-
ចិនប្រកាសដាក់ទណ្ឌកម្មលើបុគ្គល និងស្ថាប័នរបស់សហភាពអឺរ៉ុបវិញ ដើម្បីជាការសងសឹកនឹងការដាក់ទណ្ឌកម្មប្រឆាំងប្រទេសខ្លួន ជុំវិញបញ្ហារំលោភសិទ្ធិមនុស្ស
ចិន៖ ប្រទេសចិននៅថ្ងៃចន្ទនេះបានប្រកាសទណ្ឌកម្មប្រឆាំងនឹងបុគ្គល១០រូប និងអង្គភាពចំនួន៤នៅអឺរ៉ុបវិញ ដោយនិយាយថា ពួកគេបានធ្វើឲ្យប៉ះពាល់ធ្ងន់ធ្ងរ និងផលប្រយោជន៍របស់ចិន និងផ្សព្វផ្សាយព័ត៌មានកុហក និងមិនពិត ។ បើតាមអ្នកនាំពាក្យក្រសួងការបរទេសចិនម្នាក់ សហភាពអឺរ៉ុបបានដាក់ទណ្ឌកម្មលើបុគ្គលឯកជន និងអង្គភាពរបស់ចិន នៅថ្ងៃចន្ទដើមសប្តាហ៍នេះ ដោយលើកឡើងពាក់ព័ន្ធនឹងបញ្ហាសិទ្ធិមនុស្សនៅខេត្តស៊ិនជាំង ។ អ្នកនាំពាក្យរូបនោះបានពន្យល់ថា ទណ្ឌកម្មនោះ គ្មានផ្អែកលើអ្វីសោះ ក្រៅពីការភូតភកុហក និងផ្សព្វ ផ្សាយព័ត៌មានមិនពិត គ្មានការគោរព និងបំភ្លៃការពិត ជ្រៀតជ្រែកយ៉ាងខ្លាំងក្នុងកិច្ចការផ្ទៃក្នុងរបស់ចិន រំលោភបំពានលើច្បាប់អន្តរជាតិ និងបទដ្ឋានជាមូលដ្ឋានក្នុងការគ្រប់គ្រងទំនាក់ទំនងអន្តរជាតិ និងធ្វើឲ្យប៉ះពាល់ដល់ការទំនាក់ទំនងចិន និងអឺរ៉ុបយ៉ាងធ្ងន់ធ្ងរ ។ អ្នកនាំពាក្យក្រសួងការបរទេសចិនបានសង្កត់ធ្ងន់ថា បុគ្គលទាំង១០រូបខាងលើនេះ និងក្រុមគ្រួសាររបស់ពួកគេត្រូវបានហាមចូលទឹកដីប្រទេសចិន ហុងកុង និងម៉ាកាវ ហើយថា ពួកគេ និងក្រុមហ៊ុន ព្រមទាំងស្ថាប័នពាក់ព័ន្ធជាមួយពួកគេក៏ត្រូវបានរឹតត្បិតពីការធ្វើពាណិជ្ជកម្មនៅប្រទេសចិនផងដែរ ៕ AFP
-
អ្នកឆ្លង COVID-19 នៅទូទាំងពិភពលោកកើនឡើង១២៤លាន២៩ម៉ឺននាក់ ក្នុងនោះស្លាប់២លាន៧៣ម៉ឺននាក់ និងជាសះស្បើយ១០០លាន២៦ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១២៤លាន២៩ម៉ឺន២ពាន់៣៤៩ករណី ក្នុងនោះមានអ្នកជម្ងឺសរុបចំនួន២លាន៧៣ម៉ឺន៥ពាន់២៣១នាក់ស្លាប់ និង ជាសះស្បើយឡើងវិញសរុបចំនួន១០០លាន២៦ម៉ឺន៧ពាន់៦៨នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី២៣ ខែមិនា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន៣០លាន៥៧ម៉ឺន៦ពាន់៩៦២នាក់ ស្លាប់ចំនួន៥៥ម៉ឺន៥ពាន់៩៤៥នាក់ និងជាសះស្បើយចំនួន២២លាន៨៤ម៉ឺន៦ពាន់៣នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសប្រេស៊ីល ដោយមានអ្នកឆ្លងចំនួន១២លាន៥ម៉ឺន១ពាន់៦១៩នាក់ ស្លាប់២៩ម៉ឺន៥ពាន់៦៨៥នាក់ និងជាសះស្បើយ១០លាន៥០ម៉ឺន៧ពាន់៩៩៥នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសឥណ្ឌា ដោយមានអ្នកឆ្លងចំនួន១១លាន៦៨ម៉ឺន៦ពាន់៣៣០នាក់ ស្លាប់ចំនួន១៦ម៉ឺន២០០នាក់ និងជាសះស្បើយ១១លាន១៧ម៉ឺន៩ពាន់៥៩នាក់ ៕ ប្រភព៖ worldometers
-
ព័ត៌មានអន្តរជាតិសំខាន់ៗថ្ងៃទី២២ ខែមីនា ឆ្នាំ២០២១ ផ្សាយឡើងវិញ (មានវីដេអូ)
-
កូវីដ១៩៖ ថៃផ្តើមសាកល្បងចាក់វ៉ាក់សាំងផលិតដោយខ្លួនឯង លើមនុស្សហើយ
ប្រទេសថៃ កាលពីថ្ងៃចន្ទ ទី២២ មីនា ម្សិលមិញ បានចាប់ផ្តើមសាកល្បងចាក់វ៉ាក់សាំងបង្ការជំងឺកូវីដ១៩ ដែលខ្លួនផលិតក្នុងប្រទេសហើយ ដោយគ្រោងនឹងចាប់ផ្តើមចុះឈ្មោះនៅឆ្នាំក្រោយ។ វ៉ាក់សាំងនេះត្រូវបានផលិតដោយអង្គការ GPO ដោយប្រើប្រាស់បច្ចេកវិទ្យាពងមាន់ ឬ egg-based technology ។ រដ្ឋមន្ត្រីសុខាភិបាលថៃ Anutin Charnvirakul បាននិយាយថា ការផលិតវ៉ាក់សាំងដោយខ្លួនឯនេះគឺជាជំហានសំខាន់មួយ សម្រាប់សុខភាពសាធារណៈរបស់ប្រទេសជាតិ ខណៈដែលវានឹងធ្វើឲ្យថៃមានភាពច្បាស់ការខ្លួនឯង ហើយមិនចាំបាច់ពឹងផ្អែកលើវ៉ាក់សាំង ពីប្រទេសក្រៅ។ លោករដ្ឋមន្ត្រីថា ពេលជោគជ័យនៃការសាកល្បង តាមគម្រោង វ៉ាក់សាំងនេះនឹងផលិតចន្លោះពី២៥ទៅ៣០លានដូស ក្នុងមួយឆ្នាំ គ្រោងនឹងចាប់ផ្តើមឆ្នាំ២០២២។ លោកបញ្ជាក់ដែរថា បច្ចេកវិទ្យាផ្អែកលើពងមាន់នេះក៏ធ្លាប់បានប្រើប្រាស់ សម្រាប់វ៉ាក់សាំងផ្តាសាយនានាផងដែរ ដោយវាក៏អាចផលិតវ៉ាក់សាំងបង្ការជំងឺកូវីដ១៩ដែរ។ សម្រាប់អ្នកស្ម័គ្រចិត្តចាក់វ៉ាក់សាំងនេះ អាចនឹងមានឲ្យបាន៤៦០នាក់សរុប ក្នុងនោះ ២១០នាក់ មានអាយុចន្លោះពី១៨ទៅ៥៩ឆ្នាំ។ សូមបញ្ជាក់ថា ថៃ បច្ចុប្បន្ន កំពុងចាក់វ៉ាក់សាំងបង្ការជំងឺកូវីដ១៩ លើប្រជាពលរដ្ឋ ចំនួន២ប្រភេទ មួយមកពីអង់គ្លេសនិងមួយទៀតមកពីចិន៕ ប្រភពពីបាងកកប៉ុស្តិ៍
