ហ្វីលីពីន៖ មន្រ្តីយោធាជាន់ខ្ពស់ហ្វីលីពីននិយាយថា កងទាហានហ្វីលីពីន និង អាមេរិកនឹងចាប់ផ្តើមធ្វើសមយុទ្ធយោធារួមគ្នារយៈពេល២សប្តាហ៍ ដែលមានឈ្មោះថា បាលីកា (Balikatan) ដោយចាប់ផ្តើមពីថ្ងៃចន្ទដើមសប្តាហ៍នេះ ក្រោយលុបចោលព្រឹត្តិការណ៍ហ្វឹកហ្វាត់ប្រចាំឆ្នាំរួមគ្នានេះកាលពីឆ្នាំមុន ដោយសារការឆ្លងរាលដាលជំងឺកូវីដ១៩ ។ ឧត្តមសេនីយ៍ឯកលោក ស៊ីរីលីតូ សូបេចាណា (Cirilito Sobejana) បានគូសបញ្ជាក់ថា មានតែទាហានចំនួន១ពាន់៧រយនាក់ប៉ុណ្ណោះដែលនឹងចូលរួម ដោយមកពីភាគីសហរដ្ឋអាមេរិកចំនួន៧រយនាក់ និងហ្វីលីពីន១ពាន់នាក់ គឺមិនដូចសមយុទ្ធមុនៗដែលមានកងទ័ពចូលរួមរហូតដល់៧ពាន់៦រយនាក់ ។ ការប្រកាសពីការធ្វើសមយុទ្ធយោធាខាងលើនេះ ធ្វើឡើងបន្ទាប់ពីលេខាធិការការពារជាតិរបស់ប្រទេសទាំងពីរ បានធ្វើកិច្ចសន្ទនាតាមទូរស័ព្ទ ដើម្បីពិភាក្សាអំពីសមយុទ្ធនេះ និង ស្ថានការណ៍នៅសមុទ្រចិនខាងត្បូង ព្រមទាំងការវិវឌ្ឍន៍សន្តិសុខក្នុងតំបន់នាពេលថ្មីៗនេះ ៕ ប្រភព៖ CNA

ប៊ែលហ្ស៊ិក៖ អ្នកការទូតជាន់ខ្ពស់របស់សហភាពអឺរ៉ុបនិយាយថា រុស្ស៊ី និងចិនកំពុងរារាំងការឆ្លើយតបជាលក្ខណៈអន្តរជាតិ ចំពោះការធ្វើរដ្ឋប្រហារយោធារបស់ប្រទេសមីយ៉ាន់ម៉ា ហើយថា សហភាពអឺរ៉ុបអាចនឹងផ្តល់នូវការលើកទឹកចិត្តផ្នែកសេដ្ឋកិច្ចបន្ថែមទៀត ប្រសិនបើប្រទេសមួយនេះវិលត្រឡប់ទៅរកលទ្ធិប្រជាធិបតេយ្យវិញ ។ ប្រធានគោលនយោបាយការបរទេសរបស់សហភាពអឺរ៉ុប លោក ចូសិព បូរ៉ែល (Josep Borrell) បានបង្ហោះសារលើបណ្តាញសង្គមថា វាមិនមានអ្វីភ្ញាក់ផ្អើលទេដែលប្រទេសរុស្ស៊ី និងចិនកំពុងរារាំងការប៉ុនប៉ងរបស់ក្រុមប្រឹក្សាសន្តិសុខអង្គការសហប្រជាជាតិ ឧទាហរណ៍ដូចជាដាក់ទណ្ឌកម្មការហាមឃាត់អាវុធ ។ លោក បូរ៉ែល ដែលថ្លែងក្នុងនាមប្រទេសទាំង២៧ជាសមាជិករបស់សហភាពអឺរ៉ុបថា ការប្រកួតប្រជែងផ្នែកភូមិសាស្ត្រនយោបាយនៅក្នុងប្រទេសមីយ៉ាន់ម៉ា នឹងធ្វើឱ្យមានការលំបាកក្នុងការស្វែងរកមូលដ្ឋានរួម… ប៉ុន្តែយើងមានកាតព្វកិច្ចដើម្បីព្យាយាមធ្វើវា ។ លោក បូរ៉ែល បន្ថែមថា កងកម្លាំងសន្តិសុខបានសម្លាប់ក្រុមបាតុករដែលគ្មានអាវុធច្រើនជាង៧០០នាក់ ក្នុងនោះមានកុមារ៤៦នាក់ នៅក្នុងការបង្ក្រាបដ៏បង្ហូរឈាមចាប់តាំងពីយោធាបានដណ្តើមអំណាចពីរដ្ឋាភិបាលជាប់ឆ្នោតរបស់លោកស្រី អោង សាន ស៊ូជី នៅក្នុងរដ្ឋប្រហារថ្ងៃទី១ ខែកុម្ភៈ ហើយថា ពិភពលោកមើលឃើញដោយភាពភ័យរន្ធត់ នៅពេលដែលកងទ័ពប្រើអំពើហិង្សាទៅលើប្រជាជនរបស់ខ្លួន ។សូមបញ្ជាក់ថា ចិន និងរុស្ស៊ីមានទំនាក់ទំនងជាមួយកងកម្លាំងប្រដាប់អាវុធប្រទេសមីយ៉ាន់ម៉ា ដោយប្រទេសទាំងពីរជាអ្នកផ្គត់ផ្គង់អាវុធធំជាងគេ និង លំដាប់ទី២ដល់ប្រទេសនៅតំបន់អាស៊ីអាគ្នេយ៍មួយនេះ ៕ ប្រភព៖ Reuters

ឥណ្ឌូណេស៊ី៖ ប្រធានាធិបតីឥណ្ឌូណេស៊ីលោក ចូកូ វីដូដូ (Joko Widodo) បានបញ្ជាអោយមានការខិតខំប្រឹងប្រែងជួយសង្គ្រោះ និងជួយសង្គ្រោះភ្លាមៗ បន្ទាប់ពីមានមនុស្ស៨នាក់បានស្លាប់ និងជាច្រើននាក់ទៀតរងរបួសនៅក្នុងហេតុការណ៍គ្រោះរញ្ជួយដីមួយបានវាយប្រហារនៅកោះជ្វាភាគខាងត្បូង ។ លោក ចូកូ វីដូដូ បានថ្លែងតាមរយៈប្រព័ន្ធផ្សព្វផ្សាយថា ខ្ញុំបានចេញបញ្ជាភ្លាមៗ អោយមានការឆ្លើយតបជាបន្ទាន់ ដើម្បីធ្វើការស្រាវជ្រាវ និងស្វែងរកជនរងគ្រោះដែលជាប់ក្រោមផ្ទាំងថ្មដែលបាក់រលំ និងជួយព្យាបាលដល់អ្នកដែលរងរបួស ។ គ្រោះរញ្ជួយដីក្នុងកម្រិត៥,៩រ៉ិកទ័របានវាយប្រហារកោះជ្វារបស់ប្រទេសឥណ្ឌូនេស៊ីកាលពីថ្ងៃសៅរ៍សប្តាហ៍មុននេះ (ម៉ោងក្នុងតំបន់) ដោយបានបំផ្លាញអាគាររាប់រយកន្លែងនៅក្នុងទីក្រុងជាច្រើន ។ គ្រោះរញ្ជួយដីនេះ បានបង្កការញ័ររញ្ជួយនៅម៉ោង២រសៀល ធ្វើអោយកក្រើកទូទាំងខេត្តជ្វាខាងកើត ដែលមានមនុស្ស៤០,៧លាននាក់រស់នៅ និងបណ្តាខេត្តជុំវិញ រួមទាំងកោះបាលីផងដែរ ។ សូមជម្រាបផងដែរថា ឥណ្ឌូណេស៊ីជាប្រទេសមួយដែលស្ថិតនៅលើតំបន់ខ្សែ ក្រវាត់ភ្លើង (Ring of fire) នៃមហាសមុទ្រប៉ាស៊ីហ្វិក ដូច្នេះប្រទេសអាស៊ានមួយនេះ តែងតែរងការវាយប្រហារជាញឹកញាប់ ដោយគ្រោះរញ្ជួយដី និងបន្ទុះភ្នំភ្លើងជាដើម ។ ហេតុដូច្នេះហើយ ប្រធានាធិបតីឥណ្ឌូណេស៊ីបានណែនាំអោយប្រជាជនខ្លួនគួរតែមានការប្រុងប្រៀបខ្លួនជានិច្ច ចំពោះការវាយប្រហារពីគ្រោះមហន្តរាយធម្មជាតិ ៕ ប្រភព៖ CNA