របស់ការិយាល័យនាយករដ្ឋមន្ត្រី។ សូមបញ្ជាក់ដែរថា ក្រោយពួកយោធាភូមាធ្វើរដ្ឋប្រហារទម្លាក់រដ្ឋាភិបាលកើតចេញពីការបោះឆ្នោតរបស់លោកស្រី អ៊ួង សានស៊ូជី មក មានសេចក្តីរាយការណ៍ពីមនុស្សស្លាប់ជាបន្តបន្ទាប់ ពោលគឺពេលមានបាតុកម្មតវ៉ាប្រឆាំងនឹងរដ្ឋប្រហារ ដោយមានការឆ្លើយតបវិញ ពីក្រុមកម្លាំងប្រដាប់អាវុធ។ លោក ប្រាយុទ្ធ ដែលក៏ជាអតីតមេបញ្ជាការដឹកនាំរដ្ឋប្រហារយោធានៅថៃផងដែរនោះ ត្រូវបានគេដឹងថា មានទំនាក់ទំនងជិតស្និតជាមួយនឹងរដ្ឋាភិបាលរបបសឹកមីយ៉ាន់ម៉ា គឺលោក Min Aung Hlaing ។ លោកប្រាយុទ្ធបានឆ្លើយតបនឹងសំណើរបស់តំណាងអង្គការសហប្រជាជាតិថា រដ្ឋាភិបាលរបស់លោកត្រៀមខ្លួនស្តាប់និងផ្លាស់ប្តូរព័ត៌មានដែលជាប្រយោជន៍ ខណៈដែលភាគីទាំងពីរក៏ជជែកពីជំនួយមនុស្សធម៌សម្រាប់ប្រជាពលរដ្ឋភូមា រួមានទាំងការភៀសខ្លួនរបស់ជនរងគ្រោះឆ្លងកាត់ព្រំដែន ចូលមកជ្រកកោណនៅប្រទេសថៃផងដែរ៕ ប្រភពពី CNA
-
អាមេរិក៖ ចាក់វ៉ាក់សាំងរួច មិនបាច់ពាក់ម៉ាស់ទៀតទេ ពេលចេញក្រៅផ្ទះ
មជ្ឈមណ្ឌលគ្រប់គ្រងជំងឺឆ្លងនៅអាមេរិកហៅកាត់ថា CDC កាលពីថ្ងៃទី១៣ ឧសភា ២០២១ បានណែនាំដល់ពលរដ្ឋណាដែលបានចាក់វ៉ាក់សាំងកូវីដ១៩គ្រប់ដូសហើយ ពេលចេញក្រៅផ្ទះ មិនបាច់ពាក់ម៉ាស់ទៀតទេ សម្រាប់ទីតាំងភាគច្រើន និងមិនពាក់តែម្តងខាងក្នុងបរិវេណផ្ទះ នេះបើតាមការចេញផ្សាយរបស់ទីភ្នាក់ងារព័ត៌មានអង់គ្លេស Reuters។ CDC ថាជាការប្រាប់ ដើម្បីអនុញ្ញាតឲ្យត្រលប់មករកជីវិតធម្មតាឡើងវិញបណ្តើរៗ។ មកទល់ពេលនេះ អាមេរិកចាក់វ៉ាក់សាំងកូវីដ១៩ជូនពលរដ្ឋ ប្រមាណ ២៥៦លាននាក់ ដូសទី១ និងដូសទី២ បាន១១៨លាននាក់ ស្មើនឹងជាង៣៥ភាគរយ៕
-
ក្រុមប្រឹក្សាសន្តិសុខអង្គការសហប្រជាជាតិគ្រោងបើកកិច្ចប្រជុំជាលើកទី៣តាមអនឡាញ ក្នុងគោលបំណងបន្ធូរបន្ថយអំពើហិង្សារវាងអ៊ីស្រាអែល និងប៉ាឡេស្ទីន (មានវីដេអូ)