-
លោក ដូណាល់ ត្រាំ គ្រោងវិលត្រឡប់ទៅកាន់បណ្តាញសង្គមវិញជាមួយនឹងទំរង់រួមមួយ (Platform) ផ្ទាល់ខ្លួនរបស់លោក
អាមេរិក៖ អតីតប្រធានាធិបតីអាមេរិកលោក ដូណាល់ ត្រាំ ដែលត្រូវបានបិទគណនីយពីបណ្តាញសង្គម ធ្វីតធើ (Twitter), ហ្វេសបុក (Facebook) និងប្រព័ន្ធផ្សព្វផ្សាយសង្គមដទៃទៀត បន្ទាប់ពីក្រុមអ្នកគាំទ្រលោកចូលវាយប្រហារលើវិមានសភាកាលពីថ្ងៃទី៦ ខែមករាកន្លងមកនោះ បានបង្ហើបពីផែនការបើកដំណើរការទំរង់រួមមួយថ្មី (Platform) ផ្ទាល់ខ្លួនរបស់លោកក្នុងរយៈពេល២ទៅ៣ខែទៀតនេះ នេះបើតាមទីប្រឹក្សាជាន់ខ្ពស់ម្នាក់របស់លោក ត្រាំ ថ្លែងប្រាប់សារព័ត៌មាន ហ្វុក ញ៊ូ (Fox News) នៅថ្ងៃអាទិត្យសប្តាហ៍មុននេះ ។ អ្នកនាំពាក្យយុទ្ធនាការឃោសនាបោះឆ្នោតសម្រាប់ឆ្នាំ២០២០របស់លោក ត្រាំ គឺលោក ចេសសុន មៀលឡឺ បាននិយាយប្រាប់ប្រព័ន្ធផ្សព្វផ្សាយថា លោក ដូណាល់ ត្រាំ នឹងចូលប្រឡូកក្នុងប្រព័ន្ធផ្សព្វផ្សាយសង្គមសាជាថ្មីម្តងទៀតជាមួយទំរង់រួមមួយថ្មី (Platform) ផ្ទាល់ខ្លួនរបស់លោក ដែលនឹងកំណត់ការប្រកួតប្រជែងឡើងវិញ ។ លោកបន្ថែមទៀតថា ទំរង់រួមមួយថ្មី (Platform) នេះបាននិងកំពុងដំណើរការកាន់តែធំ ហើយអ្នករាល់គ្នាត្រូវការលោក… លោកនឹងនាំមនុស្សរាប់លាន និងរាប់លាននាក់ ហើយច្រើនជាងរាប់លាននាក់មកកាន់ទំរង់រួមមួយ (Platform) ថ្មីនេះ ។ យ៉ាងណាមិញ លោក មៀលឡឺ មិនបានផ្តល់ព័ត៌មានលំអិតបន្ថែមទៀត ជុំវិញការបង្កើតវេទិការថ្មីនេះនោះទេ ហើយភ្លាមៗក៏គ្មានការអត្ថាធិប្បាយណាមួយពីមន្រ្តីអង្គភាពរបស់លោក…
-
ប្រមុខការពារជាតិអាមេរិក និងប្រធានាធិបតីអាហ្វហ្គានីស្ថានជួបពិភាក្សាគ្នាក្នុងរដ្ឋធានីកាប៊ុល
