-
រដ្ឋមន្ត្រីក្រសួងសុខាភិបាលប្រេស៊ីលថ្មីសន្យាចាក់វ៉ាក់សាំងអោយបាន១លាននាក់ក្នុងមួយថ្ងៃ ខណៈចំនួនអ្នកស្លាប់កើនឡើងដល់៣សែននាក់
ប្រេស៊ីល៖ រដ្ឋមន្ត្រីក្រសួងសុខាភិបាលទី៤របស់លោកប្រធានាធិបតីប្រេស៊ីល ហ្ស៊ែរ បូលសូណារ៉ូ បានប្រើថ្ងៃផ្លូវការដំបូងរបស់លោកនៅក្នុងការងារ ដើម្បីធ្វើការសម្រេចគោលដៅចាក់វ៉ាក់សាំងចំនួន១លាននាក់ក្នុងមួយថ្ងៃ ខណៈចំនួនអ្នកស្លាប់ដោយសារជំងឺកូវីដ១៩ទូទាំងប្រទេសកើនឡើងដល់៣សែននាក់ គិតត្រឹមថ្ងៃពុធសប្តាហ៍នេះ ។ នៅក្នុងសន្និសីទសារព័ត៌មានលើកដំបូងរបស់ខ្លួន ក្នុងនាមជារដ្ឋមន្ត្រីក្រសួងសុខាភិបាលប្រេស៊ីល លោកម៉ាសេឡូ គ្វៀរ៉ូហ្គា បាននិយាយថា រដ្ឋាភិបាលមានគោលបំណងបង្កើនល្បឿននៃការចាក់ថ្នាំបង្ការវីរុសកូវីដ១៩ ហើយសន្យាថា នឹងចាក់ឱ្យបាន១លាននាក់ក្នុងមួយថ្ងៃ ។ រដ្ឋមន្ត្រីក្រសួងសុខាភិបាលប្រេស៊ីលរូបនេះ បានសង្កត់ធ្ងន់ថា វ៉ាក់សាំង ម៉ាស់ និងគម្លាតសង្គម គឺជាគន្លឹះក្នុងការពន្យឺតមេរោគ ព្រោះថា គ្មាននរណាម្នាក់ចង់បានការបិទប្រទេសនោះទេ ជាពិសេសប្រជាជនប្រេស៊ីលតែម្តង ដែលទំនងមិនប្រកាន់ខ្ជាប់ការបិទប្រទេសនោះទេ ហើយថា លោកនឹងផ្តោតលើវិទ្យាសាស្ត្រ និងតម្លាភាព ។ គួរបញ្ជាក់ថា ប្រទេសធំបំផុតនៅអាមេរិកឡាទីន ជាកន្លែងដែលមានចំនួនអ្នកស្លាប់ដោយសារជំងឺកូវីដ១៩ខ្ពស់ជាងគេលំដាប់ទី២នៅលើពិភពលោក បន្ទាប់ពីសហរដ្ឋអាមេរិកនេះ បានក្លាយមជ្ឈមណ្ឌលនៃការស្លាប់ដោយសារវីរុសដ៏កាចសាហាវមួយនេះក្នុងពិភពលោក ដោយមានអ្នកស្លាប់ម្នាក់ ក្នុងចំណោមអ្នកស្លាប់លើពិភពលោក៤នាក់ គឺជាជនជាតិប្រេស៊ីលនាពេលបច្ចុប្បន្ន ៕ ប្រភព៖ Reuters
-
អធិការបតីអាល្លឺម៉ង់សម្រេចលុបចោលវិញ ចំពោះការរឹតបន្តឹងបន្ថែមលើវិធានការបិទខ្ទប់ប្រទេសនៅថ្ងៃឈប់សម្រាកបុណ្យអ៊ីស្ទើរ
