-
មនុស្សស្លាប់ និងបាត់ខ្លួនកើនឡើងដល់៤១៥នាក់ ក្រោយគ្រោះអគ្គិភ័យឆេះជំរុំជនភៀសខ្លួនរ៉ូហ៊ីងយ៉ានៅប្រទេសបង់ក្លាដែស
បង់ក្លាដែស៖ ចំនួនអ្នកស្លាប់កើនឡើងដល់១៥នាក់ និង៤០០នាក់ទៀតបាត់ខ្លួន បន្ទាប់ពីអគ្គិភ័យដ៏ធំមួយបានឆាបឆេះបំផ្លាញទីជម្រករបស់ជនជាតិភាគតិចរ៉ូហ៊ីងយ៉ា នៅឯទីតាំងជនភៀសខ្លួនដ៏ធំបំផុតក្នុងប្រទេសបង់ក្លាដែស ។ តំណាងទីភ្នាក់ងារជនភៀសខ្លួនរបស់អង្គការសហប្រជាជាតិប្រចាំនៅប្រទេសបង់ក្លាដែស លោក Johannes Van der Klaauw បាននិយាយថា រហូតមកដល់ពេលនេះមានមនុស្សយ៉ាងណាស់១៥នាក់បានស្លាប់ ៥៦០នាក់រងរបួស និង៤០០នាក់ទៀតបាត់ខ្លួន ខណៈទីជម្រកចំនួនជាង១ម៉ឺនត្រូវបានបំផ្លាញទាំងស្រង់ ។ បើតាមក្រុមមន្ត្រីបង់ក្លាដែស អគ្គិភ័យប្រហែលចាប់ផ្ដើមឆាបឆេះចេញពីជំរំមួយក្នុងចំណោមជំរំ៣៤កន្លែង ដែលលាតសន្ធឹងលើផ្ទៃដី៣ពាន់២៣៧ហិកតា មុននឹងវា ឆេះរាលដាលទៅកាន់ជំរំបីផ្សេងទៀត ។ ប៉ុន្តែអាជ្ញាធរមិនទាន់អាចកំណត់ពីមូលហេតុបង្កឱ្យមានអគ្គិភ័យនេះនៅឡើយទេ ។ សូមជម្រាបថា ជនជាតិដើមភាគតិចកាន់សាសនាអ៊ីស្លាមរ៉ូហ៊ីងយ៉ាជិតមួយលាននាក់ ក្នុងនោះមានភាគច្រើនរត់គេចពីការបង្រ្កាបរបស់យោធានៅមីយ៉ាន់ម៉ាកាលពីឆ្នាំ២០១៧ បច្ចុប្បន្នគឺកំពុងស្នាក់នៅក្នុងជំរំជនភៀសខ្លួន នៅឯស្រុក Cox’s Bazar ប្រទេសបង់ក្លាដែស ៕ ប្រភព៖ Reuters
-
អង់គ្លេសប្រកាសត្រៀមចាក់វ៉ាក់សាំងកូវីដ១៩ ដល់កុមារ អាយុពី ៦ឆ្នាំ ដល់ ១៧ឆ្នាំ
ទីភ្នាក់ងារសារព័ត៌មានអង់គ្លេស The Telegraph នាព្រឹកថ្ងៃពុធ ទី២៤ ខែមីនានេះ បានចេញផ្សាយថា កុមារនៅចក្រភពអង់គ្លេសនឹងទទួលបានការចាក់វ៉ាក់សាំង បង្ការជំងឺ COVID-19 យ៉ាងឆាប់បំផុត ចាប់ពីខែសីហា ខាងមុខនេះតទៅ ដើម្បីឆ្លើយតបទៅតាមផែនការរបស់រដ្ឋាភិបាល។ ប្រភពបញ្ជាក់ទៀតថា កាលបរិច្ឆេទនៃការរៀបចំចាក់វ៉ាក់សាំងដល់ក្មេងៗ និងមនុស្សវ័យជំទង់នៅអង់គ្លេស ក៏អាចនឹងប្រព្រឹត្តទៅមួយខែលឿនជាងកាលកំណត់ផងដែរ ដោយអាស្រ័យលើការត្រៀមរៀបចំ ត្រូវបានជំរុញមានប្រសិទ្ធភាពដល់កម្រិតណា។ គួរបញ្ជាក់ថា គិតត្រឹមដើមសប្តាហ៍នេះ រដ្ឋាភិបាលអង់គ្លេសនៅតែកំពុង ទន្ទឹងរង់ចាំលទ្ធផលនៃការសិក្សាស្រាវជ្រាវ ទៅលើវ៉ាក់សាំងសម្រាប់កុមារ ដែលបាននិងកំពុងធ្វើឡើងដោយសាកលវិទ្យាល័យ Oxford និងក្រុមហ៊ុន AstraZeneca Plc ជាមុនសិន ទើបសេចក្តីសម្រេចអាចធ្វើឡើងទៅតាមក្រោយ។ មន្ត្រីរដ្ឋាភិបាលអង់គ្លេសបានឲ្យដឹងថា ទិន្នន័យសុវត្ថិភាពនៃការធ្វើតេស្តវ៉ាក់សាំង លើក្រុមក្មេងៗស្ម័គ្រចិត្តជាង ៣០០នាក់ ដែលមានអាយុចន្លោះពី ៦ឆ្នាំ ដល់ ១៧ឆ្នាំ អាចនឹងត្រូវចេញក្នុងពេលឆាប់់ៗខាងមុខនេះ ដែលអាចនៅអំឡុងខែមិថុនា ឬកក្កដា៕
-
ព័ត៌មានអន្តរជាតិសំខាន់ៗថ្ងៃទី២៣ ខែមីនា ឆ្នាំ២០២១ ផ្សាយឡើងវិញ (មានវីដេអូ)
-
អ្នកឆ្លង COVID-19 នៅទូទាំងពិភពលោកកើនឡើង១២៤លាន៧៩ម៉ឺននាក់ ក្នុងនោះស្លាប់២លាន៧៤ម៉ឺននាក់ និងជាសះស្បើយ១០០លាន៨២ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១២៤លាន៧៩ម៉ឺន៩ពាន់១០៤ករណី ក្នុងនោះមានអ្នកជម្ងឺសរុបចំនួន២លាន៧៤ម៉ឺន៦ពាន់២៤២នាក់ស្លាប់ និង ជាសះស្បើយឡើងវិញសរុបចំនួន១០០លាន៨២ម៉ឺន៧ពាន់៦៩៧នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៤ ខែមិនា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន៣០លាន៦៣ម៉ឺន៦ពាន់៥៣៤នាក់ ស្លាប់ចំនួន៥៥ម៉ឺន៦ពាន់៨៨៣នាក់ និងជាសះស្បើយចំនួន២៣លាន៣ម៉ឺន៩ពាន់៥៨៥នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសប្រេស៊ីល ដោយមានអ្នកឆ្លងចំនួន១២លាន១៣ម៉ឺន៦ពាន់៦១៥នាក់ ស្លាប់២៩ម៉ឺន៨ពាន់៨៤៣នាក់ និងជាសះស្បើយ១០លាន៦០ម៉ឺន១ពាន់៦៥៨នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសឥណ្ឌា ដោយមានអ្នកឆ្លងចំនួន១១លាន៧៣ម៉ឺន៣ពាន់៥៩៤នាក់ ស្លាប់ចំនួន១៦ម៉ឺន៤៧៧នាក់ និងជាសះស្បើយ១១លាន២០ម៉ឺន៣ពាន់១៦នាក់ ៕ ប្រភព៖ worldometers
-
សហរដ្ឋអាមេរិកដាក់បញ្ចូលមេប៉ូលិស និងអង្គភាពកងទ័ពមីយ៉ាន់ម៉ាទៅក្នុងបញ្ជីខ្មៅ ជុំវិញការបង្ក្រាបដ៏ហិង្សាលើក្រុមអ្នកប្រឆាំងតវ៉ាដោយសន្តិវិធី
