-
សហរដ្ឋអាមេរិក និង កូរ៉េខាងត្បូងឈានដល់កិច្ចព្រមព្រៀងទ្វេភាគី ស្តីពីការចែករំលែកការចំណាយសម្រាប់កងទ័ព
អាមេរិក៖ ក្រសួងការបរទេសអាមេរិកលើកឡើងថា សហរដ្ឋអាមេរិក និងកូរ៉េខាងត្បូងបានឈានកិច្ចព្រមព្រៀង ថ្មីស្តីពីការ ចែករំលែកការចំណាយលើវត្តមានកងទ័ពអាមេរិក ដែលមានគោលបំណងធ្វើជាកម្លាំងរុញច្រានប្រឆាំងនឹងការគំរាមកំហែងនៃការឈ្លានពានពីកូរ៉េខាងជើង ។ អ្នកនាំពាក្យក្រសួងការបរទេសអាមេរិកបានបញ្ជាក់ថា យើងមានសេចក្តីរីករាយដែលអ្នកចរចាអាមេរិក និងកូរ៉េខាងត្បូងបានឈានដល់ដល់ការឯកភាពគ្នាលើខ្លឹមសារដែលបានស្នើឡើងស្តីពីកិច្ចព្រមព្រៀងវិធានការពិសេស (SMA) ដែលនឹងពង្រឹងសម្ព័ន្ធភាព និងការចែករំលែកការការពាររួមគ្នារបស់ពួកយើង ។ កិច្ចព្រមព្រៀងនេះដែរ ក៏រួមបញ្ចូលទាំង “ការបង្កើនការចរចា” នៅក្នុងការចែករំលែកចំណាយរបស់រដ្ឋាភិបាលទីក្រុងសេអ៊ូលផងដែរ ប៉ុន្តែមិនបានផ្តល់ព័ត៌មានលម្អិតទេ ។ សូមបញ្ជាក់ថា បច្ចុប្បន្ននេះ សហរដ្ឋអាមេរិកបានរក្សាទុកកងទ័ពប្រហែល ២ម៉ឺន៨ពាន់នាក់នៅកូរ៉េខាងត្បូង ហើយបើតាមកាសែត The Wall Street Journal នោះ កិច្ចព្រមព្រៀងទ្វេភាគីខាងលើនេះ នឹងមានរយៈពេលរហូតដល់ឆ្នាំ២០២៥ ៕ ប្រភព៖ ស៊ីនហួរ
-
និយ័តករសហភាពអឺរ៉ុបជំរុញអោយមានការប្រុងប្រយ័ត្នក្នុងការប្រើប្រាស់វ៉ាក់សាំង Sputnik V របស់រុស្ស៊ី
អឺរ៉ុប៖ មន្រ្តីជាន់ខ្ពស់នៃទីភ្នាក់ងារឱសថអឺរ៉ុប (EMA) នៅថ្ងៃអាទិត្យម្សិលមិញ បានជំរុញអោយប្រទេសសមាជិកសហភាពអឺរ៉ុប បដិសេដការអនុម័តអោយប្រើប្រាស់ថ្នាក់ជាតិ នូវវ៉ាក់សាំងបង្ការជំងឺ Covid-19 របស់ប្រទេសរុស្ស៊ី មានឈ្មោះថា Sputnik V ខណៈទីភ្នាក់ងារនេះបាននឹងកំពុងពិនិត្យមើលពីសុវត្ថិភាព និងប្រសិទ្ធភាពរបស់វា ។ នាយកទីភ្នាក់ងារឱសថអឺរ៉ុប (EMA) លោកស្រី គ្រីស្តា វីថាំមើ (Christa Wirthumer) បានថ្លែងប្រាប់ក្នុងបទសម្ភាសន៍មួយជាមួយសារព័ត៌មានអូស្រ្តាលី ORF