អាល្លឺម៉ង់៖ បានប្រកាសនៅក្នុងសន្និសិទសារព័ត៌មានខ្លីមួយនៅថ្ងៃពុធនេះថា ការរឹតបន្តឹងលើវិធានការបិទខ្ទប់ប្រទេសប្រឆាំងនឹងជំងឺ COVID-19 ដែលគ្រោងនឹងអនុវត្តនៅថ្ងៃឈប់សម្រាកបុណ្យអ៊ីស្ទើរ ត្រូវបានលុបចោលវិញ ។ លោកស្រី មឺហ្គែល បាននិយាយថា ទោះបីជាការបិទខ្ទប់ប្រទេសទាំងស្រុងនៅសប្តាហ៍ក្រោយ ត្រូវបានប្រកាសជាបឋមជាមួយបំណងល្អបំផុត ដើម្បីកាត់បន្ថយល្បឿននៃការរីករាលដាលរលកទី៣ នៃជំងឺCOVID-19ក៏ដោយ ក៏គំនិតនេះគឺជាកំហុសមួយ ។ លោកស្រីបន្ថែមថា លោកស្រីមានការសោកស្តាយដែលការប្រកាសកាលពីថ្ងៃអង្គារសប្តាហ៍នេះ ដែលធ្វើឲ្យមានភាពមិនច្បាស់លាស់បន្ថែមទៀត និងបានសុំអភ័យទោសដល់ពលរដ្ឋអាល្លឺម៉ង់ទាំងអស់ ហើយថា ខ្ញុំជឿជាក់យ៉ាងមុតមាំថា យើងនឹងកម្ចាត់វីរុសជាមួយគ្នា ។ សូមរំលឹកថា អធិការបតីអាល្លឺម៉ង់លោកស្រី អាន់ជែលឡា មឺហ្គែល នៅថ្ងៃអង្គារសប្តាហ៍នេះ បានប្រកាសនៅក្នុងសន្និសីទកាសែតមួយថា ប្រទេសរបស់លោកស្រីនឹងពន្យារពេលវិធានការបិទខ្ទប់ប្រទេសប្រឆាំងនឹងជំងឺ COVID-19 រហូតដល់ ថ្ងៃទី១៨ ខែមេសាខាងមុខ ជាមួយនឹងការរឹតត្បិតរឹតតែខ្លាំងក្នុងកំឡុងពេលថ្ងៃឈប់សម្រាកបុណ្យអ៊ីស្ទើរ ៕ ប្រភព៖ ស៊ីនហួរ
-
ព័ត៌មានអន្តរជាតិសំខាន់ៗថ្ងៃទី២៤ ខែមីនា ឆ្នាំ២០២១ ផ្សាយឡើងវិញ (មានវីដេអូ)
-
ឥណ្ឌាអាចនឹងពន្យារពេលការចែកចាយវ៉ាក់សាំង AstraZeneca ទៅកាន់មជ្ឈមណ្ឌល COVAX នៅអំឡុងខែមីនា និងខែមេសាខាងមុខនេះ
ឥណ្ឌា៖ ឥណ្ឌានឹងពន្យារពេលការផ្គត់ផ្គង់វ៉ាក់សាំងបង្ការជំងឺកូវីដ-១៩ អាស្រ្តាហ្សេណេកា ទៅកាន់មជ្ឈមណ្ឌល COVAX ដែលគាំទ្រដោយ GAVI/WHO សម្រាប់ខែមីនា និងខែមេសាខាងមុខ នេះបើតាមការបញ្ជាក់របស់ក្រុមហ៊ុនជាដៃគូផ្គត់ផ្គង់របស់អង្គការ UNICEF ដល់សារព័ត៌មានរ៉យទ័រនៅព្រឹកថ្ងៃព្រហស្បតិ៍នេះ ។ អង្គការ UNICEF បានបញ្ជាក់តាមសារអេឡិចត្រូនិច (email) ថា យើងយល់ថា ការផ្គត់ផ្គង់វ៉ាក់សាំងការពារកូវីដ-១៩ដល់ប្រទេសមានប្រាក់ចំណូលទាប ដែលចូលរួមជាមួយ COVAX ទំនងជានឹងប្រឈមនូវការពន្យារពេល បន្ទាប់ពីការរាំងស្ទះក្នុងការទទួលបានអាជ្ញាប័ណ្ណធានានាំចេញ សម្រាប់វ៉ាក់សាំងបន្ថែមដែលត្រូវបានផលិតដោយវិទ្យាស្ថានឥណ្ឌា Serum Institute of India (SII) ដែលរំពឹងថា នឹងទទួលបាននៅខែមីនា និងខែមេសាខាងមុខ ខណៈ COVAX កំពុងពិភាក្សាជាមួយរដ្ឋាភិបាលឥណ្ឌា