អាមេរិក៖ ប្រធានាធិបតីអាមេរិក លោក ចូ បៃដិន នៅថ្ងៃអង្គារនេះបានប្រកាសពីគោលបំណងរបស់លោក ដោយចង់ឱ្យពលរដ្ឋអាមេរិកពេញវ័យ៧០ភាគរយទទួលបានការចាក់វ៉ាក់សាំងបង្ការជំងឺ COVID-19 យ៉ាងហោចដូសទី១ នៅមុនថ្ងៃទី៤ ខែកក្កដា ដែលជាថ្ងៃបុណ្យឯករាជ្យជាតិរបស់សហរដ្ឋអាមេរិក និងជម្រុញអោយយុវវ័យមានអាយុពី២០ឆ្នាំ និង៣០ឆ្នាំចូលរួមចាក់វ៉ាក់សាំង ។ជុំវិញការកំណត់គោលដៅខាងលើនេះ លោក បៃដិន បានថ្លែងប្រាប់អ្នកសារព័ត៌មាននៅឯសេតវិមានថា ឥឡូវយើងមានការផ្គត់ផ្គង់វ៉ាក់សាំងហើយ យើងនឹងផ្តោតលើការបញ្ចុះបញ្ចូលជនជាតិអាមេរិកឱ្យបង្ហាញខ្លួនច្រើនឡើង និង ទទួលវ៉ាក់សាំងដែលមានសម្រាប់ពួកគេ ។ ប្រធានាធិបតីអាមេរិករូបនេះបានសង្កត់ធ្ងន់ថា ប្រសិនបើយើងទទួលបានជោគជ័យក្នុងកិច្ចខិតខំប្រឹងប្រែងនេះ… ជនជាតិអាមេរិកនឹងបោះជំហានដ៏សំខាន់ឆ្ពោះទៅរកការវិលត្រឡប់ទៅរកប្រក្រតីភាពឡើងវិញ ។សូមជម្រាមថា ក្រុមហ៊ុនអាមេរិក Pfizer និងក្រុមហ៊ុនអាល្លឺម៉ង់ជាគូ BioNTech បានបញ្ជាក់កាលពីខែមីនាកន្លងទៅថា វ៉ាក់សាំងចាក់២ដូសរបស់ខ្លួនមានប្រសិទ្ធភាព ចំពោះមនុស្សមានអាយុពី១២ ដល់១៥ឆ្នាំ នៅក្នុងការធ្វើតេស្ដលើអ្នកស័្មគ្រចិត្ត២,២៦០នាក់ ។ ហើយគិតត្រឹមដើមសប្ដាហ៍នេះ ប្រជាជនអាមេរិកពេញវ័យ ៣១.៩ភាគរយបានចាក់វ៉ាក់សាំង២ដូស ឬគ្រប់ដូស និង៤៤.៨ភាគរយបានចាក់វ៉ាក់សាំងដូសទី១ ៕ ប្រភព៖ CNA

ថៃ៖ រដ្ឋាភិបាលថៃបានកំណត់គោលដៅបិទខ្ទប់ការរីករាលដាលនៃជំងឺ Covid-19 ឆ្លងកាត់សហគមន៍នៅក្នុងសង្កាត់ ក្លងតឺយ នៃទីក្រុងបាងកក ក្នុងរយៈពេល២សប្តាហ៍ និងដាក់ផែនការចាក់វ៉ាក់សាំងបង្ការជំងឺ Covid-19 ជូនប្រជាជនយ៉ាងហោចណាស់៥ម៉ឺននាក់ក្នុងចំណោមប្រជាជនទាំងអស់៩ម៉ឺននាក់នៅក្នុងសង្កាត់នេះ ។អាជ្ញាធរសុខាភិបាលថៃបានចាប់ផ្តើមយុទ្ធនាការមួយ នៅថ្ងៃអង្គារនេះ ដើម្បីចាក់វ៉ាក់សាំងការពារប្រជាជនចំនួន៥ម៉ឺននាក់រស់នៅក្នុងតំបន់មាត់ទន្លេ ដែលមានមនុស្សរស់នៅយ៉ាងច្រើនក្នុងទីក្រុងបាងកក ខណៈប្រទេសនេះកំពុងព្យាយាមទប់ទល់នឹងការឆ្លងវីរុស Covid-19 រលកថ្មី ។ អាជ្ញាធរថៃមានគោលបំណងចាក់វ៉ាក់សាំងប្រហែល៧០ភាគរយ ដល់ប្រជាជននៅសង្កាត់ ក្លងតឺយ ជាតំបន់ដែលមានប្រជាជនរស់នៅប្រមាណ៨ម៉ឺននាក់ បន្ទាប់ពីប្រជាជនជាង៣០០នាក់បានឆ្លងវីរុសកូវីដ១៩ នៅក្នុងការផ្ទុះរាលដាលចុងក្រោយបង្អស់ ដែលបានចាប់ផ្តើមនៅដើមខែមេសាកន្លងទៅ ។ស្របពេលជាមួយគ្នានេះដែរ អភិបាលក្រុងបាងកកលោក អាស្វីន ក្វាន់មួង បានគូសបញ្ជាក់ថា ការជំរុញចាក់ថ្នាំបង្ការជំងឺ Covid-19 នឹងមានរយៈពេលប្រហែល ២សប្តាហ៍ ហើយបុគ្គលិកសុខាភិបាលក៏មានបំណងធ្វើតេស្តមនុស្ស១ពាន់នាក់ក្នុងមួយថ្ងៃផងដែរ ៕ ប្រភព៖ Bangkok Post

កម្ពុជា៖ ចំនួនអ្នកឆ្លងជំងឺ COVID-19 នៅក្នុងប្រទេសសមាជិកអាស៊ាន បានកើនឡើងដល់៣លាន៤៧ម៉ឺន២ពាន់៣៤៣នាក់ហើយ ក្នុងនោះមានអ្នកស្លាប់ចំនួន ៦ម៉ឺន៩ពាន់២១នាក់ផងដែរ គិតត្រឹមម៉ោង៨ព្រឹកថ្ងៃទី០៥ ខែឧសភា ឆ្នាំ២០២១ នេះបើតាមទិន្នន័យគេហទំព័រតាមដានការរីករាលដាលជំងឺកូវីដ១៩ លើពិភពលោក Worldometer ។ ឥណ្ឌូនេស៊ី នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ក្នុងចំណោមសមាជិកអាស៊ាន បន្ទាប់មកប្រទេសប្រទេសហ្វីលីពិន និងប្រទេសម៉ាទ្បេស៊ី ។ខាងក្រោមនេះ ជារបាយការណ៍ នៃការឆ្លងរីករាលដាលជំងឺកូវីដ១៩ នៅក្នុងប្រទេសអាស៊ាន គិតត្រឹមព្រឹកថ្ងៃទី០៥ ខែឧសភា ឆ្នាំ២០២១៖ ឥណ្ឌូនេស៊ី ឆ្លងចំនួន១លាន៦៨ម៉ឺន៦ពាន់៣៧៣នាក់ (ស្លាប់៤ម៉ឺន៦ពាន់១៣៧នាក់) ហ្វីលីពីន ឆ្លងចំនួន ១លាន៦ម៉ឺន៧ពាន់៨៩២នាក់ (ស្លាប់ ១ម៉ឺន៧ពាន់៦២២នាក់) ម៉ាទ្បេស៊ី ឆ្លងចំនួន ៤២ម៉ឺន៦៣២នាក់ (ស្លាប់ ១ពាន់៥៧៤នាក់) មីយ៉ាន់ម៉ា ឆ្លងចំនួន ១៤ម៉ឺន២ពាន់៨៥៨នាក់ (ស្លាប់ ៣ពាន់២០៩នាក់) ថៃ ឆ្លងចំនួន ៧ម៉ឺន២ពាន់៧៨៨នាក់ (ស្លាប់ ៣០៣នាក់) សិង្ហបុរី ឆ្លងចំនួន ៦ម៉ឺន១ពាន់២៥២នាក់…