ថា យើងត្រូវការឯកសារដែលយើងអាចពិនិត្យបាន… យើងក៏មិនមានទិន្នន័យដែរ… អំពីមនុស្សដែលបានទទួលការចាក់វ៉ាក់សាំង… វាមិនទាន់ត្រូវបានគេដឹងនៅឡើយទេ ហេតុដូច្នេះហើយខ្ញុំសូមណែនាំជាបន្ទាន់ ដើម្បីប្រឆាំងនឹងការផ្តល់ការអនុញ្ញាតអោយប្រើប្រាស់ក្នុងករណីបន្ទាន់ថ្នាក់ជាតិ ។ យ៉ាងណាមិញ វ៉ាក់សាំង Covid-19 របស់រុស្ស៊ី Sputnik V ត្រូវបានអនុម័តអោយប្រើប្រាស់ ឬក៏កំពុងត្រូវបានវាយតម្លៃសម្រាប់ការអនុម័តនៅក្នុងរដ្ឋជាសមាជិកសហភាពអឺរ៉ុបចំនួន០៣ ក្នុងនោះរួមមានហុងគ្រី ស្លូវ៉ាគៀ និងសាធារណៈរដ្ឋឆេក ដោយក្រុមមន្រ្តីអឺរ៉ុបបាននិយាយថា ទីក្រុងប្រ៊ុចហ្សែលអាចនឹងចាប់ផ្តើមការចរចាជាមួយក្រុមហ៊ុនផលិតវ៉ាក់សាំងរុស្ស៊ី ប្រសិនបើមានសមាជិកយ៉ាងហោចណាស់ចំនួន០៤ដាក់ពាក្យស្នើសុំ ៕ ប្រភព៖ Reuters
-
សហជីពធំៗរបស់មីយ៉ាន់ម៉ាអំពាវនាវដល់សមាជិកទាំងអស់ចូលរួមយុទ្ធនាការណ៍ប្រឆាំងនឹងរដ្ឋប្រហារ ខណៈសមាជិកសភាម្នាក់របស់លោកស្រី ស៊ូជី ស្លាប់ក្នុងទីឃុំខ្លួន
មីយ៉ាន់ម៉ា៖ សហជីពពាណិជ្ជកម្មធំៗរបស់ប្រទេសមីយ៉ាន់ម៉ា បានអំពាវនាវដល់សមាជិកទាំងអស់ឲ្យបិទទ្វារសេដ្ឋកិច្ចចាប់ពីថ្ងៃទី៨ ខែមីនានេះ ដើម្បីចូលរួមយុទ្ធ នាការណ៍ប្រឆាំងនឹងរដ្ឋប្រហារកាលពីខែមុន ដើម្បីបង្កើនសម្ពាធលើយោធាមីយ៉ាន់ម៉ាដែលបានប្រើអាវុធបាញ់ និងបានកាន់កាប់មន្ទីរពេទ្យនៅក្នុងទីក្រុងសំខាន់ យ៉ាំងហ្គោន មួយថ្ងៃបន្ទាប់ពីការតវ៉ាដ៏ធំសម្បើម ។ សារព័ត៌មានក្នុងស្រុកបានរាយការណ៍ថា សាក្សីបានរាយការណ៍ពីសំឡេងនៃការផ្ទះអាវុធ ឬគ្រាប់បែបនៅតាមខណ្ឌជាច្រើនក្នុងរដ្ឋធានីពាណិជ្ជកម្ម បន្ទាប់ពីឈានចូលយប់ជ្រៅ ខណៈទាហានបានឈានចូលកាន់កាប់មន្ទីរពេទ្យ និងសាកលវិទ្យាល័យនានា។ តែគេមិនដឹងថា មានមនុស្សស្លាប់ ឬរបួសទេ ។ ការបង្ហាញកម្លាំងពង្រាយបានកើតមានឡើង បន្ទាប់ពីការតវ៉ាទូទាំងប្រទេសទ្រង់ទ្រាយធំបានកើតមាន ចាប់តាំងពីរដ្ឋប្រហារថ្ងៃទី១ ខែកុម្ភៈ ហើយសម្ព័ន្ធភាពនៃសហជីពចំនួន៩បាននិយាយថា ពួកគេមានផែនការបន្តបិទទ្វារសេដ្ឋកិច្ចទាំងស្រុង ។ មន្ត្រីម្នាក់ពីគណបក្សរបស់លោកស្រី អោង សាន ស៊ូជី បានស្លាប់កណ្តាលយប់នៅក្នុងការឃុំខ្លួនរបស់ប៉ូលិស ។ មន្ត្រីរបស់គណបក្សសម្ព័ន្ធជាតិដើម្បីប្រជាធិបតេយ្យ (NLD) លោក ឃីន មោង ឡេត អាយុ៥៨ឆ្នាំជាសមាជិកសភាមូស្លីមម្នាក់ក្នុងចំណោមពីរនាក់ត្រូវបានជាប់ឆ្នោតកាលពីឆ្នាំ២០២០ បានស្លាប់នៅយប់ថ្ងៃសៅរ៍ ឈានចូលថ្ងៃអាទិត្យកន្លងទៅនេះ ៕ ប្រភព៖ AP
-
អូស្ត្រាលីប្រកាសព្យួរកម្មវិធីកិច្ចសហប្រតិបត្តិការលើវិស័យការពារជាតិជាមួយមីយ៉ាន់ម៉ា
អូស្រ្តាលី៖ រដ្ឋមន្ត្រីការបរទេសអូស្ត្រាលី លោកស្រី មេរីស ផេន (Marise Payne) និយាយថា ប្រទេសរបស់លោកស្រីបានសម្រេចផ្អាកកម្មវិធី នៃកិច្ចសហប្រតិបត្តិការលើវិស័យការពារជាតិជាមួយមីយ៉ាន់ម៉ា ដើម្បីឆ្លើយតបទៅនឹងការបង្រ្កាបដ៏បង្ហូរឈាមរបស់របបដឹកនាំយោធា ទៅលើក្រុមបាតុករដ៏ច្រើនសម្បើមដែលប្រឆាំងនឹងរដ្ឋប្រហារកាលពីខែមុន ។ ប្រមុខការទូតអូស្ត្រាលីរូបនេះ បានបញ្ជាក់នៅក្នុងសេចក្ដីថ្លែងការណ៍មួយនៅថ្ងៃ អាទិត្យម្សិលមិញថា អូស្រ្តាលីនឹងបង្វែរជាបន្ទាន់នូវជំនួយមនុស្សធម៌ចាំបាច់នានា ទៅកាន់ជនជាតិដើមភាគតិចរ៉ូហ៊ីងយ៉ា និងជនជាតិភាគតិចដទៃទៀត ។ លោកស្រី មេរីស ផេន បានអះអាងថា យើងនឹងផ្ដល់អាទិភាពទៅលើជំនួយមនុស្សធម៌ និងធានាឱ្យបានថា ជំនួយមនុស្សធម៌របស់យើងនឹងទៅដៃអង្គការក្រៅរដ្ឋាភិបាល ពោលគឺមិនមែនតាមរយៈរដ្ឋាភិបាល ឬ អង្គភាពដែលជាសេនាធិនាការរបស់យោធាមីយ៉ាន់ម៉ានោះទេ ។ បច្ចុប្បន្នក្រុមបាតុករនៅតែបន្តធ្វើបាតុកម្មតវ៉ា ដើម្បីទាមទារឱ្យយោធាចុះចេញពីអំណាច និងដោះលែងលោកស្រី អោង សាន ស៊ូ ជី ព្រមទាំងអ្នកជាប់ឃុំដទៃឱ្យមានសេរីភាពឡើងវិញ ក្រោយអ្នកទាំងនេះត្រូវបានចាប់ឃុំខ្លួននៅក្នុងព្រឹត្តិការណ៍ថ្ងៃទី០១ ខែកុម្ភៈ ដែលត្រូវបានអន្តរជាតិចាត់ទុកថា ជារដ្ឋប្រហារយោធា ៕ ប្រភព៖ AP