ក្នុងគោលបំណងធានាការចែកចាយឲ្យបានលឿនតាមដែលអាចធ្វើទៅបាន ។ គួរបញ្ជាក់ថា កាលពីថ្ងៃពុធសប្តាហ៍នេះ ទីភ្នាក់ងារសារព័ត៌មានរ៉យទ័របានចុះផ្សាយថា ឥណ្ឌាបានផ្អាកជាបណ្តោះអាសន្ន ចំពោះការនាំចេញវ៉ាក់សាំងអាស្រ្តាហ្សេណេកា ធំៗទាំងអស់ដែលផលិតដោយវិទ្យាស្ថានឥណ្ឌា (SII) ដែលជាអ្នកផលិតវ៉ាក់សាំងធំជាងគេបំផុតក្នុងពិភពលោក ដើម្បីបំពេញតម្រូវការក្នុងស្រុកដែលកំពុងឆ្លងរីករាលដាលខ្លាំង ៕ ប្រភព៖ Reuters
-
អ្នកឆ្លង COVID-19 នៅទូទាំងពិភពលោកកើនឡើង១២៥លាន៤២ម៉ឺននាក់ ក្នុងនោះស្លាប់២លាន៧៥ម៉ឺននាក់ និងជាសះស្បើយ១០១លាន២៨ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១២៥លាន៤២ម៉ឺន៤ពាន់៤៨០ករណី ក្នុងនោះមានអ្នកជម្ងឺសរុបចំនួន២លាន៧៥ម៉ឺន៦ពាន់៦៦២នាក់ស្លាប់ និង ជាសះស្បើយឡើងវិញសរុបចំនួន១០១លាន២៨ម៉ឺន៨ពាន់២៧៣នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៥ ខែមិនា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន៣០លាន៧០ម៉ឺន៤ពាន់២៩២នាក់ ស្លាប់ចំនួន៥៥ម៉ឺន៨ពាន់៤២២នាក់ និងជាសះស្បើយចំនួន២៣លាន១៣ម៉ឺន២ពាន់៨៧៩នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសប្រេស៊ីល ដោយមានអ្នកឆ្លងចំនួន១២លាន២២ម៉ឺន៧ពាន់១៧៩នាក់ ស្លាប់៣០ម៉ឺន១ពាន់៨៧នាក់ និងជាសះស្បើយ១០លាន៦៨ម៉ឺន៩ពាន់៦៤៦នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសឥណ្ឌា ដោយមានអ្នកឆ្លងចំនួន១១លាន៧៨ម៉ឺន៧ពាន់១៣នាក់ ស្លាប់ចំនួន១៦ម៉ឺន៧២៦នាក់ និងជាសះស្បើយ១១លាន២២ម៉ឺន៩ពាន់៥៩១នាក់ ៕ ប្រភព៖ worldometers
-
ទីបំផុតវៀតណាមអនុម័តអោយចាក់វ៉ាក់សាំង Sputnik V របស់រុស្ស៊ី សម្រាប់ការប្រើប្រាស់ក្នុងករណីបន្ទាន់
វៀតណាម៖ ក្រសួងសុខាភិបាលវៀតណាមបានអនុម័តអោយចាក់វ៉ាក់សាំងបង្ការជំងឺកូវីដ១៩ ដែលផលិតឡើងដោយប្រទេសរុស្ស៊ី មានឈ្មោះថា ស្ពូតនីគ-វី (Sputnik V) សម្រាប់ការប្រើប្រាស់ក្នុងករណីបន្ទាន់ ខណៈវ៉ាក់សាំង ChAdOx1 របស់ក្រុមហ៊ុន អាស្ត្រាហ្សេណេកា ត្រូវបានអនុម័តថ្មីៗនេះរួចហើយ ។ មជ្ឈមណ្ឌលស្រាវជ្រាវ និងផលិតវ៉ាក់សាំង និងជីវសាស្ត្រ (Polyvac) បានស្នើកាលពីខែមុន អោយក្រសួងអនុម័តវ៉ាក់សាំង ស្ពូតនីគ-វី និងវ៉ាក់សាំង ម៉ូឌែណា របស់អាមេរិកសម្រាប់ប្រើប្រាស់ក្នុងគ្រាអាសន្ន ។ វ៉ាក់សាំង ស្ពូតនីគ-វី ដែលផលិតដោយក្រុមហ៊ុន ជេនណឺរៀម ជេអេសស៊ី (Generium JSC) ត្រូវចាក់ចំនួនពីរដងក្នុងរយៈពេលបីសប្តាហ៍ដាច់ដោយឡែក ត្រូវរក្សាទុកនៅសីតុណ្ហភាពដក១៨អង្សាសេ និង មានអាយុកាលស្តុកទុក៦ខែ ។ គួរបញ្ជាក់ថា រដ្ឋាភិបាលវៀតណាមបាននិយាយថា ខ្លួនកំពុងបង្កើនការចរចាជាមួយក្រុមហ៊ុនផលិតវ៉ាក់សាំងនៅសហរដ្ឋអាមេរិក រុស្ស៊ី និងប្រទេសមួយចំនួនទៀត ដើម្បីធានាថា ខ្លួនអាចទទួលបានវ៉ាក់សាំងសរុប១៥០លានដូស ដើម្បីគ្របដណ្តប់លើប្រជាជនរបស់ខ្លួនចំនួន៧០ភាគរយនៅឆ្នាំ២០២១នេះ ៕ ប្រភព៖ VNExpress
-
កូវីដ១៩៖ ថៃឆ្លងករណីថ្មីជាង៤០០នាក់ ស្លាប់ម្នាក់ទៀត
អាជ្ញាធរថៃ កាលពីថ្ងៃទី២៣ មីនា ម្សិលមិញ បានប្រកាសពីការរកឃើញ ករណីឆ្លងថ្មីៗនៃជំងឺ COVID-19 ចំនួន៤០១នាក់ ដែលអត្រាដ៏ខ្ពស់ខ្លាំងមួយ ធៀបនឹងមួយរយៈចុងក្រោយនេះ ហើយក៏មានអ្នកជំងឺម្នាក់ទៀតបាត់បង់ជីវិតផងដែរ។ ក្នុងចំណោមករណីឆ្លងថ្មីៗនោះ មាន៣៨៣ករណីជាករណីឆ្លងក្នុងស្រុកផ្ទាល់ និង១៨ករណីជាករណីនាំចូលមកពីក្រៅប្រទេស។ សម្រាប់ការរាយការណ៍នាថ្ងៃអង្គារនេះ ទីក្រុងបាងកកគឺជាកន្លែង ដែលមានករណីឆ្លងក្នុងស្រុកថ្មីៗច្រើនជាងគេ ពោល ៩២ភាគរយនៃករណីឆ្លងថ្មីៗទាំងនោះនៅក្នុងស្រុក ត្រូវបានរកឃើញនៅក្នុងរាជធានីនៃប្រទេសថៃ។ ចំណែក អ្នកជំងឺម្នាក់ទៀតដែលទើបតែបាត់បង់ជីវិត គឺជាបុរសជនជាតិថៃម្នាក់អាយុ៧៥ឆ្នាំ។ គួរបញ្ជាក់ថា គិតត្រឹមម្សិលមិញ ថៃមានអ្នកឆ្លង COVID-19 សរុប ២៨,២៧៧នាក់ ក្នុងនោះមាន២៦,៧៦៦នាក់បានជាសះស្បើយ និង៩២នាក់បានស្លាប់៕
-
លោក ចូ បៃដិន អំពាវនាវអោយមានការទប់ស្កាត់ការវាយប្រហារដោយប្រដាប់អាវុធ បន្ទាប់ពីកើតមានករណីបាញ់ប្រហារដ៏សាហាវនៅរដ្ឋខូឡូរ៉ាដូ
