នេប៉ាល់៖ មន្រ្តីជាន់ខ្ពស់នៃគណៈរដ្ឋមន្រ្តីនេប៉ាល់ពីររូបបាននិយាយថា រដ្ឋាភិបាលនេប៉ាល់នៅថ្ងៃអាទិត្យម្សិលមិញបានសម្រេចចិត្តផ្អាកជើងហោះហើរទាំងក្នុងស្រុក និងអន្តរជាតិទាំងអស់ជាមួយឥណ្ឌា អាហ្វ្រិកខាងត្បូង និងប្រេស៊ីល បន្ទាប់ពីប្រទេសទាំងនេះបានរាយការណ៍ពីករណីឆ្លងជំងឺ Covid-19 ដ៏ខ្ពស់ក្នុងរយៈពេលប៉ុន្មានថ្ងៃដូចគ្នាមកនេះ ។រដ្ឋមន្រ្តីក្រសួងសន្តិសុខសង្គម មុខរបរ និងការងារនេប៉ាល់លោក ហ្គោរី ហ្សានការ ឆូដហារី បានថ្លែងប្រាប់សារព័ត៌មានស៊ីនហួរនៅល្ងាចថ្ងៃអាទិត្យម្សិលមិញថា គណៈរដ្ឋមន្រ្តីបានសម្រេចចិត្តផ្អាកជើងហោះហើរទាំងអស់ទូទាំងប្រទេស ចាប់ពីពាក់កណ្តាលយប់ថ្ងៃចន្ទដើមសប្តាហ៍នេះ ខណៈដែលជើងហោះហើរអន្តរជាតិជាមួយប្រទេសឥណ្ឌា អាហ្វ្រិកខាងត្បូង និងប្រេស៊ីលក៏នឹងត្រូវផ្អាកជាបណ្តោះអាសន្នគិតចាប់ពីពាក់កណ្តាលយប់ថ្ងៃទី០៥ ខែឧសភានេះតទៅ ។ការសម្រេចចិត្តបែបនេះរបស់រដ្ឋាភិបាលនេប៉ាល់ បានកើតមានឡើងបន្ទាប់ពីក្រសួងសុខាភិបាលនេប៉ាល់កាលពីថ្ងៃអាទិត្យម្សិលមិញបានរាយការណ៍ពីការរកឃើញអ្នកឆ្លងជំងឺ Covid-19 ថ្មីៗចំនួន៧ពាន់២១១ករណីបន្ថែមទៀត ដែលនេះជាតួលេខឆ្លងប្រចាំថ្ងៃដ៏ខ្ពស់ថ្មីមួយ ចាប់តាំងពីវីរុសរាតត្បាតជាសកលដ៏កាចសាហាវមួយនេះបានវាយប្រហារប្រទេសនេប៉ាល់កាលពីដើមឆ្នាំមុន ៕ ប្រភព៖ ស៊ីនហួរ

ប៉ាគីស្ថាន៖ អាជ្ញាធរប៉ាគីស្ថាននឹងបិទខ្ទប់ការហូរចូល នៃក្រុមអ្នកថ្មើរជើងមកពីប្រទេសអាហ្វហ្គានីស្ថាន និងអ៊ីរ៉ង់ តាមរយៈការឆ្លងកាត់ច្រកព្រំដែនគោករយៈពេល២សប្តាហ៍ ដោយគិតចាប់ពីថ្ងៃទី០៥ ខែឧសភានេះតទៅ ដែលវាជាផ្នែកមួយនៃកិច្ចខិតខំប្រឹងប្រែងទប់ស្កាត់ការឆ្លងរីករាលដាលនៃវីរុសកូវីដ១៩ ។មជ្ឈមណ្ឌលបញ្ជា និងប្រតិបត្តិការជាតិរបស់ប្រទេសប៉ាគីស្ថាន (NCOC) បានអោយដឹងថា ការសម្រេចចិត្តខាងលើនេះ ត្រូវបានធ្វើឡើងក្នុងអំឡុងសម័យប្រជុំពិសេសមួយ ស្តីពីកិច្ចការគ្រប់គ្រងច្រកព្រំដែនគោករបស់មជ្ឈមណ្ឌល (NCOC) កាលពីថ្ងៃសៅរ៍ចុងសប្តាហ៍មុន ។គួរបញ្ជាក់ថា គោលនយោបាយគ្រប់គ្រងព្រំដែនគោកដែលត្រូវបានកែសម្រួលនេះ នឹងមានសុពលភាពចាប់ពីថ្ងៃទី០៥ ដល់ថ្ងៃទី២០ ខែឧសភាខាងមុខនេះ ហើយនឹងត្រូវអនុវត្តតែចំពោះអ្នកថ្មើរជើងចូល ដោយមិនប៉ះពាល់ដល់សកម្មភាពដឹកជញ្ជូនទំនិញ ឬពាណិជ្ជកម្មដែលមានស្រាប់នោះទេ ។ ចំនែកឯប្រជាជនប៉ាគីស្ថាននៅអាហ្វហ្គានីស្ថាន និងអ៊ីរ៉ង់ ក៏នឹងត្រូវបានអនុញ្ញាតអោយវិលត្រឡប់មកវិញផងដែរ ៕ ប្រភព៖ ស៊ីនហួរ