-
អ្នកឆ្លង COVID-19 នៅទូទាំងពិភពលោកកើនឡើង១១៧លាន៤៤ម៉ឺននាក់ ក្នុងនោះស្លាប់២លាន៦០ម៉ឺននាក់ និងជាសះស្បើយ៩២លាន៩៥ម៉ឺននាក់
បរទេស៖ ជំងឺរាតត្បាតដ៏កាចសាហាវ COVID-19 បានចម្លងទៅមនុស្សសរុបចំនួន១១៧លាន៤៤ម៉ឺន៥ពាន់៨៦៨ករណី ក្នុងនោះមានអ្នកជម្ងឺសរុបចំនួន២លាន៦០ម៉ឺន៥ពាន់២៨៩នាក់ស្លាប់ និង ជាសះស្បើយឡើងវិញសរុបចំនួន៩២លាន៩៥ម៉ឺន៤ពាន់៦៦១នាក់នៅទូទាំងសកលលោក នេះបើតាមគេហទំព័រអន្តរជាតិ Worldometers នៅថ្ងៃទី០៨ ខែមិនា ឆ្នាំ២០២១ ។ សហរដ្ឋអាមេរិកនៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងចំនួន២៩លាន៦៩ម៉ឺន៦ពាន់២៥០នាក់ ស្លាប់ចំនួន៥៣ម៉ឺន៧ពាន់៨៣៨នាក់ និងជាសះស្បើយចំនួន២០លាន៣៣ម៉ឺន៦ពាន់៦៥៦នាក់ ។ ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺ COVID-19 គឺប្រទេសឥណ្ឌា ដោយមានអ្នកឆ្លងចំនួន១១លាន២២ម៉ឺន៩ពាន់២៧១នាក់ ស្លាប់ចំនួន១៥ម៉ឺន៧ពាន់៨៩០នាក់ និងជាសះស្បើយ១០លាន៨៨ម៉ឺន៨៨០នាក់ ។ ប្រទេសឈរនៅចំណាត់ថ្នាក់ទី៣ គឺប្រទេសប្រេស៊ីល ដោយមានអ្នកឆ្លងចំនួន ១១លាន១ម៉ឺន៩ពាន់៣៤៤នាក់ ស្លាប់២៦ម៉ឺន៥ពាន់៥០០នាក់ និងជាសះស្បើយ៩លាន៧៥ម៉ឺន៧ពាន់១៧៨នាក់ ៕ ប្រភព៖ worldometers
-
មើលសមិទ្ធផលធំធេងរបស់ប្រទេសចិនចំពោះប្រជាជនចិននិងប្រជាជនទូទាំងពិភពលោកតាមរយៈរបាយការណ៍ការងាររដ្ឋាភិបាលចិនឆ្នាំ២០២១
ក្រោយពីបានតាមដានយ៉ាងយកចិត្តទុកដាក់ទាក់ទងនឹងរបាយការណ៍ការងាររបស់រដ្ឋាភិបាលចិនដែលបានថ្លែងក្នុងកិច្ចប្រជុំលើកទី៤នៃមហាសន្និបាតសភាតំណាងប្រជាជនទូទាំងប្រទេសចិន នីតិកាលទី១៣ នាថ្ងៃទី៥ខែមីនាឆ្នាំ២០២១ ដោយលោក លី ខឺឈាង នាយករដ្ឋមន្រ្តីនៃសាធារណរដ្ឋប្រជាមានិតចិន ខ្ញុំមានការចាប់អារម្មណ៍លើចំណុចសំខាន់ចំនួន២គឺ៖ ១- ការងារបង្ការនិងគ្រប់គ្រងការរីករាលដាលនៃជំងឺCOVID-19ក្នុងដំណើរប្រយុទ្ធប្រឆាំងនឹងការរីករាលដាលនៃជំងឺCOVID-19ដ៏លំបាកលំបិន