អាមេរិក៖ ប្រធានាធិបតីអាមេរិកលោក ចូ បៃដិន បានស្វាគមន៍នាយករដ្ឋមន្រ្តីជប៉ុន ក្នុងនាមជាភ្ញៀវជាន់ខ្ពស់ដំបូងរបស់លោក ដោយសន្យាថា នឹងបង្កើនការរួបរួមគ្នានៅចំពោះមុខការកើនឡើងភាពតានតឹងជាមួយចិន ក៏ដូចជាពង្រឹងកិច្ចសហប្រតិបត្តិការលើបច្ចេកវិទ្យា 5G និងបញ្ហាប្រែប្រួលអាកាសធាតុ ។ ដោយរង់ចាំជិត៣ខែសម្រាប់កិច្ចប្រជុំកំពូលលើកដំបូងរបស់ខ្លួន ដោយសារតែជំងឺរាតត្បាត Covid-19 នោះ លោក បៃដិន បានប្រាប់នាយករដ្ឋមន្រ្តីជប៉ុនលោក យ៉ូស៊ីហ៊ីដេ ស៊ូហ្គា ថា ជប៉ុនគឺជាសម្ព័ន្ធដែកថែបរបស់យើង ពាក់ព័ន្ធនឹងបញ្ហាសន្តិសុខ និងលើសពីនេះទៅទៀត ។ លោក បៃដិន បានថ្លែងក្នុងសន្និសិទសារព័ត៌ មានរួមគ្នានៅឯសេតវិមានថា យើងប្តេជ្ញាធ្វើការងាររួមគ្នា ដើម្បីប្រកួតប្រជែងជាមួយចិន ហើយក្នុងនោះក៏រួមមានទាំងបញ្ហាសមុទ្រចិនខាងកើត សមុទ្រចិនខាងត្បូង និងកម្មវិធីនុយក្លេអ៊ែររបស់កូរ៉េខាងជើងផងដែរ ។ ជាមួយគ្នានេះ លោក ស៊ូហ្គា បាននិយាយថា លោក និងលោក បៃដិន ក៏បានបញ្ជាក់ជាថ្មីពីសារៈសំខាន់នៃសន្តិភាព និងស្ថិរភាពនៃច្រកសមុទ្រតៃវ៉ាន់ផងដែរ ដែលជាបញ្ហាដ៏រសើប ជាពិសេសសម្រាប់ប្រទេសចិនដែលទាមទារលទ្ធិប្រជាធិបតេយ្យគ្រប់គ្រងដោយខ្លួនឯង ហើយថ្មីៗនេះបានបង្កើនការជ្រៀតចូលនៃប្រព័ន្ធការពារដែនអាកាសរបស់កោះនេះ ៕ ប្រភព៖ CNA

អាមេរិក៖ រដ្ឋាភិបាលទីក្រុងម៉ូស្គូបានធ្វើការឆ្លើយតបនឹងទណ្ឌកម្មរបស់សហរដ្ឋអាមេរិក តាមរយៈការបណ្តេញមន្ត្រីទូតអាមេរិក១០រូបចេញពីរុស្ស៊ី និងហាមឃាត់មន្ត្រីជាន់ខ្ពស់របស់រដ្ឋបាលលោក ចូ បៃដិន មិនឲ្យជាន់ទឹកដីរុស្ស៊ីថែមទៀត ។ ឆ្លើយតបនឹងបញ្ហាខាងលើនេះ ក្រសួងការបរទេសអាមេរិកនៅថ្ងៃសុក្រនេះបានបញ្ជាក់នៅក្នុងសេចក្តីថ្លែងការណ៍ថា សកម្មភាពថ្មីៗរបស់យើង គឺមានភាពសមាមាត្រ និងសមស្របទៅនឹងសកម្មភាពបង្កគ្រោះថ្នាក់ដោយរុស្ស៊ី ។ វាមិនមែនជាផលប្រយោជន៍សម្រាប់យើង ដែលត្រូវចូលរួមក្នុងការបង្កើនបញ្ហាវិលជុំនេះឡើយ ប៉ុន្តែយើងរក្សាសិទ្ធិក្នុងការឆ្លើយតប ចំពោះការសងសឹកណាមួយប្រឆាំងនឹងអាមេរិក ។ សូមជម្រាបថា រដ្ឋាភិបាលទីក្រុងម៉ូស្គូបានប្រកាសហាមមន្ត្រីជាន់ខ្ពស់អាមេរិកមិនឲ្យចូលមកក្នុងទឹកដីរុស្ស៊ី ដែលការសម្រេចនេះធ្វើឡើងបន្ទាប់ពីរុស្ស៊ីបានសម្រេចបណ្តេញមន្ត្រីទូតអាមេរិក១០រូប ។ ការបណ្តេញមន្ត្រីទូតអាមេរិក គឺជាឆ្លើយតបទៅនឹងទណ្ឌកម្មនៅថ្ងៃសុក្រសប្តាហ៍នេះ ដោយទីក្រុងវ៉ាស៊ីនតោនដែលបានសម្រេចដាក់ទណ្ឌកម្មលើអង្គភាពជាច្រើននៅរុស្ស៊ី និងបណ្តាញមន្ត្រីទូតរុស្ស៊ី១០រូបចេញពីទឹកដីសហរដ្ឋអាមេរិក ៕ ប្រភព៖ AFP