អាមេរិក៖ ក្រសួងរតនាគារជាតិអាមេរិកនៅថ្ងៃចន្ទនេះបញ្ជាក់ថា ខ្លួនបាននិងកំពុងដាក់ទណ្ឌកម្មលើសមាជិកពីររូបរបស់របបដឹកនាំយោធាមីយ៉ាន់ម៉ា ក្នុងនោះរួមមានទាំងមេប៉ូលិស និងអង្គភាពយោធាចំនួនពីរ ដែលមានជាប់ពាក់ព័ន្ធនឹងការបង្ក្រាបដ៏បង្ហូរឈាមទៅលើក្រុមអ្នកប្រឆាំងតវ៉ានឹងរដ្ឋប្រហារ ខណៈដែលទីក្រុងវ៉ាស៊ីនតោនព្រមានថា នឹងចាត់វិធានការដាក់សម្ពាធបន្ថែមទៀត ។ រដ្ឋបាលរបស់ប្រធានាធិបតីអាមេរិកលោក ចូ បៃដិន បានដាក់បញ្ចូលទៅក្នុងបញ្ជីខ្មីរួចរាល់ហើយ នូវសមាជិកមេដឹកនាំយោធាកំពូលៗ និងក្រុមហ៊ុនមួយចំនួនដែលគ្រប់គ្រងដោយយោធា ប៉ុន្តែទោះជាយ៉ាងណា យោធាមីយ៉ាន់ម៉ានៅតែច្រានចោលការអំពាវនាវអោយបញ្ឈប់សកម្មភាពរបស់ខ្លួន ហើយរឹតតែបង្កើនការប្រើអំពើហិង្សាប្រឆាំងនឹងក្រុមអ្នកតវ៉ាដោយសន្តិវិធី ដែលមកទល់ពេលនេះមានមនុស្សច្រើនជាង២៥០នាក់ហើយបានស្លាប់ ។ ជាមួយគ្នានេះ រដ្ឋមន្រ្តីការបរទេសអាមេរិកលោក អាន់តូនី ប្លីនខិន បាននិយាយនៅក្នុងសេចក្តីថ្លែងការណ៍មួយថា សកម្មភាពថ្ងៃនេះគឺជាការផ្ញើសញ្ញាដ៏ខ្លាំងក្លាមួយថា យើងនឹងអនុវត្តតាមការសន្យារបស់យើងដែលថា នឹងបន្តចាត់វិធានការប្រឆាំងនឹងមេដឹកនាំរដ្ឋប្រហារ ក៏ដូចជាអ្នកដែលបានប្រព្រឹត្តអំពើហិង្សា ។ ហើយចំណាត់ក្តៅរបស់សហរដ្ឋអាមេរិកនេះដែរ ធ្វើឡើងបន្ទាប់ពីសហភាពអឺរ៉ុបបានដាក់ទណ្ឌកម្មជាឯកតោភាគីនៅថ្ងៃចន្ទម្សិលមិញ ទៅលើមន្រ្តីចំនួន១១រូបរបស់របបយោធាមីយ៉ាន់ម៉ា ពីបទធ្វើរដ្ឋប្រហារកាលពីខែមុន និងការបង្ក្រាបទៅលើក្រុមបាតុករផងដែរ ៕ ប្រភព៖ Reuters
-
ប្រធានាធិបតីរុស្ស៊ីច្រានចោលការរិះគន់ពីសំណាក់ប្រទេសមួយចំនួនទៅលើវ៉ាក់សាំង Sputnik V របស់ប្រទេសខ្លួន
រុស្ស៊ី៖ ប្រធានាធិបតីរុស្ស៊ីលោក វ៉្លាឌីមៀ ពូទីន នៅថ្ងៃចន្ទនេះ បានច្រានចោលការរិះគន់ពីសំណាក់ប្រទេសមួយចំនួនទៅលើវ៉ាក់សាំងបង្ការជំងឺ Covid-19 របស់ប្រទេសខ្លួន មានឈ្មោះថា Sputnik V ហើយថា រូបលោកផ្ទាល់កំពុងត្រៀមខ្លួនទទួលការចាក់វ៉ាក់សាំងមួយនេះនៅក្នុងសប្តាហ៍នេះ ។ លោក ពូទីន