Video: https://fb.watch/5u00TZyyW9/ បរទេស៖ ប្រភពពីមន្រ្តីការទូតបាននិយាយថា ក្រុមប្រឹក្សាសន្តិសុខអង្គការសហប្រជាជាតិ (UNSC) គ្រោងរៀបចំកិច្ចប្រជុំតាមប្រព័ន្ធវីដេអូអនឡាញ នៅថ្ងៃអាទិត្យចុងសប្តាហ៍នេះ (ម៉ោងក្នុងតំបន់) ស្ថិតក្នុងគោលបំណងបន្ធូរបន្ថយអំពើហិង្សាដោយប្រដាប់អាវុធរវាងប្រទេសអ៊ីស្រាអែល និងក្រុមសកម្មប្រយុទ្ធប៉ាឡេស្ទីន (ក្រុមហាម៉ាស់) ។កិច្ចប្រជុំជាលើកទី៣របស់ក្រុមប្រឹក្សាសន្តិសុខអង្គការសហប្រជាជាតិខាងលើនេះ បានគ្រោងធ្វើឡើងស្របពេលស្រាអែល នៅថ្ងៃសុក្រនេះ បានចាប់ផ្ដើមដាក់ពង្រាយកងទ័ពជើងគោក និងរថក្រោះ រួមទាំងបង្កើនការបាញ់កាំភ្លើងធំ និងការវាយប្រហារតាមផ្លូវអាកាសប្រឆាំងក្រុមសកម្មប្រយុទ្ធប៉ាឡេស្ទីន (ក្រុមហាម៉ាស់) នៅតំបន់ហ្គាហ្សា ខណៈគ្រាប់រ៉ុក្កែតនៅតែបន្តផ្លោងចូលកាន់តែជ្រៅក្នុងទឹកដីអ៊ីស្រាអែល ។ យោធាអ៊ីស្រាអែលមិនទាន់បានបញ្ជាក់អ្វីលម្អិតឡើយ ពាក់ព័ន្ធនឹងការដាក់ពង្រាយកងទ័ពជើងគោកខាងលើនេះនៅឡើយទេ តែកងទ័ពអ៊ីស្រាអែលបានឱ្យដឹងថា ខ្លួនបានដាក់ពង្រាយកងទ័ពជើងគោក និងរថក្រោះជាច្រើនគ្រឿងនៅតាមតំបន់ព្រំដែន ដោយបង្កឱ្យមានការព្រួយបារម្ភថា កងទ័ពអ៊ីស្រាអែលអាចនឹងបើកប្រតិបតិ្តការទ្រង់ទ្រាយធំវាយលុកចូលក្នុងតំបន់ហ្គាហ្សា ។គិតត្រឹមព្រឹកថ្ងៃសុក្រនេះ មនុស្ស១០៩នាក់ ក្នុងនោះមានកុមារ២៩នាក់ក្នុងតំបន់ហ្គាហ្សាត្រូវបានសម្លាប់ នៅក្នុងការវាយប្រហារតាមផ្លូវអាកាសរបស់យោធាអ៊ីស្រាអែល ខណៈដែលភាគីអ៊ីស្រាអែលមានមនុស្ស៧នាក់បានស្លាប់នៅក្នុងប្រទេសអ៊ីសា្រអែល ដោយសារការវាយប្រហារដោយគ្រាប់រ៉ុក្កែតរបស់ក្រុមហាម៉ាស់ ៕ ប្រភព៖ CNA
-
អាជ្ញាធរសុខាភិបាលអាមេរិកបញ្ជាក់ថា អ្នកចាក់វ៉ាក់សាំងពេញលេញអាចចូលរួមក្នុងសកម្មភាពទាំងក្នុង និងក្រៅ ដោយមិនបាច់ពាក់ម៉ាស់ឬរក្សាគម្លាតឡើយ (មានវីដេអូ)