អាហ្វហ្គានីស្ថាន៖ ប្រធានាធិបតីអាហ្វហ្គានីស្ថានលោក អាច្រាស់ ហ្គានី (Ashraf Ghani) បានជួបពិភាក្សាជាមួយភ្ញៀវ គឺរដ្ឋមន្រ្តីការពារជាតិអាមេរិកលោក ល្លយ អូស្ទីន (Lloyd Austin) ក្នុងគោលបំណងធ្វើការផ្លាស់ប្តូរទស្សនៈគ្នាទៅវិញទៅមកស្តីពីកិច្ចចរចាសន្តិភាពជាមួយក្រុមឧទ្ទាមតាលីបង់ ។ បើតាមសេចក្តីថ្លែងការណ៍របស់ការិយាល័យប្រធានាធិបតីអាហ្វាហ្គានីស្ថាន អំឡុងកិច្ចប្រជុំនោះ ភាគីទាំងពីរបានសម្តែងការព្រួយបារម្ភ ជុំវិញអំពើហិង្សាដែលកំពុងបន្តកើតមានក្នុងប្រទេសអាហ្វហ្គានីស្ថាន និងបានសង្កត់ធ្ងន់ថា ដំណោះស្រាយជាមូលដ្ឋានចំពោះស្ថានភាពបច្ចុប្បន្ននៅអាហ្វហ្គានីស្ថាន គឺការទទួលបាននូវសន្តិភាព យុត្តិធម៌ និងស្ថិតស្ថេរ ។ លោក អូស្ទីន ដែលបានមកដល់រដ្ឋធានីកាប៊ុល ប្រទេសអាហ្វហ្គានីស្ថាន នៅព្រឹកថ្ងៃអាទិត្យសប្តាហ៍មុន (ម៉ោងក្នុងតំបន់) ត្រូវបានប្រព័ន្ធផ្សព្វផ្សាយដកស្រង់សម្តីនៅក្នុងសេចក្តីថ្លែងការណ៍មួយចុះផ្សាយថា សហរដ្ឋអាមេរិកបានត្រៀមខ្លួនរួចជាស្រេច ដើម្បីសហការជាមួយអាហ្វហ្គានីស្ថាន ក្នុងការទទួលបានសន្តិភាព និងស្ថិរភាពនៅក្នុងប្រទេសនេះ ៕ ប្រភព៖ ស៊ីនហួរ
-
កូរ៉េខាងជើងបិទស្ថានទូតខ្លួននៅម៉ាឡេស៊ីហើយ
កូរ៉េខាងជើងបានបិទស្ថានទូតរបស់ខ្លួនស្ថិតក្នុងទីក្រុងគូឡាឡាំពួរ ប្រទេសម៉ាឡេស៊ីហើយ រីឯមន្ត្រីទូតរបស់ខ្លួនទាំងអស់ក៏បានចាកចេញពី ប្រទេសម៉ាឡេស៊ីដែរ កាលពីថ្ងៃអាទិត្យ ម្សិលមិញ ពោលគឺបន្ទាប់ពីកូរ៉េខាងជើងបានប្រកាសកាត់ផ្ដាច់ទំនាក់ទំនងការទូត ជាមួយម៉ាឡេស៊ី ជុំវិញការធ្វើបត្យាប័នពលរដ្ឋកូរ៉េខាងជើងម្នាក់ ទៅកាន់សហរដ្ឋអាមេរិក។ កូរ៉េខាងជើង និងម៉ាឡេស៊ីបានភ្ជាប់ទំនាក់ទំនងការទូតនឹងគ្នា ចាប់តាំងពីឆ្នាំ១៩៧៣មកម្ល៉េះ ប៉ុន្តែទំនាក់ទំនងនេះត្រូវបានកាត់ផ្ដាច់ កាលពីថ្ងៃសុក្រសប្ដាហ៍មុន ពោលគឺបន្ទាប់ពីមានរឿងរ៉ាវជនជាតិកូរ៉េខាងជើងម្នាក់ឈ្មោះ Mun Chol Myong ត្រូវបានបញ្ជូនទៅកាន់មន្ទីរឃុំឃាំង នៅក្នុងសហរដ្ឋអាមេរិកហើយ កាលពីថ្ងៃសៅរ៍ចុងសប្ដាហ៍ បន្ទាប់ពីរូបគេត្រូវបានម៉ាឡេស៊ីធ្វើបត្យាប័ន។ លោក Mun Chol Myong ដែលបានរស់នៅក្នុងប្រទេសម៉ាឡេស៊ីជាង ១០ឆ្នាំ កំពុងជាប់ឃុំក្នុងមន្ទីរឃុំឃាំងរបស់ FBI ក្នុងរដ្ឋធានីវ៉ាស៊ីនតោនឌីស៊ី ដោយរូបលោកកំពុងប្រឈមមុខ នឹងបទចោទប្រកាន់លើការលាងលុយកខ្វក់៕