ជានិច្ចកាលមជ្ឈិមបក្សកុម្មុយនិស្តចិនតែងបានប្រកាន់ខ្ជាប់នូវការតម្កល់ទុកប្រជាជនជាអាទិភាព តម្កល់ទុកសុវត្ថិភាពអាយុជីវិតរបស់ប្រជាជនជាអាទិភាព លោក ស៊ី ជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន បានដឹកនាំនិងចាត់ចែងការងារដោយផ្ទាល់ ព្រមទាំងទទួលបានការគាំទ្រពីសំណាក់ភាគីនានាដោយពង្រឹងនិងពង្រីកសមិទ្ធផលនៃការងារបង្ការនិងគ្រប់គ្រងជំងឺឆ្លង។ដើម្បីឆ្លើយតបទៅនឹងឧប្បត្តិហេតុនៃការរីករាលដាលនៃមេរោគរាតត្បាតជាសកលនេះ ប្រទេសចិនបានដាក់ចេញនូវវិធានការណ៍យ៉ាងម៉ឺងម៉ាត់និងទាន់ពេលវេលាឆ្លើយតបបានយ៉ាងត្រឹមត្រូវតាមគោលការណ៍វិទ្យាសាស្រ្តដែលមានអង្គការសុខភាពពិភពលោកជាតំណាង។ ទាំងបក្សកុម្មុយនិស្តចិន ទាំងរដ្ឋាភិបាលចិនសុទ្ធតែបានយកចិត្តទុកដាក់ខ្ពស់នូវសុខុមាលភាពរបស់ប្រជាជន ស្របពេលដែលប្រជាជនចិនបានផ្តល់នូវទំនុកចិត្តខ្ពស់ចំពោះវិធានការណ៍ទាំងនេះ។ នេះជាគំរូដ៏ល្អប្រសើរមួយដែលបណ្តាប្រទេសទាំងអស់បាននិងកំពុងឈ្វេងយល់និងចែករំលែកបន្ត។ ប្រទេសជាច្រើននៅលើពិភពលោកសុទ្ធតែបានកោតសរសើរនិងវាយតម្លៃខ្ពស់ចំពោះសកម្មភាពមនុស្សធម៌ជាក់ស្តែងរបស់ប្រទេសចិនក្នុងការចូលរួមជួយដល់ពិភពលោកលើការទប់ស្កាត់ការរីករាលដាលជាសកលនៃជំងឺCOVID-19។ លើសពីនេះ ក្រោយពេលដែលខ្លួនផលិតបានវ៉ាក់សាំង SINOPHARM VACCINE ប្រឆាំងនឹងជំងឺCOVID-19 ប្រទេសចិនដែលម្ខាងជួយដល់ប្រជាជនរបស់ខ្លួន ហើយម្ខាងទៀតបានចែករំលែកបរិមាណវ៉ាក់សាំងនេះដល់បណ្តាប្រជាជាតិនានានៅទូទាំងពិភពលោក ដើម្បីរួមគ្នាក្នុងកម្លាំងមហាគ្រួសារជាមួយគ្នា ដើម្បីពង្រឹងនិងពង្រីកនូវទស្សនវិស័យរួមនៃសហគមន៍ជោគវាសនារួម។ជាក់ស្តែង កាលពីថ្ងៃទី៧ ខែកុម្ភៈ ឆ្នាំ២០២១ ថ្លែងនៅក្នុងពិធីប្រគល់-ទទួលអំណោយដ៏ថ្លៃថ្លាវ៉ាក់សាំង SARS-CoV-2 (Sinopharm) ពីរដ្ឋាភិបាលនិងប្រជាជននៃសាធារណរដ្ឋប្រជាមានិតចិនជូនដល់រាជរដ្ឋាភិបាលនិងប្រជាជននៃព្រះរាជាណាចក្រកម្ពុជា