អាមេរិក៖ មជ្ឈមណ្ឌលត្រួតពិនិត្យ និងបង្ការជំងឺឆ្លងអាមេរិក (CDC) នៅថ្ងៃព្រហស្បតិ៍សប្តាហ៍នេះប្រកាសថា ខ្លួនបានដកចេញនូវវិធានការណ៍តម្រូវឱ្យពាក់ម៉ាស់សម្រាប់មនុស្សដែលបានទទួលវ៉ាក់សាំងបង្ការជំងឺ Covid-19 ពេញលេញ ។ស្របពេលជាមួយគ្នានេះដែរ នាយកមជ្ឈមណ្ឌលត្រួតពិនិត្យ និងបង្ការជំងឺឆ្លងអាមេរិក (CDC) លោកស្រី រ៉ូឆែល វ៉ាឡិនស្គី ក៏បានអះអាងដែរថា អ្នកដែលបានទទួលវ៉ាក់សាំងពេញលេញអាចចូលរួមក្នុងសកម្មភាពទាំងក្នុងនិងក្រៅ ទាំងធំឬតូច ដោយមិនបាច់ពាក់ម៉ាស់ ឬរក្សាគម្លាតនោះទេ ។ទោះជាយ៉ាងណាក៏ដោយ ការប្រកាសខាងលើនេះ បានបង្កឱ្យមានប្រតិកម្មដ៏រីករាយចំពោះអ្នកខ្លះ ខណៈដែលអ្នកផ្សេងទៀតនៅតែប្រុងប្រយ័ត្ន ហើយនិយាយថា ពួកគេនឹងបន្តពាក់ម៉ាស់ជាសាធារណៈ ដើម្បីជាការប្រុងប្រយ័ត្ន ទោះបីជាបានចាក់វ៉ាក់សាំងពេញលេញក៏ដោយ ៕ ប្រភព៖ CNA
-
ករណីឆ្លង Covid-19 ថ្មីៗនៅឥណ្ឌា កើនឡើងយ៉ាងលើស២៤លានករណី ខណៈដែលវីរុសបំប្លែងខ្លួនថ្មីឆ្លងរាលដាលទូទាំងពិភពលោក (មានវីដេអូ)
ឥណ្ឌា៖ ចំនួនអ្នកឆ្លងជំងឺកូវីដ១៩ដែលត្រូវបានរាយការណ៍នៅក្នុងប្រទេសឥណ្ឌា បានកើនឡើងលើស២៤លានករណីហើយគិតត្រឹមថ្ងៃសុក្រសប្តាហ៍នេះ ស្របពេលដែលវីរុសបំប្លែងខ្លួនថ្មីត្រូវបានគេរកឃើញដំបូងក្នុងប្រទេសមួយនេះ បាននិងកំពុងឆ្លងរីករាលដាលនៅទូទាំងសកលលោក ។អត្រាស្លាប់ដោយសារជំងឺ COVID-19 នៅតែស្ថិតក្នុងកម្រិតខ្ពស់ដដែលនៅទូទាំងប្រទេសឥណ្ឌា ដោយអ្នកជំងឺសរុប៤ពាន់នាក់ទៀតបានស្លាប់ នៅក្នុងរយៈពេល ២៤ម៉ោងកន្លងទៅនេះប៉ុណ្ណោះ ខណៈអ្នកឆ្លងជំងឺនេះសរុប៣៤ម៉ឺន៣ពាន់១៤៤នាក់ត្រូវបានរកឃើញនៅក្នុងរយៈពេលដូចគ្នា ។ ទោះបីជាករណីឆ្លង និងស្លាប់ប្រចាំថ្ងៃដោយសារ COVID-19 នៅតែស្ថិតក្នុងកម្រិតខ្ពស់ក្តី ក៏ប្រទេសឥណ្ឌាមិនធ្វើការបិទប្រទេសទាំងមូលដែរ ខណៈបណ្តារដ្ឋមួយចំនួនបានសម្រេចចិត្ត lockdown និងរាំងខ្ទប់ការធ្វើដំណើរមិនចាំបាច់ខ្លះៗប៉ុណ្ណោះ ។សម្រាប់យុទ្ធនាការការចាក់វ៉ាក់សាំងបង្ការ COVID-19 វិញ ឥណ្ឌាសម្រេចបាន ១៧៩លានដូសគិតត្រឹមថ្ងៃព្រហស្បតិ៍សប្តាហ៍នេះ ។ ដោយឡែកការធ្វើតេស្តរក COVID-19 នៅទូទាំងប្រទេសក៏កំពុងស្ថិតក្នុងភាពសកម្មផងដែរ ដោយគិតត្រឹមថ្ងៃព្រហស្បតិ៍សប្តាហ៍នេះ ប្រជាជនឥណ្ឌាសរុបជាង៣១១លាននាក់ហើយត្រូវបានធ្វើតេស្តរកជំងឺនេះ ក្នុងចំណោមប្រជាជនសរុបជាង១ពាន់៣រយលាននាក់ ៕ ប្រភព៖ CNA
