អាមេរិក៖ សេតវិមានបានបញ្ជាក់នៅក្នុងសេចក្តីថ្លែងការណ៍មួយថា ប្រធានាធិបតីអាមេរិកលោក ចូ បៃដិន បានបង្ហាញការខូចចិត្តជាខ្លាំង ដែលមន្រ្តីប៉ូលិសអាមេរិកម្នាក់បានស្លាប់ និងម្នាក់ទៀតរងរបួស បន្ទាប់ពីជនសង្ស័យម្នាក់បានបើករថយន្តមួយគ្រឿង សំដៅទៅរកក្រុមប៉ូលិសយាមនៅខាងមុខទីធ្លាវិមានសភា នៅថ្ងៃសុក្រសប្ដាហ៍នេះ និងបានប្រើប្រាស់កាំបិតដើម្បីបើកការវាយប្រហារលើពួកគេ ។ បើតាមសេចក្តីថ្លែងការណ៍ខាងលើនេះ លោក ចូ បៃដិន បានចេញបញ្ជាអោយបង្ហូតទង់ជាតិនៅសេតវិមានត្រឹមពាក់កណ្តាលដង ដើម្បីជាការផ្តល់កិត្តិយសដល់មន្រ្តីប៉ូលិសអាមេរិកឈ្មោះ វីលៀម អ៊ីរ៉ានស៍ (William Evans) ដែលបានបាត់បង់ជីវិតនៅក្នុងហេតុការណ៍វាយប្រហារនេះ ។ មេបញ្ជាការស្តីទីនៃកងកម្លាំងប៉ូលិសប្រចាំនៅវិមានសភាអាមេរិក លោកស្រី យ៉ូហ្គាណាន់ដា ភីតមែន បានផ្តល់ព័ត៌ មានថា ជនសង្ស័យបានបើករថយន្តមួយគ្រឿងសំដៅទៅរកក្រុមមន្រ្តីរបស់យើង បន្ទាប់មកបានបើកបុកទម្លាយរបាំង និងចុះពីលើរថយន្ត ដោយបានចាក់ពួកគេដោយកាំបិតដែលកាន់នៅក្នុងដៃ ។ បើតាមលោក រ៉ូប៊ឺត ខុនធី ដែលជាមេបញ្ជាការស្តីទីនៃនាយកដ្ឋានប៉ូលិសទីក្រុងវ៉ាស៊ីនតោនបាននិយាយថា ការវាយប្រហារនេះ មិនមានជាប់ពាក់ព័ន្ធនឹងអំពើភេរវកម្មនោះទេ ប៉ុន្តែជាក់ស្តែងយើងនឹងបន្តស៊ើបអង្កេតបន្ថែមទៀត ៕ ប្រភព៖ Reuters

អាមេរិក៖ សហរដ្ឋអាមេរិក កូរ៉េខាងត្បូង និងជប៉ុនបានបង្ហាញការរួបរួមគ្នានៅក្នុងកិច្ចប្រជុំស្តីពីបញ្ហាសន្តិសុខក្នុងកម្រិតខ្ពស់ នៅថ្ងៃសុក្រសប្តាហ៍នេះ ដោយប្តេជ្ញាធ្វើការងាររួមគ្នា ដើម្បីបន្តដាក់សម្ពាធលើប្រទេសកូរ៉េខាងជើង ធ្វើយ៉ាងណាអោយបោះបង់ចោលកម្មវិធីនុយក្លេអ៊ែរ និងមីស៊ីលឆ្លងទ្វីបរបស់ខ្លួន ។ ទីប្រឹក្សាសន្តិសុខជាតិរបស់លោក ចូ បៃដិន គឺលោក ជេក ស៊ូលីវ៉ាន់ បានរៀបចំការប្រជុំដោយផ្ទាល់រួមគ្នាជាមួយសមភាគីរបស់លោក មកពីកូរ៉េខាងត្បូងគឺលោក ស៊ូ ហ៊ុន និង ជប៉ុនគឺលោក ស៊ីហ្គេរូ គីតាមូរ៉ា នៅឯបណ្ឌិត្យសភាកងទ័ពជើងទឹកសហរដ្ឋអាមេរិកក្នុងទីក្រុង អានណាប៉ូលីស រដ្ឋម៉ារីលែន ។ មន្ត្រីជាន់ខ្ពស់ ទាំងបីបាននិយាយនៅក្នុងសេចក្តីថ្លែងការណ៍រួមមួយថា ពួកគេបានចែករំលែកការព្រួយបារម្ភអំពីកម្មវិធីមីស៊ីលនុយក្លេអ៊ែរ និងមីស៊ីលឆ្លងទ្វីបរបស់កូរ៉េខាងជើង ហើយសន្យាធ្វើកិច្ចសហប្រតិបត្តិការត្រីភាគីឆ្ពោះទៅរកការរំសាយអាវុធនុយក្លេអ៊ែរ ។ សេចក្តីថ្លែងការណ៍នេះបានលើកឡើងថា ពួកលោកបានឯកភាពលើភាពចាំបាច់សម្រាប់ការអនុវត្តពេញលេញនៃសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ ដែលពាក់ព័ន្ធដោយសហគមន៍អន្តរជាតិ រួមទាំងកូរ៉េខាងជើង ការទប់ស្កាត់ការរីកសាយអាវុធ និង កិច្ចសហប្រតិបត្តិការដើម្បីពង្រឹងការទប់ស្កាត់ និងថែរក្សាសន្តិភាព និងស្ថិរភាពនៅឧបទ្វីបកូរ៉េ ។ បន្ថែមលើនេះ ពួកលោកក៏បានពិភាក្សាពីការប្រយុទ្ធប្រឆាំងនឹងជំងឺកូវីដ១៩ និង ការប្រែប្រួលអាកាសធាតុ ព្រមទាំងវិធីស្តារលទ្ធិប្រជាធិបតេយ្យនៅមីយ៉ាន់ម៉ាផងដែរ ៕ ប្រភព៖ Reuters

មីយ៉ាន់ម៉ា៖ បន្ទាប់ពីត្រូវបានទម្លាក់ពីអំណាច និងជាប់ឃុំខ្លួន លោកស្រី ស៊ូជីត្រូវបានរបបយោធាចោទប្រកាន់ពីបទល្មើសជាច្រើន ក្នុងនោះរួមមានបទចោទប្រកាន់ ទទួលសំណូក ៦សែនដុល្លារ, បំពានវិធានការទប់ស្កាត់ COVID-19 និងកាន់កាប់វិទ្យុទាក់ទងខុសច្បាប់ ។ បន្ថែមពីលើការចោទប្រកាន់ខាងលើ នៅក្នុងថ្ងៃសុក្រសប្តាហ៍នេះ របបយោធាមីយ៉ាន់ម៉ាបានចោទប្រកាន់លោកស្រី អោង សាន ស៊ូជី ពីបទល្មើសមួយបន្ថែមទៀត នៅក្រោមច្បាប់ការពារកិច្ចការសម្ងាត់ជាតិ ដែលជាបទចោទប្រកាន់ធ្ងន់ធ្ងរចុងក្រោយបំផុតប្រឆាំងនឹងលោកស្រី គិតមកទល់នឹងពេលនេះ ។ ជុំវិញការចោទប្រកាន់ថ្មីនេះដែរ មេធាវីរបស់លោកស្រី ស៊ូជី បានថ្លែងប្រាប់សារព័ត៌មានរ៉យទ័រថា ក្រៅពីលោកស្រី ស៊ូជី ក៏មានមន្ត្រីជាន់ខ្ពស់៣នាក់ទៀតនៃរដ្ឋាភិបាលជាប់ឆ្នោតដែលត្រូវបានទម្លាក់ពីអំណាច ក៏ត្រូវបានតុលាការរបបយោធាចោទប្រកាន់ថាបានបំពានច្បាប់ការពារកិច្ចការសម្ងាត់ជាតិផងដែរ ។ បទចោទនេះអាចឱ្យលោកស្រី ស៊ូជី និងមន្ត្រីជាន់ខ្ពស់ទាំង៣រូបរបស់លោកស្រីប្រឈមមុខជាប់ពន្ធនាគារដល់ទៅ១៤ឆ្នាំ ៕ ប្រភព៖ Reuters