ម៉ិចស៊ីកូ៖ មនុស្សយ៉ាងតិច១៥នាក់បានបាត់បង់ជីវិត និងប្រហែល៧០នាក់ផ្សេងទៀតទទួលរងរបួស នៅពេលដែលផ្លូវរថភ្លើងនៅទីក្រុងម៉ិកស៊ីកូ បានបាក់ធ្លាក់ពីផ្លូវដ៏មមារញឹកមួយកន្លែង កាលពីយប់ថ្ងៃចន្ទដើមសប្តាហ៍នេះ (ម៉ោងក្នុងតំបន់) ។គ្រោះថ្នាក់ដ៏អាក្រក់ខាងលើនេះ បានកើតឡើងនៅស្ថានីយ៍ Olivos ដោយរូបថត និងវីដេអូពីកន្លែងកើតហេតុបានបង្ហាញពីរថភ្លើងដាំក្បាលចុះពីលើស្ពានអាកាសដែលបាក់ ហើយរថយន្តជាច្រើនគ្រឿងត្រូវជាប់នៅពីក្រោម ។ភ្លាមៗនោះ ការិយាល័យរដ្ឋាភិបាលក្នុងតំបន់ LOCATEL ដែលផ្តល់ជំនួយគ្រាអាសន្នបានគូសបញ្ជាក់ថា យើងបាននិងកំពុងបន្តធ្វើការ ដើម្បីផ្តល់ព័ត៌មានដល់សាច់ញាតិជនរងគ្រោះ និងស្វែងរកមូលហេតុពិតប្រាកដនៃគ្រោះថ្នាក់នេះ ៕ ប្រភព៖ Reuters

អាមេរិក៖ ក្រោយទទួលរងនូវការរិះគន់ទាក់ទិននឹងគោលនយោបាយអន្តោប្រវេសន៍នោះ ទីបំផុតប្រធានាធិបតីអាមេរិកលោក ចូ បៃដិន ប្រកាសថា ក្នុងឆ្នាំ២០២១នេះ លោកនឹងអនុញ្ញាតឱ្យជនអន្តោប្រវេសន៍៦ម៉ឺន២ពាន់៥រយនាក់ចូលមកក្នុងសហរដ្ឋអាមេរិក ។ប្រធានាធិបតីអាមេរិករូបនេះបាននិយាយនៅក្នុងសេចក្ដីថ្លែងការណ៍ថា នេះជាការលុបចោលជាប្រវត្តិសាស្ត្រនៃការទទួលយកជនអន្តោប្រវេសន៍ក្នុងចំនួនដ៏ទាបដែលបន្សល់ទុកដោយរដ្ឋបាលមុនត្រឹម១ម៉ឺន៥ពាន់នាក់ ដែលមិនបានឆ្លុះបញ្ចំាងពីតម្លៃរបស់សហរដ្ឋអាមេរិក ក្នុងនាមជាប្រជាជាតិមួយដែលស្វាគមន៍ និងគាំទ្រជនអន្តោប្រវេសន៍ឡើយ ។ជាមួយនឹងការប្រកាសកាលពីថ្ងៃចន្ទខាងលើនេះដែរ សេតវិមានរំពឹងថា អាចនឹងបន្សាបការរិះគន់នៅក្នុងចំណោមសមាជិកសភាមកពីគណបក្សប្រជាធិបតេយ្យ ហើយអាចរក្សាឯកភាពក្នុងបក្ស សំដៅជំរុញឱ្យមានការអនុម័តលើសំណើរកញ្ចប់ថវិកាសង្គម និងហេដ្ឋារចនាសម្ព័ន្ធមានទំហំរាប់ទ្រីលានដុល្លាររបស់លោក ចូ បៃដិន ដែលអះអាងថា មានភាពចាំបាច់ដើម្បីប្រជែងជាមួយចិន ៕ ប្រភព៖ CNA

អង់គ្លេស៖ ក្រុមប្រទេសប្រជាធិបតេយ្យទាំង៧នៅលោកខាងលិច មានគោលបំណងចងសម្ព័ន្ធមិត្តថ្មី សំដៅទប់ទល់នឹងការប្រកួតប្រជែងពីចិន និងរុស្ស៊ី ដោយមិនចាំបាច់ត្រូវប៉ែងជើងរដ្ឋាភិបាលក្រុងប៉េកាំងអោយដួល ហើយបន្តទំនាក់ទំនងកាន់តែមានស្ថិរភាពជាមួយវិមានក្រឹមឡាំង នេះបើតាមការបញ្ជាក់របស់អ្នកការទូតកំពូលរបស់អាមេរិក និងអង់គ្លេសនៅថ្ងៃចន្ទម្សិលមិញ ។រដ្ឋមន្រ្តីការបរទេសអាមេរិកលោក អាន់តូនី ប្លីនហ្កែន បានប្រាប់អ្នកសារព័ត៌មាននៅក្នុងសន្និសីទកាសែតមួយជាមួយសមភាគីអង់គ្លេសលោក ដូមីនិក រ៉ាអាប នៅមុនកិច្ចប្រជុំរដ្ឋមន្ត្រីការបរទេស G7 ជួបទល់មុខគ្នាផ្ទាល់ជាលើកដំបូងចាប់តាំងពីឆ្នាំ២០១៩ថា វាមិនមែនជាគោលបំណងរបស់យើង ក្នុងការព្យាយាមទប់ទល់នឹងប្រទេសចិន ឬប៉ែងជើងចិនឱ្យដួលនោះទេ ។ លោកបន្តថា លោកខាងលិចនឹងការពារសណ្តាប់ធ្នាប់អន្តរជាតិដែលផ្អែកលើច្បាប់ ពីការប៉ុនប៉ងរំលោភបំពានដោយប្រទេសណាមួយ រួមទាំងចិនផងដែរ ។ លោក រ៉ាអាប និយាយថា ខ្ញុំពិតជាមើលឃើញការកើនឡើងនូវតម្រូវការ និងភាពចាំបាច់សម្រាប់ក្រុមប្រទេសដែលមានចិត្តដូចគ្នា ចែករំលែកតម្លៃរួម និងចង់ការ ពារប្រព័ន្ធពហុភាគីនិយម ។ លោកបន្ថែមថា ទោះបីជាគ្មានសម្ព័ន្ធភាពទូលំទូលាយក៏ដោយ ក៏ G7 នៅតែមានកណ្តាប់ដៃរឹងមាំដដែល… បើរួមបញ្ចូលគ្នា វាធំជាងចិន ទាំងខាងសេដ្ឋកិច្ច និងយោធា ។សូមបញ្ជាក់ថា ក្រុមប្រទេស G7 នៅសប្តាហ៍នេះ នឹងពិភាក្សាអំពីចិន និងរុស្ស៊ី ក៏ដូចជាការប្រយុទ្ធប្រឆាំងនឹងជំងឺរាតត្បាតសកល Covid-19 និងល្បឿននៃប្រែប្រួលអាកាសធាតុ ៕…