បានថ្លែងតាមកញ្ចក់ទូរទស្សន៍អមដោយមន្ត្រីសុខាភិបាលថា យើងមិនមែនកំពុងដាក់បន្ទុកទៅលើនរណាម្នាក់ឡើយ តើផលប្រយោជន៍របស់អ្នក គឺជាការការពារក្រុមហ៊ុនផលិតឱសថទាំងនោះ ឬក៏ជាការការពារផលប្រយោជន៍ប្រជាជននៃបណ្តាប្រទេសអឺរ៉ុប? ។ លោក ពូទីន បានអះអាងថា ការចាក់វ៉ាក់សាំងគឺជាជម្រើសនៃការស្ម័គ្រចិត្តពីមនុស្សម្នាក់ៗ ហេតុដូច្នេះខ្ញុំនឹងទទួលការចាក់ នៅថ្ងៃស្អែកនេះ (ថ្ងៃអង្គារនេះម៉ោងក្នុងតំបន់) ។ គួរបញ្ជាក់ថា បើតាមកាសែត The Lancet វ៉ាក់សាំង Sputnik V មានប្រសិទ្ធភាពជាង៩០ភាគរយឯណោះ ក្នុងការប្រឆាំងនឹងជំងឺ COVID-19 ខណៈវ៉ាក់សាំងផលិតដោយរុស្ស៊ីនេះ កាលពីពេលថ្មីៗត្រូវបានបណ្តាប្រទេសអឺរ៉ុបជាច្រើនអនុម័តឲ្យប្រើប្រាស់រួចទៅហើយ ស្ថិតនៅចំពោះមុខបញ្ហាយឺតយ៉ាវ នៃកម្មវិធីចាក់វ៉ាក់សាំងបង្ការ COVID-19 នៃសហភាពអឺរ៉ុប ៕ ប្រភព៖ CNA
-
ប្រធានាធិបតីកូរ៉េខាងត្បូងចាក់វ៉ាក់សាំង AstraZeneca មុនពេលចេញទៅអង់គ្លេស
ប្រធានាធិបតីកូរ៉េខាងត្បូង លោក មូន ជេអ៊ីន បានចាក់វ៉ាក់សាំងបង្ការជំងឺកូវីដ១៩ AstraZeneca នៅថ្ងៃអង្គារ៍ ទី២៣ មីនា ២០២១នេះ មុនពេលលោកត្រូវបំពេញទស្សនកិច្ចនៅក្រៅប្រទេស។ កូរ៉េខាងត្បូងបានចាប់ផ្តើមចាក់វ៉ាក់សាំងជូនពលរដ្ឋនិងមន្ត្រីសុខាភិបាលជួរមុខ ក្នុងកិច្ចពន្លឿនការចាក់វ៉ាក់សាំងឲ្យបានប្រញាប់ប្រញាល់។ លោកមូន ក្នុងវ័យ៦៨ឆ្នាំ បានចាក់វ៉ាក់សាំង AstraZeneca នៅការិយាល័យរបស់លោក នៅក្នុងក្រុងសេអ៊ូល ខណៈដែលលោកកំពុងត្រៀមបំពេញទស្សនកិច្ចនៅប្រទេសអង់គ្លេស ដើម្បីចូលរួមកិច្ចប្រជុំកំពូលនៃបណ្តាមេដឹកនាំប្រទេសរីកចម្រើនទាំង៧ ហៅកាត់ថា G7នាខែមិថុនាខាងមុខនេះ។ ក្រៅពីរូបលោក ភរិយារបស់លោកនិងមនុស្សជំនិតៗ ព្រមទាំងទីប្រឹក្សាជាតិកូរ៉េខាងត្បូងក៏បានចាក់វ៉ាក់សាំងជាមួយលោកដែរ នាពេលនោះ៕
-
សេតវិមានកំពុងពិចារណាលើកញ្ចប់ថវិការ៣ទ្រីលានដុល្លារ ដើម្បីស្រោចស្រង់សេដ្ឋកិច្ចសហរដ្ឋអាមេរិក
