អាមេរិក៖ ទីប្រឹក្សាជាន់ខ្ពស់សេតវិមាន លោក អេនឌី ស្លាវីត (Andy Slavitt) បានបង្ហោះសារនៅលើ Twitter នៅថ្ងៃចន្ទនេះថា សហរដ្ឋអាមេរិកនឹងនាំចេញវ៉ាក់សាំងរបស់ក្រុមហ៊ុន អាស្រ្តាហ្សេណេកា (AstraZeneca) ចំនួន៦០លានដូសទៅក្រៅប្រទេស ក្រោយរងការរិះគន់ជាច្រើនថា រដ្ឋបាលលោក ចូ បៃដិន ប្រមូលទិញវ៉ាក់សាំងស្ដុកទុក ខណៈបណ្ដាប្រទេសដទៃកំពុងខ្វះខាតវ៉ាក់សាំង ។ស្របពេលជាមួយគ្នានោះដែរ ទីប្រឹក្សាជាន់ខ្ពស់សេតវិមានរូបនេះមិនបានបញ្ជាក់លម្អិតថាតើមានវ៉ាក់សាំងចំនួនប៉ុន្មានត្រៀមរួចរាល់សម្រាប់ការនាំចេញ ឬក៏ថាតើវ៉ាក់សាំងទាំងនេះនឹងត្រូវបញ្ជូនទៅទីណានោះទេ ដោយគ្រាន់តែលោកឱ្យដឹងថាក្នុងពេលបច្ចុប្បន្នវ៉ាក់សាំងនៅមានចំនួនតិចតួចនៅឡើយ ។ប៉ុន្តែប្រធានាធិបតីអាមេរិកលោក ចូ បៃដិន បានជួបសន្ទនាតាមទូរស័ព្ទជាមួយនាយករដ្ឋមន្ត្រីឥណ្ឌា លោក ណារិនដ្រា ម៉ូឌី នៅថ្ងៃចន្ទសប្ដាហ៍នេះ ដោយនៅក្នុងកិច្ចសន្ទនានោះ លោក បៃដិន បានសន្យាថា នឹងផ្ដល់ជំនួយសម្រាប់ប្រជាជនឥណ្ឌាដែលកំពុងប្រឈមមុខនឹងស្ថានការណ៍ដ៏អាក្រក់នៃជំងឺ COVID-19 ៕ ប្រភព៖ CNA

ប៊ែលហ្ស៊ិក៖ សហភាពអ៊ឺរ៉ុបនៅថ្ងៃចន្ទនេះបញ្ជាក់ថា ខ្លួនបានចាត់វិធានការតាមច្បាប់ប្រឆាំងនឹងក្រុមហ៊ុនផលិតឱសថ អាស្រ្តាហ្សេណេកា (AstraZeneca) ជុំវិញបញ្ហាកង្វះការផ្តល់វ៉ាក់សាំងបង្ការជំងឺ COVID-19 ដែលបានរារាំងដល់កិច្ចខិតខំប្រឹងប្រែងចាក់វ៉ាក់សាំងនៅទូទាំងប្លុកមួយនេះ ។អ្នកនាំពាក្យសហភាពអឺរ៉ុបលោក Stefan De Keersmaecker បានបញ្ជាក់ថា កាលពីថ្ងៃសុក្រសប្តាហ៍មុន គណៈកម្មការចាប់ផ្តើមចាត់វិធានការតាមផ្លូវច្បាប់ប្រឆាំងក្រុមហ៊ុន អាស្រ្តាហ្សេណេកា ដោយឈរលើមូលដ្ឋាននៃការរំលោភលើកិច្ចព្រមព្រៀងទិញកម្រិតខ្ពស់ ។ ជាការឆ្លើយតបវិញនោះ ក្រុមហ៊ុនអង់គ្លេស-ស៊ុយអែត អាស្រ្តាហ្សេណេកា បានច្រានចោលចំពោះវិធានការច្បាប់នេះ ដោយបានពិពណ៌នាថា «គ្មានមូលដ្ឋាន» ។ បន្ថែមលើនេះ ក្រុមហ៊ុន អាស្រ្តាហ្សេណេកា បានបញ្ជាក់នៅក្នុងសេចក្តីថ្លែងការណ៍របស់ខ្លួនថា ក្រុមហ៊ុនខ្លួនបានអនុវត្តយ៉ាងពេញលេញជាមួយនឹងកិច្ចព្រមព្រៀងស្តីពីការទិញទុកជាមុនជាមួយគណៈកម្មការអឺរ៉ុប ហើយយើងនឹងការពារខ្លួនយ៉ាងរឹងមាំនៅក្នុងតុលាការ ។សូមបញ្ជាក់ផងដែរថា គណៈកម្មការអឺរ៉ុប និងក្រុមហ៊ុនអង់គ្លេស-ស៊ុយអែត អាស្រ្តាហ្សេណេកា បានឈានដល់ជម្លោះមួយ ពាក់ព័ន្ធនឹងកង្វះខាតការផ្គត់ផ្គង់ដ៏ច្រើន ដែលរារាំងដល់កិច្ចប្រឹងប្រែងនៅដំណាក់កាលដំបូងនៃប្លុកនេះ ក្នុងការចាប់ផ្តើមយុទ្ធនាការចាក់វ៉ាក់សាំងបង្ការជំងឺ Covid-19 របស់ខ្លួន ៕ ប្រភព៖ CNA