មីយ៉ាន់ម៉ា៖ ប្រជាជាតិអាស៊ីអាគ្នេយ៍ហៅកាត់ថា អាស៊ាន នឹងធ្វើការពិភាក្សាស្តីពីវិបត្តិក្នុងប្រទេសមីយ៉ាន់ម៉ា ក្នុងអំឡុងកិច្ចប្រជុំកំពូលនៅទីក្រុងហ្សាកាតា ប្រទេសឥណ្ឌូណេស៊ី នៅថ្ងៃសៅរ៍ចុងសប្តាហ៍នេះ ប៉ុន្តែប្រទេសសមាជិកមួយចំនួនបានសម្រេចចិត្តបញ្ជូនមន្រ្តីជាន់ខ្ពស់ មកជំនួសប្រមុខដឹកនាំរដ្ឋាភិបាល ។សមាជិកចំនួន១០ប្រទេសនៃសមាគមប្រជាជាតិអាស៊ីអាគ្នេយ៍ (អាស៊ាន) បានព្យាយាមដឹកនាំមីយ៉ាន់ម៉ាដែលជាសមាជិក ចេញពីភាពវឹកវរបង្ហូរឈាមដែលបង្កឡើងដោយការផ្តួលរំលំរបស់របបដឹកនាំយោធាទៅលើរដ្ឋាភិបាលជាប់ឆ្នោតរបស់លោកស្រី អោង សាន ស៊ូជី កាលពីថ្ងៃទី០១ ខែកុម្ភៈ ។ ប៉ុន្តែគោលការណ៍នៃការមូលមតិគ្នា និងការមិនជ្រៀតជ្រែករបស់ក្រុមនេះ បានរឹតត្បិតសមត្ថភាពរបស់ខ្លួន ក្នុងការយកឈ្នះលើទស្សនៈផ្ទុយគ្នារបស់សមាជិក ស្តីពីវិធីដើម្បីឆ្លើយតបទៅនឹងការសម្លាប់ជីវិតជនស៊ីវិលរាប់រយនាក់ពីសំណាក់កងទ័ពមីយ៉ាន់ម៉ា ។បើតាមរដ្ឋមន្រ្តីការបរទេសម៉ាឡេស៊ីលោក ហ៊ីហ្សាមម៊ូឌីន ហ៊ូសិន បញ្ជាក់ថា នាយករដ្ឋមន្រ្តីម៉ាឡេស៊ីលោក ម៊ូហ៊ីយីដឌីន យ៉ាសិន នឹងចូលរួមក្នុងកិច្ចប្រជុំកំពូលខាងលើនេះ ហើយបានប្រាប់អ្នកយកព័ត៌មានថា យើងសង្ឃឹមថា តាមរយៈកិច្ចប្រជុំនៅទីក្រុងហ្សាកាតា នាពេលឆាប់ៗនេះ មីយ៉ាន់ម៉ានឹងយល់ព្រមទទួលយកអ្នកតំណាងមកពីប្រធានអាស៊ាន ប្រ៊ុយណេ ឬលេខាធិការអាស៊ាននៅហ្សាកាតា ដើម្បីស៊ើបអង្កេត និងជួយមីយ៉ាន់ម៉ាវិលត្រឡប់មករកក្រក្រតីភាពឡើងវិញ ៕ ប្រភព៖ Reuters

អាមេរិក៖ ប្រធានាធិបតីអាមេរិក លោក ចូ បៃដិន នៅថ្ងៃអង្គារនេះ បានហៅសាលក្រមសម្រេចឱ្យអតីតប៉ូលិសទីក្រុង មីនៀប៉ូលិស លោក ឌើរិក ឆូវីន (Derek Chauvin) ជាប់ពិរុទ្ធពីបទមនុស្សឃាតលើបុរសស្បែកខ្មៅ ចច ហ្លយ (George Floyd) គឺជាការបោះជំហានមួយដ៏ធំឆ្ពោះទៅរកយុត្តិធម៌ក្នុងសហរដ្ឋអាមេរិក ។លោក ឌើរិក ឆូវីន ត្រូវបានតុលាការរកឃើញថា ពិតជាបានប្រព្រឹត្តបទឧក្រិដ្ឋ ពាក់ព័ន្ធនឹងការយកជង្គង់សង្កត់ក ចច ហ្លយ រយៈពេលជាង៩នាទីរហូតដល់បុរសស្បែកខ្មៅរូបនេះដាច់ខ្យល់ស្លាប់ កំឡុងការឃាត់ខ្លួនមួយកាលពីខែឧសភា ឆ្នាំ២០២០ ដែលធ្វើឱ្យមានការតវ៉ានៅទូទាំងពិភពលោកប្រឆាំងនឹងអំពើឃោរឃៅរបស់ប៉ូលិស និងការរើសអើងពូសាសន៍ ។គណៈវិនិច្ឆយមានសមាជិក១២រូប នៅថ្ងៃអង្គារនេះ (ម៉ោងក្នុងតំបន់) រកឃើញថាលោក ឌើរិក ឆូវីន មានអាយុ៤៥ឆ្នាំពិតជាមានពិរុទ្ធលើបទចោទប្រកាន់ទាំងបី ក្នុងនោះរួមមានបទមនុស្សឃាតកម្រិតទី២ បទមនុស្សឃាតកម្រិតទី៣ និងបទមនុស្សឃាត ។ តែ លោក ឆូវីន នឹងត្រូវជាប់ឃុំរហូតដល់ត្រូវបានផ្ដន្ទាទោសជាផ្លូវការ ដែលអាចអោយរូបលោកជាប់ពន្ធនាគាររាប់សិបឆ្នាំ ៕ ប្រភព៖ CNA