-
លោក បូរីស ចនសុន បង្ហាញអារម្មណ៍ធុញថប់នឹងការកើនឡើងខ្លាំងករណីឆ្លងវីរុស Covid-19 បំប្លែងខ្លួនថ្មីឥណ្ឌានៅក្នុងចក្រភពអង់គ្លេស (មានវីដេអូ)
អង់គ្លេស៖ នាយករដ្ឋមន្រ្តីអង់គ្លេសលោក បូរីស ចនសុន និយាយថា រូបលោកមានអារម្មណ៍ធុញថប់ជាខ្លាំង ជុំវិញការកើនឡើងនៅក្នុងចក្រភពអង់គ្លេស ចំពោះករណីឆ្លងវីរុស Covid-19 បំប្លែងខ្លួនថ្មី B.1.617 ដែលរកឃើញដំបូងនៅឥណ្ឌា នៅមុនពេលបោះជំហានដ៏ធំបន្ទាប់ នោះគឺការបន្ធូរបន្ថយវិធានការណ៍បិទខ្ទប់ ។នាយករដ្ឋមន្រ្តីអង់គ្លេសរូបនេះបាននិយាយយ៉ាងដូច្នេះថា វាគឺជាវីរុសបំប្លែងខ្លួនថ្មីដ៏គួរអោយព្រួយបារម្ភ… យើងពិតជាធុញថប់នឹងវា… ។ នៅក្នុងការវាយតម្លៃចុងក្រោយបង្អស់របស់ខ្លួន ដែលត្រូវបានចេញផ្សាយកាលពីព្រហស្បតិ៍សប្តាហ៍នេះ សាកលវិទ្យាល័យ អ៊ឹមភើរៀ ទីក្រុងឡុង បានបញ្ជាក់ថា ករណីឆ្លងទូទៅបានធ្លាក់ចុះដល់កម្រិតទាបបំផុត ចាប់តាំងពីខែសីហា បន្ទាប់ពីមានការបិទខ្ទប់យ៉ាងតឹងរ៉ឹង និងការទទួលជោគជ័យចំពោះការចាក់វ៉ាក់សាំងបង្ការដល់ប្រជាជន ។ ទោះជាយ៉ាងណា ពួកគេក៏បានព្រមានដែរថា វីរុសកូវីដ១៩បំប្លែងខ្លួនថ្មីមកពីឥណ្ឌាគួរតែចាត់វិធានការណ៍ត្រួតពិនិត្យអោយបានដិតដល់បំផុត ។គួរបញ្ជាក់ថា ការសិក្សាថ្មីមួយដែលហៅថា រីក (REACT) រកឃើញថា វីរុសបំប្លែងខ្លួនថ្មី B.1.617 មកពីឥណ្ឌាដែលត្រូវបានគេចាត់ទុកថា ជា “ការព្រួយបារម្ភកម្រិតសកល” ពីព្រោះវាអាចចម្លងបានកាន់តែលឿនរហ័សនោះ ត្រូវបានគេរកឃើញរហូតដល់៧.៧ភាគរយនៅក្នុងចំណោមករណី១២ម៉ឺន៧ពាន់ករណី ដែលបានធ្វើតេស្តនៅចន្លោះថ្ងៃទី១៥ ខែមេសា និងថ្ងៃទី៣ ខែឧសភាកន្លងមកនេះ ៕ ប្រភព៖ CNA