សម្តេចអគ្គមហាសេនាបតីតតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា “រាជរដ្ឋាភិបាល និងប្រជាជនកម្ពុជា ពិតជាមានការដឹងគុណរដ្ឋាភិបាលនិងប្រជាជនចិន ដែលបានផ្តល់ជំនួយវ៉ាក់សាំងកូវីដ១៩ ចំនួន៦០ម៉ឺនដូសក្នុងចំណោម១លានដូសដល់កម្ពុជានាពេលនេះ”។ លើសពីនេះ ចិនបានដើរតួនាទីយ៉ាងសំខាន់នៅក្នុងការស្តារឡើងវិញនូវសេដ្ឋកិច្ចពិភពលោកដែលកំពុងទទួលរងនូវការប្រហារពីជំងឺCovid-19ដោយក្នុងពេលអញ្ជើញចូលរួមសន្និសីទកំពូលពិសេសនៃមេដឹកនាំប្រទេស G20 ស្តីពីការទប់ទល់នឹងជំងឺកូវីដ១៩ នៅរដ្ឋធានីប៉េកាំង នាយប់ថ្ងៃទី២៦…
-
សហរដ្ឋអាមេរិកចាក់វ៉ាក់សាំងបង្ការជំងឺ Covid-19 ចំនួន៨២,៦លានដូសជូនដល់ប្រជាជនខ្លួន
អាមេរិក៖ សហរដ្ឋអាមេរិកបានផ្តល់ការចាក់វ៉ាក់សាំង Covid-19 សរុបចំនួន៨២លាន៥៧ម៉ឺន២ពាន់៨៤៨ដូសដល់ប្រជាជនរបស់ខ្លួន គិតត្រឹមព្រឹកថ្ងៃព្រហស្បតិ៍នេះ (ម៉ោងក្នុងតំបន់) និងបានចែកចាយវ៉ាក់សាំងចំនួន១០៩លាន៩០ម៉ឺន៥ពាន់៥៣០ដូស នេះបើតាមមជ្ឈមណ្ឌលបង្ការ និងគ្រប់គ្រងជំងឺឆ្លងអាមេរិក (CDC) ។ បើតាមទីភ្នាក់ងារមជ្ឈមណ្ឌលខាងលើនេះ វ៉ាក់សាំងដែលចាក់ជូនប្រជាជននោះមានចំនួនពីរប្រភេទ ដែលផលិតឡើងដោយក្រុមហ៊ុន ម៉ូឌែណា និងក្រុមហ៊ុន ភីហ្វីហ្សឺ-បាយអូអិនធិច ។ ក្នុងនោះមានមនុស្ស៥៤លាន៣ម៉ឺន៥ពាន់៦៧០នាក់ហើយបានទទួលការចាក់វ៉ាក់សាំងដូសដំបូង ឬក៏ច្រើនជាងនេះ ខណៈមនុស្ស២៧លាន៧៩ម៉ឺន៥ពាន់៩៨០នាក់ផ្សេងទៀតបានទទួលការចាក់វ៉ាក់សាំងដូសទី២រួចរាល់ហើយ គិតត្រឹមថ្ងៃព្រហស្បតិ៍សប្តាហ៍នេះ ។ ទីភ្នាក់ងារមជ្ឈមណ្ឌលដដែលនេះបានអោយដឹងទៀតថា វ៉ាក់សាំងបង្ការជំងឺ Covid-19 សរុប៧លាន២៦ម៉ឺន២ពាន់១០៤ដូស ត្រូវបានចែកចាយទៅកាន់មណ្ឌលថែទាំសុខភាពរយៈពេលវែង ៕ ប្រភព៖ Reuters
-
អ៊ីតាលីរារាំងការដឹកជញ្ជូនវ៉ាក់សាំង Covid-19 របស់ក្រុមហ៊ុន AstraZeneca ទៅកាន់អូស្ត្រាលី