-
វៀតណាមផ្តល់កាដូរអគាររដ្ឋសភាថ្មី ជូនឡាវ តម្លៃ១១១លានដុល្លារអាមេរិក
ក្រសួងសំណង់ប្រទេសវៀតណាមបានប្រគល់អគាររដ្ឋសភាថ្មី ជូនប្រទេសឡាវជាផ្លូវការ កាលពីចុងសប្តាហ៍កន្លងទៅ។ សាងសង់ក្នុងតម្លៃ១១១លានដុល្លារអាមេរិក អគារនេះនឹងបំរើដល់កិច្ចការងាររបស់សភាផង និងថែមទាំងជាមជ្ឈមណ្ឌលស្រាវជ្រាវវប្បធម៌ផង នេះបើតាមទីភ្នាក់ងារសារព័ត៌មានវៀតណាម vnexpress ចេញផ្សាយ កាលពីថ្ងៃទី២១ មីនា ម្សិលមិញ។ ក្រសួងសំណង់វៀតណាមបានឲ្យដឹងថា ក្រសួងនិងភាគីពាក់ព័ន្ធបានសម្រេចកិច្ចការងារសាងសង់អគារថ្មីនេះទាល់តែបាន បើទោះបីជាក្នុងពេលរាតត្បាតនៃជំងឺកូវីដ១៩ក៏ដោយ ដែលការរាតត្បាតនេះប៉ះពាល់ដល់ការផ្គត់ផ្គង់សម្ភារៈ និងបុគ្គលិក កម្មករ នាពេលកន្លងមក។ អគារថ្មីនេះត្រូវដឹងថា អាចត្រៀមសម្រាប់ការរៀបចំប្រជុំលើកដំបូង សម័យប្រជុំសភាជាតិឡាវលើកទី៩ ចាប់ពីថ្ងៃទី២២ មីនា ដល់ ២៦ មីនា ២០២១។ សំណង់អគារថ្មីនេះអាចផ្ទុកមនុស្សពី៨០០ទៅ១០០០ពាន់នាក់ មានកម្ពស់៥ជាន់ បានចាប់ផ្តើមសាងសង់កាលពីឆ្នាំ២០១៧៕
-
មេដឹកនាំអាមេរិក និងសហភាពអឺរ៉ុបជំរុញអោយតួកគីពិចារណាឡើងវិញ ពាក់ព័ន្ធនឹងការដកខ្លួនចេញពីសន្ធិសញ្ញាប្រយុទ្ធប្រឆាំងនឹងអំពើហិង្សាលើស្ត្រី
អាមេរិក៖ មេដឹកនាំអាមរិក និងសហភាពអឺរ៉ុបបានបង្ហាញការព្រួយបារម្ភពាក់ព័ន្ធនឹងការសម្រេចដកខ្លួនរបស់តួកគី ចេញពីកិច្ចព្រមព្រៀងអន្តរជាតិ ដែលត្រូវបានបង្កើតឡើងដើម្បីការពារស្រ្តីពីអំពើហិង្សា ហើយថែមទាំងបានជំរុញអោយលោកប្រធានាធិបតីតួកគី តាយយីប អឺដូហ្គាន់ ពិចារណាឡើងវិញ ។ នៅថ្ងៃអាទិត្យសប្តាហ៍មុននេះ ប្រធានាធិបតីអាមេរិកលោក ចូ បៃដិន បាននិយាយថា លោកមានការខកចិត្តយ៉ាងខ្លាំង ចំពោះការដែលតួកគីបានសម្រេចដកខ្លួនចេញពីកិច្ចព្រមព្រៀងអ៊ីស្តង់ប៊ុល ដែលជាសន្ធិសញ្ញាដំបូងបង្អស់របស់ពិភពលោក ក្នុងការការពារ និងប្រយុទ្ធប្រឆាំងនឹងអំពើហិង្សាលើស្ត្រី ។ សូមជម្រាបថា ការសម្រេចចិត្តដកខ្លួនរបស់តួកគីនេះ ត្រូវបានប្រកាសដោយរដ្ឋាភិបាលរបស់លោកប្រធានាធិបតី អឺដូហ្គាន់ កាលពីថ្ងៃសៅរ៍សប្តាហ៍មុននេះ ដែលជាជ័យជំនះចុងក្រោយសម្រាប់អ្នកអភិរក្សនៅក្នុងគណបក្សជាតិនិយមរបស់លោក និងសម្ព័ន្ធមិត្តរបស់ខ្លួន ដែលបានអះអាងថា សន្ធិសញ្ញានេះធ្វើឲ្យអន្តរាយដល់គ្រួសារ ។ ប៉ុន្តែសកម្មភាពនេះបានធ្វើឲ្យមានកំហឹងផ្ទុះឡើងទាំងនៅក្នុងស្រុក និងអន្តរជាតិ ខណៈប្រជាជនរាប់ពាន់នាក់នៅតួកគីបានតវ៉ាប្រឆាំងនឹងសេចក្តីសម្រេចនេះ ៕ ប្រភព៖ Reuters
-
ជនជាតិកូរ៉េខាងជើងម្នាក់ត្រូវបានបញ្ជូនទៅកាន់មន្ទីរឃុំឃាំងនៅសហរដ្ឋអាមេរិកហើយ ក្រោយរូបគេត្រូវបានម៉ាឡេស៊ីធ្វើបត្យាប័ន
អាមេរិក៖ ជនជាតិកូរ៉េខាងជើងម្នាក់ ត្រូវបានបញ្ជូនទៅកាន់មន្ទីរឃុំឃាំង នៅក្នុងសហរដ្ឋអាមេរិកហើយ កាលពីថ្ងៃសៅរ៍ចុងសប្ដាហ៍កន្លងទៅនេះ (ម៉ោងក្នុងតំបន់) ក្រោយរូបគេត្រូវបានម៉ាឡេស៊ីធ្វើបត្យាប័ន ។ លោក Mun Chol Myong កំពុងជាប់ឃុំក្នុងមន្ទីរឃុំឃាំងរបស់ FBI ក្នុងរដ្ឋធានីវ៉ាស៊ីនតោនឌីស៊ី ដោយរូបលោកកំពុងប្រឈមមុខនឹងបទ ចោទលាងលុយកខ្វក់ ហើយបានក្លាយជាជនជាតិកូរ៉េខាងជើងដំបូងគេបំផុត ដែលត្រូវបានធ្វើបត្យាប័ន ទៅកាន់សហរដ្ឋអាមេរិក ដើម្បីប្រឈមមុខនឹងសវនាការ ។ ការធ្វើបត្យាប័នបុរសកូរ៉េខាងជើងខាងលើនេះទៅកាន់សហរដ្ឋអាមេរិក បានធ្វើឱ្យទំនាក់ទំនងការទូតរវាងទីក្រុងព្យុងយ៉ាង និងទីក្រុងគូឡាឡាំពួរត្រូវបានកាត់ផ្ដាច់ ដោយភាគីទាំងពីរសុទ្ធតែបានប្រកាសពីការបិទស្ថានទូតប្រទេសរៀងៗខ្លួន ។ សូមជម្រាបថា សហរដ្ឋអាមេរិកបានចេញដីកាចាប់ខ្លួនលោក Mun Chol Myong កាលពីខែឧសភា ឆ្នាំ២០១៩ ពីបទលាងលុយកខ្វក់ និងបទសមគំនិតក្នុងបទល្មើសជាច្រើនទៀត ។ លោក Mun មានអាយុប្រហែលជា ៥០ឆ្នាំ បានរស់នៅក្នុងប្រទេសម៉ាឡេស៊ីអស់រយៈពេលជាង ១០ឆ្នាំ និងត្រូវបានឃាត់ខ្លួនកាលពីខែឧសភា ឆ្នាំ២០១៩ បន្ទាប់ពីមានសំណើធ្វើបត្យាប័នពីសហរដ្ឋអាមេរិក ៕ ប្រភព៖ AP