អាមេរិក៖ប្រធានាធិបតីអាមេរិកលោក ចូ បៃដិន នៅថ្ងៃអង្គារនេះ បានអំពាវនាវអោយមានការទប់ស្កាត់ការវាយប្រហារដោយប្រដាប់អាវុធនៅក្នុងសហរដ្ឋអាមេរិក បន្ទាប់ពីប្រទេសមហាអំណាចនេះ កើតមានករណីបាញ់ប្រហារដ៏សាហាវជាលើកទី២ក្នុងរយៈពេលមួយសប្តាហ៍ ធ្វើអោយមនុស្ស១០នាក់ស្លាប់ក្នុងរដ្ឋខូឡូរ៉ាដូ និងមានការជំរុញជាបន្ទាន់ ដើម្បីបង្កើតច្បាប់គ្រប់គ្រងកាំភ្លើងថ្មីមួយ ។ ថ្លែងទៅកាន់ប្រជាជាតិដែលរងការឈឺចាប់ជាយូរមកហើយ ដោយសារការសម្លាប់រង្គាលនៅតាមសាលារៀន ក្លិបរាត្រី រោងកុន និងកន្លែងសាធារណៈផ្សេងទៀតនោះ លោក បៃដិន បាននិយាយថា លោកមិនចាំបាច់រង់ចាំមួយនាទីទៀតទេ ទុកឲ្យប្រើពេលតែ១ម៉ោងដើម្បីចាត់វិធានការរួមដែលអាចជួយសង្គ្រោះជីវិតនាពេលអនាគត និង ដើម្បីជម្រុញមិត្តរួមការងាររបស់ខ្ញុំនៅក្នុងសភា និងព្រឹទ្ធសភាអោយធ្វើសកម្មភាព ។ លោកបានសង្កត់ធ្ងន់ថា នេះមិនមែនជាបញ្ហាដែលប្រកាន់បក្សពួកនិយមទេ… នេះជាបញ្ហារបស់សហរដ្ឋអាមេរិក… វានឹងជួយសង្គ្រោះអាយុជីវិតប្រជាជនអាមេរិក… ហើយយើងត្រូវតែធ្វើសកម្មភាព ។ ការអំពាវនាវខាងលើនេះរបស់លោក បៃដិន បានកើតមានឡើងខ្មាន់កាំភ្លើងម្នាក់បានបើកការបាញ់ប្រហារមួយនៅឯផ្សារទំនើបមួយកន្លែងក្នុងទីក្រុងប៊ូលឌ័រ រដ្ឋខូឡូរ៉ាដូ នៅថ្ងៃចន្ទនេះ (ម៉ោងក្នុងតំបន់) ហើយជាលទ្ធផលនោះ មានមនុស្ស៦នាក់បាត់បង់ជីវិត ក្នុងនោះរួមមានមន្ត្រីប៉ូលិម្នាក់ផងដែរ ។ ការបាញ់ប្រហារទាំងពីរករណីខាងលើនេះដែរ បានកើតឡើងនៅចំពេលចរន្តនៃអំពើហិង្សប្រឆាំងពលរដ្ឋអាមេរិកដើមកំណើតអាស៊ី កំពុងកើនឡើងខ្លាំងនៅក្នុងសហរដ្ឋអាមេរិក ៕ ប្រភព៖ AFP
-
កូរ៉េខាងជើងបាញ់សាកល្បងមីស៊ីលរយៈចម្ងាយខ្លីចំនួនពីរគ្រាប់ ដែលនេះជាការប្រកួតប្រជែងជាមួយរដ្ឋបាលលោក ចូ បៃដិន
អាមេរិក៖ មន្រ្តីអាមេរិកមួយរូបនៅថ្ងៃអង្គារនេះនិយាយថា កូរ៉េខាងជើងបានបាញ់សាកល្បងមីស៊ីលមួយចំនួន តែប៉ុន្មានថ្ងៃប៉ុណ្ណោះបន្ទាប់ពីប្រមុខការទូត និង រដ្ឋមន្ត្រីការពារជាតិអាមេរិកបញ្ចប់ដំណើរទស្សនកិច្ចនៅកូរ៉េខាងត្បូង និងជប៉ុន ហើយនេះក៏ជាបាញ់សាកល្បងលើកដំបូងបំផុត ដើម្បីជាការធ្វើតេស្តប្រតិកម្មរបស់រដ្ឋបាលលោក ចូ បៃដិន ។ បើតាមមន្ត្រីអាមេរិកដដែលនេះ កូរ៉េខាងជើងបានបាញ់មីស៊ីលរយៈចំងាយខ្លីចំនួនពីរគ្រាប់កាលពីថ្ងៃអាទិត្យសប្ដាហ៍មុន ដោយសកម្មភាពនេះត្រូវបានគេចាត់ទុកថា ជាការបង្កហេតុទាំងទៅលើទីក្រុងវ៉ាស៊ីនតោន និងទីក្រុងសេអ៊ូល ក្រោយប្រទេសសម្ព័ន្ធមិត្តទាំងពីរធ្វើសមយុទ្ធរួមគ្នា ។ ការធ្វើតេស្តនេះដែរ បានកើតមានឡើងក្រោយទីភ្នាក់ងារចារកម្មបានព្រមានថា ទីក្រុងព្យុងយ៉ាងអាចនឹងធ្វើសកម្មភាពបាញ់សាកល្បងគ្រាប់មីស៊ីលរបស់ខ្លួននាពេលខាងមុខនេះ ។ ទោះជាយ៉ាងណាក៏ដោយ មន្រ្តីអាមេរិកក្នុងលក្ខខណ្ឌមិនបញ្ចេញឈ្មោះបាននិយាយថា ការធ្វើតេស្ដមីស៊ីលរបស់កូរ៉េខាងជើង មិនមែនជាសកម្មភាពបង្ករឿងធ្ងន់ធ្ងរអ្វីនោះទេ ហើយថែមទាំងអះអាងដែរថា សហរដ្ឋអាមេរិកនៅតែបើចំហទ្វារចរចាជាមួយទីក្រុងព្យុងយ៉ាង ៕ Reuters
-
អាល្លឺម៉ង់សម្រេចពន្យារពេលវិធានការបិទខ្ទប់ប្រទេសរហូតដល់ថ្ងៃទី១៨ ខែមេសា ដើម្បីប្រយុទ្ធប្រឆាំងនឹងជំងឺកូវីដ១៩
បារាំង៖ អាល្លឺម៉ង់នឹងអូសបន្លាយពេលវិធានការបិទខ្ទប់ប្រទេស ដើម្បីប្រយុទ្ធប្រឆាំងនឹង COVID-19 រហូតដល់ថ្ងៃទី១៨ ខែមេសាខាងមុខ ជាមួយនឹងការរឹតត្បិតកាន់តែខ្លាំង ក្នុងកំឡុងពេលថ្ងៃឈប់សម្រាកបុណ្យអ៊ីស្ទើរ ។ បន្ទាប់ពីកិច្ចប្រជុំជាមួយគណៈរដ្ឋមន្រ្តីនៅថ្ងៃអង្គារនេះ អធិការបតីអាល្លឺម៉ង់ លោកស្រី អាន់ជែលឡា មឺហ្គែល បានប្រកាសក្នុងសន្និសិទសារព័ត៌មានថា អាល្លឺម៉ង់កំពុងស្ថិតក្នុងស្ថានភាពគ្រោះថ្នាក់ខ្លាំង នៅចំពោះមុខនៃការរាតត្បាតយ៉ាងឆាប់រហ័សរបស់ជំងឺ COVID-19 ខណៈប្រទេសអឺរ៉ុបមួយនេះកំពុងប្រឈមនឹងការកើនឡើងយ៉ាងខ្លាំងនៃករណីឆ្លងថ្មី ដែលជាបន្ទុកដ៏ធ្ងន់សម្រាប់វិស័យសុខាភិបាល ។ អធិការបតីអាល្លឺម៉ង់រូបនេះបានសង្កត់ធ្ងន់ថា ថ្ងៃឈប់សម្រាកបុណ្យអ៊ីស្ទើរនៅដើមខែមេសាខាងមុខនេះ នឹងមានការរឹតត្បិតយ៉ាងខ្លាំងលើការប្រាស្រ័យទាក់ទង បន្ថែមលើការហាមឃាត់ការជួបជុំនៅតាមទីសាធារណៈ និងថា ការជួបជុំជាលក្ខណៈឯកជននឹងត្រូវបានអនុញ្ញាតិតែរវាងពីរគ្រួសារប៉ុណ្ណោះ ប៉ុន្តែវាក៏ត្រូវបានកំណត់ត្រឹមអតិបរមាចំនួនមនុស្ស០៥នាក់ ៕ ប្រភព៖ ស៊ីនហួរ