អាមេរិក៖ រដ្ឋមន្ត្រីការបរទេសអាមេរិកលោក អាន់ថូនី ប្លីនខិន បញ្ជាក់ថា ប្រទេសរបស់លោកនឹងដាក់សម្ពាធដល់គ្រប់ប្រទេសទាំងអស់ ឱ្យកាត់បន្ថយការពឹងផ្អែកលើធ្យូងថ្ម ដែលនេះជាការប្រឈមមុខជាក់ស្តែងជាមួយចិន ខណៈលោកប្តេជ្ញាធ្វើឱ្យសហរដ្ឋអាមេរិកក្លាយជាអ្នកដឹកនាំដ៏អស្ចារ្យបំផុតខាងអាកាសធាតុ ។ ប្រមុខការទូតអាមេរិករូបនេះ បានថ្លែងនៅក្នុងសុន្ទរកថាមួយនៅឯទីក្រុង អានណាប៉ូលិស រដ្ឋម៉ារីលែន ថា វាពិបាកក្នុងការស្រមៃឃើញសហរដ្ឋអាមេរិកឈ្នះការប្រកួតប្រជែងយុទ្ធសាស្ត្ររយៈពេលវែងជាមួយចិន ប្រសិនបើយើងមិនអាចដឹកនាំបដិវត្តន៍ថាមពលកកើតឡើងវិញបានទេនោះ ហើយថា ឥឡូវនេះ យើងកំពុងដើរក្រោយគេហើយ ។ ដោយចាត់ទុកបញ្ហាប្រែប្រួលអាកាសធាតុជាបញ្ហាសន្តិសុខជាតិនោះ លោក ប្លីនខិន បានព្រមានពីផលប៉ះពាល់ធំៗនៅជុំវិញភពផែនដី និងហានិភ័យដល់សហរដ្ឋអាមេរិក ប្រសិនបើខ្លួនមិនបង្កើនការខិតខំរបស់ខ្លួនទេនោះ ។ សូមបញ្ជាក់ថា លោក ប្លីនខិន បានចាប់ផ្តើមការទូតអាកាសធាតុដ៏ខ្លាំងក្លាពេញមួយសប្តាហ៍ ដែលដាក់ចេញដោយប្រធានាធិបតីអាមេរិកលោក ចូ បៃដិន ដោយបានអញ្ជើញមេដឹកនាំពិភពលោកចំនួន៤០នាក់ចូលរួមក្នុងកិច្ចប្រជុំកំពូលតាមអនឡាញមួយនៅថ្ងៃព្រហស្បតិ៍ និងថ្ងៃសុក្រ ស្ថិតក្នុងគោលបំណងលើកកម្ពស់មហិច្ឆតារបស់ពិភពលោកស្តីពីអាកាសធាតុ ៕ ប្រភព៖ CNA

ប៊ែលហ្ស៊ិក៖ សហភាពអឺរ៉ុប នៅថ្ងៃចន្ទនេះ បានដាក់ទណ្ឌកម្មលើមន្រ្តីយោធាមីយ៉ាន់ម៉ាចំនួន១០រូប និងក្រុមហ៊ុនធំៗចំនួនពីរ ដែលជាប់ពាក់ព័ន្ធនឹងការធ្វើរដ្ឋប្រហារ ព្រមទាំងការបង្ក្រាបដ៏ឃោរឃៅប្រឆាំងនឹងក្រុមបាតុករអហិង្សា ។ ក្រុមអ្នកការទូតអឺរ៉ុបបាននិយាយថា ក្រុមមន្ត្រីដែលរងទណ្ឌកម្ម គឺភាគច្រើនជាសមាជិកក្រុមប្រឹក្សារដ្ឋដែលកំពុងកាន់អំណាច ដែលត្រូវបានគេមើលឃើញថា ជាអ្នកទទួលខុសត្រូវចំពោះការធ្វើឱ្យប៉ះពាល់ដល់លទ្ធិប្រជាធិបតេយ្យនៅក្នុងប្រទេសអាស៊ីអាគ្នេយ៍មួយនេះ ។ ដោយឡែកក្រុមហ៊ុនទាំងពីរដែលទទួលរងការដាក់ទណ្ឌកម្ម ដោយការបង្កកទ្រព្យសម្បត្តិ និងការហាមឃាត់ទិដ្ឋការ គឺសាជីវកម្មសេដ្ឋកិច្ចមីយ៉ាន់ម៉ា (MEC) និងក្រុមហ៊ុនសេដ្ឋកិច្ចមីយ៉ាន់ម៉ា (MEHL) ដែលគ្រប់គ្រងលើវិស័យជាច្រើន រួមមានទាំងវិស័យពាណិជ្ជកម្ម គ្រឿងស្រវឹង បារី និងទំនិញប្រើប្រាស់ ។ គួរបញ្ជាក់ផងដែរថា វិធានការណ៍ខាងលើនេះ នឹងចូលជាធរមាន នៅពេលត្រូវបានចុះផ្សាយនៅក្នុងទិនានុប្បវត្តិផ្លូវការរបស់សហភាពអឺរ៉ុប ខណៈដែលមហាអំណាចលោកខាងលិចកំពុងព្យាយាមបង្កើនសម្ពាធលើរបបដឹកនាំថ្មីរបស់មីយ៉ាន់ម៉ា ដោយផ្តោតលើប្រភពសេដ្ឋកិច្ចសំខាន់ៗរបស់ពួកគេ ៕ ប្រភព៖ CNA