អូស្រ្តាលី៖ រដ្ឋមន្ត្រីការបរទេសអូស្ត្រាលីលោកស្រី ម៉ារីស ផេន (Marise Payne) បានចេញមុខបដិសេដការចោទប្រកាន់ដែលថា ការសម្រេចចិត្តរបស់រដ្ឋាភិបាលបាលអូស្ត្រាលី ជុំវិញការហាមឃាត់ជាបណ្ដោះអាសន្នលើអ្នកដំណើរមកពីឥណ្ឌាចូលក្នុងប្រទេសអូស្ត្រាលី គឺជាចេតនារើសអើងពូជសាសន៍ ។ប្រមុខការទូតអូស្រ្តាលីរូបនេះបានសង្កត់ធ្ងន់ថា ការសម្រេចចិត្តបែបនេះ គឺស្ថិតក្នុងគោលបំណងឆ្លើយតបនឹងការកើនឡើងករណីឆ្លងជំងឺកូវីដ១៩ ក្នុងចំណោមពលរដ្ឋអូស្ត្រាលីនៅតាមមណ្ឌលធ្វើចត្តាឡីស័ក បន្ទាប់ពីពួកគេធ្វើដំណើរមកពីឥណ្ឌា ។ ការអះអាងបែបនេះរបស់លោក ម៉ារីស ផេន បានកើតមានឡើងបន្ទាប់ពីរដ្ឋាភិបាលអូស្ត្រាលី កាលពីថ្ងៃសៅរ៍សប្តាហ៍មុនប្រកាសថា អ្នកទាំងឡាយណាដែលមកពីឥណ្ឌាអាចនឹងប្រឈមមុខនូវការពិន័យយ៉ាងធ្ងន់ធ្ងរ ឬ ជាប់ពន្ធនាគាររហូតដល់០៥ឆ្នាំ ប្រសិនបើពួកគេចូលមកក្នុងប្រទេសអូស្រ្តាលី អំឡុងការអនុវត្តបម្រាមធ្វើដំណើរនេះ ។សូមជម្រាបថា បម្រាមធ្វើដំណើរលើអ្នកដំណើរមកពីឥណ្ឌារបស់ប្រទេសអូស្រ្តាលី បានចាប់ផ្តើមចូលជាធរមាននៅថ្ងៃចន្ទដើមសប្តាហ៍នេះ ហើយអាចនឹងត្រូវពិចារណាឡើងវិញនៅថ្ងៃទី១៥ ខែឧសភា ឆ្នាំ២០២១ខាងមុខនេះ ៕ ប្រភព៖ ស៊ីនហួរ

ឥណ្ឌា៖ នាយករដ្ឋមន្ត្រីឥណ្ឌាលោក ណារិនដ្រា ម៉ូឌី បានចាញ់ក្នុងការបោះឆ្នោតដ៏កម្រនៅក្នុងរដ្ឋដ៏សំខាន់មួយ ដែលបង្ហាញឲ្យពីសញ្ញានៃអ្នកគាំទ្របានថយចុះជំនឿរបស់ពួកគេលើភាពដឹកនាំរបស់លោក ក្នុងការគ្រប់គ្រងជំងឺកូវីដ១៩ដែលបានកំពុងឆ្លងរាតត្បាតប្រទេសមួយនេះយ៉ាងធ្ងន់ធ្ងរបំផុត ។លោក ណារិនដ្រា ម៉ូឌី ត្រូវបានគេរំពឹងថា នឹងទទួលបានសំឡេងគាំទ្រច្រើនសន្ធឹកសន្ធាប់កាលពីថ្ងៃអាទិត្យម្សិលមិញ នៅរដ្ឋ West Bengal ដែលជារដ្ឋដ៏សំខាន់មួយ ក្នុងចំណោមរដ្ឋសំខាន់ៗមួយចំនួនតូចសម្រាប់គណបក្ស Bharatiya Janata (BJP) របស់លោកដែលកំពុងកាន់អំណាច ។ ផ្ទុយទៅវិញ លោកស្រី Mamata Banerjee ជាអ្នកនយោបាយលេចធ្លោម្នាក់ និងជាអ្នករិះគន់ដ៏ខ្លាំងៗលើលោក ម៉ូឌី បានឈ្នះអាណត្តិទី៣ជារដ្ឋមន្ត្រីនៃគណៈរដ្ឋមន្ត្រីប្រចាំរដ្ឋនេះ ។ លទ្ធផលនៅរដ្ឋ West Bengal បង្ហាញថា លោកស្រី Banerjee បានឈ្នះដាច់តែម្តងគឺទទួលបាន២១៦កៅអី ក្នុងចំណោមកៅអីសរុប២៩៤ ។គួរបញ្ជាក់ថា ការបរាជ័យរបស់លោក ម៉ូឌី ខាងលើនេះ ត្រូវបានគេជឿជាក់ថា បណ្តាលមកពីចំណាត់ការធូររលុងក្នុងការទប់សស្កាត់ជំងឺកូវីដ១៩ ដែលរយៈពេលពីរសប្តាហ៍ចុងក្រោយនេះផ្ទុះឡើងខ្លាំងបំផុត។ ក្រៅពីនេះ ប្រជាជនក៏ប្រហែលជាមិនពេញចិត្តនឹងនយោបាយប្រឆាំងនឹងមូស្លីម ដែលបែកបាក់គ្នារបស់គណបក្ស BJP នៅក្នុងរដ្ឋ Bengal ៕ ប្រភព៖ Reuters