អាមេរិក៖ រដ្ឋបាលប្រធានាធិបតីអាមេរិកលោក ចូ បៃដិន បាននិងកំពុងធ្វើការពិចារណាលើការចំណាយដ៏ធំថ្មីមួយ ដែលមានទំហំទឹកប្រាក់៣ទ្រីលានដុល្លារលើការរៀបចំហេដ្ឋារចនាសម្ព័ន្ធនៅសហរដ្ឋអាមេរិក និង ការបែងចែកទៅក្នុង កញ្ចប់ថវិការចំនួនពីរ ដែលអាចប្រឈមមុខនឹងផ្លូវតូចចង្អៀត ដើម្បីទទួលបាននូវការអនុម័តនៅសភា នេះបើតាមប្រព័ន្ធផ្សព្វផ្សាយអាមេរិកនៅថ្ងៃចន្ទម្សិលមិញ ។ ផែនការរៀបចំហេដ្ឋារចនាសម្ព័ន្ធនេះ ត្រូវបានបង្កើតឡើងមានគោលដៅដូចគ្នាទៅនឹងកញ្ចប់ថវិការនៃផែនការសង្គ្រោះពលរដ្ឋអាមេរិកទំហំ ១,៩ ទ្រីលានដុល្លារ ដែលលោក បៃដិន ទើបតែចុះហត្ថលេខាអោយចូលជាច្បាប់ជាផ្លូវការកាលពីដើមនេះ ដែលមានគោលបំណងជួយស្តារឡើងវិញនូវសេដ្ឋកិច្ចរបស់ប្រទេសមហាអំណាចពិភពលោកមួយនេះ ពីការបំផ្លិចបំផ្លាញបង្កឡើងដោយវីរុសរាតត្បាតសកលកូវីដ១៩ ។ សូមបញ្ជាក់ថា លោក ចូ បៃដិន ដែលបានស្បថចូលកាន់តំណែងជាប្រធានាធិបតីអាមេរិកកាលពីខែមករាមកនេះ ធ្លាប់បានសន្យាថា នឹងអនុម័តលើកញ្ចប់ថវិការសង្គ្រោះលើកទី២ ដែលមានគោលបំណងធ្វើអោយប្រសើរឡើង នូវហេដ្ឋារចនាសម្ព័ន្ធនៅក្នុងសហរដ្ឋអាមេរិក ការបង្កើតការងារថ្មីៗ ហើយបើតាមប្រព័ន្ធផ្សព្វផ្សាយអាមេរិកនោះ ផែនការនេះនឹងត្រូវបានបែងចែកទៅក្នុងសំណើចំនួនពីរ ដែលចំណាយទឹកប្រាក់សរុបរហូតដល់៣ទ្រីលានដុល្លារ ៕ ប្រភព៖ Reuters
-
ផ្ទុះករណីបាញ់ប្រហារថ្មីមួយទៀតនៅសហរដ្ឋអាមេរិក បណ្តាលអោយមានមនុស្ស៦នាក់ស្លាប់ ក្នុងនោះមានប៉ូលិសម្នាក់ដែរ
អាមេរិក៖ ខ្មាន់កាំភ្លើងម្នាក់បានបើកការបាញ់ប្រហារមួយនៅឯផ្សារទំនើបមួយកន្លែងក្នុងទីក្រុងប៊ូលឌ័រ រដ្ឋខូឡូរ៉ាដូ នៅថ្ងៃចន្ទនេះ (ម៉ោងក្នុងតំបន់) ហើយជាលទ្ធផលនោះ មានមនុស្ស៦នាក់បាត់បង់ជីវិត ក្នុងនោះរួមមានមន្ត្រីប៉ូលិម្នាក់ផងដែរ ។ មេបញ្ជាការប៉ូលិសក្នុងតំបន់លោក Kerry Yamaguchi បានបញ្ជាក់ក្នុងសន្និសិទសារព័ត៌មានថា ក្រោយហេតុការណ៍ ជនសង្ស័យត្រូវបានប៉ូលិសចាប់ខ្លួន ប៉ុន្តែភ្លាមៗនេះ មិនទាន់មានការបញ្ជាក់ពីចេតនា ឬមូលហេតុនៅពីក្រោយការបាញ់ប្រហារខាងលើនៅឡើយនោះទេ ។ ការបាញ់ប្រហារនេះ ជាការបាញ់ប្រហារយ៉ាងរង្គាលជាលើកទី២ ក្នុងរយៈពេលត្រឹមតែមួយសប្ដាហ៍ប៉ុណ្ណោះនៅក្នុងសហរដ្ឋអាមេរិក បន្ទាប់ពីខ្មាន់កាំភ្លើងម្នាក់បានបាញ់សម្លាប់មនុស្ស៨នាក់ ក្នុងនោះមាន៦នាក់ជាស្ត្រីអាមេរិកមានដើមកំណើតអាស៊ី ក្នុងទីក្រុងអាត្លង់តា រដ្ឋចចចៀ ។ ការបាញ់ប្រហារទាំងពីរករណីខាងលើនេះដែរ បានកើតឡើងនៅចំពេលចរន្តនៃអំពើហិង្សប្រឆាំងពលរដ្ឋអាមេរិកដើមកំណើតអាស៊ី កំពុងកើនឡើងខ្លាំងនៅក្នុងសហរដ្ឋអាមេរិក ៕ ប្រភព៖ AP
-
បណ្តាប្រទេសលោកខាងលិចដាក់ទណ្ឌកម្មប្រឆាំងចិន ជុំវិញបញ្ហារំលោភសិទ្ធិមនុស្សទៅលើជនជាតិភាគតិចអ៊ូហ្គួរ នៅខេត្តស៊ិនជាំង
អាមេរិក៖ សហរដ្ឋអាមេរិក សហភាពអឺរ៉ុប ចក្រភពអង់គ្លេស និងកាណាដាបានប្រកាសដាក់ទណ្ឌកម្មប្រឆាំងនឹងមន្រ្តីចិននៅថ្ងៃចន្ទនេះ ជុំវិញការរំលោភបំពានសិទ្ធិមនុស្សនៅខេត្តស៊ិនជាំង ដែលនេះជាការសហការគ្នាលើកដំបូងរបស់ប្រទេសលោកខាងលិចប្រឆាំងនឹងទីក្រុងប៉េកាំង ស្ថិតក្រោមរដ្ឋបាលរបស់ប្រធា នាធិបតីអាមេរិកថ្មី លោក ចូ បៃដិន ។ រដ្ឋាភិបាលប្រទេសលោកខាងលិចបាននិងកំពុងព្យាយាមគាបសង្កត់ធ្វើអោយទីក្រុងប៉េកាំង ទទួលខុសត្រូវចំពោះការចាប់ឃុំខ្លួនយ៉ាងច្រើននូវជនជាតិភាគតិចអ៊ូហ្គួរ នៅភាគពាយ័ព្យប្រទេសចិន ដែលសហរដ្ឋអាមេរិកនិយាយថា ចិនកំពុងប្រព្រឹត្តអំពើប្រល័យពូជសាសន៍ ។ ទោះជាយ៉ាងណា ប្រទេសចិនបានប្រកាសច្រានចោលរាល់ការចោទប្រកាន់ទាំងនោះ ។ គួរបញ្ជាក់ថា កិច្ចប្រជុំរដ្ឋមន្ត្រីការបរទេសនៃសហភាពអ៊ឺរ៉ុបនៅទីក្រុងប្រ៊ុចសែលនៅថ្ងៃចន្ទនេះ បានអនុម័តការដាក់ទណ្ឌកម្មលើការរំលោភបំពានសិទ្ធិមនុស្សនានានៅក្នុងប្រទេសចិន មីយ៉ាន់ម៉ា និងរុស្ស៊ី ខណៈដែលប្លុកនេះពង្រីកវិធានការណ៍ដែលផ្តោតលើការរំលោភសិទ្ធិសកល ។ សហភាពដែលសមាជិកចំនួន២៧ប្រទេស គ្រោងនឹងដាក់មន្ត្រីចំនួន០៤រូប និងអង្គភាពរដ្ឋមួយរបស់ចិនចូលក្នុងបញ្ជីខ្មៅ ជុំវិញការបង្ក្រាបរបស់ទីក្រុងប៉េកាំងទៅលើជនជាតិភាគតិចអ៊ូហ្គួរ ក្រោយឯកអគ្គរដ្ឋទូតនានានៃប្លុកនេះបានផ្តល់ភ្លើងខៀវកាលពីសប្តាហ៍មុន ៕ ប្រភព៖ Reuters