អ៊ីតាលី៖ រដ្ឋាភិបាលអ៊ីតាលីបានរារាំងការដឹកជញ្ជូនវ៉ាក់សាំង COVID-19 របស់ ក្រុមហ៊ុនផលិតឱសថអង់គ្លេស AstraZeneca ទៅកាន់ប្រទេសអូស្ត្រាលី ដែលវាជាការរារាំងការនាំចេញជាលើកដំបូងបង្អស់ ក្រោមគ្រោងការណ៍ត្រួតពិនិត្យវ៉ាក់សាំងរបស់សហភាពអឺរ៉ុប ។ បទបញ្ជារបស់អ៊ីតាលីដែលរារាំងការដឹកជញ្ជូនវ៉ាក់សាំង COVID-19 ជាង២៥ម៉ឺនដូស ត្រូវបានធ្វើឡើងដោយគណៈកម្មការសហភាពអឺរ៉ុប ដែលបានរិះគន់យ៉ាងខ្លាំង ចំពោះក្រុមហ៊ុនផលិតឱសថ AstraZeneca ជុំវិញការផ្គត់ផ្គង់វ៉ាក់សាំងមួយភាគតូច ដែលក្រុមហ៊ុននេះបានសន្យាថា នឹងផ្ដល់ដល់ប្លុកអឺរ៉ុប ។ បើតាមក្រសួងការបរទេសអ៊ីតាលីនោះ ការដឹកជញ្ជូនត្រូវបានបញ្ឈប់ដោយសារតែការខ្វះខាតវ៉ាក់សាំងនៅសហភាពអឺរ៉ុប និងនៅអ៊ីតាលី ព្រមទាំងការពន្យារពេលផ្គត់ផ្គង់វ៉ាក់សាំងពីក្រុមហ៊ុន AstraZeneca ទៅកាន់សហភាពអឺរ៉ុប និងអ៊ីតាលី ។ សូមជម្រាបថា គណៈកម្មាការសហភាពអឺរ៉ុប និងរដ្ឋាភិបាលអ៊ីតាលីបានទទួលរងការរិះគន់យ៉ាងខ្លាំងពីសំណាក់ប្រជាជនអ៉ីតាលីចំពោះភាពយឺតយ៉ាវ ក្នុងការចាប់ផ្ដើមចាក់វ៉ាក់សាំង ដែលវាត្រូវបានចាប់ផ្តើមតាំងពីខែធ្នូ ឆ្នាំ២០២០មកម៉្លេះ ប៉ុន្តែត្រូវបានពន្យារពេលដោយសារតែការខ្វះខាតនៃវ៉ាក់សាំងនេះ ៕ ប្រភព៖ AFP
-
ជប៉ុនអូសបន្លាយពេលដាក់ទីក្រុងតូក្យូ និងកោះចំនួន០៣ ក្នុងស្ថានភាពប្រកាសអាសន្នរហូតដល់ថ្ងៃទី២១ ខែមីនាខាងមុខ
ជប៉ុន៖ រដ្ឋាភិបាលជប៉ុនមានផែនការអូសបន្លាយពេលដាក់ទីក្រុងតូក្យូ និងប្រជុំកោះនៅជិតៗគ្នាចំនួន០៣ ក្នុងស្ថានភាពប្រកាសអាសន្នបន្ថែមទៀត ដើម្បីបង្កើនការប្រយុទ្ធប្រឆាំងនឹងជំងឺ Covid-19 រហូតដល់ថ្ងៃទី២១ ខែមីនាខាងមុខ ពោលគឺរយៈពេលពីរសប្តាហ៍យូរជាកាលវិភាគដំបូងឡើយ នេះបើតាមរដ្ឋមន្រ្តីសេដ្ឋកិច្ចជប៉ុន លោក យ៉ាស៊ូតុស៊ី នីស៊ីម៊ូរ៉ា ។ ស្ថិតក្រោមស្ថានភាពប្រកាសអាសន្ននេះ រដ្ឋាភិបាលបានស្នើដល់ភោជនីយដ្ឋាន និងក្លឹបរាត្រីបិទទ្វារនៅត្រឹមម៉ោង៨យប់ ហើយឈប់បម្រើសេវាគ្រឿងស្រវឹងនៅមួយម៉ោងក្រោយភ្លាមៗ ។ ប្រជាជនក៏ត្រូវបានស្នើអោយស្នាក់នៅក្នុងផ្ទះផងដែរ បន្ទាប់ពីម៉ោង៨យប់ លើកលែងពួកគេមានមូលហេតុសំខាន់ ដែលចាំបាច់ដាច់ខាតត្រូវតែចេញទៅក្រៅប៉ុណ្ណោះ ។ គួរបញ្ជាក់ថា ទីក្រុងតូក្យូ កោះឈីបា កោះកាណាហ្គាវ៉ា និងកោះសៃតាម៉ា ដែលទទួលរាប់រងរហូតដល់៣០ភាគរយ នៃចំនួនប្រជាជនសរុបរបស់ប្រទេសជប៉ុននោះ ដំបូងឡើយ គ្រោងនឹងបិទបញ្ចប់ការប្រកាសអាសន្ននៅត្រឹមថ្ងៃទី០៧ ខែមីនាខាងមុខនេះ ដោយសារតែករណីឆ្លងជំងឺ Covid-19 មានអត្រាធ្លាក់ចុះគ្រប់គ្រាន់តាមគោលដៅដែលបានកំណត់ ៕ ប្រភព៖ Reuters
-
ប្រទេសថៃមានផែនការចាក់វ៉ាក់សាំង Covid-19 ជូនដល់ប្រជាជនរបស់ខ្លួនចំនួន៤០លាននាក់នៅក្នុងឆ្នាំ២០២១នេះ
ថៃ៖ មន្រ្តីជាន់ខ្ពស់រដ្ឋាភិបាលថៃបាននិយាយថា ថៃមានផែនការចាក់វ៉ាក់សាំងបង្ការជំងឺ Covid-19 ដល់ប្រជាជនរបស់ខ្លួនប្រមាណ៤០លាននាក់នៅទូទាំងប្រទេសគិតត្រឹមឆ្នាំ២០២១នេះ ។ លោក សុផុន ម៉េកខាថន ដែលជាជំនួយការរដ្ឋមន្រ្តីសុខាភិបាលសាធារណៈថៃ លោក អានុធិន ឆាវីរ៉ាក់គុល បាននិយាយថា គំរោងខាងលើបាននឹងកំពុងគ្របដណ្តប់លើប្រជាជនប្រមាណ៤០លាននាក់ដែលគិតចាប់ពីអាយុ១៨ឆ្នាំ និងច្រើនជាងនេះ នឹងតម្រូវអោយចាក់វ៉ាក់សាំងបង្ការជំងឺ Covid-19 សរុបចំនួន៨០លានដូស ខណៈផែនការនេះដែរ ក៏នឹងគ្របដណ្តប់លើកម្មករចំណាកស្រុកផងដែរ ។ ហើយគម្រោងនេះដែរ នឹងតម្រូវអោយថៃបញ្ជាទិញវ៉ាក់សាំងបន្ថែមចំនួន១៧លានដូសទៀត ខណៈដែលប្រទេសនេះបានប្រកាសកាលពីមុន អំពីផែនការដើម្បីទិញវ៉ាក់សាំងសរុបចំនួន៦៣លានដូសនៅក្នុងឆ្នាំនេះ ក្នុងនោះមានចំនួន២លានដូសពីក្រុមហ៊ុនចិន ស៊ីណូវ៉ាក់ និង៦១លានដូសទៀតពីក្រុមហ៊ុនអង់គ្លេស អាស្រ្តាហ្សេណេកា ។ បើតាមជំនួយការរដ្ឋមន្រ្តីសុខាភិបាលសាធារណៈថៃ ផែនការនេះដែរ ក៏នឹងត្រូវទទួលការយល់ព្រមពីគណៈកម្មាធិការចាក់វ៉ាក់សាំងជាតិ ដែលលោកនាយករដ្ឋមន្រ្តី ប្រាយុទ្ធ ចាន់អូចា ជាប្រធានផងដែរ ៕ ប្រភព៖ ស៊ីនហួរ